2016 MIZORAM

January 11th, 2017 9:30 pm by chhana

* MPL champion Aizawl FC chuan nikum lama an khelh that rah zoin I-League an khel ve ta. A vawikhat nan Aizawl FC hian Kolkata club tha Mohun Bagan chu Kolkata khawpuiah 1-3 in an hneh lo a, Aizawl FC te an khel tha ve pangngai viau in a lang. Aizawl FC hian khualmualah point hlawh chhuak lo mah se inelna tikimtu an ni ringawt lo tih an lantir a, game mawi an khelh miau avangin India rama football ngainatuten Mizo club hi an fak a, Kolkata-a Mizo awmte’n MPL club-te an ṭawiawm ṭha hle bawk.
Aizawl FC 0 – 1 Bengaluru FC, hei hi Mizorama I League kan en hmasak ber a ni. Chaklo mah ila a ropui thlawt. Vawikhatna a ni bawk a, en tum kan thahnem hle. Ticket changlo tam zia kha! A hnuah ticket phuahchawp (a ni mai ang chu) siam hial a nih kha.
A lungthu kimnaah erawh chak hmel hmu in DSK Shivajians chu 2-0 in kan hneh ve hlauh a nih kha. Mizo mipui kan va lawm em!
I League-ah hian team kua awmin anni hian home leh away-a an khelh kual vek hnuah Bengaluru chuan point 32 hmuin an champion a, Salgaocar leh Aizawl FC te hian point 16 ve ve hmuin kan hneh hmasak ber Shivajians in point 15 an hmu thung.
Salgaocar nen kan point inzat mah se head to head a kan phak loh avangin (1-1) & (0-1) dinhmun chhe zawkah kan ding a, Shivajians hian kan aiin hmu tlem zawk mahse sawm (invite) annih avangin an tla ve thei bawk silo. Division hniamah kan awm leh nghal ta a nih hi!
Amaherawhchu, AIFF dan mak tak hmangin an khel leh thei dawn a nih hmel a; a lawmawm tho mai.
* Mamit Bazar Venga Saikhuma (35)-te chhungkua chuan papàr nia hriat chu chawhmeh atan hmangin an ei a; chaw an ei kham hnu deuhah an vaiin an pum an sawisel a, khawṭhaloin an zût bakah, an luak avangin Mamit District Hospital-ah dah luh an ni. Pa eitute hi Saikhuma bakah a nupui Ramdinmawii (34) leh an fate – Saihmingthanga (12), Biakrinawma (10), Malsawmtluanga (8) leh Miriam Lalremruati (3)-te bakah, an mikhual VL Hriata (20) s/o Liankhama, Tuikual, Aizawlte an ni.  
Pa an ei atanga ni ruk hnuah an fa ú ber dawttu, Biakrinawma chu Mamit Hospital-ah a thi a, a chhang chiah Malsawmtluanga pawh Mamit damdawi-inah bawk a thi leh a ni.
Saikhuma chu a nat zual avangin Aizawl Civil Hospital panpui nih hnuah, a thi ve leh bawk.  Thlan khata an pafaa an han mu tlar chu an lainatawm kher mai! Mi dang palite pawh Mamit DC leh Officers Club-te’n Aizawla phurh thlen dan tur ngaihtuahin, Aizawl Civil Hospital thlenpui an ni a; an fa ú ber Saihmingthanga chu ICU-ah dah nghal niin, mi dang pathum – Ramdinmawii, an fa naupang ber Miriam Lalruatfeli leh an mikhual VL Hriata te chu Casualty ward-ah enkawl mek an ni thung.  
