April 2014, Mizo(ram) Diary

May 13th, 2014 11:39 am by chhana

1st. Tuesday: Tripura refugee camp-a Bru awmte chuan Mizoram Lok Sabha MP inthlan atan ballot box hmangin vote an thlak ṭan a, vote hi nit hum thlak tura ruahman a ni. Mi 3200 velin vote hi an thlak a ni.
2nd. Wednesday: Govt. Aizawl College zirlaite chuan Aizawl Civil Hospital-ah thisen unit 78 an pe a, a petute hi mipa 66 leh hmeichhia 12 an ni.
3rd. Thursday: Health department directorate conference hall-ah sikserh dona beihpui thlak thla, Anti Malaria Month hman ṭan a ni a; Health principal director, Dr K Ropari’n kaihruaiin, health secretary, RL Rinawma’n a hawng. Report-a a lan danin, kum 2013 chhung khan India ramah mi 8,36,916-in sikserk an vei a, chung zinga mi 359 chu an thi a, Mizoramah chuan mi 21-in sikserh an thihpui a ni.
4th. Friday: Mizorama harhna thlen hmasak ber champha, Harhna Thlen Ni a ni a, kumin hi a kum 108-na a ni. Harhna Thlen Ni-ah hian Presbyterian kohhrante chuan zan inkhawm an nei a, thupui chu ‘Kan mamawh Pathian thutaka harhna’ tih a ni. Harhna Thlen Ni hi April 4-ah hian kum 1982 aṭanga hman ṭan a ni.5th. Saturday: Electric Veng branch YMA chuan Aizawl Civil Hospital-ah thisen unit 64 an pe a, a petute hi mipa 64 leh hmeichhia 10 an ni. Electric Veng branch YMA chuan Mizo zinga thisen pe tam tawh ber, an member C.Lalremruata chu blood donation camp an huaihawtnaah hian an chawimawina thilpek an hlan nghal a; C Lalremruata hian vawi 54 thisen a pe tawh a ni.
6th. Sunday: UPC (NEI) Penticostal Youth Department general conference vawi 36-na, April 3, Ningani zana Bethlehem UPC biak-ina neih chu a ṭiak ta.. Inkhawmpuiah hian kum 2016-a general conference neihna hmun atan Saiha an thlang a, environment humhalhna kawngah hmalak an rel bawk.
7th. Monday: Tripura transit camp-a awm Bru-te, an awmnaa April 1-3, 2014 chhunga MP election atana vote thlâktir an nih duh lohna leh Bru vote-te cancel phûtna atan NGO Coordination Commitee-in darker 72 chhung awh tur rampum huap chu zing dar nga atangin neih tan a nia; mipuiin an thlawp \ha hle.
8th. Tuesday: Tluang takin bandh neih chhunzawm zel a nia; mahse, ECI lamin Bru ho vote chu chhiar phawta, thla thum chhunga Mizorama an lo let lo a nih chuan roll atanga paih annih tur thu a rawn sawi avangin bandh an huaihawt chhan tak – Bru vote thlak tawh cancel chu hlawhtling lo mah se, an beisei aia ṭha zawk hlawhchhuaka an inngaih avangin chawhnu dar 1:30 ah bandh hi an ti tawp ta. He bandh hi Lawngtlai leh Saiha district pahnihte chuan bandh nei ve loin moral support an pe thung.
9th. Wednesday: Lalsiamkima (25) s/o Sapdenga leh Ngurremsanga (19) s/o Lalruaii, Sialhawk khua ve vete chu ṭêkin a déng hlum. Lalsiamkima leh Ngurremsanga te hi an ṭhian dang pathumte nen lo-ah an kal a, an haw lam chu ṭêkin déngin, an tlu vek a; a laia kal, Lalsiamkima leh Ngurremsanga te chu an vanduai ta a ni. Lalsiamkima chu ṭêkin a denna hmunah a thi a, Ngurremsanga erawh chu a piah thlám an thlenpui hnuah a thi a; mi dang pathum erawh chuan an na lo thung.
10th. Thursday: Chief Minister Pu Lal Thanhawla chuan Pu VS Sampath, Chief Election Commissioner, Election Commission of India Mizoram Legislative Assembly Election 2013 a EVM hman tak leh Parliamentary Election neih tura Electronics Voting Machine hman tur nihphung leh a rintlak dan Mizoram mipuite hnenah sawifiahna nei turin a ngen a; EC chuan tunlaia kan boruak hre reng chungin rang taka chhanna rawn thawn leh nghalin ‘EVM hi a rinawma; tih chingpen theih a ni lo’ tih thu a rawn thawn let.
