Archive for the ‘Lifestyle’ Category

Nun Champion

Saturday, August 11th, 2012

Nau-no tap râwl ka hria a, naupang tlu palh ka hmuh hmaih hek lo. Kan hah viau thin; ni e, nunna tûra kan tlânna kawngah hian châwl hman kan ni mawlh si lo. Hahna haider a, taimâkna tûlpui thin chuan hringnun drama kan chan mêkah hian ‘hlawhtlinna’ leh ‘hnehna’ an lâmpui thin. Tu nge hria, khawi atangin nge malsawmna dawibûr lo thleng ang a, tawlh thlûkna tûr harsatna chu? Kan pawm thiam tûr a ni, kan ziahlai mêk thawnthu tawi tê hi.

Hlawhtlinna chu han thlîr teh, i hmu ang a ler sângah chuan. Rahbi tin chhiar kim la, i hmuh hmaih ka ring lo beidawnna leh harsatna thlantui far chu. Mite pawhin an zawh a, an tlu thin asin. Mahse tlu hlen duh lo va, chawlhna nuam thlen hma zawng tumruhna nêna beituten malsawmna rah an seng thin. Rilru ngaihtuahna fîm leh ‘tih tak tak arpa tuihâl’ nên chuan hringnun thawnthu ziah hi a kal zaih mai ni. Tahna mittui kan ziah laiin phêk dangah chuan hlimna hlimawm kan ziak leh dâwn tih kan hre si a.

(more…)

Sakhaw hruaitute thusawi

Friday, August 10th, 2012

“Miin i chunga an tiha i duh tûr ang bawkin mi chungah pawh ti ve rawh.”
– Isua Krista (Christianity)

“Thatna chuan thatna a hring a, sualna chuan sualna a hring.”
– Buddha (Buddhism)

“Sawi aiin ngawih hi a lo tangkai zâwk a ni.
Chapona aiin inngaihtlawmna a ropui zâwk a; thinrim aiin inremna a ropui zâwk a lo ni.”
– Mahavira (Jainism)

“Mi thate ngainat nih a tha a, mi sualte huat hlawh a tha bawk.
Thatna chu thatnain thungrûl la, sualna chu diknain thungrûl ang che.”
– Confucius (Confucianism)

“Ka chunga thate chungah ka tha a, ka laka sualte chungah ka tha a. Tichuan engkim mai hi a tha a ni. Tih tak meuhva tite chu tih tak meuhvin ka thungrûl a, ti mai maite chungah pawh tih tak meuhvin ka ti a. Tichuan engkim mai hi tih tak nain a khat thin.”
– Lao-tze (Taoism)

“Thatna chu a tha reng a, sualna lah a sual reng a ni.”
– Zoroaster (Zoroastrianism)

“Mi retheite chunga that chhuah a, an thlan tla a ro hma ngeia hlawhfate hlawh pêk tûr a ni.
– Mohammed (Islam)

Panlai Nun – Furkhua leh kan nun

Thursday, August 9th, 2012

(Phur thuta chhunzawm atan ka ti ve tawh si a;-) )

Ramvachal, chal lem lo tak
Computer kan hre ngai lova, TV en tur lah a neitute phalna la hmasa te tea en theih a nih avangin; sikul chawlh ni chuan ramhnuaia ka chhuah loh paw’n, dai hnaiah kan vak vel thin. Thian hovin kan vei leh duhzawng sawi hovin, a chang leh kan lunglenna hla sain kan zai rawng rawng a. Theirah lawh tur a awmin kan lova, kan ei hawng hawng thin. Kut bal deuha thei ei tur lak chang a awmin, upa te’n ram lei chu a thianghlim an ti tiin ngaihtha takin kan ei thin.