Nu ber hi a tha viaua a lan laiin a boral ve leh hlauh mai a; a hnuah an fa u ber a boral zui bawk. Chumi hnuin an mikhual Vanlalhriata (20), Tuikual South, Aizawl chu hun eng emaw chen enkawl a nih hnuah Aizawl Civil Hospital ICU-ah a thi ve leh a ni.
Health minister Lal Thanzara chuan, “March 4, 2016 tlaia pâ ei vanga mi pali laiin nunna an chán hi a pawi ka ti tak zet a, he thil thleng ka hriat hian min tihhrehawm hle a ni,” a ti a; “Mamit leh Aizawl lama Health department lama thawktute’n theihtawp an chhuah a; ni mah sela chhan theih loha an boral ta hi a vanduaithlakin a pawi ka ti tak zet a, Pathianin khawhar chhungte a awmpui tlat ka beisei,” a ti bawk.
Dam chhuak awmchhun, Miriam Lalremruati (3) hian mi lainat a hlawh hle a, a \anpui nan hmun hrang hrangah bawm dawh a niin zaithiam hrang hrangin hmun hran hranah concert te neiin hetianga an sum hmuhte hi a \anpui nan an hmang bawk.
Tin, ‘Kan phal thei lo’ music video hi Saikhuma te chhungkua lainattu ṭhianho intelkhawm (Project Miriami) bultumin Mamit Officers’ Club leh Mamit khawpui chhunga mimal dawr leh mi ṭhahnemngai te thawhlawm tlingkhawm aṭanga buatsaihin siam a ni bawk a; heta hla te hi Lalrinchhana Hrahsel, Mamit Bazar Veng phuah a ni. Mizorama zaithiam lar Lalfamkima, Zoremi Ralte leh Mamit nula zaithiam Lalduhawmi Pachuau ten he hla hi an sa a ni.
*Lirtheia life time tax (kum 15 chhung) chu tihtawp a ni Kum 5 atan chhiah pek tawh tur a ni. Hei hi Council of Minister chief minister Lal Thanhawla hoa CS conference hall-a ṭhukhawm remtihna a ni.
Transport deptartment hotute hnen aṭanga thudawn danin, sorkar aṭangin lirthei chhiah pek dan phung tidanglam tura rawtna an dawn avangin Mizoram Motor Vehicles (Taxation) Act, 1996 (5 of 1996) an duang a.  Dan an siam tharah hian life time tax-a kum 15 atana chhiah pek ngai ṭhin chu tihtawp a ni. Life time tax hi road tax tia thlak niin, lirtheite’n chhiah kum nga atan zel an pe tawh dawn a ni.
MNF party chuan thuchhuah siam nghalhun bithliah neia vehicle lifetime tax lak hrim hrim titawp turin Mizoram sorkar an phût tih an tarlang.
*National Food Security Act hnuaiah Ration card siam that a ni a; he thil hi thil tha tak leh hmasawnna tur a ni laiin diklo a’n tam dan em em kha a mak a; Setana meuh paw’n ‘em em a’ a ti hial ta ve ang! Khawilai card hnih khat emaw lo diklo zeuh chu nise a la hriatthiam theih a. Mahse, veng pum a diklo te a awm nual mai a, a ram buaiin kan buai a ni ber mai a nih kha.

