Archive for the ‘Advice’ Category

In ennawn fo avan tha em!

Sunday, May 10th, 2015

Ngaihtuah chang ka ngah ta hle mai, ka ngaihtuah nasat poh leh “Mizo” intite kan lo racist zia hi zahtlak ti khawpin ka chiang tawlh tawlh mai chu a ni e. “Mizo” inti-te aia racist hi HITLER bak kha an awm dawn em ni chu le aw, ka ti deuh hial thin bawk.

Mongol thlah hrang hrang indo reng mai huikhawmtu leh ram pakhata dintu, Temujin (Chinggis Khan) kha chuan, an chak theih zawknan a hmelma (a chipui Borjigin tribe nilo) pawh a generalah hial a dah duh a nih kha mawle. Keini “Mizo” intite hi chuan, “Mizo” intiten kan chipui nireng si pawh an awmna ram a danglam vang a an identity a danglam-in emaw, an hnam bil tawng an la hman vang hian “Mizo pawh inti duhlo” kan ti leh mai thin nia mawle.
(more…)

Nungchang mawi

Tuesday, February 17th, 2015

Mawi leh tha ka ti em mai a, lo en ve teh u.

YouTube Preview Image

INNEIH HMAA HMANGAIHNA

Thursday, March 27th, 2014

Mi tute pawh hi inneih hma chuan kan inhmangaih hmel hliah hliah vek a. A kâ pawh zen ila min seh lovang’ tih ang deuh khan, kan ngaihzawngte bulah hian kan titau tha ngam lo va, kan thinrim phal meuh lo thin a ni. Engemaw tia inhmuh thiam lohnate hi chu a thleng fo va, mahse rei tak kan inhaw tak tak ngai lo a ni. Inthen te kan nih ngawt loh chuan.

Inneih hma hi chuan hmeichhe lam aiin mipa lam hi an pangchang zawk tlangpui a, hmeichhiate hi an puitling zawk mah mah thin. Mahse, a hunah erawh mipa takin mipa na na na chu an awm leh maithei thin a. A tul hunah an tlawm thiam a, a hunah chuan an indahsang thiam em em bawk.

Chutiang a nih rual chuan mipa te hi an zakzum duh tlangpui a, hmeichhia hi eng emaw chenah hmahruaitu an ni fo bawk. An zak thei lo’ ka tih chuan nuho hian min ngei lutuk ang tih ka hlau ve bawk si, heti hian ti mai ang, ‘Zahna hi an tuar dai thiam bik em em a ni’ tiin. Mahse, hmuhsitna leh tiel taka tawngkhum hi an ngaithei lo em em thung a, miin hmusit taka an tih chuan an zak em em a, mahse an tuar hram hram thin.

Hmangaihna lamah chuan hmeichhiate hian anmahni care thiam takte hi an duh zualin an ngaina bik em em a, inhmuh nikhuaa eng emaw pangpar emaw, eitur tha leh hmawmsawm kensak phei chuan lawmthu min hrilh bakah an rilru lam thlengin lawmthu min hrilh nawn mawlh mawlh thin. Mahse, chin tawk nei lova, in inhmuh apianga i kensak chu a ngaih i titha lo thei a ni tih erawh hria la, thil pek chin tawk nei thiam ang che. (more…)

MIZOTE LEH COMMITTEE

Wednesday, February 26th, 2014

Mizote hi a hnam ang chuan committee nasa pawl tak kan ni awm e. Kohhran leh khawtlanga inhmang deuh phei chu committee 4/5 vela tel kan ni deuh fur. Hnam dang pawh hi committee nasa fe fe chu sawi tur ting chuan an awm tho mai. Lehkha kan zir ve lai khan tumkhat chu kan department ah Welsh poet a lo kal a, a poems chhiarchhuah te kan ngaithla a, chuta a sawi chu ka la hre reng mai. “Keini Welsh ho khu committee uar leh ngaisang tak hnam kan ni a, nakinah chuan zing thingpui in tur pawhin, i committee phawt ang u, kan la ti hial ang, kan ti fiamthu thin,” a ti. Engpawhnise, Mizote hian heti taka committee kan uar chuan committee dan (committee ethics) hi kan sawi a kan ngaih pawimawh deuh deuh a tul hle a ni. Chumi chungchanga ka vei ve zawng, ka ngaih pawimawh thenkhat ka’n tarlang ang e.

