July 2014, Mizo(ram) Diary

August 2nd, 2014 12:13 am by chhana

1st. Tuesday: Mizoram police, Subsidiary Intelli¬gence Bureau (SIB) leh 14th Assam Rifle ṭawngkawpte chuan Keifang dáiah AK-56 pahnih, AK-47 pali leh a magazine pathum, LMG pakhat leh a magazine pakhat, GS pathum leh a magazine pathum, M-4 Mark 2 UBGL pakhat leh a magazine pahnih, 5.56 mm mû 125 leh 9.96.mm mû 1070 silai 11 leh a mû eng emaw zat 407 truck MZ-04 7276, Champhai aṭanga Aizawl pana tlanin atangin an man. Silai man chungchangah hian thu zawhfiah atan Ngaizawl khaw mi pathum – Thangdeihpianga (38) d/o Vungkhanang, Khaideihpianga (30) s/o Thangkhenbuai leh, Lalramnghaka (26) s/o Saimana te man nghal an ni.

2nd. Wednesday: ` Rs 95,000,0/- senna Vanapa Hall kawta Vanapa lim dah thar chu Art & Culture minister R.Romawia’n a hawng. Vanapa lim hawnna inkhawm hi Art & Culture director Ngurbiaka’n a kaihruai a, Vanapa lim dinnaa hmalak dante A&C research officer C.Laltlankima’n sawiin, lim siamtu James Khamliansawma’n a siam dan a sawi. Lim hawnnaah hian Vanapa tupa, Chawnglianchhinga pawh a tel. He lim hi ft. 5’6″ a sang, kg. 250 vela rit a ni.

3rd. Thursday: Excise & Narcotics department anti-narcotics squad-te chuan heroin gram 42.5 leh a neitua puh Than¬chhingi (43) d/o Lalsiama, Zokhawthar an man.

4th. Friday: CID (Crime) hnuaia Special Narcotic PS staff leh BSF ṭang dun chuan Rangvamualah ganja kg. 12 an man a, a neitua puh Vanlalhlua (30), Tuingo, Myanmar, tuna Rangvamuala khawsa mek an man bawk.

5th. Saturday: Lunglawn Games & Sports Association chuan, LDFA hnuaia first division-a an luh lawm nan Lunglawn YMA Hall-ah blood donation camp an buatsaih a, bialtu MLA S.Laldingliana’n a hmanpui. Lunglei Civil Hospital tan thisen unit 21 an pe a, a petute hi mipa 19 leh hmeichhia pahnih an ni.

6th. Sunday: Bungkawn Vengthar Kohhran Thianghlim Biakbuk thar chu Executive Chairman, Dr. LB Sailo-in a hawng a, thu sawiin ‘Kohhran Thianghlim chu Zoram Kohhran naupang te ni mah se, thlarau thianghlimin a chenchilh tlat avangin tisa leh thlarauah malsawmna an dawng zela ni’ a ti. Biakbuk thar hi ` 15,89,316/- senga sak a ni a, \um 547 hnatlanga thawh a ni a, a dung feet 36 leh a vang feet 29 a sak a ni. A hawnna inkhawm hi Vengthar Kohhran Thianghlim Chairman, Pu Lalvuana’n a kaihruai a ni.

7th. Monday: MNF party dintu, President hlui leh Chief Minister hlui ni bawk Pu Laldenga thih champha vawi 24-na a ni a, MNF General Headquarters chuan Treasury Square-a Pu Laldenga thlanah a hriatrengna hun an hmang. Pu Laldenga hi 1927 June 11 khan Pukpui, Lunglei-ah a piang a, kum 1986-a inremna ziah fel a nih khan CM a ni a, a hnu, 1987 inthlanah sorkarna changin CM a ni leh a ni. Kum 1990 khan a hrawkah Cancer rang chi hmuh a ni a, New York damdawi inah enkawl ni mah se, a lo haw kawngah 1990 July ni 7-ah khan London tumhmunah a thi a ni.

8th. Tuesday: Mizoram Assembly budget session ni thum chhung awh tur chu ṭan a ni a, Finance minister Lalsawta’n thla li (August-November) chhunga Mizoram sum hman tur Vote on Account cheng vbc. 2377.88/- a pharh a; UD&PA minister Zodintluanga’n bill pariat a pharh a, LR&S minister R.Romawia’n ‘The Mizoram (Land Survey) & Settlement Operation (Ammendment) Bill, 2014 ‘ leh, School Education minister H.Rohluna’n ‘The Mizoram Board of School Education (Ammendment) Bill, 2014′ an pu lut a; sawiho hnuah pass vek a ni.

