Saikhumphai-bawk Chungchang Kha…

April 22nd, 2014 11:00 pm by Levi

Ka mi lohna a rei ta a niang,ka bo huih mai.

Saikhumphai leh Vaphai khaw inkara buaina a chhuah hma kar khan Vaphai ah ka chho a. Tichuan kha tiang thil kha athleng ta rup rup mai si a. A pawi in, a lungchhiat thlak em em a ni. Ka mit ngeiin ka hmu ve a, ka tel ve bawk a (Vaphai khua ni ve miau hek). Post hlui khatiang inziahna kha ka’n hai kual a, ka hmu nual mai. Ziah ve a tulin ka hre tlat ta a.

Hemi issue ah kher kher hi chuan Vaphai kan thiam lo hmasa a ni ti ila a sual lo ang. ‘In khua ni si i va tan lo ve’ min ti mai thei, kan sawi zel ang.

Saikhumphai hi (Keini Vaphai ho chuan Saikhumphai-bawk ti ngat in kan ko) a dinna a reilo. A din tandan chu sawi vek lo mai ang, a sei dawn lutuk. Vaphai khua, leilet a hnathawka riak thin ten an din a ni. Khua a ni lo, bawk a ni. Tichuan hun alo kal zel a, mi an lo pung ve zel, khawchhak tlang dung a tang kan unau te an lo pem khawm a, Vaphai atang ngei pawh zuk in bawk an awm ta (Vaphai atang an pem lo a, an in sawn mai a ni. Vaphai veng pakhat ang a ni). Tichuan VC hran ngiat tham te an lo awm ve ta reng mai. Hetianga mahni in relbawl hrang duh a an awm hi ka hriat sual loh chuan 2003 vel a tang a ni a. A mei zang hlap tu ber hi kan khaw pa ngei mai Pu. Lalchawivela a ni. Mahni in lak hran duhna an ti lang lian telh telh a, party lam atang eng tin tin emaw politics khelh nan an hmang a, MNF VC kan neih laiin politics khelh nan kan indan tir ang che u an lo ti pek emaw ni, chu document ngei chu a ni court-a Saikhumphai-bawk ten an lek lam viau kha. Tichuan Vaphai khaw mipuite chuan kan hotute tih dik loh chu kan tuar ta zel a ni. Hetah hian in thupsak a, kan thiamna ngawr ngawr chauh sawi ka tum lem lo a, dik lo chu a dik thei lo miau si hek!

Vaphai khua te hian kan in rawt phur a, kan khaw veng pakhat kan zu hal hluah ringawt a ni lo a, rei tak atanga in mun tawh, khaw chhung mipui ten thaw dep dep a kan thlir a ni tih min hriat pui ula a tha khawp mai. Hetiang hi a thleng thei tih an hriat avangin Val upa chinchang hre deuh te khan min lo hup bet hram hram a, zawl an lo dawh hram hram a ni zawk a. Zawl dawh zawkah kan tang char char a, a te zawk Saikhumphai-bawk hian min vo kher kher zawk titih ta mai. “Vaphai khua hian an ngam tak tak lo ang” an ti a nih mahna. Khawchhak lam unaute, helaia Saikhumphai-bawk a rawn pem te hi atlangpuiin tlawmngaihna ah an hniam em em a, Vaphai khaw ram kang ah te hian kangmei min ven pui a min thelhpui awm hi ka la hre lo reng reng mai a, an veng chhak lawk te pawh kang se, an tana a hlauhawm lem loh chuan an thlir vel mai mai a, sangha lah nise Tiau dung tluan an suar tluan a,an vai zo. Kan naupanlai (ti ve khanglang ila, a la rei lem lo mahse chuti chung pawh chuaan…) a ngaw khep khup, zawng rual pawh kan hmuh sup sup na Tiau kam ngawpui te kha min tuk darh sak zo a, thingzai a tan tam tak an kit bawk a. Khaw hmangaih tak rilru atang chuan a na ve em asin. Khang ho kuta Vaphai khaw ram tha lai tak mai, leilet hmun leh thlawhhma atana tha lai han pek birh kha chu kan phal bik thlawt lo a ni. Mahse kan tuhrah kan seng kha a ngai ve miau si a. Border Trade te Saikhumphai a dah tura tih a lo nih khan, Saikhumphai-bawk mite nena buaina kan neih avangin Farkawn khuaah Trade center kha sawn mai thei dinhmunah a awm ta mai a. Khami rilru na kha tam tak an awm bawk a ni.