Hetiang a nih tak avang hian a changtu department lam insawithiamna pawh a lo lang ve nghal zat a; a tira a siamtute tih dikloh vang leh computer-in a man fuh theihloh vangah te an puh mai a nih kha. A changtu minister lahin VC/LC hotute a puh hmiah mai bawk!

He thil hi a mak ngawt mai! A buaipuitu khawtlang hruaitute hi chuan uluk theihtawpin an buaipuiin a rinawm a; chuvangin, department lam inthlahdah vangah mipui chuan kan puh deuh ber niin a lang.
Pian ni leh thla inang thum mai leh pian kum diklo nasa lutuk te kha chuan computer chianloh vang a nih nghawt hmel loh hle a ni.

Tih dikloh a awm tih hriat a nih hnuah sorkar (LC/VC) lam chuan siamthat hna an buaipui ve nghal a; mahse, mipuiin pawisa kan seng leh kher kha a mak ngawt mai bawk. An tih dikloh siamtha tur an nia, mipuiin kan tuar leh daih mai kha a mak ngawt mai. A tam lemlo bawk a, phun kan tam lo mai pawh a.

Hmeichhe hming dah hmasak an duhna thinlung kha hriat a chakawm khawp mai bawk. Card holder-ah chhungkaw nu ber dah tur a ni a; an awmloh chuan fanu/tunu/……tih a ni chhawng duat mai kha a mak a ni.

* Kumthar kan lawm zo chauh a; a am fal chuan an la nawn hial awm e. Zing khawvar hma deuhin Zoram chu lirnghingin min nuai. Hemi tum hian chuan a na lemlo niin a lang. Kum chanve em pawh kan thlen hmain na deuh zawkin min nuai leh a nih kha.

He lirnghin hunlai hi kan hriat angin Nilaini zanah a ni a; mi tam tak chu kan inkhawm lai a ni in a rinawm. Inkhawm lai pawna chhuah tum kan tam viau awm e. Khawlaia awm lahin biak in an pan thung thu sawi tur a awm nual bawk. “biak in pawh ringlo” tih ang zawnga thu vaivir duh tawk an awm a, ‘zurui leh pawna awm zawkin biak in an rawn belh hram hram laia kohhran mi zawk han tlan chhuah daih mai chu’tiin ngaihdan kherkhiap taka sawi duh pawh an awm nual bawk niin a lang. A mawh lo e.

Enganga thlarau lama chang sang pawh ni ila, thihna emaw accident hi cho chi a ni lo a, mahni sahimna zawn hi mitinin kan mawhphurhna a ni. Dawihzep uchuak tak erawh a awmtheih tho awm e.

*Sorkar laipui chuan India ramah pawisa chheprelh leh pawisa lem tam lutuk tih ziaawm deuh beiseiin cheng 500/- leh cheng 1,000/- note te a ti thi a; mipui kan buai phili hle.

India ramah hian pawisa lem hi a leng vel nasa viau mai a; an man thu pawh chanchinthar lamah kan hre chamchi a nih hi. Chutih rualin, pawisa chheprelh, chhiah awl duh avanga bank a dah loa, mahni ina lo kawl mai an tam hle niin a lang. Hetiang ho hian bank ho hlawh hmuhna ve an tihbo nual avangin sorkar tan chuan thil pawi tak a ni.

Thui tak ruahmanna an kalpui tawh chu a rinawm a, hetia, thawklehkhata an ti thi(?) thut mai hi mipui chuan kan tuar hle. Mahse, thil tha zawk chhuah na tur chuan buai deuh rap rap pawh a tul chang a awm thin a, chuvangin, he thil hi chuan rah duhawm zawk a chhuah ngei a rinawm. Opposition party lam pawhin demna chu auchhuahpui tho mah se, an thlawp ve viau tho niin a lang.

Sorkar laipui hian cheng 500/- leh cheng 2,000/- note an ti chhuak nghal a; hei hi chu hman lai aiin a hlailo deuh zawk a ni. Hetih laia a lem a chhuak hman hi erawh thil mak tak a ni.