9th. Wednesday: Mizoram Governor Pu Vakkom B.Purushothaman chu central sorkarin Nagaland Governor ni tura a sawn avangin Mizoram a chhuahsan a; Mizoram Governor thar tur Dr. Kamla Beniwal chu lo thleng ve nghalin Raj Bhawan Durbar Hall-ah Justice B.K.Sharma, Judge Gauhati High Court in Mizoram Governor ni tura rinawmna thutiam tirin a la lut.

10th. Thursday: Mizoram Assembly pasarihnaa budget session, July 8-a ṭan chu ni thum chhung neih a nih hnuah Speaker Hiphei-in tiam chin awm lo in a ti tawp. Session-ah hian starred question 32 chhan hman niin, chhan hman loh 17 a awm a, unstarred question 67 lut zinga 51 pawm a ni bawk.

11th. Friday: 1st MAP constable, Sakawrdai post-a awm mek Malsawmkima, Sakawrdai chu a silai leh a ṭhianpa police tho silai kawl lai nen a tlanbo a, police-a a ṭan hmaa HPC(D)-a inhnamhnawihna lo nei ve tawha hriat a nih avangin, HPC(D) nen inzawm leh an tum nia rinhlelh a ni.

12th. Saturday: Lalzammawia (14) s/o Zamuana (L), Ṭhekpui khua, a u Vanlalpeka, Khuangthing hnena awm mek chu Ṭiau luia Dardah lí-ah a chesual a; a thi.

13th. Sunday: Mizoram UPC-a Dinthar PYD chuan Aizawl Civil Hospital-a damlote hnenah bawnghnute leh artui an sem a, damlote’n Pathian aṭanga damna an hmuh theih nan ward tinah an ṭawngṭai bawk. He an thiltih hi kumin chhunga an project pakhat, ‘Mi dangte tana malsawmna nih’ tih bawhzuina a ni.

14th. Monday: Falkland Veng leh Zemabawk inrina Vailui kama Assam type Lalramenga Bethlehem Veng in, hnam dang mistiri Samsul Haque te chhungkaw luah lai chu leiminin a hnawl a, mi pali hliamin, nu ber a boral. In chim lai hian mistiri te chhungkaw member te bakah helper pahnih an awm lai a ni.

15th. Tuesday: Mizoram Legislative Assembly-a Estimates Committee member-ten National Highway 54, Buichali leh Kawnpui inkar kawngpui siam that mek tlawhin an hnathawh dan an enfiah a, he kawng siam that nana sum ruahman, vawi hnih ennawna tihpun a nih chhan te, tun hnaia Kawnpui leh Kolasib inkar kawng, tlawmngai pawl hrang hrangten hnatlanga an siam that chu thawm that dan tur ruahman a nih theih nana endik an nih thu an sawi.

16th. Wednesday: Lawngtlai Dist.-a politician hlunte zinga mi, Lai Autonomous District Council Chairman hlui, Pu F. Rohnuna chuan MNF a zawm in Lawngtlai bazar-a Areopagy-a inkhawmah MNF President, Pu Zoramthanga’n a lawm lut.

17th. Thursday: AMC-in Aizawla sumdawnna khuahkhirhna dan a hman mekah MIMA-in hnam dang sumdawng danna tur telh an phut avangin zing dar 5 atanga tlai dar 5 thleng, AMC huam chhunga sumdawnna hmun zawng zawng khar a ni. Bazar puia thlai zuar ho tlem an inzawrh luih avanga buaina tenau a chhuak tih mai loh chu veng tla birh deuh tak thlengin \ha takin an zawm.

18th. Friday: Labour, Employment & Industrial Training department hnuaia Mizoram Building and Other Construction Workers Welfare Board chuan Sakawrtuichhun quarry-a thawkte hnenah a thlawnin lukhum (safety helmet) an sem. Sakawrtuichhun quarry-ah hian chhungkaw 150 velin lung la leh rawra chhúin ei an zawng mek a, safety helmet hi hna thawktu mi 255 hnenah pek a ni. Heti hian Mizoram Building and Other Construction Workers Welfare Board hian quarry pathumah safety helmet 546 an sem chhuak tawh a ni.

