Ka hre chiang ka tih rual khian ka duh leh duh loh pawh ngaihtuah nawn a ngai tlat. A chhan chu ka duh e ti chung hian ka duhzia tilangin kan runah ngei a lawi ka rem ti thei si lo. Kei chauh ka ni lo ka chhungte pawn an rem ti thei lo. Duh tak te nen a sawi fel thei loh chu rual awh chu a na thin ngei mai. Ka sum leh pai neih ten mite tluk zoin ka hmel te fai ving veng lo mahse ka fukekim leh ni khua hre ve thei a ka awm hi ka lungawi pui phian a. Mahse lungawi lohna khawvel ah hian, hei ngei hi a ni ka lungawilohna chu, ka duh ka nei thei lo.

Hringnun ka hman chhung chuan thil mak danglam tak ka dawna, ka chhungten an dawn ve vek hma loh chu ka ui pui tui lian thlir dauh dauh mai dawn a ni. A then lemin an duh duh danin an chinglet a, rinawm taka zui ngat ngat peihtu pawh a phu tawk (lo ti ringawt ila) duhsakna an lantir thei lo a ni si a.

Kei ve chuan TV a a lo lan changte, midangin hnungzui a engmah pawh sawi lo a a kawi a ngil a a zui dut dut ka hmuh chang phei hi chuan ka bulah lo awm tawh zawk ta che tih mai te hi ka duh thin. Ka bulah chuan awm thei ngat se zawng kan va induatin kan va inhmangaih dawn tak em! Mahni zun leh ek a thiar thei lo a nih pawhin ka hre thiam tho ang, min hmangaih reng dawn tih ka ring tlat si a.

Nei thei ngat ila chu aw…ni ka hman tan atangin a hming ka lam nghal anga, zan muthilh dawnah pawh ka lam mawlh mawlh ngei anga, ka hmuh phakloah thawm a neih chuan a hming ka lam leh ang a, a hmel, a pianhmang, a thiamna leh a finna ai chuan min zah derna avanga ka thu a bengkhawn thinna chuan ka ngaihtuahna a la tih a hriat thiam ve kur dawn avangin a hming ka lam rualin ka lam alo hawi anga, puipunna hmuna ka kal dawnin a duhlo chung chung thlahlel tak chung si in min zuilo turin ka tingei anga, ka hun awl neih ang angah a bulah awmin a luah te ka chul heuh heuh anga, a hnungthak te ka hiahsak ang a, ka lungawiloh leh a thina tihrim chang pawhin a zawldawhna chuan thiam chan ka duh vang reng pawh niloin thiam min chhantir ngei ang a. Hna ka thawh leh thawh lohah a buai lo anga, eitur tha ka pek leh pek lohah a vui dawn hek lo. Khawlai a han lenpui te ka va chak ve tak..mahse ka thei dawn lo a nih hi maw..

Ni e, ka sinusitis vang hian ka duh tak UI hi neih hi ka nei ve dawn lo a nih hi.

Hetah hian lo thlir rawh u.

www.i-mcf.org

Indianapolis hi USA Indiana State a awm a ni a, mipui nuai 8 chuang awmna a ni a, USA a khaw lian ber atanga teh in (mipui tam zat indawt in) 11-na vel a ni.

Zofate mi 8,000 (sang riat) vel an awm tawh a, USA ah chuan Zo hnahthlak tamna ber khua a ni ta! Duhlian-Mizo tawng hmang chu mi 200 dawn lai an ni ve tawh a, IMCF ah  hian member 160 vel an awm. IMCF hi denomination pakhat chauh, thurin pakhat chauh a inghat a ni lova, Duhlian-Mizo tawng hmang zawng zawng inpawlho a Pathian biakna hmun a ni e.

PAMHMAI

Thinlai thawngtu thu chimawm chu -

I tawnah vanpui a chim an ti!

Runlum nuthai chang tawh hnu khan,

Luaithli nula suihlung chhirin

Chun-i run belhzai i rel tak le!

Chhimtianga khiang i awi tawh hnu, 

Leng dang tawna chul tawh hnu khan -

Parlai i chawi leh dawn em ni?

Dai theu loha sahrang hliam hnu,

Vul leh thei hian i mawi lo ve!

Hun leh sul tam liam tawh mah se,

A tiam ‘rinawmna’ hlen lo mah se,

Sut ve i maw rinawm biahthu?