11th. Friday: Mizoram aṭanga Lok Sabha member tur leh Hrangturzo bial MLA tur thlanna chu Mizoram pumah (By-election erawh an bialah chauh a nih thu hria ila) neih a ni a; harsatna tênau deuh hmun ṭhekhatah thleng mah se, vote thlak theih loh phahna khawp harsatna lian thleng a awm lo. He inthlanah hian candidate pathum heng: INC-CL Ruala, UDF-Robert Romawia Royte leh AAP-M.Lalmanzuala te an ni. Lok Sabha MP inthlanah hian service voters leh Tripura transit camp-a vote tlate tel loin vote 61.05% a tla a; Hrangturzo biala Assembly bye-election-ah chuan vote 73.78% a tla thung.
12th. Saturday: Tlabung Chawnpui branch YMA chuan April 12, Inrinni khan an venga hmeithai pakhat in tur hnatlangin an sa a, an sa zo nghal. Hnatlangah hian mi 45 an thawk chhuak a; in sakna atan hian ram aṭangin hmanruate an lak khawm bakah, Zodin V/C-in thingpui lumna senso tur Rs. 1,000 an pe a ni.
13th. Sunday: Tumkau Ni a ni a, zing karah kohhran pawl hrang hranga Sunday School naupangte’n Isua Krista, Jerusalem-a lal anga ropui taka a luh hriatreng nan tumkau chawiin kawng an zawh.
14th. Monday: Electronic media-a thu dik lo leh ngaih sual theih vawrh darha puhna te, mi fuihpawrha puhna te, mipui rilru tichiai zawnga thu dik lo vawrh darha puhna te leh a huhoa mi phiar rûa puhna te avangin Electronic Voting Machine (EVM) tihchingpen nia sawitu, K.Chhawnṭhuama, Durtlang chu Paltan Bazar, Guwahati-a Star Line Hotel-ah Mizo 3rd. IR commandant, Zosangliana leh a hote’n an man a, a rualin journalist, K Lalhruaitluanga, Zotlang, Aizawl an man bawk.
15th. Tuesday: Mizo Writers’ Association (MWA) chuan Aizawl Press Club-ah Annual Meeting an hmang a, kum 2013 chhunga lehkhabu lehlin ṭha ber, ‘I hneh thei’ tih lehkhabu, Shiv Khera ziah letlingtu VLC Vanlalhriatrenga hnenah Translation Book Award 2013 an hlan.
16th. Wednesday: Excise & Narcotics department enforcement-te chuan Sesawng Vengtharah ganja kg. 46.500 an man a, a neitu nia hriat Ngurhmingliana (34) s/o Chhinga, Churachandpur an man tel bawk.
17th. Thursday: November 23, 2013-a Dampa ngaw chhung aṭanga Sanglianthanga, Lalzamliana leh Deep Mondal-te rubotu zinga mi pathum Dhaniram Reang @ Duhawma (42), Naisingpara Tripura; Roton Reang @ Chanchinmawia (28), Naisingpara leh, Roliana @ Liona, Naisingpara te chu man anniin thu zawhfiah turin Mamit police station-ah phurh thlen an ni.
18th. Friday: Isua Krista Kross-a khenbeh ni, Good Friday chu Mizoramah kohhran pawl hrang hrangte’n urhsûn takin an hmang.
19th. Saturday: Ronald Lalrinpuia (25) s/o Lalbiakzuali, Khawzawl Vengthar chu an inah thi chhar a ni. Ronald Lalrinpuia ruang hi an chhar lai hian a chhe viau tawh a, post mortem a nih hnuah vui nghal a ni. Ronald Lalrinpui hi a lú leh a nâkah hliam a awm a, a khum bul bangah thisen a kai nual bawk avangin, mi kut tuara thi a nih rin a ni a, Khawzawl Police Station-ah thubuai ziah luh nghal a ni.
20th. Sunday: Isua Krista thihna hneha a thawh lehna ní, Easter Sunday chu Mizorama kohhran hrang hrangin an lawm a; kohhran ṭhalaite huaihawtin zing ni chhuah rualin Easter Sunrise Service neih a ni bawk.
21st. Monday: Tlanzova (36) s/o Laldika, Keiṭum Field Veng chu Tuichang luiah a tla hlum. Tlanzova hi a ṭhiante pahnih nen Tuichangah sangha man turin an kal a, Tuichang balu lakna thlangah a bo tâk daih avangin tuiah a tla nia ringin an zawng a, tihian a ruang an hmu ta a ni.
22nd. Tuesday: Earth Day a ni a; he ni pual hian Centre for Environment Protection (CEP) chuan chhung tinte chu an theihna zawn ṭheuha ṭan la turin an chah. Kumina Earth Day thupui chu ‘Green cities’ tih a ni.
