May 2014, Mizo(ram) Diary

June 8th, 2014 8:00 pm by chhana


1st. Thursday:
Mizoram DGP thar atan Dharmendra Kumar, IPS ruat a ni. DGP thar ruatna thupek hi Union Home Ministry-in a tichhuak a ni. Dharmendra Kumar hi 1984 batch IPS niin, Delhi police-a special commissioner hna chelh lai a ni a, May 17, 2014 hmaa a hna thar hi zawm tura tih a ni. Tuna Mizoram DGP mawhphurhna la mektu, AK Patnaik chuan addl. DGP hna a chelh chhunzawm ang.

2nd. Friday: Mahindra 2 Wheelers Mizoram Premier League (MPL) Season 2 champion chu Chanmari FC anni ta. MPL inkhelh dan hi session hmasa nen tlema tih danglam hret niin vawi hnih theuh an inkhelh kual hnuah a point hmu sang pahnih Chanmari FC leh Luangmual FC ten final hi an khel a. Anni hian vawi hnih khelin match hmasa zawkah Luangmual hi 2-1 in chak mahse Chanmari lamin khelh hnih naah 3-0 laia an hneh avangin a pumpuiah 4-2 a chakin champion nomawi hi an chawi ta a ni.

3rd. Saturday: Durtlang North branch YMA-te chuan BSF camp aṭanga zu phurh chhuah, Blenders Pride leh Royal Challenge báwm (case) khat ve ve an man. Zu hi an pute ina dah tur niin a kawltu SM Chakma inti chuan a sawi a, mahse, YMA hruaitute chuan BSF-in zu hralh an chìn avangin hralh atana an tih a nih ringin an mansak a ni.

4th. Sunday: Tlabung bula luiah hmeichhe pakhat ruang chhar a ni a, Bangladesh mi nia rin a ni. Hmeichhe ruang hi Bindasora kâi bulah a láng chhuak a, a kâwngah lung kg. 10 vel phuar beh a ni.

5th. Monday: Thingdawl aṭanga Kolasib pana tlan Santro car, AS-11 E-5545 chu Kolasib Leitan bul kawng thlangah a tlan liam a, Rohmingliani w/o Lalkima, Thingdawl Venglai leh Silpi Laskar, Silchar-te a hmunah an thi. He chetsualnaah hian motor-a chuang ve dang, driver Biswajit Das leh Robin Das te chu an hliam a, Kolasib damdawi-inah dah an ni.

6th. Tuesday: Mizoram Democratic Alliance (MDA) MLA-te chuan Armed Venga Aizawl District Jail an tlawh. MLA-te hian jail ward hrang hrangte fangkualin, tángte leh thawktute harsatna tawhte an zâwt a ni. Jail tángte chuan harsatna lian tham an neih loh thu MLA-te hi an lo hrilh a ni.Aizawl District Jail hi mi 113 tân theihna a ni a, tunah hian jail táng 52 an awm mek. Táng zinga 15 chu thiam loh chang (convict) an ni a, mi 37-te erawh an chungchang ngaihtuah mek an ni. Thawktu hi superintendent tiamin mi 44 an awm bawk.

7th. Wednesday: World AIDS Orphans Day a ni a, Support Group for Children Living with HIV huaihawtin I&PR Auditorium, Aizawlah hman a ni. MSACS deputy director, Dr Rothangpuia’n a hmanpui a, thupui chu ‘I am positive’ tih a ni.World AIDS Orphans Day hi FXB dintu, Albina Du Boi¬srouvray-in May 7, 2002-a a din a ni a; Mizoramah pawh hman a nih theihna turin Governor chuan kum 2004-ah order a chhuah a, kum 2006 aṭangin hman ṭan a ni.