* LPS Cable network chuan a tumngana atan Youth Icon a buatsaih leh ta a; hetah hian K.Lalthlamuankimi (Mami), Rulchawm nula chu Icon atan thlan a ni. Rulchawm nula hian a duhthusam hlawmtlinna a chan rualin, lawm luat avanga hnukulh leh lungchhiain lawmman a dawng.
Youth Icon thlannaah hian mi zanga chuang lai an tel a; hetianga han tlin theih hi chu thil ropui tak a ni ve hrim hrim mai.
Kum 2012-a H.Lalrempuia hnua Youth Icon hmasa leh ber, kum 18 mi Mami hian a sang pathum zinga a elpui R.Lallawmsanga (Bethlehem Vengthlang) leh Eunice Lalngaihsaki (Republic Vengthlang) khumin Icon lallukhum a khum a. Judge panga point pek leh mipui vote-ah a sang ber.
Khawsak awlsam lo tak hnuaia pi leh puin an enkawl sei len Mami chuan, “Engtin nge pakhatna ka nih theih zawk? A mak lutuk!!” a ti.
Youth Icon pangana chuan Pathian leh a pi leh pu hnenah lawmthu a sawi a, a nih chak em em a ni ta mai chu a duhthusam a takin a thleng tih a sawi.
Mami hian intihsiak a hmachhawn chhungin lengzem leh lenglawng hla nem lam, rilru hneh thei chi a sa tlangpui a, inelna hnuhnung ber Top 3 Contest-ah ‘Hmangaihna Rinawm’ leh ‘Hling Zinga Rose Par’ a sa.
2006 atangin LPS Vision-in zai thiam thlanna ‘Youth Icon Contest’ a buatsaih tan. Mami hi hmeichhe zinga Youth Icon ni thei pathumnna niin Zoramchhani (2006) leh Malsawmtluangi Fanai (2007) hnung a zui a, mipa zingah R.Lalhmangaiha (2009) leh H.Lalrempuia (2012) chuan hlawhtlinna an chang tawh a ni.
Grand Finale hi official sponsored Zoplast neitu Lalhmangaihzuala Pachuau leh a nupui Lalmuanpuii bakah, Mizo Zaimi Insuihkhawm Pawl (MZI) Treasurer Helen Zaithankungi leh General Secretary Isak Malsawmtluanga’n a hmunah hmanpuiin lawmman an sem.
Youth Icon thar hian Rs 1,50,000/- leh trophy bakah mimal thahnemngaite hnen atangin thilpek engemawzat a dawng a; Music video Chiangtea Videography, Sihphir in an siam sak bawk dawn a ni.


“Vote thlak” chungchang a kei leh United States.

January 11th, 2017 6:39 pm by Henry Vangchhia

Ka blog a mi ka rawn suan lut e:

Kum 2007 atang tawh khan United States-ah hian “vote thlak” thei dinhmun a insiam ve thei ni tawh mah ila ka phur tehchiamlo bawk nen ka ngaihsak ngailo. Thiante hnenah pawh ka tumloh thu ka sawi zeuh zeuh tawh thin bawk. Kum 2008 a United States President thlanna a awm khan, ram tan a mi tha a ni dawn a ka hriat vangin (a campaign auhla vang a ni ang), vote thlak tumna lam nei chuang hauhlo chuan ka nupui hnenah Barack Hussein Obama vote ngei ngei turin ka fuih. Ka fuih mai pawh nilo-in ka tur zawk mah awm e. Vote tumna lam neive lem rihlo mah ila, awmna ram atan chuan mi dik leh ram tan a tha tur ni a ka ngaih chu party politics a buailo-in kalo tan ve em em ringawt mai a nih chu.

A campaign auhhla a ropuiin a ukil nih hriat tak a tawngkam thiam Hussein Obama chu President a nita ngei a, a lawmluh ni pawh a pui hep hep teh e! Mahse, kum khat pawh a ral hma chuan kalo tanta kha inchhirna leh inngeina deuh ka neita tlat pek a. A rei zel a, mihring lem tak leh America ram chakna haw tak (he seem to hate strong America), khawvel a chak bik nih duhlo niawm taka engkim kalpui a ni chhota zel mai a ni. America hmelma Iran a thlawp a, remchang a hmuh apiangin America hmingin ngaihdam a dil a, middle east a America thiantha ber leh Democracy ram awm chhun chu a hawta em em mai a nih kha. Tichuan, kum 4 a ral dawn… 2012 a inthlan awm leh turah Hussein Obama a ding leh chu a lungchhiat thlak lek lek zawk a ni. Tin, hna a thawh hma a Nobel Peace price an pek khan a lawmman siamtute a ti nep sawtin ka hre nghe nghe. Hussein Obama leh Romney te chu ram tan a tha lo tur nia ka hriat ve ve vangin vote thlak lam ka ngaihtuah leh talo a, ka nupui pawh chuan a tu zawk mah chu a vote ta lo a, kan chhungkua atangin 2012 inthlan khan vote a tla talo a ni.