Kan thil ei avanga kua a that loh chuan kawiam (kawlthei) hnahno kan ei mai a, a reh ve mai thin. Phek erawh phak ve tek tawk tak a ni. :-P

Vangvat I hlau maw?
Vangvat hi thilnung chi khat ve mai a ni tih kan hria, kan hlau lem lo. Tihtur nei vak lem lova fur khawthat nia ramchhuah changin, ruahtui tlaa lei hnawng lawmin vangvat an lo phar huang huang thin. Keini tan duhthusam a ni lawi si. Kan duhthusam chu endang mah a ni lo. Vangvat kan man lawk a, hmawlhte/thingtang kan la a. Hmawlhte hmawrah vangvat hmui kan thun te tea, kan tawtawlik thin! Tawtawlik hi tawngkam mawi tak a ni lem lo, mahse kan hman uar ber a ni tlat.

Vangvat tawtawlik tawh chu nun leh ngaihna a vang khawp, an kawchhung zawng zawng pholang vekin hmawlhah an tang khawng awt tawh a. :-P

(more…)

…ta!

Thursday, August 9th, 2012

Hnam Sakhua… Lalhnam Sipai… tihvel post hi ka ning ta! :p

Thinrim thut/ thinbutut vangin mi pawi ka sawi tam ta!

Uan luat vangin mi thin ka tirim zing ta!

Mawl luat vangin nuihsawh ka hlawh fo ta!

Nihna aia lan ropui ka tum thin vangin ka zak tam ta!

Hmeichhe chhaih ka hrat luat vangin kan nu a titau zing ta!

Pianthar der ka chin vangin lemchang thiam tia sawi ka ni ta!

Kawngpui leh thenawmte ram nek ka chin vangin mi nuih tet tet ka hlawh fo ta!

Eiruk suma in leh motor ka lei vangin tawngtai ka inthlahrung zo ta!

Pawlitik khelh ka tum vangin dawn sawi ka hrat zo ta!

Zu ka nghei tak vangin zu khapna dan ka thlawp a, a in mite’n zu chhe man to in mah se pawi tih lohna thinlung ka pu ve ta!

Synod vangin presbyterian nih ka zak fo ta!

Insum theih loh vangin hiv/aids test ngam lo khawpa dawizep ka ni ta!

{{{ …ta ve r’u… ka fel tawh dawn ta! }}}

Ka hmelhriat thar, ka chhuan em em!

Wednesday, August 8th, 2012

A sei viau, i chhiar chhuah chuan i inchhir lo thung ang!

Midang ziak ka rawn nghat chawrh mai
:

Source: http://tkahnamte.blogspot.in/2011/10/hiv-positive-ni-tih-zep-lo.html

Lalchhuanzuali hi March ni 6, 1988 khan Aizawl Civil Hospital ah a piang a. A pa chu Lalnunfela niin, a nu chu Lalthlanchhuahi a ni a. An chhungkuain Venghlui, Aizawl ah an khawsa mek a. Chhuanzuali te unau hi 4 an ni a, hmeichhe pathum leh mipa pakhat niin, amah hi a upa ber a ni.

Sikul hi a kal kual ve nual mai a, Govt. Primary School, Venghlui an bul tanin, Govt. Bible Middle School, Venghlui; Hrawva English Medium School; Brighter Higher Secondary School; MICE leh Basilea ah te kalin, Class 12 thleng a zir a, a bak chu pasal a neih tak avangin a chhunzawm ta lo.

Khawtlangah a theih ang tawk tawkin a inhmang thin a, an Branch KTP in documentary an siam pawhin a theihna apiangah thahnem ngai takin a tel ve a ni. May, 2006 khan pasal a nei a, nau a pai zui a. A nau pai hi a fuh chiah loh avangin December thla khan doctor te chuan ‘bed rest’ turin an ti a, damdawi inah a lut a.

Nau pai apiang an tih thin ang bawkin Chhuanzuali pawh HIV hrik a pai leh pai loh an en a, positive a nih thu hi an hrilh a.

(more…)

Nunkhaw Sana

Tuesday, August 7th, 2012

Hringnun hohzia zirtîr kher i ngai lo,
Nunna derthâwnzia hrilh kher i ngai hek lo;
Vawiinah rim takin thawk la,
Naktûkah a rah seng lo pawh ni la;
‘Beidawnna’ hi hmun ken kher a ngai lo,
‘Beiseina’ hian i thian nih a châk reng fo.

