March 2014, Mizo(ram) Diary

April 15th, 2014 10:33 am by chhana

1st. Saturday: Champhai aṭanga Aizawl pana tlan Scorpio MZ 01 J -3066 chu Seling thlen hma lawk kawng thlangah a tlan liam a, Jirin Zohminga (Thla 5) chu Thingsulthliah damdawi in panpui anih hnuah a thi. Scorpio-ah hian mi panga chuangin, kawngthlang feet 300 velah an lum a, an vaiin hliam an tuar vek a ni.

2nd. Sunday: Mizorama Thalai Inkhawmpui lian ber Kristian Thalai Pawl (KTP) General Conference vawi 55-na & Diamond Jubilee lawmna ni bawk, Khawzawla Feb. 27, 2014 atanga tan tak chu tluang taka neih a nih hnuah a tiak ta. KTP General Conference vawi 55-naah hian thupuiah ‘Tho la, Eng rawh’ (Isaia 60:1) tih hman a ni a, speaker atan mi pathum Rev. H.Lalrinmawia (CKTP Leader, 2004-2006), Rev. Lalzuithanga (CKTP Leader 2006-2007) leh Upa C.Ngurthantluanga (CKTP Asst. Leader 2000-2002) te an hmang. 2016-ah chuan Champhaiin an thleng dawn a ni.

3rd. Monday: Land Revenue & Settlement minister, R.Romawia chuan, sorkarin in hmun la nei lote tan in hmun pek tur a ruahman mek thu Chaltlang North khawtlang hruaitute a kawmnaah a sawi.

4th. Tuesday: Zemabawka bazarna hmunpui tur ‘Aizawl Municipal Market’ tia vuah chu AMC chairman, CT Zakhuma’n a hawng. Market hawnna inkhawm hi AMC chief executive officer, M.Zohmingthangi’n a kaihruai a ni. Aizawl Municipal Market sakna atan hian NH-54 kawngpui chhak lama UD&PA enkawl bazar chhak chu ram neitu, Lalramliana’n a thlawnin a pe a; market hi AMC-in Rs. 26,70,000/- sêngin bazar a sa a ni.

5th. Wednesday: March 5, 1966-a India sorkarin jet fighter hmanga Mizoram a beih ni champha, ‘Zoram Ni’ tia vuah chu MZP huaihawtin Aizawla I&PR auditorium -ah hman a ni a; Aizawla Zoram Ni hmannaah Prof. JV Hluna leh Lalhruaitluanga Chawngte ten paper an buatsaih an chhiar a, sawiho nghal a ni.

6th. Thursday: Salvation Army India Eastern Territory chuan Booth conference hall-ah Territorial Council neih a ni a; kum 2014-15 budget atan cheng nuai 852 an pawm. S.A Territorial Council-ah hian hun hmasa lamah India Eastern Territory budget 2014–15 sawiho a ni a; budget pumpui, cheng nuai 875 chu General Maintenance, Social, Property leh Trade-ahte ṭhen a ni. Territorial Council-ah hian chairperson chu territorial commander Col. Lalngaihawmi a ni a, Lt.Col. Lalramhluna, chief secretary chu vice chairman niin, TV Fambawl chu secretary a ni.

7th. Friday: Mizoram hmun hrang hrangah Chapchar Kut hlim leh hlawhtling taka hman a ni a; a hmanna pui ber, Lammualah chuan mipui an ṭhahnem hle. Lammuala Chapchar Kut hman hi chawhma dar 11-ah ṭan a ni a, Art & Culture secretary, C Zothankhumi chu kut thlengtu niin, INTACH Mizoram Chapter secretary, Thenseia chu kut pa a ni. Kut pa chuan, Mizo mipuite’n Chapchar Kut kan chhawm nung zel chu lawmawm a tih thu sawiin, hlim taka kut hmang turin mipuite duhsakna a hlan. Central YMA president, Lalbiakzuala pawhin thu a sawi bawk. Chapchar Kutah hian YMA branch hrang hrangte’n Mizo hnam làm chi hrang hrang entir niin, zaithiam ṭhahnem tak an zai a; MHIP lamin làm an entir bakah, PC Girls’ School naupangte’n pawnto an entir a, IMFA lamin hman lai Mizo inthuamna an entir bawk a ni.