Tichuan tha takin kan indawr chho anga, an ni pawhin zawl an dawh ve ang a, Vaphaiah lo chho in kan cheng ho anga kan tih laiin kawhmawh an bawl leh ta a. Court ah an zual ko a, rambuai hma atang a kan awmna a ni tih ang zawng a thu an han vei vir te kha chuan tlangval thin a ti sa a lawm. Tichuan 2012 khan Vaphai khaw thinrim chuan an in zu thiah tumin a khaw nawtin kan chim thla a, a hnarkaitu in 3/4 vel chu kan zu thiah sak a, in halna em chu a thleng lo. Upa te khan thalaite kha min beng dai hram hram a, IR ho an lo duty bawk a. He mi tum pawh hian ka tel ve nghe nghe a. Tha taka sawi laia an awih duh loh avang khan kan zu rik rap ve a ni. A khaw mi tam zawk te chuan bawk atang a Vaphai khuaa rawn insawn chu an hreh lo, mahse an hotu deuh te kha an hmaizah a ni chek ang chu in 2 vel bak an rawn in sawn ta lo a. Court ah an appeal leh ta. 2013 kum tir ah khan Court thu a lo chhuak a, hnehna an chang ta mai. Khatah tak khan a ni Vaphai tlangval thinrim kan in veng seng ta lo a ni. Court-ah Bawk mite nen chuan kan in khing ta a, khati khawp khan document kan nei tha a. Kan dinhmun a that fe zawk lai a, Vaphai khua min king thla tawp thei kha mipui mak tih a la ni reng. Rilru a na bawk. A thawh hnih nan Bawk lam panin a khaw nawtin kan chim leh ta a.

Tlangval chakvak te ruang chaicheh in khua kan lut a, IR te leh kan nula ho lo in dan buai lai a in lo thiah zawh vek kha kan tum ber a. Upa lam leh nula te kawng pangngaiah IR ho nek thla turin an kal a, tlangval ho khua kan luh hma chiah khan nula ho te thawm leh tear gas puak ri khan Vaphai khaw tlangval thin tawt a ti puak a ni ber ang chu, thil duhawmlo tak kha kan lo ti ta a. Khuaah chuan Bawk mi sa tu mah an lo awm lo a, an hlau an lo tlan bo vek a ni. In inhnaih te te a nih hlawm avang khan an zirlaibu, Bible leh an thawmhnaw te, an bungbel te kha theh chhuak ve mah ila a hliau kang vek tho a. A rapthlak em em, tih bak chuan sawi ngaihna a awm lo. Sawi tam lo ang. Vaphai khaw nula te, tlangval ai mahin an huaisen a ni. Fak an phu.

Thir hi a lin laia den tur a ni a, hmana a awlsam lai khan kan khawtlang hruai tu te khan a na chang hriain ro lo rel sela chu hetiang hi a thleng lo ang. Tin, a nih tur ang ang a ni tawh a, Saikhumphai-bawk a hruaitu (mipui thlan an ni chuang lo a, hotu awm a awm ve tawp an ni ber) te kha in phah hniam in Bawk atang Vaphai-ah khan rawn insawn chho mai se chu eng mah athleng lo ang. Sorkarin transportation a tum vek dawn a, tin, sawrkar atanga compensation kha atlem an ti a nih chuan demand belh in Vaphai khua te phungbawm ah sawm se, inpui tawn ila engkim hi a tha mai tur. Thuneihna duh lutuk avang in nu nau ten an tuar ta vak mai a, a pawi tak tak a ni. Vaphai khua hi khaw sual tak kan ni lo a, ramri dep a awm kan nih avang erawh chuan chanchin tha vaklo hi kan nei ve zauh zauh a ni.

Khatia kan buai lai khan sawrkar atangin Saikhumphai-bawk mite chuan ration an dawng a, Vaphai khan chaw nghei a dah chu a tum bik lo. Mahse, thil kan ti ro ro tawh a, Bawk a awm tir loh tawp law law kha Vaphai hruaitu te duhdan a nih avang khan an hnena tanpuina lut turte kha an dang ta a. Chutih laia Farkawn khuain Vaphai khua pawh rawn eih lo a an lo zu che ta mai kha, Vaphai khua an zahlo hle a ni. Thil atir atanga min hriatpui vek tu te kan khaw thenawm an ni a. An politics ah chuan Saikhumphai-bawk an hmangaih em em vang aiin, Border Trade an khuaa a awm theih nan Bawk-a mite hi chhuak lo se, buai reng se. Keiniin Trade Center hi chang ila, tia an politics khelhna a ni mah zawk. A hmuna cheng ka nih avangin he thil hi chu a chiang khawpin ka hria. (Farkawn leh Vaphai hi chu khaw iner tak kan ni ve hrim hrim a)

Ka sawi hmaih hauh loh tur chu hotute hi an pawimawh a. Khaw mipui/ram mipui te dinhmun hi an kutah a awm a ni. Tha leh dik taka rorel mai hi a tha a. A chang te chuan inphahhniam a ngaih changte a awm ve fo a ni. He thilah hian Vaphai mipui kan thiam lo a, Bawk hruaitu te pawh an thiam lo. Lungrual taka awm ho hi a tha ber a. Vaphai khaw mawng ka hlim deuh a nih pawhin ka hmuhdan ka ziak a ni ve mai a. Thupawi a nih em ka ring lo. Mimal ngaihdan ka rawn tarlang mai a ni. Vaphai khaw mipuite hian min tawmpui vek kher lo ang. Tumah ka tih chhan lo tiin ka’n in tlawh khalh sa ange. Saikhumphai-bawk mipui te nen hian kan inhaw hran chuang lo a, kan la in kawm bawrh bawrh a. Bawka kan kal chang pawhin chawthing kan zen rawk rawk tho a ni. An ni pawh an rawn bazar a, tumah kan in enhrang chuang lo. Vaphai in an chunga an thiltihah Bawk mite chu an rilru a na in engemaw chenah Vaphai pawh an dem ngei ang. Vaphai pawhin heng thleng thleng a kalpui ngaia Bawk mite an awm hi an puhmawh ngei ang. Mahse, a mimal takin inhuatna pakhatmah kan nei lo a. A hma ang takin inpawh tawhlo mah ila, khaw khat kan nihna leh a thlum a al ei za kan nihna hian kan in huat phah reng reng lo tih hi Mizo mipui te hian min hriat sak hlawm dawn nia.