1. Member thlan chungchang (mipui mawhphurhna): Kan pawl neihte hi (kohhran pawh telin) democratic form of government zulzui deuh vek an ni hlawm a. Chumi awmzia chu hruaitute hi mipuiin kan thlang tlangpui, tihna a ni. Hruaitu thlan kawngah hian mipui kan pawimawh khawp mai. Tunah hian (a ruh langin sawi ta rawt rawt ila) kan hruaitute kan thlan danah hian mi tam tak chuan pawl tana tha tur aiin kan mi duhsak zawng kan ngaihtuah a, pawl tam tak (kohhran pawh telin) ah phei chuan a ruka campaign chiam chiam kan ching hle bawk. Chutiang a nih avang chuan, mipuiin kan pawl hruaitu tur committee kan din dan leh thlan dan hi a bulthut atangin a nget tihna a ni. Chu chuan nasa takin pawl a nghawng a, hruaitute pawhin thu lai la thei lovin, an rorelna ah hleih an neih phah thin. Mipuite hian pawl hruaitu kan thlan dawnin rilru ngil leh dik takin ngaihtuah ila, inthlan a thianghlimin a zahawm ang a, hruaitute pawh an zahawm lehzual ngei ang.
(more…)

BUANNEL RAM DAIAH VA TUAN ILA

Thursday, January 2nd, 2014

Mizo pi leh pute chuan, “Sa hi Buannel-ah an piang a, Chawngtinleri’n a siam a ni,” tih thute an sawi thin. Chuvangin Buannel hian hman atanga vawiin thlengin mizote ngaihtuahna thinlung a luah ve tlat a ni. A la hmu lo ten hmuh an chak a, a hmu tawh te erawh chuan a mawizia leh a nawmzia chu hahipin an sawi thin. Tin, he hmun mawi leh nuam danglam tak, chanchin ngah zet mai hi a hmu tawh inchhir tawh reng reng an awm lo ve.

Buannel hi Myanmar (Burma) ram Hmunluah atanga chhim chhak dep, Hmunluah khawlu tlang liam, mel sarih vela hla, Luangdam lui bul lawka awm a ni. Buannel hi chhuah lam leh tlak lam dawng tha tak a ni a, a tlang inkhawh cham durh mai te chu an mawi em em a ni. Rih Dil awmna Rihkhawdar atang hian Motor keng lo tan pawh Bike a hire theih a, inphurhtir man hi pakhatah Burma pawisain Kyat (Chiat tia lam tur) 8000/- zel a ni. Khawmawi tlanpelin, Lianhna khawthar leh khawhlui tlanpel leh zelin, Chawhte thlen hnuah Hmunluah a thleng a. Hmunluah thleng chauh hi Motor-in a thleng thei rih a ni. Hmunluah atang hi chuan ke-a fehkawng tum ang tiat velah kal a ngai tawh a, kein a thlen theih tawh a ni.

Buannel-ah hian a nu tlang leh a pa tlang an awm a, chung tlang cham durh mai te chu an mawi em em a ni. Tin, a nu tlang leh a pa tlang inkarah chuan phai ruam zau tak a awm a, phai lo atan a itawm hle. Tin, a nu leh a pa inrina phaizawla lui luang hi ngil taka luang lovin a luang kawi nghiat mai a, hetianga lui te a zik zaka a han luang kawi ngiai mai hi a makin a mawi dangdai hle a ni. Chumai ni lovin a nu tlanga lui te luang pawh hi a kawi nghiat tho a ni. Hetianga Buannela lui te pahnih luang kawi nghiat maia an luang hi thil mak tak leh sawi hlawh tak chu a tling a ni. (more…)

KA FARNU DUHTAK

Thursday, October 31st, 2013

http://imgur.com/fQmq45d

Ka farnu duhtak, Chingal bai tuitak leh Saum sawhbâwl pir phak lovin thangkhat lian dâwn i lo awm bo ve tareng mai!!! Zoram khawvel leh thalai te ningkhawng hmu leh hre phak lova i awm hnu ah; Tuithiang tualnuam a tualchai turin i puanthuah te i rawn têl dawnta tih ka lo hria a. Phûr namenin kan phur lo!!! Amaherawhchu, kan sumtual leh chhuahtlang nunphung changkanna chimawm tak tak leh danglamna dangdai tak tak tena a lo barakhaih che a; i men phar awn awn loh nan kei i û hian thu kam hnih khat ka’n rawlruk teh ang che.