19th. Saturday: Lalremtluanga Sailo (31) s/o Lalpiangliana Sailo, Mualpui, Aizawl chu electric current-in a man hlum. Lalremtluanga hian an inah current leak siam ṭhat a tum a, electric hruia current kal a khawih palh avangin a man ta a; Alpha Hospital panpui a nih laiin a thi a ni.

20th. Sunday: Lawngtlai District-a Lungtian khuaah Hmingthanpuia, kum 33 miin a u, Hmunliana (35) Lai Autonomous District Council hnuaia Lungtian-a Asst. Revenue Officer Office-a Circle Supervisor chu a that. Hmingthanpuia leh Hmunliana te unau hi Thatduna (L) fa, in hrang chang tawh ve ve an ni a, inhmuh thiamlohna an neih avangin a nau zawk, Hmingthanpuia chu a u, Hmunliana awmna inah kalin, thutthlengseia a u mu lai chu tuboh kg 5-in a lu-ah a chhu a, a u hi Lungtian damdawi in panpui a nih laiin kawngah a thi a ni.

21st. Monday: Sihphira Iskut chingtu chhungkaw 442 hnenah Horticulture Department bul tumin `.21,98,025/- man lei tha, Quintal 1,625 chu bialtu MLA, Assembly Dy.Speaker ni bawk Pu R.Lalrinawma’n a sem a, Iskut chu Mizoramin state pawn atanga sum a lak luhna tlemte zinga chhuanawm tak a nih thu sawiin, iskut chingtute chu tam zawka an thar chhuah theih nan sorkarin theihtawp a chhuahpui zel dawn tih a sawi. Sihphira Iskut chingtute hnena Horticulture Department-in lei tha a sem chhuah hi lei tha chi hrang hrang a ni.

22nd. Tuesday: Councillor 19 awmna, Aizawl Municipal Council-a Councillor 10-in an Chairman paihna tur resolution, Aizawl District Magistrate hnena an thlen chungchangah Aizawl DC chuan AMC session a ko a; Session ṭan a nih veleh chairman R.Lalrinawma chuan motion pu luttu, ZNP councillor W.Chhuanawma chu thu sawi turin a sawm nghal a; mi hrang hrangin thu an sawi hnuah postal ballot hmangin vote lak a ni a; paih duhtu councillor 10 awmin, paih duh lotu councillor pariat an awm a, paih duhtu an tam zawk avangin AMC chairman CT Zakhuma chu paihthlak a ni ta a ni. AMC danah chuan, state leh Central sorkar anga no confidence motion a awm lo a, ‘removal of chairman’ tih a awm a; chairman chu paih a nih chuan, a kaihhruai sorkar pawh a ding zui lo tura ngaih a ni.

23rd. Wednesday: Sihphir Branch YMA President Pu R.Lalduhzuala Inah Mizoram buai lai leh sawikhawm hnu chanchin sawihona neih ani a, he hunah hian Sanjay Hazarika, Director, Centre for North East Studies and Policy Research, New Delhi hovin Preeta Gill, Consulting Editor, Zubaan, New Delhi te, Rini Tochhawng, Asst. Professor, Govt. T.Romana College leh Dr Malsawmdawngliana, Asst. Professor, PU College te lokalin, anniho nen hian zirho a sawiho a ni. Tin, Sihphir lama upa ho \henkhat leh tualchhung chanchinbi mi an tel bawk. Pu Sanjay-a chuan ti ti hona atanga a hriat danin North East India a buaina awm tawhah buaina rapthlak ber a nih thu te, India Sorkarin engmah hnemhnanna a a ngaihsak lo chu mak a tiin, Sipai te chet dan hrang hrang report ngaihthlak hian lukhawng pe thei te hnen thleng tura hmalak a ngaih thute a sawi lang a, “Mizoramah hetiang lam hi kum 30 ka zir tawh a, vawiinni a ka thu hriat chuan thinlung a hneh khawp mai, Central sorkar in a ngaihsak lo hi a mak ka ti”, a ti.

24th. Thursday: Lungleia Writers’ Club-in Sub Hqrs. YMA Hall-ah mi hmingtha pahnih an chawimawi a, hengte hi TNT dintu leh enkawltu, Pu Sangthankima leh Padma Shree dawngtu, Pu RK Lalhluna te an ni a, Pu Sangthankima aiawhin chawimawina hi a fapa, Lalsangzuala’n a dawng a ni. He chawimawina inkhawmah hian Dist. HPC Vice Chairman, Pu S. Laldingliana chu khuallian a ni a, chawimawina inkhawm hi Lunglei Writers’ Club President. Pu T. Lalzika’n a kaihruai a ni.

