Archive for the ‘Lifestyle’ Category

I him em?

Friday, June 14th, 2013

Hman deuh khan Aizawl veng pakhat a nula tleirawl fel tak pakhat chu a in awkhlum a. Ruihtheih thil a ti ngai lova, nula fel tak a ni si a. A zirlai ah pakhatna a ni zat zat thin a, Class IX a zir kumin 2-na a ni hlauh mai a, result a hria chu a shock lutuk a, a khawng tawp tih thu an sawi a. Amah a fel a, a nu leh pa hmangaihna a dawng a, sum leh paiah harsatna an nei lova, a zirlaiah nise top ani a, khatia 2-na an ni kha a la na lutuk a, a inawhhlum phah a lo ni a.

He thu atang hian zirtur kan neiin ka hria. Kan nun hi a tluan lutuk chuan kan tan a lo thalo thei dawn ani tih hi ka ngaihtuah a. Motor pawh a break rah fo a tul ang hian kan nitin nunah hian min break tu obstacle te hi awm ve zauh zauh se a lo tha dawn mang e tih ka ngaihtuah phah ta a. Kan thluak nilo, kan thinlungin kan nun a ro a rel hian buaithlak a awm fo. Mental health hi Physical health tlukin a pawimawh si a.

Nangmah han inen teh. I hrisel in sum leh paiah harsatna te tawk miahlo in I nun I hmang em? Hmangaihna kawngah te I tluang purh em? Tin, I zirlai leh I thil tihna ah a sang ber I ni vek em? Mithiamte sawidan chuan mihring nun ah hian ‘average’ nih hi kan mental health atan chuan a him ber an tih teh tlat chu. Enge I ngaih ve dan le?

Posted in Lifestyle, Luangliam, Opinion | 26 Comments »

SDMI Inkhawm Ka Chhim Ve A

Tuesday, June 11th, 2013

Thuhmahruai
Thlen chin zimteah hian ziah tur tawk te hi ka nei ve zel a. Kum 2008 khan Mizoram House, Vasant Vihar-ah hian Mizo inkhawm ka chhim ve tawh a. Kha’ng lai kha chuan Mizoram house-a thleng leh House hnaia mi te inkhawm mai kha a ni bawk a. House Dormitory-a thleng kan ni a, kan mutna room-ah khan kan inkhawm mai a. Chu inkhawmah chuan khuangte pakhat vuain putar pakhatin zai a hruai a. Hla un pui pui a la a, zai a har phian a nih kha.

Tahrikni 9, June 2013 khan ka hna tul avangin Delhi ka zin lai a ni bawk nen, Ghaziabad atangin Mizoram house-ah bawk chuan ka va inkhawm leh a. He hunah hi chuan Delhi Mizo Inkhawm, Delhi chhim lama mi te an ni thung a. House thlenkhawmna (dormitory) pawh inkhawmna pangngai taka chei a lo ni a. A lo changtlung ta hle mai.
(more…)

Posted in Lifestyle, Mizo Society & Culture | 21 Comments »

Inneih Runpuiah Virginity leh Pregnancy Test hmasa phawt !.

Monday, June 10th, 2013

June ni 7 Zirtawpni khan, Madhya Pradesh a Betul District a Hardu khuaah chuan, ‘Mukhyamantri Kanyadaan Yojna program hmanga Nupa tuak 400 zet inneihna buatsaih a ni a. Mahse, he inneih runpuiah hian thil pangai lo tak a thleng ta tlat mai a. Chu chu, Complaint a awm avangin, innei tur nula ho chu, an inneih hmain, an rai leh rai loh bakah, an virgin leh virgin loh an test hmasa a ni. Nula 8 lai chu an disqualified a ni awm e.
He thil thleng dangdai tak hi an hriatin, sawrkar lam pawh an che vat a, Collector Rajesh Mishra chuan Inquiry an lak tur thu a sawi a, Assistant Collector Neha Malviya chu Report kimchang thehlut thuai turin ruat anih thu a sawi.
(more…)

Posted in Event, HAHAHA, Lifestyle, Mizo Society & Culture | 22 Comments »

Mihring!!

