KHAWPUI TIH HI

May 14th, 2014 1:00 pm by BigDaddy Hmahmatea

KHAWPUI TIH HI

**************

In dawn chiang ve ngai em???

Hla siamtu in, “Ka pianna Zawl-khawpui…” an ti hnap mai a, a inhmeh angreng hle mai a. Engemaw hun lai atang khan Lunglei lam saw Leitlangpui an han ti a a mawi in a inhmeh viau mai bawk a. Mizo khaw hming tam zawk hi chu thu awmze nei pahnih inzawm lam-hnih a lam ngai a ni tlangpui a. Tichuan le engemaw hun lai atang khan mahni khaw hming a lam hmasak ngai zawk emaw a lam hnuhnung zawk emaw chu la hranga ‘khawpui’ tih nena kaihkawp hi kan uar thar ta hle mai a. A khua a pui tak tak em, khawpui tih a chhiar chi a ni ngei em tih lam chu ka rawn sawi tum a ni hauh lo mai a, mahse keini Mizote hi thil engemaw hlek intihhmuh hrat tak mai kan nih avang hian  khaw lian deuh leh a khaw hming nen pawh a inhmeh deuh ten an lo hman vanga khawi emaw lai a khawte kilkhawr ve tak, in zahnih-khat khua vel, thal lai a motor lut thei ngawr ngawr vel ina a bial kohhran hmeichhe khawmpui tih vel bawr thlen dawn avanga chumi khami khawpui ti a an lo inchhal ve ngawt zel hi chu thil fuh ber a nih hmel vak lo tlat.

Helam hi chu thudangah dah ta ila ka’n sawi tum tak zawk chu thenkhat inhmeh fe fe a awm laiin thenkhat inhmehlo fe fe leh inremlo fe fe lah a tam nangiang mai le. Entir nan Sialsuk in ‘Sial-khawpui’ an han intih chuan a inrem viau tho mai a, chutih laiin Tarpho khua te chuan Tar-khawpui’ han inti ve ta se a nih loh leh tunhma a Vawkzawn khua thin  te khan ‘Vawk-khawpui’ te han in ti ve ta se a zialo angreng viau maithei. Khawzawl in ‘Zawl-khawpui’ an inti a, Aizawl pawhin ‘Zawl-khawpui’ kan in ti leh tho mai a, a inhmeh ve ve tho mai. Aizawl pawh hi ‘Ai-khawpui’ han tih chu a remchang teh vak chuang lo. Reiek te khu ‘Rei-khawpui’ kan ti dawn nge ‘Ek-khawpui’ kan ti dawn remchanglo ve deuh ania. Farkawn khua in ‘Far-khawpui’ in ti ta se a inhmeh viau laiin a bul lawk a Vaphai khua hian ‘Va-khawpui’ han inti ve thung se chu a inhmeh fahran lem hauh lo ang le.

Chuvangin in ti teh ang, mi in an tih ang apiang hi kan tih ve a rem lohna te a awm ve thin a, a khaw hming chungchang kher lovah pawh mihring nunah te pawh hian a ni vek mai a. I thiannu hmeltha tawk a pian pawh model pian zaih mai in jeans tight tawk a ha a a inhmeh avang khan nang barrel pian a piang, i mal pawh  in tualvuak  nana iai awm loh fahran mai in a i lo in hak mar ve pung ringawt kha chu thil inhmeh vak a ni hauh lo ang a. I thianpa tuktin a gym a intih sek zir thin in T-shirt body fit a hak a a inhmeh avang ngawt khan nang i dul pawh ‘one big pack’ an tih ang chi in a dul kiar bial pup lang kawp a T-shirt body-fit i lo hak ve ngawt chuan i inmheh hek lo ang le. Khawi lai Film star chhelo tawkin emaw contact-lense hring a rawn vuah a a rawn meng hring phet phet a, a mawi pui avang khan nang Tribal nula hang uk beh ve tak khan i lo vuah a i lo men hrin pui ve phut ringawt khan i inhmeh ve tihna pawh a ni reng reng lo a, tu zaithiam emaw film star hmingthang in emaw a sam a tih phirsi avanga nang Mizopa chenbeh ve tak, veng mawng lam a tuikhur bula vaihlenhlo nena in thenawm ve mai khan zuhrai chaw zawng tur a kaw tawp atanga rawn chhuak chho vang vang anga khawpui lam pan a rawn chhuakchho ve in a i lo tih phirsi ve ngawt khan i lo inhmeh ve kher lo thei bawk.

Chu mai a la ni lo. I thenawmpa a nupui neih ni a biak ina a luh bak vawikhatmah a puitlin hnuah biak in a la lut leh reng reng lo Bible a Genesis awmna pawh a zawnawlna atanga en ngai khawpa bangbo ve, amah pawh Kristian-ah pawh inchhal mang lo khan nitin zu a ruih thin avanga nang Kristian, Lal Isua ringtu inti kha i lo ruih ve ngawt nachhan tur kha a awm lo reng reng a. I thiannu hir-ha ve tak kohhran leh sakhaw lam ngaisak reng reng lo khan sawn a pai vanga nang kohhran thalai active member khan i lo pai ve ngawt kha thil inhmeh lo tak a ni ngei ang le.  I thenawmpa in a hnathawhna-ah a eiru a, a len thur thur avanga nang ringtu inti ina i lo eiruk ve ngawt pawh thil dik a ni hauh lo in i nihna nen pawh a inhmeh hek lo ang.

Chuvangin, khaw hming a ‘khawpui’ tih belh pawh hi a inhmeh leh hmeh lo te, in awm leh awmlo riau te a awm ang bawk hian kan nunah pawh hian kan nihna nena kan thiltih atana inhmeh leh inhmeh lo hi a awm tih hi hriat ve fo thin hi a tha khawp mai a. Chuti a nih loh chuan kan awmdan kha miten an han hmu anga, kan nihna nen an han khaikhin anga mi nuih tizatu lek kan ni ang tih hi a hlauhawm viau tlat a ni. Bilkhawthlir khuan ‘Bil-khawpui’ inti ta se a inhmeh angreng viau anga, a chhak lawka Kolasib khuan engtinge an in tih ve tak ang? ‘Kola-kawpui’ tih chu thil inhmehlo tak a ni ngei anga ‘Sib-khawpui’ an inti a nih chuan a  zia deuh mai thei anih leh Mamit hian engtinge an in tih ve tak ang le…….

 

Dated Wednesday 7th May, 2014

BigDaddy Hmahmatea

Kulikawn

 

Similar Posts:

Recent Posts:

5 Responses to “KHAWPUI TIH HI”

  1. 1
    H.Vangchhia Says:

    Inchawih bik riau hi a awm thin a niang e, hairehai :D

    Report this comment

  2. 2
    chhana Says:

    I thlir thiam hle mai. A hlimawm phian bawk sia. I thuziak atanga fiamthu ka hriat thar chu: Bible a keu khat awm mai mai asin. A inkhawm ve a; tantuin Genesis bung khat na a chhiar dawna, zawnawlnaah a en hmasa vel.

    Report this comment

  3. 3
    Awmtea Leo Khiangte Says:

    A tha ve viau tho e.

    Report this comment

  4. 4
    chhana hlawnchhing Says:

    Kulikawn pawh Kuli khawpui ti ta ila a in hmeh dawn lova Kawn Khawpui tih chuan a in hmeh viau ang ;-)

    Report this comment

  5. 5
    H.Vangchhia Says:

    #4 Kuli ho intawhkhawmna, puak phur tur a an awm khawmna :) hairehai

    Report this comment