Similar Posts:

Recent Posts:

37 Responses to “Saikhumphai-bawk Chungchang Kha…”

  1. 1
    Borat Says:

    “France has too many foreigners” tih article chhiar zawh chiah hnua chhiar ka ni bawk a, levi (post tu) sawi zawng zawng khi pawm a awlsam khawp mai.

    Vaphai khaw tih dan kha a dik lo viau. Mahse Saikhumphai “bawk” kha illegal immigrant awm khawmna anih chuan sorkar lamin hnawhchhuah tur ani tlat. Sorkar in a hna tur a thawh loh chuan hei aia nasa pawh hi ala awm khawp ang.

    Sorkar hnathawk hlawh pek ringawt hi ram tan a tangkai lem lo. Hemi chungchang debate lai khan eng political party mahin Vaphai khaw tih dan kha an sawisel loh kha.

    Kan ramah hian illegal immigrant an tam lutuk.

    Report this comment

  2. 2
    H.Vangchhia Says:

    Thil pakhat kan hriat tur chu, khua din dawnin khua angin a ding nghal vek kher lo. Entirnan, Aizawl bul mai a Lungleng 2 tih tak khu kan naupan lai chuan Lungleng khaw tak tak, Khamliana Sailo lal in awmnate chuan “Veng piah” an ti mai thin. A chhan pawh Pu Khamliana Sailo lal awpna hnuai tho niin bawk ang lek a awm an ni ve thin tho. Hun a liam zel a zawlbuk hial a din takah chuan khua ang deuhin an awm hrang ta a, an lal erawh Pu Khamliana Sailo ala ni reng. Chutiang chuan, Samtlang tih ni ta, Khawchhete khua-ah khan Pu Khamliana Sailo tho hian a thianpa lal tirin, “He khaw chheteah hian lal ni rawh,” a tih vang a a khua pawh “khawchhete” tih hming pu chho a ni ta zel a ni. Tun hmain chutia khua han tih tham a ni chuang lo.

    Saikhumphai pawh hi in sawi angin ‘bawk’ anih thin ngei a rinawm. Mahse, sawrkar lam thuneituten inthlan ilo-ah pawh polling station te siamin khua ang a pawm a nih tawh si chuan, “Bawk” tih reng kha a dik tawhin ka hre lo. Khua a ni tawh. In (house) tam vang emaw a khua hi khua a ni lo va, khua chu kumtluan a chhungkaw engemawzat ten chennaa an siam chuan khua a ni thin. Rajasthanah pawh khuan Moolsagar khua a awm a, in chu 10 pawh an tling lo, mahse map-ah pawh an chuang kalh a ni. Thar thlaler tawntirh a ni a, ke-in ka kal tawh a, zankhat an khaw daiah kan riak nghe nghe a ni.

    Ram dan bawhchhia an awm anih chuan vantlangin sawrkar lam a thuneitute kan puih theihna chu an hnen a report chiang leh felfai tak a thlen a ni. Man (arrest) theihna kan nei lo va, an khaw hal ngat phei chu human rights lam thleng a bawhchhiatna a ni thei ang. Chu mai a nilo, hmuh theih a suahsualna lian berte zing a mi, tunlai khawvel angah chuan Islam sakhaw la sualtute tihawm tawk lek a ni.

    Report this comment

  3. 3
    phawkars Says:

    Sakhumphai hi khua a ni lo hrim hrim. Sawrkar lam in khua ti a, an pawm ka hre lo bawk(ka hriat dan in). A haltu te hi Islam ni lo in Kristian mahni ram/khua tan Pasalthra an ni e. Ramdang ni lo mahni ram ngei a eizawng ngam a ni e.

    Report this comment

  4. 4
    thewthew Says:

    Saikhumphai In hal tih vel hi I rawn phawrh leh duh zawk ka ti , I thiamthu I rawn puahchhuah pui chu a nia, Chunglam hian thiam ti ve tak maw.A chanchin hriat pawh ka duh tawh lo a rapthlak em mai.

    Report this comment

  5. 5
    Levi Says:

    @Pu HV, I sawi chu a dik viau. Mahse hmana tanga din a ni miau si lo a. Vaphai bulah chawngtui E a awm a, khawkhawm hma atanga awm an ni. Khawkhawmah Vaphaiah khawm an ni a. Tichuan a lo ralmuan tak hnu khan Vaphai ram sat thla in an va in bawk leh a. Vaphai chuan sawi tur kan nei lo. Hman atanga khua a nih avang leh an nu leh pa te ram lo luah tawh an nih avangin. Tuna saikhumphai-bawk hi chu hmanni lawk a bawk, dan lo a kan unau te awm khawmna a ni. Chu chu kan buaina bul pawh a ni. Hman leh tun hi a in ang thei tawhlo tih hriat a tha, ram hauh a na tawh lutuk.