Friday, May 31st, 2013

Ti hian, misual-ah post 239 ka submit ta! Min lo hrethiam ula, inlan ve deuh zeuh zeuh ka duh si a, ka tel tin aphai ta a niang e, tunhma ang khan ( ti ve khanglang ila) ka hnùm hleithei ta lo. Hei, tunah pawh ka fb wall-a mi ka rawn thlawh phei leh tawp! Thenkhat chuan in lo chhiar tawh ang a, ho pawh in ti viau maithei — misual-a pâwt châk tawh si, pâwt tur dang hre si lo post a nih mai mai hi… post tha tak tak karah lo awm ve luklak teh se. (H)

Tul lova computer, cell phone kan bih peih luatah kan mit a fiah lo zo a.

Ring uchûak tak taka bengah earphone kan hnawh-tawt thin avangin kan ri hriatna a tha lo zo a.

Sahdah, khaini vangin kan hmui hnuai zawk a piangsual a, mi zinga nui tha ngam lo khawpin kan ha a trit-êk a.

Zial vangin kan chuap a ro a.

Zu vangin kan thin a lian a.

Kuhva vangin kan pum a lawng a.

(more…)

Posted in Lifestyle, Luangliam | 18 Comments »

RAMÂR HMANGAIHNA

Friday, May 24th, 2013
Tho hreh takin khumah ka let ka let a, âr a rawn khuang chiah a, barakhaih ang mai in khumah ka ding ta hluai a. Ârpa ka ngah tehreng nen, chu Ar khuang danglam bik na chu enge?

CHU ÂR CHU: Zing tina khuang thin, tuktina chaw ka pek, ka duat em em, ka ar zinga ka ngainat ber a ni, fa chuam anga ka enkawl, fa tlumber anga ka duat a ni. Tukkhat chu kawhmawhbawlin âr dang a chuk chiam mai a. Chaklo leh naupang zawkte bula awmdanmawi zirtir ka duh avangin ka arpa huaiber bulah chuan ka khung lui ta a. A hlau ngang mai!! A lu thukru in bih ruk a tum a, pakhat zawk lahin dimdawihna tel map lovin a mawng ah tak mai chuan a pet ta lauh lauh mai a. A sualhuai zawk ta na na na chuan a nawp ta nek a, a hnehsawh ngei mai. A râk teng tunga, ar dang hriat ah tlawmzawk nih thu puangzar in a iak ve ta vak vak mai a. Ar dang ho paw’n an lawm vang nihmiang an lo kawkawdak ve noh noh mai bawk a. Khami tuk kha chu kan chhung kan bengchheng ngei mai!! Chuan eng tin zel?

TLÂWMAH A LA: Tlawmzawk nih chu a la na ngang mai!!! Ka’n la chhuak chiah chu, a zum zât mai a, Âr dang bulah pawh awm duh miah lovin, âr la dang lah a ngaihsak tawh hek lo, a sim chiang hle ah ka ngai mai a!!! A tuk khua a lo var a, a khuang ka hre ta hauh lo mai, ka zawng chiam a, ka beidawng der a ni!! Khawi lai ah emaw lo thi palh a nih takin ti in chhung chhungin thenawmte ramah kan zawng luih luih a. A ruang rêng hmuh tur a awm lo a, a thawm lah hriat tur a awm tawh hek lo!!! Pûâl lenga thlangtla an sawi ang vang vang in a reh ta vawng vawng mai a ni.

KA LUNG A LENG: Thla hnih a liam. Tuktin ka tukverh bianga thlawk kai a khuâng âl âl-a min kaitho ziah tu, ka hmel a hmuh apianga thian te tlansan a min pan dat dat thin, ka âw a hriat apianga khuan chak ziah mai, ka Pisa ban hun awm vel a rawn haw ve ziah thin a ni. Mahse, Tunah chuan a awm tawh lo, ka khua a har ta takzet mai!! Ka ngaih em avangin zingah te hian a lo chhâwn mial takin ti in veng mawng lamah te ka zuk khuang ru vel thin a, a chang leh arnu kak ang hian ka kak ve chiam chiam mai thin!! Hmelhriat ten “U Zra kan huan ah a rawn khuang thin, U Zra hi tun lai chu a kâk vak vak zel” ti a an sawi hlau chung chungin, KTP leh YMA a ka OB nihna hre ran in a rukin rei fe chu ka khuang ru ta tang tang a. Mahse, Thla khat a liam a, a ngaihna a awm tawh ngang lo, a tawp nan ti in Chhingaveng nena kan in ri na ah ka ngam tawka ringin, ka va khuang leh hrâm a. Ka âr chu ka mangtha zui ve ta nge nge a.

