Tun Hun Hi

March 24th, 2014 9:39 am by Chawngthu Pa

“A pawimawh ber chu hei hi a ni,

Kan ngaihhluta kan hman thiam ngai,

Nakin huna kan awmdan tur hriltu tur,

Tun hun hi.” – Vincy Chhangte

 

Hun leh tufawnin tumah a nghak lo. Saptawng chuan Time and tide waits for none tia kan hriat lar hian a sawi tum ber chu – mihring tumah hi hun kallai chelh ding tur khawpa ropui leh chak an awm lo – tih hi a ni. Hun hi mihring rohlu ber te zinga mi a ni. Thenkhat chuan hun hi nunna tluk hiala hlu a ni, an ti thin. Enge nunna chu? Boruak thawk luha thawk chhuah leh ringawt hi nunna a tling em? Engtinnge hun chu kan sawifiah tak ang le? Nobel Prize dawngtu German thawnthu ziaktu Thomas Mann chuan a thawnthu The Magic Mountain ah chuan heti hian a ziak: “Hun kan tih hi enge ni le? Hun chu thuruk a ni – khawih theih leh hmuh theih loh, mahse thil ropui ber a ni si,” tiin.

 

“Hun a ral thin, in ti maw? Teuh lo mai! Hun hi a awm reng, hringfate hi kan ral thin zawk a ni,” tiin Austin Dobson chuan a lo sawi ve thung bawk. English poem pakhat The Brook ah chuan lui te tuiluang chuan heti hian a auchhuak a: “Mite an lokal a, an liam leh thin, kei erawh chu ka luan pangngaiin ka luang reng a ni,” tiin. Mahse, he lui te tuiluangah hian tui pangngai a luang nawn leh ngai tawh lo ang bawkin hun hi a ral tawh chuan kha hun pangngai vek kha kohkir leh theih a ni tawh ngai lo. Eng anga nasa pawhin miin bei mah se, hun liam tawh kohkir leh hi mihring theihna piahlam a nih miau avangin hun ral tawh hi nawt reha ziak tha leh thei tumah an awm lo.

 

Hun hian mitha leh michhia a thliar lo. Mi hausain tan hun a kalmuang bik lo ang bawkin mi rethei tan hun a kalchak bik chuang hek lo. Darkar khat hi lal leh a chhiahhlawh tan inang rengin minute 60 a ni mai. Mi zawng zawng hi hun thuhnuaiah kan kun vek a. Kan tih theih sang ber chu tun hun zel hi fing tak leh a hlawk theih ang bera kan hman hi a ni.

 

Khawtlang siamtha tur leh chhungkua, kohhran, mimal nun siamtha tur hian eng hun nge pawimawh ber? TUN hi a ni. Mahse, chumi hlenchhuak tur leh chutiang thil sualchhuak tura pawimawh ber TUN hun hi kan bawhpelh fo a ni. Mahni sahimna hmun atangin mite kan thlir a, kan sawisel a, kan teh a, kan teh tling lo fo. A kotlang atangin miin goal a thun ngai lo. Khelmual luhchilh a, nasa taka beia tlan thian hian a ni goal thun a, chawimawina nopui chawi thin chu ni!

 

Hun a ral a, hun bi thar a lo thlen zellai hian eng rahbi nge kan rah leh dawn? TUN HUN neitute KEINI hian chu zawhna chu a practical in i chhang ang u. Henry Wadsworth Longfellow chuan heti hian a lo ti a nih kha:

 

Hawh u, thovin i thawk ang u,

Engpawh hmachhawn tura kan thinlung inpeihin;

Hmatiam hlen chung leh hmasawn zel chungin,

Thawk zel chungin i nghak ang u.

Similar Posts:

Recent Posts:

6 Responses to “Tun Hun Hi”

  1. 1
    badboy Says:

    nghak 1la :-D

    Report this comment

  2. 2
    chhana Says:

    ‘Hun is pawisa’ an tih tak kha mawle.

    Report this comment

  3. 3
    saint sammoo Says:

    tha hle mai (Y)

    Report this comment

  4. 4
    kilung Says:

    A dik chiah lawm..

    Report this comment

  5. 5
    H.Vangchhia Says:

    Ni e “tun” hi a pawimawh em em. Chutih karah chuan kan fate, an sen tet atang a kan enkawl chhoh dan hi thlak a hun tawh viauin ka hria. Hun pawimawhna te, mahni ke a ding tur a mawhphurhna neih dan kan zirtir lohna te hian kan tun hun zel a khawih thin a ni. Tun a kan siam that loh chuan milem chethei vel a an hmuh angin khawsak an tum a, behind the story etc. engmah an ngaihtuah pha tawh thin silo, tunah kan chet a tul a ni. Nu leh pate pawhin kan fate ti tur a kan duh ang chuan keimahni pawh an hmuh theihin, chutiang chuan tun atang hian kan awm a ngai, chutilo chu entawn tur an hmulo ang a kan ka kan ang thlawn a ni mai. Hairehai :)

    Report this comment

  6. 6
    Awmtea Leo Khiangte Says:

    A tha hle mai.

    Report this comment