    Report this comment

  6. 6
    Levi Says:

    @thewthew Rapthlak e. Hetiang thleng kal kan ngai hi a pawi kan ti. Vaphai kha min dem nasa a(misual.com a post hlui ho ah pawh hetiang lam hlir a ni) thiamthu kan nei ve e tiin ka rawn post a ni. In rawt phur a ti kan ni bik lo. Chunglam hi chuan engtiang takin nge min ngaih ang ka hre thiam chiah lo, mahse kha thil thlen hma leh thlen hnu atang khan Vaphai Kohhran hrang hrangte hi kan tui em em vek a ni, saikhumphai-bawk mite tan pawh theih tawpin kan tawngtai thin. Vaphai ah han kal rawh i hre thei ang :) @Borat leh @phawkars In comment chu Vaphai mi leh sa tan chhiar a nuam viau ;) (Y)

    Report this comment

  7. 7
    sheldon Says:

    Thil engkim ah hian hmanlai chuan tih ngawt theih ani tawh lova. Tunah te chuan veng leh khawtin ah a Village Council ang leh Local Council te kan nei vek tawh a. In leh lo ram pawh duh duhna hmunah a neih ngawt theih tawh lova. Mahni inhmun ngeia insa tur pawh phalna a ngai tawh a nia. Khaw thar din tur ngat phei chuan a phur phur tih chi a ni tawh lo nasa a. Saikhumphai lo indin dan hi chu dan pawn a ni ngei ang. Sorkar in a tihtur a ti lo ah ka ngai.

    Mahse, mi in chhungkua leh khua a lo din a a lo in benbel tawhna chu zah sak an ngai ve alawm ka ti. Sorkar kut hi nghak thei zel ila kei chuan ka duh. Mob Rule hi chu a lanchhuah dan a rawng deuh hret thin a.

    Report this comment

  8. 8
    Levi Says:

    @Sheldon A dik a ni. Hetah na na na hi chuan Vaphai mipui te hi thiam thu sawi tur kan nei miah lo. Min dem pawh hi a awm a ni. Mob rule hi chu pumpelh hram a tha, a rawng mah mah. Vaphai khawtlangval pakhat fiamthu ah chuan, “Mi khaw hal chu kan sim chiang khawp mai…Vaphai chuan” a ti a. A thu ah chuan thiam in ti mah ila, kan chet dan kha chu a fuh kan ti lem lo.

    Report this comment

  9. 9
    doc_lib Says:

    Ekhai a van ngaihnawm ve aw. Chuan Misuals te in ngaihawm hlawm hle

    Report this comment

  10. 10
    H.Vangchhia Says:

    #5 Khua ni turin ‘hman atang a din” a nih a ngaiin ka hre lo. Hmun ngaiah chhungkaw engemawzat an khawsak ngheh chuan khua a nih mai hmel. Anni phei kha chu biakin nen thlap an awm nghet a nih kha. Kan pi leh pute pawhin khawthar an kai thinin ka hre tlat. Bawkte an khawh mai lo va, khua a ding tawh zawk a nih kha.

    Vaphai khua hi law enforcer an ni lo. Period

    A thuhrimah dan kengkawhtu pawh ni hlei lovin mahni thu a tam hneh a pitar putar naupang thleng mai a rikrap zawng a che hrim hrim hi khawvel hian a thiam ngaiin ka ring lo. An lo thiam a nih pawhin kei tal chuan ka thiam ngai lo vang.

    Sawrkar-n khua tih chu khua a ni mai.

    Report this comment

  11. 11
    phawkars Says:

    Sorkar-in khua a tih bik hi chu State Sorkar-in
    Village Council nei thei dinhmun a a hlankai
    chiah te hi an ni a; Election Commission lamin
    Polling Station a tih hi khua emaw ti an awm fur
    a, ECI-hi chuan voter te’n vote an thlakna tur
    hmun leh an awmna/chenna hmun hi inhnaih
    thei ang ber turin Polling Station a siam thin a.
    2013 atang phei chuan Voter chenna leh polling
    station inkar hi km 2 bak a pel tur a ni lo, tiin
    hmalakna a kalpui mek a;hemi huamchhungah
    tho hian polling station pakhatah voter
    1500/2000 (niin ka hria) awmna chinah chuan
    polling station thar siam belh tur a ti mek bawk.
    Tunah chuan Aizawl veng/khau khatah pawh
    polling station 2/3 a awm fur hi. Polling station
    hi khua a ni lo tlats. Chuan Saikhumphai bawk hi sawrkar in khua a ti lo bawk. Mahni ngaihdan hi dik vek emaw tih loh a thra. Hmanlai leh tunlai a in ang tawhlo tih mipangai tan hriat a thra.

    Report this comment

  12. 12
    H.Vangchhia Says:

    Dan palzut a mahni mihringpuite chunga a khawnawt a khatiang che chhuak, thiam channa zawng a pehhel tak a “bawk” tih vel a tan rawn lak thar leh. Vaphai chet dan kha ka ten tawp. Mizoram mipui zingah hian thiam chantir an awm mangin ka ring lo. That is all (N)

    Report this comment

  13. 13
    phawkars Says:

    uiii i ten tawp maw? haha

    Thuawihlo chu an thuawihloh man an hmu ve ni mai. Vaphai tran tu tam tak an awm tran lo tu pawh tam tak an awm. Mahni ram ngei a awm tan chuan ram/khua hmangaih hi a lo na ni.