(more…)

Posted in Lifestyle, Luangliam, Mizo Society & Culture, More than words | 8 Comments »

Nu Lehkhathawn. (Mothers’ Day Pual)

Monday, May 13th, 2013

(Admin note: Sorry, nimin current a mumalloh avangin kan rawn online theilova, a tlai tawh deuh na in kan rawn chhuah tho e)

Ka fa duh tak,

Ka kum tea lo tam ve tak avangin, ka tawng te a lo fiah ta lo deuh a, ka sawi ngai I hriat loh ka hlauh avanga ka sawi nawn ka sawi nawn anih pawhin, min hrethiam hram ang che. Tawng I thiam tirh I la tawngfiah theih hma si a, I duh zawng ngen a, I sawi ngai I sawi I sawi thin lain dawhthei takin ka lo ngaihthlak sak thin che kha.

# Ka khup te lo chak lovin, ka lo tlu naih naih palh anih pawhin, I naupan laia I tlu tur venga I kuta ka chelh thin che kha hre chhuak ve thin la, I tlu palh I tah bai bai chang a, hmangaih leh duat taka ka kaihthawh thin che kha.

# I hnaah buaiin, I nupui/pasal fanaute tan I hun awl hman zawh I thlahlel tih pawh ka hria e. Ka thusawi hmanlai leh thing ve tak tak te chu min ngaihthlak sak ve hram thin la. Tawng I thiam hma leh I thiam tirh a I thusawi hriat thiam tuma dawhthei tak a ka beng ka dawh hram hram sak thin che leh, ka hun ka pek thin che kha hre rengin I hun min pe ve hram hram thei ang em?

# Ka lo upat tak avanga mahni taksa pawh thunun tha hlei thei lova, khuma zun ka cheh mai mai anih pawhin, I naupanlaia I zun leh ek hmangaih taka ka thiar sak thin che kha hre rengin, min hau mai lovin, min then/sukfai sak hram hram thei ang em?

(more…)

Posted in Lifestyle, Luangliam, Mizo Society & Culture | 7 Comments »

Hnamdang Nupui-Pasala Neih Hi {Sunday Pual}

Sunday, May 5th, 2013

Thuhmahruai
Hnamdang Nupui-pasala neih (inter-cultural/faith marriage) hi thupui pawimawh tak a ni a, a taka nunpui leh lem duak erawhchu har tak a ni thung. Bible chuan thutlukna fel tak siamin Israel fate kha a warning thlap a, hnamdang chu nupui-pasala nei lo turin chiang takin a hrilh lawk a. Hei hi a chhan ber nia lang chu, (1) culture in-ang lo chuan chhungkua leh chi leh hnamah harsatna a thlen thei a, (2) hnamdangte hian sakhaw (pathian) biak an nei hrang a, (3) ringlo mi nupui emaw, pasal emaw chuan a rinna a phat-tir (bansan-tir) theih dawn avangin a ni ber (cf. Gen.28:1-4, Deut.7:1-4, 4:15-20, 17:17, 2Sam. 1Lal.3:1, 11:1-14, Neh.10, 13:23-27, 1Kor.7:12-39, 2Kor.6:14, 1Pet.3:1,2). A chunga tarlan aţang khian, hnam-dang nupui-pasala neih hian mimal, chhungkua, hnam leh sakhua (personal, family, culture, social & spiritual life)-ah te harsatna siamin chhungkaw hlim nih leh Pathian tana mi ţangkai nih a harsa dawn tih a hriat-chian êm avangin Pathianin a phalsak lo niin alang.

