Hmeichhia leh chakaiin sakhua an nei lo tih te, hmeichhe finin tuikhur ral a kai lo tih te, hmeichhia leh pal chhia chu thlak theih ti tein kan thlahtute khan an lo sawi thin a. Hmeichhe tan chuan huatthlala tur deuh chu a ni tak naa, mahse,an nundan han en rawh kha chuan hmeichhiate kha an pawimawh hle thung a ni. Hmeichhiate khawtlang tan an pawimawhna in thlir ho dawn teh ang.
Pathianin mihringte hi inthlahpunga,khawvel luahkhat turin thu min pe a, chumi tihhlawhtling tur chuan hmeichhiate hi an pawimawh em em a ni. Kei ngei pawh nu chhul atanga lo keu in hnute tuia chawmlen ka ni si a.
Kan Mizo nunhluiah kir daih teh ang u. Hmanlai kan pi leh pute hunlaia nulate kha khawtlang tan an pawimawh em em a. Pasaltha an ngaisanga, tlangval tinreng khan nula lama tlaknat an duh avangin pasaltha nih tumin theihtawp an chhuah a. Kha an theihna zawng zawng khawtlang tana an hman khan nula lamah an tla na a, chumai ni lovin nulain an ngaihsan zawng a dik avangin khawtlang inrelbawlna pawh a tha em em a ni.
Hun a lo kal zela, sipai ngaihsanna lamah kan nulaten thahnem an ngai leh ta a. Khatih hunlai na na na kha chuan sipai tan chuan nula rim kha a nuam awm thin mang e. An thuam famkim inbel chung ngeia an han rim kha chuan khawtual tlangval naran tan chu beisei tur a chaurau ve ngawtin ka ring. Sipai boot nen kailawn an han rah rik rap rap kha chuan nula tan khan kha baka ngahhlelhawm a awm tawh dawn mi? – India sorkar duhlai a rawn leng dawn tlat.
(more…)