    Report this comment

  14. 14
    chhana hlawnchhing Says:

    Khaw inhalsak kha chu a taliban khawp mai a, amaherawh chu a khawneitu, a ram neitute an rilru put hmang kan ngaihtuah thiam pui a ngai in ka hria,Mahni ram leh khua hmangaih hi a lo na thei khawp mai…. Inhnialbuai tawh lovin, thiamloh a in puh tawn tawh lovin… in ngaihtlang tak a an chenza ho theihna tur lam zawk hi i ngaihtuah tlang zawk tawh ang u

    Report this comment

  15. 15
    Athana Chhangte Says:

    Saikhumphai hal kha Media that hmaa thilthleng ni se chuan han phuahrem dan deuhte pawh a awm tur hi a ni a. Tunah chuan thlalak nen lam kan dahtha fir fer hlawm ta chu a nia. He leia Zofate awmchhung hi chuan nawhreh a har tawh ngawt ang.

    Vaphai khua mite ngei thil tih dik loh vanga Saikhumphai lo pianchhuah dan i sawi khi a dik ngei ang tih ka ring khawp mai.A thu-ah chuan in thiam zawk ngei mai Mahse kan mihring puite chenna in halsak kher kha chu a demawm a ni

    Report this comment

  16. 16
    H.Vangchhia Says:

    Mihring fing famkim leh fel famkim kan awm lo. Mahse hmasawn tum a inzir mite (lehkha zir san kher a ni lo) chuan hma an sawn a, mahni ngaihtuahna ang ang a sapatal duh mi, rilru inhawng lo leh inti fingte chu an mawl ngaiin an mawl tulh tulh reng thin. “You can’t teach an old dog new tricks,” an tih ang kha naupang te te pawh hian a put theih fu a nia; chutiang rilru pu tar hnan tawh ngat phei chu… hairehai :D :P

    “E khai, heti ta luai luai chu (ie, Mizoram pum a thang chhuak) tih dik loh kan nei ani ngei ang, insiam that a ngai a nih hi,” tih theihna rilru nei nita hlawm sela chuan mihring hi inngaidam thei tak leh thil hre reng lem lo kan ni fo. Mizoram ngat phei chu Phullen a inrukbo lem te, pastor thih chungchang pawh kan theihnghilh titih der tawh a ni lawm ni? :(

    Report this comment

  17. 17
    Khuangpu Says:

    Vaphai kha dem tur vak an ni bik lo e. Tuipuiral lam mi chuan(farkawn tih loh) vaphai an side vek in ka hria. An zirlai hruaitu thenkhat pawh khan MZP ten tanpuina pek an tum pawh kha an duh vak lo a, an ti lang ngamlo mai niin kan thianpa chuan asawi(TZP- Tuipuiral zirlaipawl hruaitu hlui ani). Aizawla seilian keini ho in kan veng kan indan tir ang ngawt anive lo a, an khaw ram nisa reng kha sahthlak a an thu neihna leh lo rama neih theih tawhlo tur kha uiawm turu tak a ni. Hmanlai insawi anih pawhin mualkhat lek inchuh a thubuai hla buai nei khuan an tam mai. Tunlaiah pheichuan dan feltak a awm a, sawrkar dan pawh in a phal tawhlo ani. Chuan, saikhumphai buai laia Vaphai leh sawrkar leh YMA dem vak vak a, taliban ti tu te ngei kha, Lungdai leh Sihphir buaina ho lutukah khan insah sawk sawk leh inrun chak chak an nih kha. Mahni tawn ve loh leh ralkhat atanga lo judge tawp chi anilo. Keini Aizawl pa te pawh dan anga kan ram ri chu thenawm te nen a fuhloh palh hlekah hmaisen kan inhmuh thla zen alawm. Tinge tuipui bialah Pu T Sangkunga, INC kha hneh taka atlin si. CYMA kha kan huat hlawm tehlul nen. A chhan chu maw, a khilai bial thudik hrepha ho khian helama thu vu vuk kan buaipui ang hi an pawm ve lo.

    Report this comment

  18. 18
    caribou Says:

    In leh lo, a hala in hal sak kha a rapthlak. Halsak hnua chhawmdawlna pek pawh phal lo ni hiala kan lo ralkhat hriat phei kha chu a rapthlak lehzual.

    Report this comment

  19. 19
    H.Vangchhia Says:

    #17 Zohnahthlak ram hrang hrang a awmte min tidarhtu tur ni thei ngei a ka rin, a din tur thu ka hriat pawh a “A tling ngei ang le, nakin-ah Mizo te tan, kan tu te thlengin thil pawi tak la thlen thei tu tur a ni si a aw..” kalo tih lawk sa a ni. A tlin ka rinna chhan pawh a chet dan/ a khawsa zia leh Vaphai chet dan kha a inmil em a ni.

    #18 khi a dik a ni.