Hruaitu Ropui Mosia, Davida, Solomona-ten Hnamdang An Nei!
Pathianin Israel fate kha hnamdang nupui-pasal-a nei lo turin a hrilh mawlh mawlh a. Mahse, an Hruaitu ropui ber ber-te chuan hnamdang nupui-ah an nei lawi si! Mosia’n hnamdang mi (Kush/Ethiopian) a neih hi Jehova ringtu ve tho a nih rin a ni tlangpui a (Numb.12:1-3). Hetih hunlai hian Thupek chiangkuang tak la awm lo mahse, hnamdang mi neih hi Pathianin a phalsak lo tih an hre tawh niin alang. Hemi avang hian a Unaute sawiselna (demna) pawh hi Mosia’n a chhang-let ngam lova, Pathian meuh pawh a inrawlh lo niin alang. Lal Davida khan hnamdang mi Bathsebi nupuia a neih khan, a nupui neih dân chungchang mai ni lovin, “Bathsebi kha hnamdang mi” a nih avangin Pathian a lungni lo tel bawk niin an ngai (2Sam.11). Mahse, Pathian chuan hnamdang mi nupui laka a fa Solomona chuan a Lalthutthleng a luah a phalsak a, a thlah kal zel chu Khawvel Chhandamtu Isua Krista lo pianchhuahna atan a thlang leh tlat lawi si! Hnamdang nupui lak aţanga piang Solomona chu Israel Lal zinga fing ber leh hausa ber a ni a. Mahse, a pa Davida a chhun a, hnamdang mi nupui-ah a nei a, a nupui-te chuan a lalram leh a thlarau nun an tih-chhiat sak thung (1Lal.11:1-14). Pathian ruat hruaitu ropuite pawhin hnamdang mi nupuia an neih chuan, keini lo sawisel tur a awm emni? tiin ngaihdan kan siam ve mai dawn emni ang? (more…)

Posted in Lifestyle, Luangliam, Mizo Society & Culture, Religion | 31 Comments »

Ka chenna ram thlaler a ni.

Sunday, May 5th, 2013

Vawiin chu Mizo hlaphuahtute zinga ngaihsanawm ka tih em em Pi Lalruali leh a hlaphuah “Ka Chenna ram thlaler a ni Lalpa” tih hi I han en ve leh thuak thung teh ang aw.

Pi Lalruali hi Kum 1924 February ni 13 khan Sihfa khuaah a lo piang a. Naupanlai atanga mi hlim thei tak leh rual pawl thiam tak a ni a. Lehkha pawh thiam thei ang reng tak anih avangin 1936 khan Pawlthum Scholarship hmu phak ngei turin a bei a; mahse January thlaah a khup a lo na a, a vung a, a khuate a sik a, a khum bet chu ani ta reng mai a.

A natna lah chu, Doctor ten an han enchian chuan ‘ruhnget’ chi a lo ni lehnghal a, Durtlang Damdawiinah a kuma kum tam enkawl ani chung pawhin a dam tha tak tak thei lo a, Wheel Chair a hman deuh reng alo ngai ta a ni. Chutiang chuan, Pian tirha naupang hrisel leh harhvang tak ni si chu, ke nei reng chunga kal theilo, Wheel chair-a thut deuh reng ngai leh midangte bawihsawm ngai renga a awm chung pawh chuan, a thlarau nun erawh chu hrisel tha pangai tak ani reng thei tho a ni.

A vanduaina belhchhah turin, kum 1958 khan, Synod Dispensary Sihfaa a awm laiin a Lung lam tha lo avangin a tawngthei lo leh ta tlat mai a. Pathian hnenah, “Lalpa, hla min pe la, a satu apiang ka sawi ai sawitu-ah ka ngai tang e,” tiin a dil a; tichuan he hla hi a lo dawng ta a ni. A thluk hi Pu Rokunga siamsak a ni.

(more…)

Posted in Lifestyle, Music and lyrics, Religion | 15 Comments »

Pathian chance pe ve rawh

Sunday, April 28th, 2013

He thu hi hman atang tawhin ka rilruah a awm reng thin a. Vawiinah erawh chuan thui takin ka ziak dawn lo va. Ka sawi tum awmzia chauh ka rawn thai lang dawn a ni.