Kum 2016 inthlan lo awm tur chu Republican party a candidate an tam hle mai a ( mi 17), mi tha deuh hlir nia ka hriat anni hlawm nghe nghe. Democratic party candidate te erawh: pakhat chu kan awmna state, Maryland governor hlui, a mayor nihna a record chhe fahran, governor a nih pawh a record tha nei lemlo a ni. Pakhat dang lah chu Democratic hming a ding independent candidate leh Socialist a ni. An hmeichhe neih chhun lah chu dawt sawi avanga a hna lian thawh hmasak ber atanga an ban, record tha reng reng kum 30 vel chhung neilo a ni. Republican lamah chuan politics lam a hming la nei ngailo pakhat, frank tak mai, mi pawisawi palh hlauhna neilo a thil a nih ang ang a sawi chhuak phawng phawng mai chu an chuk rawn ta luai luai mai a — a chanchin chhui chian chakna ka neita tlat! Read more »


November 2016, Mizo(ram)Diary

December 26th, 2016 11:17 am by chhana

1st. Tuesday: Aizawl Municipal Corporation-a councillor 12-te chu India ram khawpui hrang hranga tualchhung sorkar (municipal) rorel dan zir tur leh an hnathawh dante zir turin Aizawl aṭangin an chhuak. AMC councillor-te study tour-a kalte hi deputy mayor Lalringliana’n a ho a ni.

2nd. Wednesday: SBI digital branch thar, ‘sbiINTOUCH’ tia vuah, Chanmari, Aizawla mi chu chief Minister Lal Thanhawla’n a hawng. sbiINTOUCH hi khawl changkang ber ber hmanga thuam a ni a, independent (mahnia inrêlbâwl) branch a nih ang leh digital branch a nih angin hnathawk pawh mi pahnih chauh dah a ni. Read more »


MIN NGAIDAM LUL RAWH

December 15th, 2016 11:49 am by H.zate

MIN NGAIDAMDAM LUL RAWH
– H.zate

[Khawvel hian eng chu a inherchhuahpui thin ni maw! Ka awm mai mai hi thawnthu mak tak tak hian min rawn deng zut zut reng a. Ka nat phah hial thin. He thawnthu pawh hi a tak, inthiam lo leh rilru hreawm tak atang lo chhuak a ni a. Ka thiam ang tawkin ka han ziahsak leh dawn chu anih hi. A….. A ziah ka rawn khawrpum ni berin ka hre zawk! ]

A kum, a hun leh ni ka la hre reng! Khawvel hmasawnnain a ken tel WhatsApp group pakhatah kan awm hova, chuta inchhar chu kan ni. Ka thian pakhat nen in inkawm thin a, ani avang chuan kan inbe chho ta a, kan inkawm ngeih ve hle anih kha. Khang hunlai khan nuam ka ti a, a hlimawm a, a ngaihawm! Read more »


October 2016, Mizo(ram) Diary

December 15th, 2016 11:48 am by chhana

1st. Saturday: World Old Age Day a ni a, Mizoram hmun hrang hrangah hman a ni a, sorkar mi pawimawhte pawhin an hmanpui. Kum 2011 chhiarpuiah senior citizen (kum 60 chung lam) Mizoramah 49,799 an awm a, chung zinga 25,469-te chuan tar pension (old age pension) an la mek a ni.