8th. Thursday: Mizoram Board of School Education (MBSE) chuan Higher Secondary School Leaving Certificate Examination 2014 result a tichhuak a, zirlai exam mi 11,178 zinga 8,400 an pass. Pass percentage chu 71.32% a ni a, kum 2013-a pass percentage 58.66% aiin a sang zawk a ni. HSSLC 2014-ah hian a pumpuiah distinction-a pass mi 154 awmin, first division-ah mi 1,461 an pass a; second division-ah mi 2,851 leh third division-ah mi 3,934 an pass. Compartmental chance nei mi 270 an awm a, fail zat chu mi 3,108 an ni.

9th. Friday: Electric Veng basketball court leh volleyball court siamna tur hmun siam mek chhak lam aṭangin lung lian tak a tla a, mi pahnih an hliam. Lung tla hian Rotlinga (21) leh Hmingthanngura (45) Electric Veng ve vete tlakpuiin, an hliam ve ve a, lak chhuah an nih hnuah damdawi-in panpui nghal an ni. Hna thawka awm mek mi dangte erawh chu an chawlh lai a nih avangin an hliam lo thung.

10th. Saturday: Chief Minister Pu Lal Thanhawla chuan MADC complex-ah tuna MADC sorkarna kalpui mek ten kumhnih(2) an tlin lawmna programme an buatsaih chu a hmanpui. He kumhnih (2) tlin lawmna programme hi Pu LC. Chakhai, MADC Chairman-in inchawnglawmna thusawiin, Rev. P.Riabi Sr.Executive Secretary, ECM kohhran chuan hunserh a hmang. He lawmna programme-ah hian Pu Lal Thanhawla chuan thusawiin, mipui ten an tawiawm loh chuan sorkar hian ram hmasawnna kawng sial tur leh a chhe laite siamtha turin a mah chauhvin a kal thei lo va. Chuvangin, Mara ram mipuite chu Mara ram tih hmasawn tur leh a chhelaite siamtha turin rinawmna, taimakna leh Pathian tihna nena; eng party nge sawrkarna siam tih-ah buai lo va, MADC sawrkar chu tawiawm tlat thin turin a sawm.

11th. Sunday: Nute Ní (Mother’s Day) a ni a, Salvation Army-te chuan uar takin biak-inah an hmang. Mother’s Day hi nute chawimawina leh zahna ní atan hman a ni a, Salvation Army chuan biak-inah hmangin, naupangte’n an nute hnenah pangpar leh thilpek dangte an pe a; hmun dangah pawh naupang ṭhenkhat chuan an nute thilpek an pe bawk. Mother’s Day hman ni hi khawvelah a inang vek lo a, Mizoramah chuan Salvation Army, Thiltlang corps-ah May 10, 1936-ah hman ṭan a ni.

12th. Monday: Sihphir Venglai branch K|P member te chuan Durtlang North Branch te tlawhin hlim takin hun an hmang. He hunah hian Venglai lam a\angin an assistant leader Pu V.Lalrindika’n Pathian thuchah a sawi a; inkhawm banah kohhran hall-ah fellowship zuiin hlim takin hun an hmang. Durtlang lampang hian 2012 khan Venglai ho hi an rawn tlawh tawh a; tihian an tlawh let ve a ni. Hetianga branch intlawhtawn hi K|P lam hian (branch dang pawh) an hlawkpui \hin hle a ni.

13th. Tuesday: Lammualah inkhel pui tham tak, a aia ropui la awm lo hiala mi tam takin an ngaih theih tur a awm. Mizo player \ha thlankhawm ‘Mizoram XI’ tia invuah leh German league, Bundesliga a ninth position TSG 1899 Hoffenheim te chuan frienly match an khel a; Mizoram hi 0-3 in an tlawm.
14th. Wednesday: MZP gen.hqrs chuan MZP pisapui conference hall-ah income tax zirhona an buatsaih a, Taxation minister Lalsawta khuallian a ni. He seminar-ah hian R.L.Rinawma Principal Secretary buatsaih ‘Income Tax bihchianna’ tih te, C.Zothankhuma Registrar MZU buatsaih ‘Tax Payer tana Financial Management lama hmasawnna’ tih te, Lalhriatrenga Chhangte, Deputy Controller of Mines, IBM Bhubaneshwar buatsaih ‘Corruption dona leh mimal hmasawnna atana tangkaina’ tihte chu zirho a ni.