    Report this comment

  20. 20
    phawkars Says:

    CHAWNGTE(P) BRANCH YMA IN CHAKMA IN
    PALI
    HAL SAK
    Nimin 24th chawhnu lam khan Chawngte(P)
    Branch YMA chuan Chawngte lui hnära
    Chakma
    In Pali(4) chu an hal sak.
    Chawngte(P) ram lama lui hnar-Vanteikhawr
    bul
    vela Chakma In neite chu hun engemaw chen
    chhuak tura hun pek niin tum hnih warning
    an
    pe a,chuti chung pawn an chhuak duh lova,
    Branch YMA thu rel angin an halsak ta a ni.
    Heng mite hian Chawngte luidunga thing leh
    mau,luia cheng tinrengte ti chereuvin an
    eizawnnan an hmang thin a,YMA chuan a
    ram
    humhalh leh hmangaihna lantirin he thil hi an
    ti
    ta a ni.

    Ram kutphah bawk leh chân pawh hi Ramhmangaih/khua hmangaih tu tak tak te tan chuan a lo na a ni. Ramdang atrang a ram ka hmangaih e ..chu e kha e..lo ti ve zuah zuah ho hi Pharisai nen an danglamna an awm chuang lo. Mahni tluk loh leh kan êr tlat ho hi sawisel nuam kan ti bawk. Mi sawisel reng reng tum phet ho hi lawm Pharisai chu.

    Report this comment

  21. 21
    Levi Says:

    Vaphai khaw chet danah khan insawifiah hi kan tum reng reng lo a. Kan ti dik tawk lo tih chu kan pawm a, ka paws ah pawh ka sawi khi. Pu HV Mizoram i rawn chuan chuah leh veleh Vaphai ah rawn zin la a tha ang. Arpui tui lai ka lo talh ang che :D hairehai :p Saikhumphai-bawk te chu kan zu tlawh ho anga, a thei thei ka zu mi ang chu maw le.

    Report this comment

  22. 22
    chhana Says:

    Vaphai ho hi ka dem khawp mai. Mahse, Saikhumphaibawk ho pawh hi ka dem tho. Kan khawperah in bawk an awm chuan he thil thleng hi inenfiah nan i hmang ang u.

    Report this comment

  23. 23
    Biaka Says:

    He thil thleng hi a pawi hle tih bak sawi vak tur a awm lo..Tunge thiam a thiam lo tih sawi dawn chuan, Sawrkar leh Vaphai VC te an thiam lo ber ka ti ve tlat, rorel hi fin a har a, rorel a fel loh chuan thil pawi hi a thleng chawk a ni. Hetiang aia pawi thui zawk nuna in laksak hial pawh thil thleng thei a ni. Vaphai khaw mipui te hi thiam lohna an nei em em in ka hre lo.

    An khaw ram chhungah khaw dang siam tum an awm a, Vaphai khaw hmangaih tak tan chuan phal chi a nih in a ni lo reng reng a ni. Phal ta se, Saikhumphai hian VC an nei ve ang a, VC an neih chuan Vaphai ram sahthlak/lakthen a ngai dawn a, hei hi thingtlang hnathawka ei zawng tan chuan phal chi a ni lo tawp. Tun ang ram chia leh bua tawhah hian khawtin hian ram hi duh aiin an nei te vek tawh a. Vaphai ram sahhek hi Vaphai khua thingtlang hnathawka eizawng tan chuan huatthlala tak hi a ni ringawt dawn a ni.

    (Chutia nih chuan a mipui ngai tho kha Vaphaiah hian rawn pem se an ti tho a, mipui ngai tho tho te chu an ram ei pawh a in ang reng tho lo mi? in ti mai thei, hei hi chu ti hian tehkhin ta ila, kan Ina mi awm tir leh kan insir kan ram ruaka kan phalna ni miah lova in rawn sa tawp nen tehkhin tawk vel awm e.)

    Hei hi kan hriat thiam theih dan tur chuan, sawrkar hnathawk hlawh in lakthen sak nen in ang thuak awm e. Hetiang hi thleng ta se sawrkar hnathawk tam tak chuan thih ngamin an tang ngei ang.

    Sawi tur a tam mai, a tawp khar nan(comment sei dawn ltk) Vaphai ram chhunga khaw hran din hi Vaphai hian an phal lo bur a, din dawn se emaw la ti lui tang tang ta se, thisen chuah hnial lo an la awm theuh ka ring, sawrkarin a tih tur a tih loh chuan Khaw mipui te an chet a ngaiah ka ngai mai, Tual thihna a awm lo kha a lawmawm hle a ni.

    Pathianin engtin nge a ngaih ang tihah hi chuan, a duh zawng chu a ni hauh lo ang a, mahse a lehlam zawng chuan Pathian hian ral te chu Thah hial pawh a phal ve tho bawk a ni.

    Vaphai iva tan ve in ti mai thei, tan vang a ni lova, an khaw rilru tur ka thlir thiam pui vang a ni, Vaphai khua hi ka la kal lova, a awmna pawh chiang takin ka hre lem lo, map a en hi ka hriat dan a ni ve mai a, Vaphai khaw mi leh sa hmel hriat pakhat mah ka nei lem lo bawk e..

    Report this comment

  24. 24
    PKfanai Says:

    Vawiin hi Saikhumphai hal tanga kumkhatna chiah ani awm e. Misual.com a kan rik laih laih lai te kha a ngaihawm letling ta khawp mai. Kumin khua a thal ro char nasa mai si a, hmun hrang hrangah in kang thawm hriat tur a awm a, in kang palh mah a nat tehreng nen, lo inhal sak tawh lo hram rawh u. History chang se, repeat anih tawh loh nan fimkhur nanah erawh hman tum ila a tha awm e.