23rd. Wednesday: Mizo Academy of Letters (MAL) chuan Synod Conference Centre-a Pi Zaii Hall-ah MAL Golden Jubilee an lawm a, Book of the Year 2013 atana thlan, ‘Thinglubul’ tih lehkhabu ziaktu, Lalpekkima hnenah lawmman an hlan nghal. MAL chuan kum 2013 chhung khan ṭawng dang aṭanga lehlin ni lo, Mizo kut chhuak liau liau lehkhabu 161 a chhuakin an hria a, chung aṭang chuan kum 2013 chhunga lehkhabu ṭha ber an thlang chhuak a ni.
24th. Thursday: K.Vanlaltlana, Ramlaitui pick-up MZ-02 6807 chu Ramlaitui khaw daiah a chesual a, kawng thlangah metre 150 vel a lum. Motor-a chuang Vanlalmawia (18) c/o R Lalrawngbawla, Ramlaitui a thi a, Rammawia, Hnahthial na takin a hliam.
25th. Friday: MBSE chuan High School Leaving Certificate (HSLC) Examination, 2014 result a tichhuak a, zirlai exam mi 18,469 zinga 12,468 an pass. Pass percentage chu 67.51 a ni a, kum 2013 pass percentage 58.63% aiin a ṭha zawk a; Lalremruati Sailo, St. Paul’s HSS leh Malsawmzuala Royte, St. Peter’s HSS-te chu pakhatna an ni. Kumin HSLC-ah hian subject mala mark 100% hmu an awm lo a, 99% hmu erawh an awm nual thung.
26th. Saturday: Mizorama Salvation Army din champha, Sipai Pawl Ni vawi 97-na a ni a, Mizorama Salvation Army corp hrang hrangte’n awmni khamin an lawm. Zoram Sipai Pawl Ni hi khan Mizorama corp hrang hrangte’n an remchan angin an lawm a; corp tam tak chuan mi harsate hnenah thilpek an hlan a, vantlang hmun leh khawlaite an tihfai bakah, thisen pete pawh an awm a ni. He ni hian mahni hna tul thawh hi a thiangloah an ngai. Mizorama Salvation Army dintu chu Kawlkhuma a ni a, Kolkata-a Sipai Pawl officer hna a zir zawh hnuah Mizorama Salvation Army rawngbawlna ṭan turin April 26th., 1917-ah Mizoram a thleng a; Mizorama a thlen ni hi Mizorama Salvation Army din ni atan pawm a ni.
27th. Sunday: Presbyterian Kohhrana pastor bial inkhawmpui, April 25 zana ṭan chu a ṭiak. Bial inkhawmpuiah Inrinni khan rorel inkhawm neih a ni a, vawiin chawhnu inkhawmah Lalpa Zanriah Sakramen ṭheh a ni. Bial inkhawmpuia thurelte zingah Mizoram pum nghawng thei thilte a awm nual a; Aizawla bial pakhat chuan ‘MLTP Act hi kauh zawka kalpui zel turin sorkar ngen ni rawh se,’ an ti. Biate bial chuan, kohhran upa thite biak-ina vui tawh loh rawtna an pawm bawk. Bial inkhawmpui hmang tura kal Darlawn mi \henkhat chuanna bus a chetsual avangin mi pakhatin nunna a chana; a pawi hle. Hei bak hi chu inkhawmpui chhungin thil duhawm lo thleng awm loin tluang takin an hmang hlawm.
28th. Monday: Environment & Forest department hnuaia Forest Training School chuan Bamboo Research Centre Conference Hall-ah training an buatsaih a; Forest officer, tlawmngai pawl, academician leh thing phun lama tui mite an tel. Training hi ni thum chhung awh tur a ni a, NAEB Shillong, E&F department leh Mizoram University-a mithiamte’n zirtirna an pe ang.

29th. Tuesday: Aizawl City Bus Owners Association (ACBOA) chuan Synod Conference Centre-ah General Assembly vawi 41-na an hmang a, Transport joint director, Lalchungnunga’n a hmanpui. ACBOA chuan, ‘city bus-a chuan man âwl (free) tur chin card siamsak ni rawh se’, an ti. ACBOA hnuaiah city bus 260 vel a awm a ni.
30th. Wednesday: Home minister R.Lalzirliana leh Environment & Forest minister Lalrinmawia Ralte te chuan tunhnaia ramri chungchang avanga buaina tawk mek Buhchangphai an tlawh. Home minister chuan, Buhchangphai Ramthar zaua Assam Police leh Forest mite chêtna chu Mizoram a nih thu sawiin, Assam mite chu an rawn lut leh a nih chuan, lo kâp turin IR police-te a chah.

Similar Posts:

Recent Posts:

One Response to “April 2014, Mizo(ram) Diary”

  1. 1
    H.Vangchhia Says:

    1st :P hairehai

    A tha thin mang e aw (Y)

    Report this comment