KA MITTUI A TLA!

June 17th, 2017 2:35 pm by Leo dtea

Room kawngkhar inkalh ri khep in min ti harh a, tuk dang ang bawka thawh chhuah ka tum lai tak chuan, kan inah ka awm lo tih ka inhre thei nghal a.

Chu ka awmna room tluka room khawhar chu khawvel hmun dang ah a awm theih pawh ka ring lo, a thim in a dai ruih mai a, boruak pawh chu a rit hle bawk a. Chu room thim ruih mai chuan mitthi khaw lam nena inzawmna a neih ti chiang tur in, chiang lo ruaia ruangam lo che phei hrut hrut ka hmu thei a, mahni inrintawkna nei chung a uluk tak a ka lo thlir pawh in, ka thil hmuh chu mitvai thil hmuh sual mai mai a ni lo tih ka hre thei bawk.
Chu thil chuan ka lam a rawn pan hnai hret hret tih ka hmuh chuan chi-ai ruk na riau ka nei a, kar lo ah ka khum bul hnai chu a lo thleng ta mai a! A hmel ka en nak chuan ka thau ah min man a! dik tak chuan tawng chhuak tur pawh ka awm tawh lo.
Chutia chechang lova ka awm reng lai chuan thawm dang in min rawn ti harh zawk a, room kil tin atang chuan tuna ka thil hmuh mek ang deuh hlek leh tlema ang lo deuh tam tak an rawn chhuah belh a, a then mawngtawlh in, a then bawk vak in an lo chhuak a, a then phei chu an che hlei thei lo zawk hial a ni.
Ka huaisen na zawng zawng te nena intih pachan tum a, ka han inseh ruh meuh chuan chu room thim tak chu thawklehkhat ah a eng ta uar hian ka hre thei a, a boruak rih dan leh boruak khawhar thlak tak erawh a la danglam chuang lo. Chung ka thil hmuh te theihnghilh thak khawp ka in ngaihtuah lai chuan, chiang lo ruai, mahse hriatthiam theih tho si a min be tu an awm ta tlat hian ka hria a. Ka hawi kual a, a tira hlauh ruk na nen a ka lo hmuh, ka enchian ngam loh te kha eng dang ni lovin, nausen buchip te te, lungchhe tak, mittui nen min lo thlir dauh dauh tu te lo niin.

An mitmeng fiah fai tak, mittui in a chiah avanga lang de chiai te chuan thil tam tak min hrilh a ni.
“He khawvel eng hmu tur hian duhthlanna siam tu kan ni lo a, duh thlanna siam tu zawk kan nu leh pa ten hetiang dinhmun ah hian min siam ta a ni. Minung khawvel a kan awm ve phal lovin, a then chu kan pian hun hma a tih boral in kan awm a, a then chu kan pian hnu lawk ah, tin a then dang leh te phei chu kut leh ke kan neih fumfe hma hauha tih boral kan ni”.
Ka nausen hmuh te chuan ri hauh lova an mitmeng hmang a thu min hrilh lai chu ka ngaithla reng a, an zinga pakhat chuan, “minung khawvel ah hian kut leh ke kim nei ve a, tualchai ve te hi kan châk em em asin. Ka pu, i fa te ngei tualchai lai te hi kan thir ru reng a, kan dan zawh rual loh rorelna dik lo avang in kan thei ve ta si lo a, kan mittui hi dan rual loh in a luang thin asin”
“Mihring ni tur in nu chhul ah kan nih dan tur ang thlap in ka awm ve a, tih sual kan nei bik lo asin, a then nu pum chhung ata paihchhuah in kan awm a, a then a pangngai taka hrin chhuah ni si in kan nunna lak sak in kan awm a, kan ruang hmu tu zing a tam tak lah in min râp a, min hlau a ni si a, kan chan hi a rapthlak in a lungchhiatthlak..”
“Tunlai khawvel thiamna sâng tak te, damdawi thiamna sâng tak te pawh hi kan tan chuan a hutthlalaawm in, a nunrawng a ni. Mihring nih ve theihna tur a kan tan a kawng hawng tu kan nu leh pa te hian, ngati nge kan lo pianchhuah hi an duh loh tlat le? Keimahni ang hi tam tak an la awm belh ang a, chung te pawh chu lo thlir liam mai mai i tum em ni?”

Ka biang a mittui luang hnawng chap chuan mumang ram atang in min ti harh ta a…..
(Ziak/ziah zawm leh zawm loh tur tih sual ka nei nual in ka ring, a theih chuan comment lamah min lo hrilh ula…)

Similar Posts:

Recent Posts:

5 Responses to “KA MITTUI A TLA!”

  1. 1
    Sangpuiipa Says:

    1st

    Report this comment

  2. 2
    Henry Vangchhia Says:

    Thu hi in phuah thiam bik thin mange aw :D hairehai

    Report this comment

  3. 3
    Pakak Says:

    Lairil a fan

    Report this comment

  4. 4
    Leo dtea Says:

    #1 hmana 1st an inchuh sup sup lai khan silent reader ho pawn kan nui chhuak huk zel. Khang gun lai ata tawh kha net in nei that hlawm ka lo ti rilru viau.
    #2 infakderna mah ni se a lawmawm thin.
    #3 comment lawmawm

    Report this comment

  5. 5
    Awmtea Leo Khiangte Says:

    Mittui ti tla dawn ila…

    Report this comment

Leave a Reply

You must be logged in to post a comment.