15th. Thursday: Mizoram State e-Governance Apex Committee chu chief secretary L Tochhong hoin Secretariat conference hall-ah an ṭhukhawm a; e-District hnuaia ruahmanna chhawpchhuahte an pawmpui a, e-District hnuaiah hian service hrang hrang 10 dah a ni. Mizoram State e-Governance Apex Committee hi IT hmanga sorkar inrelbawlna tihchangtlun leh mipuite’n awlsam zawka sorkara an mamawh hrang hrangte an dil leh dâwr theih dan tur ngaihtuahtu committee sang ber a ni. Meeting-ah hian department hrang hranga secretary te, department aiawhte leh World Bank aiawhte an tel.

16th. Friday: April 11, 2014-a Lok Sabha inthlan leh Hrangturzo Assembly bye-election-a vote tlate chu chhiar a ni. Mizoram MP atan CL Ruala, Congress party candidate thlan tlin a ni a, Hrangturzo MLA atan Vanlalawmpuii Chawngthu, Congress party candidate bawk thlan tlin a ni. Inthlana vote tlate hi district tinah chhiar a ni a, zing dar 5-ah chhiar ṭan niin, buaina leh harsatna awm loin chawhnu dar 3:30 velah chhiar zawh a ni. Vote chhiar lai hi election observer te, micro observer-te leh district tina returning officer-te’n an vil reng a ni. Mizoram aṭanga Lok Sabha MP atana thlan tlin tak, CL Ruala hian vote 2,10,485 hmuin, vote 198203 hmutu, Robert Romawia Royte, United Democratic Front candidate chu vote -204331 in a hneh. Aam Admi Party candidate M.Lalmanzuala’n vote11,890 a hmu a, NOTA-ah vote 6,495 a tla bawk. Hrangturzo Assembly bye-election-ah thlan tlin tak, Vanlalawmpuii Chawngthu (INC)-in vote 6,721 a hmu a, UDF candidate Lalduhawma’n vote 4,218 a hmu. NOTA-a tla vote 135 leh postal ballot-ah vote thi 13 a awm a, vote tla zawng zawng chu 10,939 a ni.

17th. Saturday: Aizawl Diocese Catholic Hmeichhe Pawl bultumin Christ The King Catheral hall-ah Gender Policy seminar neih a ni a, Aizawl bishop Most Rev. Stephen Rotluanga leh Mizoram Law Commission chairman John Siamkunga ten an hmanpui. Gender Policy-ah hian mipa leh hmeichhiate intluktlanna ngaih pawimawh a ni a, hmeichhiate tihchakna atan a ṭan lakna a ni. Seminar hi Diocese Catholic Hmeichhe Pawl president Agnes Sangluri’n a kaihruai a, Mizoram Women Commission chairman Lalnipuii, North East Region Women Commission coordinator Alphonesa Monsang leh DCHP director Lucy Laltluangi ten thu an sawi.
18th. Sunday: Synod Mission Board in India ram laili, central region huam chhunga missionary-te puala May 15 zan aṭanga ITI Vengchhak Kohhran biak-ina Missionary Retreat an buatsaih chu a tiak ta. Retreat-ah hian thupui chu ‘Krista thuhretu’ tih a ni a, thupui hi Rev. Vanlalbela, Rev. C.Lalsangliana, Upa Denghmingthanga, Rev. PC Pachhunga leh Rev. C.Chawngliana ten an sawi. Central region huam chhungah hian mission field pasarih a awm a, missionary thawktu nghet 78, contract missionary 143 leh field worker-te an vaiin mi 528 an thawk mek a ni.