8th. Saturday: Kanchenjunga Stadium, Silliguri, West Bengal-a 68th. National Football Championship for Santosh Trophy final-ah Railways chu 3-0 in a hneh a, a vawi khatna atan India champion a ni ta. Mizoram tan team captain Zico Zoremsanga chuan goal hnih khungin F.Lalrinpuia’n goal khat a khung. He tournament-ah hian Mizoram hian Kerala (3-1), Maharashtra (2-0), Services (4-1) leh Uttarkhand (2-1) te chu hneh vekin semifinal-ah Tamil Nadu chu (1-1) (2-0) in an hneh leh bawk.

89th. Sunday: 7th. Friday a tanga neih Mizoram Presbyterian Kohhran Hmeichhe Rorel Inkhawm vawi 7-na chu Durtlang Presbyterian Kohhran Biak Inah tluang taka neih a ni a, thupuiah ‘Lalpa lam i hawi ang u’ (Tah Hla 3:40) tih an hmang. Rorel Inkhawmah hian Dr. Lalnghakthuami, Associate Professor, ATC; Pi Rosangpuii, Central Committee Member leh Rev. Lalramliana Pachuau, Executive Secretary i/c Women ten thupui hmangin Pathian thuchah an sawi thin bawk.

10th. Monday: Kolkata-a British deputy high commissioner, Scott Furssedonn-Wood chuan zan khat riak turin Aizawl a rawn thleng a; Governor Vakkom Purushothaman, chief minister Lal Thanhawla, chief secretary L.Tochhong leh NGO leh kohhran hruaitute a kâwm. Mizoram leh Britain ram chu Welsh leh London-te nen Pathian thu kaltlanga inzawmna pawimawh tak nei an nih thu sawiin, Scott Furssedonn-Wood chuan, “Hei hi Britain chuan remchanga hmangin, hmasawna kawng hrangahte thawhhona neia tihnun leh a duh a ni,” a ti.

11th. Tuesday: Tuirial aṭanga Aizawl pana tlân taxi MZ-01 D-8844 chu Bung Bangla bulah a chesual a, mi pali chuang zingah a khalhtu Lalrimawia (40) w/o Zairemi leh Lalruatmawia (19) s/o HC Lalrohlua, ITI Veng ve vete a hmunah an thi a; pakhat dangin hliam a tuar bawk.

12th. Wednesday: India Champion, Mizoram Football team ten Aizawl an lo thleng. Lengpui Airport-ah Mizoram mipui thahnem takin an lo hmuak a ni. Assam Rifles Lammualah champion lawmna inkhawm chhawng hnih buatsaih a ni bawk. Champion lawm na chi khat atan hian sorkar hnathawkte tan chawlh (holiday) a puan a ni bawk.

13th. Thursday: National Disaster Management Authority (NDMA), Government of India leh Mizoram State Disaster Management Authoriy tangkawpin an buatsaih, kum 1897-a Shillong khawpui nuaitu lirnghing na tak 8.7 Richter Scale-a na lo thleng anga ngaiin chhiatna rapthlak thleng kara chet lak dan tur lemchanpui (mega mock drill) chu Aizawl khawpui chhung hmun hrang hrang: Kulikawn Middle School, Millennium Centre, Directorate of Higher & Technical Education, Pioneer Missionary School, Zarkawt leh Hotel Regency-ah ah neih a ni a. He Mock Drill-ah hian Sorkar Department hrang hrangte leh tlawmngai pawlte, School leh Hospital ten tha takin an chanvo an hlen a ni.

14th. Friday: Lunglei District Disaster Management Authority hnuaia Joint Verification Team-te chuan PWD SDO (Road) Rammawia hoin Lunglawna Industries department quarters a hmunah an enfiah. Industries quarters hi Industries department-in kum 1984 vela an sak a ni a, assam-type building a ni. In kalkhang leh chhuat a awm tawh lo a, a bang thlang lam a awm tawh lo bawk. Joint Verification Team chuan, in hi ṭhiah a nih loh chuan a bul hnaia chengte tan thlipui tleh thulhah a hlauhawm thei hle turah an ngai a ni.