Thawhrimna avanga i sakhmel pawr tak leh phuai tak te chu tuaihnum lovin Zo khaw ‘Tribalywood’ ah i rawn pho chhuak dawn a ni a, changkanna chihrang hrang ina a chiahpiah te khawvel ah hian hralh a tlâk loh chu sawi loh melh pawh a hlawh lo maithei e, mite angin sakhmel hmatheh tur hmaifang felfai neilo mahla, Belvâl val a vâl satliah te thlang mai lo tur leh an lak a kut kuangkuah thiam deuh turin ka duh hle a che. Kawtthler a chak tak tak a tlan ching te hi, Biakin kawng a tlan muang tak tak te an nih thin avangin an lakah mit lên lo la, i thinlung phei chu hawng hauh suh ang che.
(more…)

Tawng fimkhur

Thursday, October 10th, 2013

Mi tam tak min vaw lêttu leh inchhirna nasa tak min siam fotu chu kan tawngkam chhuak vêk hi a ni fo. Kohhran rawngbawltu, khawtlang leh ram hruaitute te kan mualpho fona pawh tawng thua kan fimkhur loh thin vang a ni. Mi thiamten, kan tawngkam chhuak rêng rêng hi boruakah a lêng a lêng a, a tâwpah chuan a chhe lam a tha lamin mahni chungah bawk a lo thleng leh thin, an ti a; Bible-in, “Miin a tawngkam chhuak rah chu a seng ang a, ama kut thiltih ngei chu a hnena hlan a ni ang,” tia a sawi nen pawh a inhmeh hle (Thuf 12:14).

Tunlaiah media chak tak kan nei tawh a, kan thusawi leh thiltih ngeite pawh kan inhriatpui kîlhkêlh thei vek tawh a; hmanlai anga ‘chutiang zawk chuan alawm ka sawi’ tia inbum mai mai theih a ni tawh lo. A nî leh darkar chenin kan insawisak thei ta vek mai! Politician-ho tan pawh dawt puarpawlenga mipui bum mai mai ngamna chi a ni ta lo. Mahni ngei pawh kan tawngkam chhuakah kan awh lohna turin fimkhur tlang ila. Tirhkoh Paulan, “Mi tin engtia chhân theuh tur nge ni tih in hriat theih nan in tawngka chhuak chu chia al, khawngaihna tel ni fo rawh se,” a tih hi i vawng reng ang u. (Kol 4:6).

Like!

Monday, September 16th, 2013

“The three idiots” ah chuan photographer nih tum kha,
engineer leh doctor an “like” luih tir a!
a tawp dan chu, an “like” lo teh e!
pianken “like” sa ni tlat hek lo le!

Lanu hmeltha hmingthang tualvungi,
a tawng a hmangaih, a “like” zawpala,
a “like” loh an “like” luih tir a,
a tawp dan chu, an “like” lo teh e!
pianken “like” sa ni tlat hek lo le!

German mi tawrawt hitler-a chuan
german ho chauh hi tling tiin
hringfate “like” luihtir a tum a,
a tawp dan chu, an “like” lo teh e!
pianken “like” sa ni tlat hek lo le!

Babulon lal nebukadnezzer-a chuan amah chauh chu lal ropui a ni tiin
daniel-a leh a thiante “like” luih tir a tum a,
a tawp dan chu, an “like” lo teh e!
Pathianin phal tlat hek lo le!

Adama leh evi an awm, eden huanahchuan,a siamtu chuan a van “like” tak em!
rulpui chuan “like” loh tur a “like” luih tir a,
a tawp dan chu, an “like” lo teh e!
Pathianin phal tlat hek lo le!