Tûn hun hi i ta liau liau a ni a,
Hlim tak leh duhawm takin nung la;
Tumruhna nên thawkrim ang che.
Naktûk atân engmah khêk suh –
Chutih hunah chuan Nunkhaw Sana hi
A lo tâwp dêr tawh maithei asin!

Bûklung ka khai thin

Saturday, August 4th, 2012

‘Vâl to lo’ ni tûra ka nu chhûl atanga ka lo piang chhuak ve ngawt hi tihpalh chu ni lo mah se, tihfuh tak zawng a ni kher lo maithei. Chutih nâk alaiin thil hrang hrangah ka inham buai a, ‘Vâlbuaia’ ka han ni lehzêl phei hi chu nula tân chuan lukhamtê hman hnu ang maiin thlâkhlelh tûr ka awm lo ve ngawt ang! Hmêlin ‘puak’ ti suhin pianin ‘thûr’ ti hek lo mah se, tlangvâla pumpa ve lêm hmêl duhzâwng te chu hai bîk hek suh. Hmêl mai pawh a ni lo, nungchang tha leh fel, fate nu atâna iaiawm loh tak te phei chu ka hmu thei phian lehnghâl! A mawh lo ve, mipa ka ni miau a. Chuti ni lovin ka mit duhzâwng hi hmeichhe hmuhnawm tih chi hlîr niin, ka ngaihtuahna hi nula ngaihtuahna ang mai lo ni ta se; thla 9 lai ka lo chên tawhna leh ka lo pian chhuahna ka nu chhûl pawh a zahawm lutuk ang asin.

A vau tumbu ka khawrh rei leh ta mah mah, birh nghâl mai dâwn. Tlangvâl nih a, hmalam hun ngaihtuah châng chuan ‘nupui’ hi a lo lan châng a awm thin. A chhia a tha te pawh kan la nei ve ngei ang a, fate hmangaihna avang leh nupuite hmangaih luatah hian kan thaibawih hnûp hnûp ang tih chu a hlauhawm phian. Eng pawh ni se, tûnlaiah thaibawih ni tawh lovin ‘chhûngkaw tangrual’ an ti tawh zâwk em ni kha? :-D

Mihring takin nupui atâna duhthusam hi ka lo bûk ve thin a, a bûkna tehkhâwng pawh ka siam ve thin. Chu bûkna hmang chuan nula te hi ka’n bûk a, a kg. zâwnga rit âwm tak takte pawh hi an lâng leh nul nul thin nia! Ka bûkna hrang hrang te chu a nihna takah chuan ‘duhthusam’ ti ila a sual âwm lo e. Chuti ang mi chu Pathian hnênah ka dil a, ka zawng bawk thin. Nimahsela, tûn thlengin a chhânna ka la hmu lo. Chuvang mai chuan maw le, tûn thlenga ‘tu pu mah, amaha tar’ min tih ve tâk thuak thuak ni!

Tûnah erawh ka duhthusam thil ka dil thin leh ka zawn thin chu thil theih loh a ni tih ka hmuchhuak a, thil âtthlâk tak ka lo ti a ni tih ka inhrechhuak ta. Ka duhthusam thil te chu Pathian tân tih theih loh pakhat mah a awm lo, mahse a ti si lo. A chhan chu ‘mi famkim’ ka dil thin vang a ni. Mi famkim siam chhuak tûr khawpin Pathian hi a â mawlh si lo. Ka dîlna te chu min chhân duh hle mah se, ngawih a chuh ta zâwk a.

(more…)

In ni ve thin em?

Thursday, August 2nd, 2012

Kamkeuna
Pathianin mihringte a duan dan ropui leh makzia hi chu aw. Mi thenkhat luhlul leh rilru lian tak tak an awm laiin, thenkhat erawh thinnem tak an awm bawk a. Mihring mize hrang hrang leh, nihphung hrang hrang hi kei chuan ka sawi seng lo’ng.