19th. Monday: EVM tichingpena inpuhna thubuaia man, K Chhawnṭhuama, Durtlang chu Addl. District & Sessions Court-in bail-in a chhuah. K.Chhawnṭhuama bail dilna hi chief judicial magistrate-in May 5, 2014-a a hnawl hnuah Court sang zawkah a zualko leh avangin Addl. District & Sessions judge, Helen Dawngliani’n a ngaihtuah a, bail a phalsak ta a ni.

20th. Tuesday: Hrangturzo bial MLA atana thlan thar, Vanlalawmpuii Chawngthu chu Assembly Annexe conference hall-ah Assembly speaker Hipheia’n rinawmna thu tiamtirin MLA atan a la lut. MLA thar lak luhna inkhawmah hian Chief Minister, minister-te leh MLA, Aizawla awmte an tel kim deuh vek a ni.

21st. Wednesday: VLC Vanlalhriatrenga ziah ‘Mizo mi ropui HK Bawichhuaka’ tih lehkhabu chu Vanglaini editor K.Sapdanga’n Chanmari YMA hall-ah a tlangzarh. Lehkhabu hi Kumtluang Run Publication tihchhuah a ni a, tlangzarhna inkhawmah hian K Sapdanga bakah, HK Bawichhuaka fapa HK Jerry Ramliana’n thu a sawi a ni.

22nd. Thursday:
All Mizoram Inter Village Football Tournament – 2nd NECS Cup chu khelh ṭan niin goal 71 a lut nghal. Mizoram Premier League Season 1-a Best Player R. Laldanmawia chu hattrick siam hmasa ber a ni a, Siahawk tan goal nga ngawt a khung.Team 173 telna NECS Cup hi group riatah an inthen a; knock out round a khelh a niin round of 16 atangin Lammualah khelh chhunzawm a ni ang.

23rd. Friday: Sihhmuia Aizawl Cricket Stadium chu Chief Minister Pu Lal Thanhawla’n a hawng. He stadium hi Mizoram State Sports Council chuan Cricket Association of Mizoram (CAM) hnenah an hlan nghal. He stadium hmun hi F.Rotluanga’n a pa Suaka hriatrengna atan a hlan a, CAM kuta a luh rual hian stadium hmingah ‘Suaka Cricket Stadium’ an sa nghal a ni.

24th. Saturday: Kumtluang Run Publication Society leh BSF Mizoram Sector chuan I&PR Auditorium-ah HK Bawichhuaka Memorial Lecture an buatsaih. Inkhawm hi Vanglaini editor, K.Sapdanga’n a kaihruai a, BSF Mizoram Sector DIG UM Subramani chu khuallian a ni. Chawhma lamah Denghnuna ziah, ‘Bawihchhuaka’s political ideology’ tih leh chawhnuah H.Raltawna ziah ‘Bawihchhuaka’s contribution of Ethical Issues in Mizo Society’ tih zir a ni a, sawiho a ni bawk.

25th. Sunday: Nl Laltlansangi (17), Aizawl Bungkawn YMA Road chu Singapore a a hnathawhna te in ah inawk hlum a hmuh ani a. A ruang hi Police ten la nghal. Burma passport hmanga kal a nih avangin Burma sorkar kaltlangin Mizoram rawn thlen tum a ni.

26th. Monday: Ramdinsangi (2) d/o Lalhunliana Hnahlan khua Champhai district chu current man vangin a boral. Ramdinsangi mantu electrict neitu TC Lalthansiama te inah hian current a awmloh lai pawhin an bang rangva leh tuizem velah current a kal a. In neitute hian Electric Dept. lam hrilhin Department-a thawktute pawhin tih ngaihna an hriat loh avangin an Connection lakna hruai hi cheh chah a ni a. Hemi hnu pawh Current hi a la kal reng tho a. Current kal dan hi In chhung lamah kal lovin pawn lamah a kal thung a, rangva leh tile ah te Current hi a kal vek nghe nghe.Ramdinsangi a man lai pawh hian Hnahlan khua-ah chuan Current an neih loh lai tak a ni a. Ramdinsangi hian pawn lama Skirting rangva lo khawihin a lo man tang reng a. An va hmuh chuan a thawk a lo harsat tawh avangin an chhan hman ta lo a ni.Ramdinsangi a man hnuah hian Current pawh hi Pu TC Lalthansiama te Inah hian a awmlo chhunzawm ve nghal mai a ni.

