I lo sawi ve tûr a awm lo

June 25th, 2014 5:28 pm by Awmtea Leo Khiangte

January ni 1, 2014-a ka post bak kha ka la post leh miah lo va. Ka khua lam lam a har riau nia. Ka’n rawn ti leh hram ang e aw.

Mizoram leiba chêng vbc. 5,455.95 a nih thu leh mi pakhatin chêng 50,008.06 theuh ba kan neih thu kan sawi zing ta hle mai. Bat neih duh lo leh nei ngai lo tia inchhâl mi fel tak takte pawh khân ba in lo nei reng zuk nia! Heti chung hian eng dang dâwn lovin kan la nui bâwk bâwk thei chu a ni si a le!

Vaibelchhe bi bat nei chungin minister leh parliamentary secretary-te hman tûr lirthei lei nân Rs. 3,41,50,000 an ruahman mai pawh ni lovin an chah thleng tawh zâwk lo maw? Thukhawchâng pakhat “Bumna ngaiah hmeichhia chu vawi sarih an bum nawn theih” tih thu hi in lo hre theuh tawhin a rinawm. Tûna kan dinhmunah hi chuan Mizoram mipuite hian hmeichhia pawh kan tluk lo tihna a ni.

Kan duh tak kan thlang chhuak tê têa an thiltih kan sawisêl leh vak vak a. Khawiah nge kan duhna kan tihlanna chu? Heti ang hi an ni tih hmân hmânah kan hre tawh a, an thiltih tam tak kan hmu a, ram tân hmasâwnna paw chhuak tak tak si lovin an thên an thên tih ka hria. Hmangaih tûr dik ‘Zoram’ hmangaih lovin anmahni an inhmangaih a, ram aiin lainate tânghma an hai zâwk a, ram aiin party worker-te an ngai pawimawh zâwk a, ram aiin thenawm khawvêngte an ngaihsak zâwk a, ram aiin an lîrthei an duat zâwk a, ram aiin an zawhte pawh an châwm thau zâwk asin.

Bumna ngaia bum nawn mai mai theih nutling leh patling kan lêng suau suau chu a nih hi maw. Mipuiten kan tuar a, kan rûm a, kan tap a, anni erawh sofa dûp nuam taka thuin eng eng uain emaw tawng nuam tâwkin an lem khawlh khawlh maithei asin. Kan duh tak kan thlang tling a, kan duhna chu sêl rual lohvin vote hmangin kan lantîr a, a hnu lama sawisêl leh chiam hi a hmeichhe thu lutuk. Mipa takin kan tuar tûr a ni a, huaisen takin kan hmachhawn ngam tûr a ni.

Duh ila, duh suh ila ‘Amen’ kan pêk a ngai tho tho. Tûnah chuan kan nghah rih a ngai, mi fel tawng thei lo kan nih hlawm hi. Kum nga hnuah chauh tawng thei dinhmunah kan ding rih. Nang leh kei hian sawi ve tûr kan nei lo. Kei phei chuan ‘trîk’ pawh ka ti ngam lo. Nang pawh i lo sawi ve tûr a awm lo.

Similar Posts:

Recent Posts:

12 Responses to “I lo sawi ve tûr a awm lo”

  1. 1
    Awmtea Leo Khiangte Says:

    A lo chhuak ve ta. Post hrim hrim hi comment-tu an awm lo hle mai. A reh tlawk tlawk.

    Report this comment

  2. 2
    TheHumanBot Says:

    post thar zawng zawng hi han comment thla par par la bul tan nan:)

    Report this comment

  3. 3
    Awmtea Leo Khiangte Says:

    Ka ti ve ziah a. Tun hma te kha chuan 1st nih kan inchuh luih luih thin a. Tunah chuan first nih pawh a nuam chuang vak lo :)

    Report this comment

  4. 4
    chhana hlawnchhing Says:

    An zahawm nan Car manto an lei a, central ah kut kan dawh leh si te hi ngaihtuah chian chuan a zahthlak nia, keni mipui te lah hi kan easy leh lutuk a, party politics ah kan tang a, kan mitha leh ngaihna hriaho lah hian Politics ah an zuanglut duh mang bawk si lova, Kan state future hi a bright vak lo ani…

    Kan politicians ho thusawi hi rin har ka ti tawh kei chuan khawi a an kalna hmunah pawh party dang sawisel leh mahni infak an ching riau leh nghal a

    Report this comment

  5. 5
    TheHumanBot Says:

    “A lo chhuak ve ta”

    Rawn chhuak zut zut tawh dawn :)

    Report this comment

  6. 6
    Awmtea Leo Khiangte Says:

    Tum khatah a rawn chhuak hnem lutuk a, a chhiar pawh kan chhiar seng hleinem.. haha

    Politician rintlak hi kei pawh ka hmu mang lo.

    Report this comment

  7. 7
    TheHumanBot Says:

    Post tang a tam emmm alawm :)

    Report this comment

  8. 8
    Awmtea Leo Khiangte Says:

    Uluk tak khan han vil teh u khai. Tunhma ang khan schedule leh thlap thlap theih ni se. A chhuah hun tur schedule thlap chuan a post-tu tan kha minute, darkar kha a nghahhlelhawm thin teh a nia.

    Report this comment

  9. 9
    chhana Says:

    Nia, tan i la thar leh deuh teh ang u.
    Car man to uchuaka lei chungchang pawh sawiho a chakawm alawm le. Tunah chuan ngaihdan pawh sawi ila; tun an chhiar chuang hlei lo a. Facebook a status update ve ziah; thian nei silo ang mai kan ni.

    Report this comment

  10. 10
    Awmtea Leo Khiangte Says:

    A dik khawp mai. A khawharthlak tak zet.

    Report this comment

  11. 11
    TheHumanBot Says:

    Tunah hi chuan schedule hrih lutuk lo. Pending a tam lutuk vang hian hman dan azirin rawn ti chhuak deuh zel hrih mai. Tin schedule hi chu a schedule tu tan pawh a nghahhlelh awm ve lek lek thin a:)

    Tan kan han la zel a nge.

    Report this comment

  12. 12
    Awmtea Leo Khiangte Says:

    #11 TheHumanBot, Aw le. Kan beiseina a la vul reng a nia.

    Report this comment