Sulhnu nunhlui a tharlai leh

Ka di ar ang a vaihlai hian.

Thlangtlai ni kawl a her liai e,

Liampui nang che tawn loh sakruang -

Pamhmai kimtlang, nuih mawi, a bahsam nen.

Lungril rinawm beiseina chuan

Chhum zinna piah ram a thlir fo vang.

Chuailo par pawh a chuai thin – he ramah hian.

Lungril hmangaihna erawh a cham – thinlungah hian.

Movers: Keimah leh a duh duh etc

Opposers: Nangni…

Keimah:  Pu Speaker he thu dik awmsa sawi thei tur a hunremchang min petu hi chawimawi in awm rawhse…. kan Mizo thufing chuan Sial rang in sial rang a hring a, Sakawl in sa kawl a hring. Kawi pawh a kawm a that chuan a rah pawh a tha; a lo ti mathlawn lova, kan thang thar te leh kan thalai te YMA bu zawl a min awp keu tute hi kan nu leh pa te kan ti lo thei lo … A pawimawhna leh a hlutna bosal  lo tura  min kaihruai  tu tur chu kan nu leh pa te tho hi an ni tih sawi kher ngai lovin kan chiang tlang awm e…. hetah tak hian nu leh pa te YMA a an pawimawhna chungchuan zia chu a lang chiang hle a ni.

Pu Speaker, Thangthar te hian Zawkbuk Culture kal pel in, thingnawi fawm hun lai an  thlawh khum ve ta luklak si a.  YMA ze pui Tlawmngaihna, Mizo chhiatni thatni dan te leh mizo nun ze mawi dang dang te hi chhul chungah zir ngawt thu awm suh, nu leh pa te zirtirna zar zo vek a hria kan ni. Nu leh pa te hian min zirtir lo se YMA huang ah hian vai pawh kan tluk awm love.

YMA Chak kan tih hian enge a kawh? Kal pangngai a kal lova, hmasawn na kawng hrang hranga chak zawk a kal a ni mai lo maw? Pu speaker fate fuih a tur kal tu, entawn tlaka khawsa a zui lo thei loh nun entir tu chu nu leh pa te an ni… heng te a nih a vang hian Nu leh pa te hi YMA meichher chhemalh tu ah hian an pawimawh thlawt a ni ka ti a ni.

 (Ka sawi zawm zel ang han sawi ve phawt ula, debate kalphung pangngai ang takin aw…J)

Het, zialo ngei mai kei misual hi ngaihtuah loh loh tur kan ngaihtuah chu, ka suangtuah na ram atanga in thin harh hnuah pawh ka tawn emaw tih mai tura chiang hian mi thing tlat si.Tu emaw hlimsang deuhin sawi lo thei ka ni lo an tih ang deuh in thu thiamlo hle mah ila han puak leh pawp mai teh ang.

Suangtuahna mah nise a taka thleng a ni miau si.Ka vela ka duhsak ngawih ngawih leh ka hmangaih ngawih ngawih ten chhungte avanga inkawp rem theilo a lungthlu zan lo a hmangaihte then a midang chhungte duh zawk nupui/pasal nei an awm ka hmuh te hian ka ngaihtuah na a ti thar leh thin. Ziaklo thei ka ni lo.

Hmanlai atang tawh in kan mizo nunah milian leh mite inthliarna avan na tak em, hnamchawm nula/tlangval tan hmangaih in duh hle mahse milian fa beisei a thiang silo. Kan in ti changkan viau emaw tih pawhin kan la in thliar cheu si. A tu a te pawh hi han in chui han in chui ta ila kan iai awm vek lawng maw? A nu chuti khati, a pa chuti khati tih vanga kan fate/kan nau te hmangaih ngawih ngawih kan han then tir thin hi sim a hun lo maw?

Han ngaihtuah ve teh u,amah a thalo e tih vang nilo a an chhungte duh loh vanga kan han duh loh ve ngawt mai hi zawng a hnam mawl zia deuh a ni. Kan pi/pute hunlai chuan an in zawng fimkhur narawh e, tun hnuah leh zel kan chhawm hi a thalo e tihna ni lo in, a mihringa kan neih tur ber kha a fel phawt chuan enge a chhungte kan va buaipui daih hi a chhan ni ta ang? Chapo vang niin ka hria kei chuan.