Like tur dik a awm, a awm chiang mai!
nang leh kei hian kan hria em?
teh reng mai! teh reng mai,
chhia leh tha hriatna kan neih miau!
“like” tur dik kan “like” loh chuan
a tawp dan chu kan “like” lo teh ang chu!!

FANCHUN

Sunday, August 11th, 2013

Pawl Sawm Exam form kan fill-up laiin kan Principal in ”I hming engtia dah nge i duh? A ngai ang hian kan dah dawn a mi?. ‘F’ hi eng nge awmzia?” tiin min zawt a. Pawl Sawm a tanga hnuai lam zawngah kha chuan ‘F. Lalrosanga’ kha ka ni thina. Kan Principal hnenah chuan ‘F’ chu FANCHUN tihna a nih kha ka ti a. ”E he! Pawichhia te maw i nih? Pawichhia te” minti a, ka zak lutuk kha, ka thinrim pawh ka tilang ngamlo hial.

Office chhunga Zirtirtu dang awm lai leh Ka zirlai puite Exam form fill-up ve tur awm lai a khatiang thu dawn kha chu ka zak lutuka, hawina lam tur pawh ka hrelo a, awmdan pawh ka thiam tawhlo.!. Mahse ka nihna chu ka nihna a ni tlata, eng angin zahpui mah ila a sawt chuanglo a, ka nihna a ni tho tho a.. FANCHUN in ka nihna a tilang a nih chuan tiin, kan Principal hnenah chuan ka hming bula ‘F’ dah tawhlo in ‘Lalrosanga B Fanchun’ tiin Class-x Exam form ka fill-up tir ta a.

Kan Principal in ”Pawichhia te” mintih lai khan thinrimin zak viau mah i la, tun kum 7 vel liam hnua ka ngaihtuah that leh hian ‘Pawichhia’ minlo tih kha a lo awm reng a lawm le tih hi rilru natak chungin ka pawm thiam ve ta..:(

Kei ni Lai ho chu ‘hnambo’ a lawm kan lo nih chu.! Tawng hran leh ze hran Pathian in a hran tein minlo siam sak ve kha humhalh loin leh ngainep in; hnam dang ho hnenah ka pil zo ta! Hnambo, mahni tawng leh zia pawh hrelo chu ngati nge ‘Pawichhia’ mintih mai loh ang?.

Khawvelah Lai hmun hnihah kan awm a:
Hmunkhat chu Burma lamah. Burma lama awm ho chu kawl ho karah an awm a, Kawl tawng hmangin, Kawl zia an hmang a, a then ram inrelbawlna thatloh vangin ram dangah an ral tlana, Vunvar, vunsen, vundum ho bulah UN in a thendarh hlawm a.. Chung ho pawh chu reilo teah an bo thuai dawn.. An mahni inti ‘Lai’ em em mahse an fa fa leh te chu an awmna ram/ an ral tlanna mi ho angin an chhuak tawh ang. (more…)

Mahni in X-Ray nan

Sunday, August 4th, 2013

Tunge I nih tih I inhriat chian duh tak tak chuan, heng zawhnate hi inzawt la, dik takin han chhang kauh kauh la, tunge inih chu alo lang ruak mai ang:-
i) I duh apiang nei thei dawn ta la, Eng thil nge neih I chak ber?
ii) Eng ngeni I ngaihtuahna luah tam ber tu?
iii) Eng atan nge I sum neihchhun ang angte I sen ral nasat ber thin?
iv) I hunawlah engnge I tih tam ber thin?
v) Tute ang mihring bula awm nge nuam I tih ber thin?
vi) Tute ang hi nge I ngaihsan thin?
vii) Eng thil hian nge I thin tiur thin a, tinui thin che?
viii) Eng thil tih nge nuam I tih a, eng thil tih nge I hreh deuh tlat thin?
ix) Fb ah hian, Eng ang Group-a awm nge nuam I tih a, Eng ang Post hi nge I comment loh theih loh chi?
x) Eng ang Post hi nge I comment peih ngai loh thin?
Mahni theuh in exam nan aw