15th. Saturday: April 3-9 chhunga neih tur UPC (NEI) ṭhalai khawmpui neihna tur Aizawl College Venga field-ah pandal an sak mek chu Venghlui local council lamin an hnenah dilna an thlen loh vangin pandal sak mek chu titawp (stay) rih turin an ti a, hei vang hian nihnih chhung pandal an lo sak tawh chu ṭhiatin, a ruhrel (structure) central YMA aṭanga an hawh pawh an kir leh nghal. Field-a khawmpui an neih turah UPC chuan College Veng local council hnenah an dil angin phalsak an ni a, March 12 khan pandal hi an sa ṭan a, cheng nuai hnih dawn an sen tawh bakah mihring tha 250 vel an sen tawh thu an sawi. Chanchinbuah khawmpui neihna tur ‘College Veng field’ tia tarlan anih vangin Venghlui LC chu an lungawi lo hle a; pandal banner-ah Venghlui/College Veng tia tar tura an tih laiin College Vengin Venghlui tih tel chu an remti si lo a, veng pahnih inkar buaina a ni a, veng leh veng boruak chhiat ai chuan kohhran anga hman a rem loah ngaiin an inthiarfihlim ta a ni.

16th. Sunday: Michael Lalrinsanga Sailo (33) s/o John Ruata (L), Ramhlun Venglai, senior civil judge chu an mut pindanah a silai, .22 pistol-in a bek dinglamah kah a nia; damdawiin pan pui a nih hnuah a hliam tuarloin a boral. Mahni inkap lui nia ngaih a ni.

17th. Monday: Synod Music Committee chuan Mission Veng Kohhran hall-ah lengkhawm zai hruaitute tan training an buatsaih a, Aizawl khawpui chhunga khuangpu mi 245 an tel. Khuangpute hian Synod Music Committee member, Rev. K.Lalthanliana ziah, ‘Kohhrana lengkhawm zai pawimawhna’ tih leh, Synod senior music instructor, Lalromawia ziah, ‘Lengkhawm zai khuang vuak dan’ tihte an zirho a ni.

18th. Tuesday: Lunglei DC thar, Ashish Madhaorao More chuan nimin khan a hna thar a chelh ṭan. Ashish Madhaorao More hi Maharashtra mi niin, 2005 Batch IAS, AGMUT cadre a ni a, Andaman & Nicobar Islands leh Delhi-ahte a awm tawh a ni.

19th. Wednesday: CBZ extreme MZ-01 F-4250 hnunga chuang, C Lalrinthara (59) s/o Thangchhunga (L), Khawzawl Vengthar chu 407 truck MZ-06 1179-in Zemabawkah a chíl a, a hmunah a thi. CBZ extreme hi Zemabawkah a hmaa tlan motor leh anmahni tawk zawnga tlan motor dang inpêl tur avangain 407 truck hnungah a ding a; chutih lai chuan V.Luaizamuana s/o LK Kama, Zemabawk khalh taxi MZ-01 D-7063 in hnung lam aṭangin a sû a, bike hnunga chuang C Lalrinthara chu invawrh chhuakin, anmahni tâwk zawnga 407 truck tlan, MZ-06 1179-in a chíl a, ká pawh chhawn loin a thi a ni. Bike khalhtu erawh ngaihtuahawm lutuk a ni lo. Laizamuana leh 407 khalhtu hi police-in an la a ni.

20th. Thursday: Mizoram Assembly Budget Session, ni thum awh chu chhunzawm a niin, zawh nghal a ni. Session-ah hian sorkar kum thara thla li, April-July chhunga sorkar sum hman tur cheng vbc. 2,381.8/- chu Vote on Account hmangin pass a ni a, kum 2013-14 sum indaih lohna phuhrukna tur, Supplementary Demand for Grants cheng vbc. 2,658.47/- pass a ni bawk. Session tihtawp hmain speaker, Hiphei chuan, tun session chhunga thil tihte a puang a; starred question leh unstarred question 93 chhan a nih thu te, report pali leh lehkha pawimawh pariat House-a pharh a nih thute a sawi. Report a pek zawh hian ni thum chhung awh Assembly Budget Session chu tiam chin awm loin speaker, Hiphei hian a titawp a ni.

21st. Friday: UPC (NEI) ṭhalai pawl, Pentecostal Youth Department (PYD) din champha vawi 46-na a ni a, Mizoram puma PYD-te’n an hmang. PYD Day pual hian tualchhunga PYD hrang hrangte’n awmni khamin intihhlimna leh infuih tharna hun an hman bakah, vantlanga thil ṭha tihna hun hmangin, khawlai thianfaiin an hnatlang a; PYD ṭhenkhat chuan thisen an pe a ni. PYD hi March 21, 1969-a din a ni.