Nu leh pa leh aia upa thu zawm tura in zirtir hnam kan ni, Kan rinna pawhin Nu leh pa thuawih turin min zirtir, an thu kan awih loh chuan Pathian thu awih lo angah kan in ngai, Hmangaihna pawh Pathian min pek tho a ni, a eng zawk nge kan dah pawimawh ang le? Ziaklo thei ka ni lo.

A tawp ber ah chuan, keipawh engtik emaw fanau neiin ka la awm anga, Pathian zara an lo puitlin a an hmangaih an hmuh phawt chuan Hmangaihna aia hlu awma hrelo tu hian pawmpui ngei tum turin tunah ka rilru ka siam tan e.

1. Inform-ers: Heti ang mite hi an hnathawh tlângpui chu thil thleng chanchin – lungchhiat thlâk/hlimna – hriat zauna lam te an ngaihvenin mite hriattîr an tum ṭhin. An hnathawh hi a pawimawh êm êm a, an tui a, an ngaihtuah peih a, an tha leh sum leh pai pawh an sêng nasa ṭhin hle. Thil an chîk peih a, mite ṭanpui duhna rilru pawh an pu lian hle ṭhin. Mi ṭhenkhat chuan midangte er avangin kan thil hriatte pawh kan vai pianthar hnan a, kan ui tlat ṭhin. Amaherawhchu, inform-er-ho erawh chuan mite hian kan hriat ang hria se, kan hriat loh thleng thleng pawhin hria se tih hi an duh êm êm a, an pawimawhna hi sawi maia fiah chi a ni lo.

1. Pray-ers: Anni ve thung erawh chuan inform-er-ho thil report-te an lo chhiarin an lo ngaithla ve ṭhin a, thinlung takin an tawrhpui/lawmpui ṭhin. Ṭanpui ngaite an awmin ṭanpui ve pawh an duh êm êm a, nimahsela, sum leh pai leh thil dangah harsatna an neih avangin ṭanpui thei dinhmunah an ding bawk si lo. Amaherawhchu, tih theih pakhat erawh an nei tih an inhai lo va, engkim titheitu Pathian hnêna ṭawngṭaia lawmthu sawipui emaw, dilpui emaw an ṭhulh ngai lo. Chu ṭawngṭaina hrui chu an thlunzawm reng a, engtik lai pawhin Pathian an be pawp reng ṭhin. An pawimawhna hi mihring lamah lang êm êm lo mah se, Pathian kut chak tak hnathawhtirtu an nih avangin mi ropui tak chu an va ni tehlul êm!

1. Donors: An rau emaw rau lo emaw lam chu kan sawi phâk pawh va ni suh. An tihtûr nia an hriat chu an ti mai ṭhin. Malsâwmna petu hi ‘ka kutzungpui’ tih tlukin an chiang a, ‘sem darh chu pun lehzualna a ni’ tih hi an thinlung chângvawn a ni. An neih êm avanga midangte ṭanpuinâ’na sum leh pai pe chhuak an ni bîk lo asin, an neih chuang liam pe tûr ni se, pêk tûr engmah an nei bîk hauh lo vang. An rilrua a thawh ang zêl leh, thinlung lama turtu a awm avangin an luang chhuak mai ṭhin. An hausak avangin an hlim chuang lo va, sum an ngah avangin an him chuang bawk hek lo. In ṭha pui pui leh lirthei nalh tak tak an neih avangin nun hi nuam takin an chên hem hem chuang hek lo. Midangte tâna malsawmna nih hi Pathian duhzâwng a ni tih hriain, mihringin dam chhûng rei loteah hian midangte tâna malsawmna nih hi kan tih theih sâng ber a ni tih an chiang êm a ni.

Mi chi 3 pawimawh deuh deuh te ka’n han târlang a, an pawimawhna a inang lo ang bawkin an thawh theih pawh a inang bawk hek lo. An pawimawh êm êm ṭheuh a, pakhat pawh awm lo se, nun hi a kim lo ngei ang. Inform-ers awm lo se, thu thar hriat tûr kan nei lo ang a, Pray-ers awm lo se, thlarau lama min châwmtu leh Pathian kut tichetu kan nei hek lo ang. Donors awm lo se, mi harsa zâwkten an mamawh êm êm sum leh pai an dawng lo ang a, Samari mi ṭha kan nei dâwn lo tihna a ni ang. Chuti a nih chuan ṭanpui ngai tak takte hi an va khawngaih thlâk dâwn tak êm! Khawiah ber khian nge i tel ve le?