Kei ngei pawh hian ka nunah engemaw bik riau tawn hi ka ngah ve khawp mai a, sawi vek chi pawh a ni lem lo mai thei. Tuna ka rawn sawilan te erawh primary sikul ka kal lai, chinchang ka hriatthiam ve tawh laia ka tawn thenkhatte an ni.

1. Ka pi kutphah thap hrip hrep – ka pumna chhawktu
Zo hnathawk tih takah kum tluanin hlo leh hriam tin reng hamin an hmanhlel a. Thingtlang naupang nafam chuan, thil thianghlim vak lo leh thei rah eng eng emaw ei tawk kan neih fo avangin, a khat tawkin ka pum a na fo. Khatia ka pum a nat chang khan, ka pi kuhtphah thap hrip hrepin ka pum a’n zut hauh hauh khan, pumna a dam huaiin ka hre thin!

2. Ka pa puak (nen-nen) ngei – ka tan damna
Thosilen zar mumal lova mut mai mai kan chin avangin kum tinin sikserh veiin ka na deuh ziah a. Tawrh nat chang phei chuan luak leh luna nen fawmin, chhungte beidawn rap rap chang a awm fo. Thingtlang atanga neih theih tawk Chloroquine leh Magadol kan ei a, dam hun a awm ve leh mai bawk. Hetia ka dam loh nikhua hian, ka nu emaw ka u te min puak aiin, ka pa min puak khan ka natna a kiang deuh huaiin ka hre thin.

(more…)

Vawm khawm hmawk hmawk mai teh ang hmiang…

Thursday, August 2nd, 2012

Thla tin hian vawi 1 tal chu Post submit ka tum ve hram hram a, mahse thla 2 chhung chu ka ba ta. Tun tum chu Topic ropui tak pawh awm chuang lo in, a hnaivai pictures, ka han hai chhuah theih mai kan vawmkhawm hmawk hmawk mai ang e. Hotunu pic shot, 2 kan ruk sak tel bawk ang e. hahaha…

Fur a ni chho bawk a, fur lai chuan hetiang hi hmuh tur a tam khawp mai.

Buh hmun pawh a mawi tan ta khawp mai. Kawngpui kam a lo nei chu an hahdam bik ngei ang.

(more…)

Kan khua chu

Wednesday, August 1st, 2012

(Mahni mawng kan inhlim dawn ta sa sa, zun leh ek ka thlahdah law law mai thei)

Kan vawkpui Rângi hur thla, ka nu ten Pa Benghmula (kan koh dan) te rama lo hla an neih kuma piang mai ka nih avangin (ka nu sawi danin), kan khaw chanchin hi ka hre bel lutuk lova. Dawt ngial ngan leh thu huihphai tak tak ka zeh tel a ngaih hmel ta viau, ka hriat ang ang leh tlem sawi ka tum dawn a ni.

Kan khua hian mite hmasawn zia leh changkan zia a hmu lo a ni bik lova, kan mâwlna leh kan sum neih lovin min la delh bet mai chauh a ni. Kan tu leh faten hnim buk bawh beta Tuhrik an la kai lai hian, khawpui lama infate chuan nula malngo bawhbet-in AIDS an la kai pheuh pheuh chauh alawm tiin kan la tilpuk thut pui mai mai a. Mahse, awh tinin kan tin pui hauh lova, kan awt bik lem love- khawnvartui hnawihin a dam ve thei si lova.

Mahse e, pawi ta ber chu hei hi a ni. Chhiat tawh ni khuain khualkhua-a kan chhungte’n thuchhe keng an hriat tlai luata, kan tah nin hlei hlui tawh hnu leh ruang phum fel a nih tawh hnua min la tahpui tha leh thin hi a ni. Kan khuaa tlawmngai pawlte chuan kan ngai neih tawh mai a, khualkhua atanga lo kal te erawh kan tihrilhhai lek lek fo reng a ni.

(more…)