22nd. Saturday: Bru helhoin an rukbo Deep Mondal chu chhuah a ni ve leh ta. Amah hrengtuten Mizoram police houte hnenah ramriah an hlan a ni. Deep Mondal ruala Mizo pahnih an rûkbo, Sanglianthanga leh Lalzamliana te chu ni 58 hrên an nih hnuah, January 21, 2014-ah chhuah an ni a; Deep Mondal pawh ni 119 an hrên hnuah an chhuah ve leh ta a ni.

23rd. Sunday: Venghlui, Aizawla Roṭhuami in, Assam type chu a kâng a, bungrua chuh hman awm loin a kâng ral. Kangmei chhuak hi khawtlang mipuite’n ṭhelh tuma an beih bakah, Fire department-te rang takin an thleng bawk naa; eng ruai an ang ta lo a ni.

24th. Monday: Mizorama tlawmngai pawl panga – YMA, MHIP, MUP, MZP leh MSU-te chuan Tripura transit camp-a awm mek Bru-te an awmna Tripura state chhunga vote thlaktir tum duh loh lantir nan Aizawl khawpuiah kawngzawh an huaihawt a; resolution an pass bakah, Election Commission of India-a memorandum thlen tur an siam chu joint chief electoral officer, H.Lalengmawia hnenah an thehlut.

25th. Tuesday: Lai Autonomous District Council (LADC) huam chhunga village council inthlanna, Thawhlehnia neihah vote 76.9% a tla a, vote tlate hi April 12-ah chhiar a ni ang.Eletion-ah hian Hmawngbuchhuah, Laitlang, Sabualtlang, Chamdur P-II, Chamdurtlang-II, Kawnkhua, Sangau-IV leh Bolisora-ahte Congress candidate-te chuhtu awm loa tlingah puan an ni a; vote tlak ṭhatna ber Kaichhuah khuaah chuan vote nei zawng zawng 154-te’n vote an thlak vek a; vote tlak chhiatna ber, Ṭialdawngilungah chuan vote nei 277 zinga mi 102-in vote an thlak a, vote tla hi 36.82% a ni.

26th. Wednesday: Mizoram Government Pharmacist Association (MGPA) chuan I&PR conference hall-ah general conference an hmang a, Health Services director, Dr K Ropari’n a hmanpui. Dr.K.Ropari chuan, pharmacist-te pawimawhna leh dinhmunte sawiin, an harsatna tawh, a hnena an lo thlente chu sutkian a nih theih nana theihtawp chhuahpui a inhuam thu a sawi a, “Mizoram hi hriselna kawngah model state-a hlangkai thei turin ṭan lak tlan a ngai a ni,” a ti. MGPA conference hi an pawl president, Lalvuana’n a kaihruai a ni. MGPA-ah hian member 115 an awm mek a ni.

27th. Thursday: Excise & Narcotics enforcement-te chuan Edenthar Veng, Aizawlah heroin gram 46 leh a neitu, Singneihpari (35) d/o Paudokhup, Khampat, Myanmar an man a, thubuai an siamsak. Heroin hi Myanmar aṭanga lâk, Aizawla hralh an tum mek laiin man a ni.

28th.Friday: Buansanga (34), Lawngtlaia Fire&Emergency Services department-a thawk lai chu Chhimtuipui ferry kaiah a chesual a, a thi. Buansanga leh a thawhpuite chu Chhimtuipuiah hian an department tui tur chawi turin an kal a, tui an thal zo chu inchiah dai tura luia an kal chu Buansanga hi a chesual ta a ni.

29th. Saturday: Environment & Forest department chuan Tuirini kama ramhmul ṭangkai loa ngaih (invasive plant) chi khat, Shillong pár (Lantana camara) nuaibo beihpui an thlak ṭan a; addl. PCCF Rosiama Vanchhawng hoin Forest officer-te leh, Central YMA leh ASEP hruaitute an tel a ni. Shillong par nuaibo beihpui thlaknaah hian a hung lian deuhte chu JCB hmanga hnuh chhuah a ni a, hâl ral nghal a ni.Shillong par nuaibo beihpui thlakna hi a bul ṭanna leh nuaibo dan tura mite zirtirna a ni a, Mizoram pumah nuaibo zel tum a ni. Shillong par hi hlíng nei a ni a, a chak em em a, ei raltu a neih meuh lo a; lei chhia a ngam a, sik leh sa inthlak a haw lem lo a, chi a chhuah tam avangin a pung chak hle niin an sawi. Rim leh chemical a tihchhuah hmangin a bul vela thlai dang awmte a tihlum theih bakah, rante tana túr chi khat a pâi niin an sawi bawk.