“Ninawm lutuk, i fapa hre hraw saw. Ka naute awm mai mai lai a velh leh ringawt tawh hi”

“Aw, Puia thin hi chu aw. Enga tinge?“

“Engvang mah anilo, a suahsual tukhum pawn vang ani mai. Ninawm lutuk, ka ben hrep kha”

“Ka beng a!! Hrim hrimah naupang thu leh hla ah nutling an inrawlh ngailo. Kutthlak te hi i awlsam lutuk”

“Ka tan e i tia law, i fapa suahsual zia hi i hrelo anih hi. Khati te chuan mi ti re re suh aw”

“Naupang mai anla nih hi, tin i fa ti ziah suh. Ka fate chu i fate anni ve tho”

“Hrinhring annih hi anin hre kawr a, i tan si, ninawm lutuk”

“Nangman i enhrang em anih kha. Inneih hma zawngin, Nu an mahmawh, an khawngaihthlak iti ang zawr zawr a. Hetiang tih hria ila…”

“Engmaw i sawi a, khanglang che chuan. Rai lo ila chuan ka nei lo bawk ang che”

“Railo ila a!! Mi zar buai hneh zia kha i hria em”

“Lalchhuanawm, i zak em. Nangmah ani lawmni, engemaw beisei vanga Khawro leh thal khawkhen lai a chakai khawrh tura beisei nei rana mi sawmtu, chakai te zawng khawrh i tumloh tawp kha. Nagmah hi ani lawmni Pi.Thuami te vawkin hluia mi tawmpuitu leh an vawkin ti chimtu kha, Vengchhak tuikhura i chet dan te kha ka sawi zel dawn em. Rai loh chi ziazang kani hlei nem.. Mi puh te i tum khanglang a, ka inchhir zia mai chu”

Chhan chi ani tawh lo, a kuhva hring ei lai chhak that that chunga a tawng zuah zuah a, a khaini bur min melh kalh chunga a hawn tawh hi chuan a thin a rimin chhaih kawlh chi anilo tioh chu kei aia hrechiang an awm silo. Zahzelah,

“Khawnge mami hi”

(vin tak main)

“I fanu awmna ka hre lo ve, Inchhei takin lehkha kan zir ho dawn tiin a chhuah kha, khawia lehkha mah va zir suh. Ninawm,i fanu hian inchei leh mobile khawih bak thiam a neilo. An rualpui te inchhung khura an tangkai teh reng nen”

A an a kal tui dawn tawh avangin chhan zel chi anilo tih hriain room lamah ka luhsan ta a. Nia, heihi ka nun aniin inchhirin awmzia a nei silo. Zingkhat pawh mi thawh khalh ngai lova, naupang tiffin siam chu ka nitin hna a niin siam chhawk min tum silo. Pa berin ei rawng kan bawl a, chhuat kan nawt a, insuk kan zar a, vawkchaw kan pein zingkar hi zawng a rei loin a liam zung zung a, chhun lamah hna kan buaiin hah takin kan thawk nileng a, hah takin kan haw a. Thlamuanna leh hahdamna te lah in lamah thlakhlelh tur avangin a chang phei chuan office banah ei rawng ka bawl a tam si thin.

Nia, kan Nu ve hi zawng mi nupui te nen khaikhin chi anilo. Mi nupui te zawng nilengin inchuhungkhur hnaah an buai nileng a, chhungkaw tan rawng an bawl si. An nunah “tihtur’ in a nghak a, zawh hmanloh hlauhin an thawk nileng a, kei ka nupui ve hi zawng hnathawh hi a chemkalna ani ve silo. Thianpa Zam’an in nu ve hi zawng engmah tihna chang a hrelo, amah hi “tihtur” hlang ani mai, aman enge a tih ve thin a tih fiamthu te pawh kha diklohna a awmin ka hrelo. Engtikah nge kan buhfai a zawh anga, gas bur khat hi ni engzah nge kan hman tih han zawt teh, a chhang thei hauh lo ang che. Chu ai zawngin “The Voice’ ah tute nge la dam, “American idol” ah contestant engzah nge awm a, Brad Pitt ate engtik ah nge an inneih ang tih te zawt la, kuhva thial sen sung chungin a chhang ang che anga, ala sawi belh zui teuh bawk ang, kan Nu ani miau a.