25th. Friday: Aizawl lam aṭanga Zampuimanga thlan thlen hmaah (Melthum area) Maruti Suzuki SX4 MZ-01/F-4166 a chesual a, mi pathum car khalhtu Vanlalchhuanga (24) s/o H.Thangmawia, Ramthang Veng leh Sammy Lalruatpuia (27) s/o Lalremruata, Chhinga Veng te chu a hmunah an thi a, F.Roluahpuia (24) s/o F.Lalhmachhuana, Ramthar Veng chu damdawi-in thlenpui a nih hnuah a thi. Motor-ah hian mi panga an chuang a, Rampanmawia, Armed Veng leh Brenda Lalruatdiki, Laipuitlangte chuan hliam an tuar a, Rampanmawia chu a nat vak loh avangin chhuahtir leh nghal a ni.

26th. Saturday: Animal Husbandry & Veterinary Minister Pu C.Ngunlianchunga chuan District hrang hrang a vawkvulhtute hnena sem tur vawk vulh tur chi India ram State dang atanga lak luh, PIGFED Quarantine Shed, Durtlang-a dahkhawm chu a tlawh. Vawk note hi PRRS awm lohna hmun (free area) atanga lak luh a ni a. He scheme kaltlang hian Mizoram hmun hrang hranga beneficiary thlan bikte hnenah vawk vulh tur pahnih zel a thlawna pek an ni ang.

27th. Sunday: Excise & Narcotics Department, Champhai Station te leh Khuangphah Branch YMA te tangdun chuan Ganja kg 50 (Nylon bag 6-a dah) an man. Ganja neitute – Vanlalliana(26) s/o Piangthara(L), Zokhawthar leh Lalbiakthanga (46) s/o Lengthanga, Hunthar Veng intite pawh an man nghal. Ganja phurhna atana an hman Car MZ 01 C -6672 pawh hrensak an ni.

28th. Monday: Nehru Yuva Kendra Champhai District chuan Champhai D.C. Pu Sangdingliana IAS hovin ama Office Chamber-ah District Advisory Committee on Youth Programme meeting an nei a. Pu Sangdingliana D.C Champhai chuan he meeting hi kaihruaiin department hrang hrang atanga member lo kal khawmte inhmelhriattirna a nei nghal bawk.

29th. Tuesday: Aizawla Mosolman-te chuan Eid Mubarak an hmang. Eid Mubarak-ah hian Mosolman-te chu zing karah Lammualah an kal khawm a, an pathian hnenah an ṭawngṭaiho a ni.

30th. Wednesday: Ṭhalai Kristian Pawl (ṬKP) din champha vawi 63-na a ni. ṬKP Day pual hian ṬKP-te unit tinte’n anmahni remchan dan angin an hmang.

31st. Thursday: Malsawmtluanga s\o Lalngaihawma ITI leh R.Zonunpuii (Tekuri) d\o Lalthankhuma, Chanmari West, te chu BCM ITI Kohhran Hall-ah bialtu pastor Rev. L.Vanlalsanga kutah an innei.

Similar Posts:

Recent Posts:

7 Responses to “July 2014, Mizo(ram) Diary”

  1. 1
    TheHumanBot Says:

    Pu chhana, I display name i thlak a mi? I hming a va lang thei lo ve.

    Report this comment

  2. 2
    chhana Says:

    Thlak hleinem. Keipawh post tu hming khi mak ka lo ti reng a ni. Ka hming hawrawp erawh a kim thap lawi a.

    Report this comment

  3. 3
    H.Vangchhia Says:

    A tha thin mange aw. (Y)

    chhana hming thar chu leh hairehai :D

    Report this comment

  4. 4
    VaiVa Says:

    A va mak awm ve aw.. chhana i post ngei chu a ni sia maw? :p

    Report this comment

  5. 5
    chhana Says:

    Aw ni e, ka submit lai hian tarnet a muang deuhhleka; draft ah dahin mut pahin fon atangin ka tifel ta chauha, a buai ta deuh a ni mahna.

    Report this comment

  6. 6
    Awmtea Leo Khiangte Says:

    Bengvar thlak hle mai. (Y)

    Report this comment

  7. 7
    khawpuia thianhlun Says:

    post tha khawp mai…

    Report this comment