    Report this comment

  25. 25
    Puii Says:

    Levi chu mita hmutu si i va rawn report tlai ve le…. ;-)

    Tunah tak hian an dinhmun hi enge ni ta le…

    kum khat chauh a la ni na a, he thil thleng min barakhaih zia kha kan theihnghilh tan ta der mai chu ania…

    Report this comment

  26. 26
    TuaiSialA Says:

    Ka’n sawi ve mai mai ang a; Saikhumphai in hal ni champha-ah chiah (hmanni lawk) Vaphai kan tlan tlang… :) He issue avangin khawchhak lama kan unau Chin te’n zirlai pawl, a bikin MSU an lo hmelhriat phah a, eng emaw changa han zin chhoh hian a nuamin mi an lo ngaina der ve thin khawp mai. A nihna takah chuan, a history chu eng pawh lo ni se, in dawn a tawi em a, an ti mai pawh a. He thil hi Vaphai leh Saikhumphai inkar chauh a ni tawh lo va, Mizoram pum mai bakah khawvel hmun hrang hranga kan unau Chin thlengin a nghawng vek a ni. In dawn tawi em a ni. In halsak kha in history ngaihtuah chuan thil awm tak pawh a lo ni thei e, mahse, a hnu leha in moral kha a rapthlak lutuk. Tanpuina pe tura han zin chho zingah ka tel ve a, in tawngkam leh min lo chan dan te kha a rapthlak takzet a ni. In pastor-te pawh in timangang hle a nih kha. Chuvangin he thil hi chu engtiang pawhin insawifiah eng ang mah ula, in thiam thei ngai lovang. In khua tan ngawr ngawra rawn post i ni lem lo va, i post bengvarthlak hrim hrim e.

    Report this comment

  27. 27
    phawkars Says:

    @Khupchawng a sar hu lai a lo in rawlh vak pawh hi a fin thlak ber lo. Thiam e maw thiamlo e maw mi thinrim hrik tlak hma lo ti ve vak vak pawh hi a thra ber lo. Zirlai pawl pahnih sap trawng pawl (MSU) leh Mizo tawng pawl MZP(nakin lawk a hruaitu te Hnam rûn leh Bavan a la lawm luh tur pawl) te pawh hi in kuanglo in nawr mah mah zel. Ram kutphah tiat pawh hi a hlu a ni.

    Report this comment

  28. 28
    H.Vangchhia Says:

    He hla hian a hril kim khawpin ka hria:

    http://www.youtube.com/watch?v=gxwnvIFoMlI

    Report this comment

  29. 29
    phawkars Says:

    bulma makpa chu re hle mai

    Report this comment

  30. 30
    Levi Says:

    @Puii Nia, nikum chhung kha Vaphai ah ka khaesa a, khilam atang duhangin a online theih ve si loh a. Ka up ta reng a.

    @TS In saeithiam chi zia zâng kan ni lo bawk a, in sawi fiah poh tumlo lawlawta ila, mahse kan thu bul bal ka rawn tarlang mai a nia. A hmingin zirlai pawl angah te kan lo hruai ve a, keini lehkha zir hoten kan khua kan chhan lohin tunge mi rawn chhansak chuang ang. Mahni ram hauh a na a, kan lo tawng hriam ta deuh a nih pawhin lung lohah la suh. Kan tih turkan ti mai a ni.

    @HV Ka hrethiam che. I rawn paste link poh khi hla tha tak a ni. Mizoram tanakan thiltih (Kan khaw tan pawh) in hmu thiam thei lo hi chu eng dang vang a nilo tih @phawkars nen hian kan hai bik lo ;)

    Report this comment

  31. 31
    H.Vangchhia Says:

    Levi hi I tawngkam a puitling thin viau a lawmawm e. Keimah min chhanletna turah erawh khawngaihin ka chhungte telh lo hram ang che u. Dik ka tan ang a diklo nia ka hriat ka tan ngai lovang. Hairehai :P

    Kan hriat loh luih tlat thin pakhat chu: Mizoram a “Mizo” inti bikte hi Hmar, Mara, Lai (pawi), Ralte, Thadou, Lusei, Paite leh Zahau te kan ni hlawm. Lusei tawng hmang chauh hi Mizo nihna a ni lo tih kan hriat a pawimawh. Lushai Hills pawh Mizo District ti a an thlakna chhan kha Lusei vek ni lovin Zohnahthlak hnam hrang tam takte awm khawmna a nih vang a ni (Lushai Hills District (change of name) Act. 1954)

    Mizoram a piang kan nih a Lusei tawng kan hman avangin Mizo kan nih phah lo va, Hmar, Lusei, Lai, Paite, Mara, Thadou leh Zahau te kan nih vang a Mizo kan ni zawk.