Kuhva hring ei tam hi a hrisel anlo tih thin hi kan nu en hian a dikin ka ring fo thin. Kum 40 awrh niin feet 5 leh inches 2 chiah ni mahse a rih zawng erawh Kg.80 aiin a zang ngai hauh lo a, mahse ka dem lemlo. A ka atanga eitur tui tha lut zawng zawng te hi thlantuiah kal ralna tur awm ta silo chu, a mawng bawr leh a dul bawr vela thau ah a insiam mai lohin eitur tui tha a chakna te khan kalna kalna tur nei hek chuang silo le. Chuti nimahse, a ka ah vawksa rep te hi an tuiloh phah lova, ladoo, gulap jamun leh ice cream tuina te hi a dal phah lovin a thlum tui reng si.

Titi puia, han kawm tlangnel i duh anih chuan Isua tuarna leh Chhandamna thu te kha sawipui tum suh ang che. Pathianthu sawi a, sermon thlak dup dup te hi a tan cuan pharisai, ringtu lem anni a, an chungchang sawipui tum suh. Polititics maw? A teuhlo, kan CM hmingpum pawh hi a hriat ka ring lo a, chuvang chuan Sonia, Mamata, Jayalalitha te chungchang zawng a hre hauh lo ang. Mahse thenawm te rel leh ka chhungte thinzia, an retheih zia leh ka farnu tena min tihbuai thinzia baka sawi nuam atan a awm hauhlo ang, chung i sawipui peih anih chuan nileng pawhin i kawm thei anga, iti nui uar uar thei ang. Tin, a thiantha tak ini nghal bawk ang.

Chuti khawp si, mi dang nei mai ta che minti maw?
“Ka tan a remlo”
Engvang maw?

Ka tlangval chhuahtirh atanga Nula hre mi tak, zei hret hrawt leh nula theih tam insawitheih nana hmang chi ka ni a. Kan tlangval chhuah hlim te khan “Enge eizawnnan ka hman ang”, “Englam nge ka zir anga, enge ka tuina” tih lam aiin “Pu.Thandawla fanu khu chhelo tak ani, a kilh hmasa sa chu Pi.Nuthluaii inah um thum kan khilai ang ” tihte kha kan thianho in elna thin anisi. Tlangval to a chhiar kani vat in, thanmual te, tuikhur te leh vawkin hlui thelngin ka hmang thiam a. Ka hmel chu tha teh uallo mahse, tawngkam thiam leh a huna risk huai te kha ka chakna ani a, kawng dangah rual khum lo mah ila nula theih tam te chu tlangval dangin min chung enna awm chhun aniin a nuam kati ve thei hle.

Mahse, kum 20 ka nihin sawn ka thlak a, ka thlakna nu lah zu zuar nimahse fate tih fahrah a thalo tiin min neihluih tirin thla 2 kan innei. A hma a pawisak neih tawhloh nak alaiin pathlawi nih phei chuan pawi sak kan nei zeuh zeuh. Duhtui loh nen mitilreh ka nihloh zia chu rawn lang lehin kum 2 hnuah sawn bawk ka thlak leh ta. Chutah meuh zawng, inchhirna a rawn awm chho a, kum a tam zelin eizawna kawng zawh leh ngaihtuah rilruah a lan meuh chuan ka tlai zo ta. Kuthnathawh ka peihlo laklawh a, lehkha lam lah misual zir chin zirin matric fail niin a bak ka zir ta lo.

Tichuan, vanneihthlak takin (?) kan nu hi ka tawng ta . Hmelduhna nen kan inkawp laklawh in, anni mi khawsa thei chhung tak annih bakah a Pa hi block hruaitu alo ni nen, kan inneih hnu lawkah hna chhete min hmuhsak a, tin an in pakhat kan luah ta nghal bawk anih hi. Chuvang ania ka sawisel ngamloh a, fin vang ni lova ka ngawih mai thin ni. Zeplohah chuan, khawtlang nuih “thaibawih” nih hi ka tum ngailo, hmeichhe duat chi nimah ila, ka hlauh ka ring ngai lova, sawisel ngamloh phei chu hreawm tak ani. Mahse, engvang nge ti a ka inzawh chuan,

“Ka NEP em vang ani” , Mizo mipa te u ka tihsual ang hi tisual ve suh u. Nawmchen hun a awm, ruih hun a awm, a pawisak neilo tan chuan hur hun pawh a awm. Mahse, mipa kan nih anga kan mawhphurhna kan hlenna tur tithuanawp khawp chuan i awm lo ang u. Kan Mizo hmeichhia ten min finkhalh in min kalsan mek si, hmeichhia te chu zahtur, dimdawih tur, duat tur, mahse a lu ah i tan tir lo ang u. Hmeichhe vauloh chu an pawng tual tual tih ani si a.

via FB Chanchinthar

BONUS: Bonus-ah hian kan misual member kan dah loh chuan a fel lovang.