30th. Sunday: Vairengte Forest checkgate-ah red sandalwood ṭhahnem tak an man a, a neitu nia puh Vanlalhruaia, Champhai nia insawi leh a phurtu motor pawh man a ni. He truck MZ01 J-1880 hi Vairengte forest chuan an thudawn bawhzuiin an gate-ah an lo man a, he motor number ngei hian Vairengte police gate pawh a paltlang tihchian nan police-te pawhin an ziak lut nghe nghe a. Mahse, forest hoin an man lai hian a number dik tak MZ04-6807 in an thlak leh a, forest duty ho pawh a tibuai hman hle. Truck hnung chhuatah hian red sandalwood hi quintal 45 vel an rem a, a chungah thiam takin Wheat-vai Bag engemaw zatin an khuh a ni. Vanlalhruaia chuan, heng thing manto hi Silchar aṭanga a lak, insak nana hman tur niin a sawi a, local market rate ang chuan cheng nuai za man vel a ni.

31st. Monday: MSACS buatsaihin pawl hrang hrangte’n I&PR Conference Hall-ah tunlaia ruihhlo hlauhawm, Amphetamine chungchang an zir ho a, he ruihhlo hi Mizo thalaite a run nasat hma-a do a pawimawh thu an sawi. He ruihhlo zirhonaah hian MASCS Project Director, Dr. Lalmalsawmi Sailo chuan, amphetamine ruihhlo hi mi thiamte’n a thahna damdawi an la siam lo a, ram chhungah a enkawlna centre pawh din a la ni lo niin a sawi a, Chennai leh Synod Hospital-ah a enkawl chhinna tur duan mek a ni a, he ruihhlo hian hun rei lote chhungin thalaite chu tar hmel anga a sawisak chhiat thin avangin tangruala do a tul thu a sawi. Zirhona-ah hian MMACS Dy. Director, Dr. Vanlaldiki, Psychiatrist chuan, Amphetamine ruihhlo hlauhawm zia, a lem nena entirin a sawi a, rei lote chhunga thluak leh taksa hnathawh hrang hrang tisanga tichak thei a ni a, mihringah phurna leh hlimna nasa takin a siam a, a ruite chu uchuak takin an phur a, mi aiin an tawng tam a, an che reng a, phut zek zekte an nei a, an ril a tam thei mang lo a, an thin a chhiat bakah hlauh an nei deuh reng a, an hah thei lo a, thawk harsa an tih bakah an lu a hai thin bakah hmel a tichhe nasa a, thalai tam tak chu tar angin an hmel a lantir a, ha hni a tichhia a, mipat hmeichhiatna kawngah nasa takin mi a tiphur thei niin a sawi a, mihring a tihchhiat hma avang leh a ngawl vei a awl avangin do a ngai hle niin a sawi.

Similar Posts:

Recent Posts:

6 Responses to “March 2014, Mizo(ram) Diary”

  1. 1
    badboy Says:

    comment 1la :-D

    Report this comment

  2. 2
    sheldon Says:

    Chhana hi i taima ngawt mai. Tluk loh rim i nam vung vung e (Y)

    Tunthla Mizoram Diary ah chuan Phantom a la lang phalo ni maw :-D

    April Diary chu pui ngawt ang. NGO Total Bandh, mipui rilru phawklek, chutih laiin a tizual turin Phantom thu leh hla lo ri sek bawk, Election Commission hlauhawm bawk si :-)

    Report this comment

  3. 3
    H.Vangchhia Says:

    A lawmawm thin e (Y) Hairehai

    Report this comment

  4. 4
    Puii Says:

    Bengvarthlak thin hle mai… (Y)

    Lantana camara maw shillong par sap hming chu lo ni? Kan naupan lai khan cancer a thlen thei an ti a, a par pawh mawi ti viau mah ila kan hlau thin khop… :-) chitin par kha kan ti mai thin a,

    Report this comment

  5. 5
    saint sammoo Says:

    ti tha thin e…. chawngchilh.. te tawngkam hawk lawk ang…
    Qualitus – habitus.. :-)

    Report this comment

  6. 6
    Awmtea Leo Khiangte Says:

    A tha e (Y)

    Report this comment

Leave a Reply

You must be logged in to post a comment.