27th. Tuesday: CID Crime hnuaia Special Narcotic PS staff-te leh 36th Assam Rifles-te chuan Bawngkawn Phuihnamchhe Vengah gelatine tihpuahna kêp (detonator) báwm 40 an man. Gelatin kêp báwmah hian kêp 20,000 a awm a, Rs. 4,40,000 hùa chhût a ni. Kêp neitu nia hriat, Zabiaka (49) s/o Lianlunga, Falam leh Thanga (37) s/o Liannawla, Kalemyo-te chu man an ni a; gelatin kêpte hi vaiin an hnena an dah a, Myanmar lama thawn chhoh tur niin police an hrilh. Mi pahnihte hi Explosive Substances Act Section 5 hmangin thubuai siamsak an ni.

28th. Wednesday: Tachhip YMA, Sevenphul Section YMA chuan Aizawl Civil Hospital-ah thisen unit 19 an pe a, a petute hi mipa 18 leh hmeichhia pakhat an ni.

29th. Thursday: Mizoram University-a pawl pathum – MZU Teachers Association, MZU Non Teaching Staff Association leh MZU Student Union-te chuan MZU kawng siam lai, chawlsan lailawk chu chhunzawm phûtin Vaivakawnah zing dar kua atangin darkar ruk vel chhung kawngpui an dang. Sawi lawk awm loa thil hi kalpui thut a nih avangin helai kawnga kal thinte an buai phah hle.Kawng siamtu Sunshine Overseas-te nen inremna an siam hnuah MZU mi leh sate chu an ṭin darh a ni.

30th. Friday: Thing phun rûnpui: National Service Scheme (NSS) Cell, Mizoram chuan Aizawl-Lunglei World Bank road-ah thing phun rûnpui an huaihawt a, thing chi hrang hrang ṭiak 2,000 vel an phun. Thing phun rûnpui hi Zampuimanga thlanlungah hawn niin, NSS sate liaison officer Dr Lalzuiliana’n a kaihruai a, Sport & Youth Services secretary R.Lalvena khuallian a ni. Mizoram University, college leh HSS-a NSS volunteer mi 800 velin Damdiai leh Sumsuih khaw inkarah thing an phun a, an thing phunte chu humhalhpui turin mi tin an sáwm a ni.

31st. Saturday: Khawvel hmun dang rualin Mizoramah pawh World No Tobacco Day hman a ni a. Aizawl-ah chuan a lawmna inkhawm hi Millenium Centre kawtah Health & Family Welfare Minister Pu Lal Thanzara hovin neih a ni. Dr. Lalbiakkima, Director, Hospital & Medical Education chuan he hun hi kaihruaiin, Dr. B.Thangdailova, Sr. Vice President, Indian Society on Tobacco & Health (Mizoram Chapter) hovin kalkhawmte chuan meizu lo turin leh a zu thin te chuan sim tawh tura intiamna thu an sawiho bawk.

Similar Posts:

Recent Posts:

2 Responses to “May 2014, Mizo(ram) Diary”

  1. 1
    Jennifer Lo Says:

    Delhi Police chu kan lo mikhual ve dawn ta nge nge a nih chu… mizoramah chuan dress code te min siamsak em lo’ng chu maw…

    Report this comment

  2. 2
    sim only any network calls package Says:

    sim only any network calls package

    May 2014, Mizo(ram) Diary | mi(sual).com

    Report this comment