Mahse, chutiang chu a nih laiin, thil fello tam tak a awm thin mai bakah, buaina tawk tam tak an awm thin tak avangin hna zawngte leh zirna sâng zawk umtuten kan hriatchian tûr thil tam tak a awmin kan hria a. Chuvangin, Bangalore-a zirna leh hna zawng tuten buaina leh harsatna kan tawh loh nân Bangalore Mizo Association chuan heng a hnuaia hriattur pawimawhte hi kan târlang a ni.

1. Mizoram State pâwna zirna zawngte tân
Mizoram State pâwn atangin Mizoramah Zirna college/institution puitlinglo thenkhat ten brochure lem te hmangin Mizo zirna zawngte an bum thin a. Zirna hmun an thlenin an sawi ang leh an hrilh ang a lo nilo leh thin a, Mizo zirlai thenkhat ten buaina an tawk thin. Chuvângin, heng laka kan fihlim theih nân, heng a hnuaia kan târlan te hi hriat ngei a tha:
1.1 Zirna institution chu eng ang affiliation nei nge a nih tih hriat chian tûr.
1.2 Institution address-te chiang taka hriat tûr ani.
1.3 Agent an awm thin a, hengte hi middleman niin ei an nei thin a, institution mi leh sa dik tak an nih leh nih loh finfiah a tha. A tul a nih chuan I-Card dil mai tur.

1.4 Institution chuan eng subject nge on offer a, eng subject combination nge an neih.
1.5 Institution chuan hostel tha leh him a neih leh neih loh hriat hmasak.
1.6 Institution tak tak awm lo, handout leh brochure siam chawp hmanga mi bum thin an awm tih hriat a tha.
1.7 Bangalore Mizo Association hotute thurâwn lak ngei a tha. (Bangalore Mizo Association website ‘www.bangaloremizo.info’ ah zirna hmun thate pawh tarlan a ni a, zawhna zawh theih a ni e.)

2. State pâwna hna zawngte tân
Mizoram pâwn atangin company thenkhat chuan Mizoramah AGENT te neiin, hnathawh tur an zuar a. Mizo thalai thenkhat thil chinchang hre chiang vak lote leh fimkhur dan hrelo zawkte an bum ta nual mai. An thawh tur an tiam ang lo ni leh tak tak si lote, hna tha tak anga in kawhhmuh si; himlo tak tak te pawh a awm a, tunah pawh a la awm mek zel a ni.

Mizorama hna zuar te, Admission Agent te ngampa taka lokal thinte hi uluk deuh zawk a lo finfiah ngei tur ani. Tunlaiin Human Trafficking lamah mi an huaisar em em avâng leh mi tam tak inbumna a awm thin avangin, mipui leh khawtlâng hruaitute pawhin hetiang lamah hian beng kan chhit deuh pawh a ngai hle a ni. Hetiang inbumna hrang hrang awm thei lakah hian Mizo mipuite fimkhur turin kan ngen takmeuh meuh che u a ni.

3. Inluah Chungchâng
Zirna leh hnathawka Zoram pawna lokal nula leh tlangval inluaha khawsa an thahnem viau mai a. Heng zingah hian nupa pawh ni silo, inngaizawnga inluaha awmdun an awm nual ta mai te pawh hi a fel lo khawp mai a, hetiang lamah hian Nu leh Pa ten kan fate awmdan leh chanchin kan ngaihtuah zui a kan thlithlai zui thin ngei a ngai a ni.

Bangalore-ah hian hnamdang, sakhaw dang bia, conservative society kara awm kan ni bawk nen, hetianga khawsa te hian Mizo hming an tichhe thei a ni. A hmunah kan tlawh theilo a nih pawhin midangte kaltlang talin an khawsak dan chiang taka hriat a tha a ni. Chutiang ti ngei tur chuan nu leh pate kan beisei nghal bawk a ni.

http://www.bangaloremizo.info/bangalorea-awm-tum-te-tana-hriattur-pawimawh.html