2nd. Sunday: India hnampa, Mahatma Gandhi pian champha a ni a, amah hriatrengna leh zahna lantir nan sorkar hotu liante’n Zodin Square-a Mahatma Gandhi limah pang¬par an dah. India Hnampa zahna lantirnaah hian Governor Lt.Gen. Nir¬bhay Sharma-a’n pangpar dah hmasa berin, chief minister Lal Thanhawla’n a dawt a; a hnuah Legislative Assembly speaker Hiphei, Home minister R.Lalzirliana, minister dang te, parliamentary secretary-te leh MLA te, Chief Secretary, DGP leh sorkar officer dangte’n zahna pangpar an dah a ni. Read more »


Lawm chunga Lalpa rawngbawl

December 15th, 2016 11:45 am by Sangpuiipa

Sam 100-na hi nun kawng hruaina tha tak niin ka hre thin. Ringtu, Pathian rawngbawltu te hian kan nun enfiah nana hman fo tlak niin ka hria.

Lawm chunga Lalpa rawngbawl hi thil harsa ve tak a ni. Mihring nun hi chhut ila, kan lawm hun aiin kan lawmloh hun hi a tam zawk angem aw tih tur khawp in kan lawmlo nasa thin. Lawmna tur kan hmuh nasat poh leh lawm lohna tur a tam mai ni te hian a lang.

A enga pawh nise lawm hi zir theih a ni a. Lalpa rawng bawl tur phei chuan lawm lo chunga rawngbawl hi Pathian pawhin a duh ber a ni lemlo ang. Bible a kan hmuh ang hian Lawm chungin Lalpa rawng kan bawl tur a ni ang. Lawmlo chunga rawng kan bawl hian kan rawngbawlpui te mai bakah keimahni ngei pawh hian hrehawm kan ti thin chu a nih hi maw.

Read more »


Triau Trackx-Lungtat Par (official music video)

November 6th, 2016 10:02 am by TheHumanBot

LUNGTAT PAR CHUNGCHANG HI
(Ziaktu ka hre lo, WhatsApp forward)

Hmanlaiin Sailo lalte leh Pawih/Sukte-ho kha an indo nasa thei khawp mai a. Sailo lal zingah Vanhnuailiana kha a ropuiin Pawih do nasa ber pawl pawh a ni a, a hmingthangin a ropui bawk a, a hunlai kha tun thlenga kan sawi țhin ‘Tualte Vanglai’ an tih phahna kha a ni reng a.
Read more »


Triau Trackx – LUNGTAT A PAR

November 3rd, 2016 10:02 pm by

Nilai zanlaiah min rawn call
Oh oh oh oh oh
Eng dangmah sawi lovin
Ohh.. min rawn hnawl
Oh oh oh oh oh
Amak ka ti ana ka ti
Oh oh oh oh oh
Mi bum hmang ilo ni. Read more »


September 2016, Mizo(ram) Diary

November 3rd, 2016 9:54 pm by chhana

1st. Thursday: India ram pumah petrol leh diesel man tihsan a ni a, Mizoramah pawh hman ve nghal a ni. Petrol man chu litre khatah Rs. 3.38-a tihsan a ni a, diesel man chu litre khatah Rs. 2.57-a tihsan a ni thung.
2nd. Friday: Committee of Privileges, Delhi Vidhan Sabha chu an chairman Somnath Bharati hoin Mizoramah an rawn zin a, Mizoram Legislative Assembly-a Committee of Privileges-te nen an chairman PC Zoram Sangliana hoin Assembly Secretariat Annexe building-ah an inkâwm. Read more »


A VA LUNGLEN THLAK EM!!!

September 14th, 2016 4:59 pm by kilung

Kum 2009 khan ka kuthlei in Internet ka khawih ve chiam a, he Site (misual.com) ah hian kan petek lut ve hlawl mai a. Post leh Coment kan en thla zei zei a, Post ‘Hot” leh ‘Hit’ em em an en chho a, chuta tang chuan ka lut ve ta chhen a ni. Thenkhat chuan he Group Member tha tak tak ni chung in min boralsan tawh a. An va uihawm tak em!!

Pu.Hv-a ate, Funny-a, Aryan-a, etc. In va ngaihawm e aw :-D
Funnya’n ” Intellectual tak in min han argue teh u” an ti pang pang te kha a va ti nuam em!! :-)

Tun ah chuan Facebook leh Whatsapp ah min pemsan zo ta!!