    In ziak leh comment te hmanlo chung chungin ka chhiar sak che u bawk a… ka la comment sak zel che u nghe nghe hi mawle heihi lo chhiar ve ru khai. #29 a risk dik thuak ang lo deuh khian kei leh ka chhungte chanchin chhui kir ngam thah inhriat duh chuan ka blog-ah khan a inziak deuh vek bawk e Hairehai :P

    http://henryvangchhia.blogspot.....wmzia.html

    Report this comment

  32. 32
    H.Vangchhia Says:

    phawkars #29 hmangaihtu hmuh ve chhunte fiamthu nan min hman sak lo la mawle :P tet tawt mai hairehai :P

    Tak tak a, Mizo-te hian kan hriat loh fo leh hre hman pawh a kan khawsak thin lohna nia ka hriat chu kutthlak pawi zia hi a ni. Kan thiam ngei ngeinaah pawh kut kan thlak chuan thiam loh kan chang fo thin tih hi kan hriat a thain ka ring. In khua (niin ka ring a) Vaphai pawh hian thiamthu sawina in ngah ang (i. post ang hian), mahse tharum thawh a kut in va thawh chiah khan khawvel mithmuhah chuan thiam loh in chang tih ininhriat a in pawm thiam a pawimawhin ka hria. Mifingin an lo sawi, “Chhuanlam a awm tawh chinah chaun thil felhlel a awm tawh thin,” an lo tihte kha hre rengin.

    Report this comment

  33. 33
    rka_49er Says:

    misual.com hi a lo la awm a ni maw :D

    Saikhumphai ‘bawk’ hal kha chu a zia lo khawp mai. Hal kher lo khan in te kha thiat ta mai ula a zia deuh ang em te chu ka tia :\

    Ni e, mahni ram satthla a khua rawn din tum ngawt te hi kan ngaithei lo thin khawp mai… hman lai lal ten bawk an khawh tir a, khua te a lo piang thin chu a nih kha… phalna lova khaw din tum ringawt chu a dik lo em bawk a ni.

    Farkawn ho pawh khi an lam hnaih tiau-ah khian khua din han tum se an ngaithei bik vak lo ang. Saikhumphai zuk tanpui kha tanpui an duh em em vang nge hman lai atang khaw inhal, in er, fiaratui inchuh an nih vang le :P

    Vaphai ho hi in khua ai chuan Saikhumphai khi a rem daih zawk, tui in harsa bawk si. Saikhumphaiah khian pem thla vek ula, khaw ropui tak a din theih ngei ngei ka ring tlat… khawpui ropui tak tak hi lui kamah awm a tam hi maw

    Illegal immigrants hi Burma ram ri depah khi chuan an tam khawp a Sawrkar tan pawh ven a harsa a nih hi. Kan chipui tih reng pawh hi a fuh ber em aw. Kan chipui te an nih avang a phalna lova rawn pem a rawn inbengbel tir ringawt hi kan tu leh fate tan hian a tha ang em? Ram hi a pum belh lova mihring hi a nia pung zawk :D

    Report this comment

  34. 34
    Dr Mahminga Sailo Says:

    I thuziak chu ka ril rem zawng tak a ni e. Fiamthua an sawi ang deuhin – Saikhumphai bawk hi an thiam lova, Vaphai khua lahin in tidik bik hauh lo!

    Englekhawle, a thleng tawh chu thleng tawh ni mai se, hun lo kal zel atan erawh in leh lo inhal sak em em hi chu thleng tawh lo se. Dan hi zahin, khawtlang leh ram hruaitute paw’n mahni hamthatna ngawt um lovin ram leh hnam thatna umin thawk zel teh se. Hnam tlem nih nak alaia khua leh khua inhala awm zawng a pawi e mai! ;-)

    Report this comment

  35. 35
    saint sammoo Says:

    Vawiin ka B’ Day a nia.. post ka siam ang chu ka tia. mahse.. nileng in power suply kan nei lo… B’day Comment ni mai teh se.. :-D

    Report this comment

  36. 36
    mihring Says:

    Khaw inhal sak kha chu tunlai hunah chuan a hlui tawh, Museum a dah tlak a ni tawh… :D

    Report this comment

  37. 37
    Levi Says:

    @Pu HV, nia kan han rihlut a. Min ngaithiam teh,kan han tan ulh ve deuh te pawh a niang…haha. Innheih tlang taka awm tur kan ni e.

    @rk Thlenin pa in an mikhualpa hnenah ka inchhungah hian tha takin khawsa la, i cham chhung na na na chu ei leh in pawh kan ei ang ang i ei ve ang a, hlim tlang takin kan khawsa ang a, amaherawhchu ka nupui erawh min chuhpui lo hram rawh a tih ang deuh hi a ni e. Thinlungah kan in pawh tawn tur a ni, unau kan ni si a. Mahse nupui lehzel in chuhpui chu a dik ber lo ang :D

    @Dr Mahminga Keini khua a example angin kan awm tawh a, a thleng nawn tawhlo turah ngai ang. Thiltihsual atang hian a nia thil tha zawk a lo chhuah ve fo ni.

    @saint sammoo (Y)

    @mihring A hlui lo a kha a thlen mai kha. Hmanlai thil amaw kan tih kha a lo hmanlai hauh lo. Vaphai chuan “Kan hal” kan ti ngailo, “Kangmei a chhuak” kan ti! ;) :D
    Hmuhthelh chi chu a ni chiang lo a =)

    Report this comment

Leave a Reply

You must be logged in to post a comment.