Pathian hnenah kan tawngtai thin a, kan duh leh mamawh tam tak kan dil thin. Chutih la erawh chuan keimahni duh dan leh ngaihdanin thutlukna kan siam leh lawi si a. Tha kan tih zawng ang apiang chu Pathian aw tiin kan chhal fo thin.

Pathian hi kan hmangaiha a thu kan zawm duh tak tak a nih chuan kan nunah hian chance kan pek ve hi a hun tawh hle a ni. Chance chu eng nge? Thutlukna kan siam dawnin emaw, kan nun kal zel dan turah pawh ‘A Thu’ kan ngaichang thin tur a ni. Kan Pathian, kan zah em em leh a rawng kan bawlsak leh a thu kan awih em ema hi chance pek kan theihnghilh fo. Khawi kipah pawh awmin eng thil pawh ti ila, Pathian hi a hmun laili ber pe thin ila; pen khat kan pen hmain Pathian hian chance nei hmasa zet sela, thu kam khat kan sawi hmain Pathian hian a ngaihdan leh duhdanah chanve nei hmasa zel sela, hringnun hi a kal sual thei hauh lo vang.

Vawiin atang chuan thutlukna kan siam hmain Pathian hi a ngaihdan, duhdan leh remtihdan sawia, puang chhuak thei turin kan chanchin phek tinah hian chance i pe thin ang u. Pathianni malsawmna ka hlan a che u.

Posted in Lifestyle, Religion | 15 Comments »

Open letter to Ronaldinho

Wednesday, April 24th, 2013

(Ka lo hram tlahawlh deuh a nih pawhin, i mi hriatthiamna ka’n dil hmasa a che)

I hmel hi i inhmeh lo ka ti phal thlawt lo che, nang aiin ka inhmeh lo feeeee zawk. Hmel inhmeh lo theuh theuh-ah pawh nang chuan NLUP beisei hauh lovin, Inrinni zingtin Vawksa leh bekang um i duh zat zat i la ba ngam dawn tih ka hria alawm. Ih e…hmelah buaina tur a awm lo, Aizawl-ah te hian rawn zin ve lawk mah teh, i hmelchhiat loh zia i hre mai ang. Mizoram Premier League lama kan Model hote pawh hian, mi pa pawh ni mah la e-an star hle che ania ka rin tlat ni. Chu mai a ni lo, Sports Writer-Mamuana (Y2 Goal Agencies), Hmingsanga, Tetea leh Zara adt. ho hian an ngaisangin, an thai rang peih dawn em asin.

Vanglaini Newspaper hnunglam khat dul khawpin i lo kal hma leh i hawn leh hnu thleng pawhin, an lo thai rang leh hman pek ang. Gerrarda Pa te’n LPS emaw Zonet-ah emaw LIVE in an han kawm ang che ang a, English khera i chhan a ngai lovang. Mizo Tawng pai tak pawhin han chiri pui ve nawk nawk la, John Cena ang em chuan Mizo a ni kan tih che chu ka rin loh rualin, Mary Kom ang deuh-in kan hauh na fu ang che tih erawh ka ring tlat thung. Rajiv Gandhi Stadium Mualpui, Sipai Lammual leh Thuamluaia Mual-ah te pawh Grass kan phah hring ve dul tawh a, World Cup thlen hi kan la dil lovang tih kan sawi thei hleinem!!

Eng ngati nge “Football ka chawlhsan hun chuan tap chungin ka thlah ang a, ka thih hunah Thlanmual ah emaw min phum lo ula. Football Stadium bulah min phumna tur siam ula, BALL nen min phum tel dawn nia. A chhan chu Football ka hmangaih a ka ‘Nunna’ a ni si a” te min tihsan tak mai le? Chawlh lam chu la sawi duh hauh suh, i chawl dawn a nih rau rau pawhin Mizoram Premier League lamah Aizawl FC, Reitlang FC leh adt. kan nei ve alawm, kan khelh luih tir tho tho ang che. Inkhel.com lam chuan an update peih ngawt ang tih lo ring phawt mai rawh. I awih lo a nih chuan, www.inkhel.com emaw www.zofooty.com lam lo tlawh ve thin la, i hre mai ang.

(more…)

Posted in Gaming, HAHAHA, Lifestyle, Sports & Games | 10 Comments »

« Older Entries