Ngaihtuah a ti thui mang e!

March 6th, 2014 1:24 pm by H.Vangchhia

Nimin March ni 4, 2014 khan kan college-ah tul tiin ka kal a. Chutah chuan professor pakhat, Pi Teresa Clark ka hmuh a tul vangin a office kawngkhar ka va kik det det a, min ko lut a ka thu ta a. A thil hriat a sawite chuan minti lawm hlein a mah min nel tir phah nghal hle mai. A office ka chhuahsan hnu erawhin thui tak min ngaihtuah tir zui chiang kher mai.

Min ko lut chu thuthleng min kawhhmuh a, ka thu ta a. Ani chuan, “Kan inhmu tawh em?” a ti nghal chawt pek a. Kei chuan kan la inhmuh awm ka hriat loh thu ka hrilh a. Ani chuan min hmuh tawhna nei tlat a a inhriat avang chuan min zawt chik angreng viau mai a, min nel sa sarh reng bawk a tichuan leh, “A nih Mizo i ni em?” min ti ta phawng mai a ni. Ka phu zawk lek lekin ka hria. USA kum heti zat ka awm ve tawh chung hian tumah ka hriat ngai lovin, “Mizo i ni em?” min la ti ngai lo. A lawmawm dangdai teh asin.

Ka thil tih tur ka tih pah chuan kan titi zui zel a. State dangah rei tak a thawh hnuah a pasal kan khaw lam a an sawn vang a a insawn ve thute a sawi chhova. A class neih hmasakber te chu mahni inhriattirna (self introduction) nei turin a tih a, “a mal mal a kut phar a ‘Kei hi Chin Hills, Burma atanga lokal ka ni,’ an ti zel a. Maryland state a ka class lak hmasakber chu Chin Hills a mi vek an ni ta a nih chu; mak ve deuh a ni,” tih chu tui takin a sawi siam siam a. A hnuah nasa takin research a neih tak thute sawiin, “India a Kuki, Zomi leh Mizo te hi Burma a Chin-te nen hian mihrang inni lo a nih hi. British ho ziak lehkhabu hluite pawh ka haichhuak a, ziak hrang tam tak ka chhiar a– chi khat, hmun hrang a chengten identity hrang hrang in lo hmang mai a ni tihte ka hmuchhuak asin,” tiin phur takin a sawi chho ta zel a. Ka lo sawi thin fo ang a nihavangin kei tak mai chu ka phur ta nek a, kan titi tui chho ta hle nghe nghe a ni.

He ram USA ah hian hnamdangin, “Mizo i ni em?” tia min zawh vawikhatna a nih bakah, a sawi zel danin inneihnaah, Pu Hminga Hmar-te nen dawhkan kan lo kil tlang tawh a ni tih thlengin a sawi chho ta zel a. A hriatrengna pawh a tha takzet a ni. Chin Hills a Lai (Pawi) ho te, Paite-te leh Kalay lam Lusei tawng hmang Tahan mite chuan an nel em em thute chu min hrilh zel a, mitthi vuinaah te, inneihnaah te a kal fo thin thu te chu min hrilh ta zel a ni.

A sawi pakhat lawmawm ve em em mai chu, “American, heta US a piangte ai hian heta lokal hnu a English zir chawp ho hian tan an la peih a, lehkha an thiam chak zawk fo. Immigrant hrim hrimah Chin hills a mite leh Mizo te hi lehkha in thiamthei ber,” a tih kha a ni awm e. Zohnahthlakten mahni chipui hnamdang ang lek lek a kan inen fo lai a vun var hnamdangin, research nasa tak a a neih hnuah tute nge kan nih a chiang em em mai hian Zohnthlakte hi kan inenchian a ngaih zia min ngaihtuah nawn tir chiang kher mai.

Similar Posts:

Recent Posts:

23 Responses to “Ngaihtuah a ti thui mang e!”

  1. 1
    sheldon Says:

    Kha kha ani mai Mizo te hi chu keimahni ah hian Pathian hian theihna a dah tlat a. Khawiah pawh awm ila kan duh anih phawt chuan a chunglamah kan awm thei zel. Pu Hv-a pawh student thatak zinga mi i nih ngei ka ring e.

    Report this comment

  2. 2
    saint sammoo Says:

    ngaihtuah a ngai e…………

    Report this comment

  3. 3
    H.Vangchhia Says:

    sheldon, ID nei thlapin student chu ka ni ngei mai a… hairehai :D I ngaihawm e, misual ho kan inhmuhkhawm kha ka ngai thin teh asin. :)

    Report this comment

  4. 4
    Chawngthu Pa Says:

    Chhiar a nuam hle mai (Y)

    Report this comment

  5. 5
    H.Vangchhia Says:

    Chawngthu Pa, ka lawm e. (Y)

    Report this comment

  6. 6
    Dr John Says:

    (y) Post tha hle mai.

    Zofate tan Chanchin Tha a ni e,

    Nakinah i Post (Prof. Teresa’s Research Finding i sawi) hi a la Pawimawh viau ang… ;)

    Report this comment

  7. 7
    H.Vangchhia Says:

    Dr John, kawm leh hunah rawtna eng eng emaw neih ka tum rin ran. :) hairehai

    Report this comment

  8. 8
    chhana hlawnchhing Says:

    Kan politicians ho leh NGO hruaitu thankhatte hian kan in unauna leh kan inpumkhatna hi an ti chhe thin a, chu pawh chu hre reng chung in, Vote hmuh duh vang leh tu te emaw tih lawm an tum thin vang a ni a

    Report this comment

  9. 9
    century child Says:

    (Y)

    Ti ta daih ila, kumin chu ‘Zoram senmei a chan ni kha’ tih kha ava chhuak lo ve

    Report this comment

  10. 10
    sheldon Says:

    Ngaihtuah a ti thui tak tak. Mahse chin/lushai tih ang lam issue hi chu ka tui ve pha vak lo. Mihring erawh inzir reng tur kan ni a, Pu Hv-a hi a entawntlak riau ania, a inzir peih reng mai. Post tupa, misual ho chu kan vang pharh tawp mai :-D

    Report this comment

  11. 11
    chhana Says:

    Kei hi ka suala, Chin Hills ami adt. tih vel hi ka hmu Mizo thei meuh lo. Mahse, khunglai angah chuan ka ngaina viau tho chuan ka inring. Kan vengah hian Paihte, Manga, nunphungah pawh sang lua biklo hi a awm a, ‘Paihte mai mai’ ka ti thin. Mumbai airport-ah khuan tumkhat chu ka buai tlat maia; Paihte ve tho niin Manga ve tho lehnghal hian min pui hrep maia, kha zet kha chu ka hmu Mizo khawp mai. Ka rilru hel hi nasa takin a kawihher phah.

    Report this comment

  12. 12
    Chawngthu Pa Says:

    Hnam thil hi a sensitive khawp mai. Hmun hla deuh atang chuan Mizorama Mizo, Chakma, Bru issue kan neihte hi tul lo leh ho tak angin a lang thei. A chang chuan Mizoram mai ni lo, Northeast ang pawh hian culture/tawng inanna (similarity) kan ngahzia leh intibuai tur kan nih lohzia te hi ka ngaihtuah ve chiam thin. Mahse, a tawpkhawkah chuan survival game a nih miau avangin hnam leh hnam (unau pawh) kan indo leh thin a nih hi. Mizorama awm kan unaute rilru hi hmun hla leh ram dang atanga hriatthiam vek theih/phak loh chin a awm fo, tih hi hriat a ngai.

    Report this comment

  13. 13
    hlatekhua Says:

    Post leh #12 Chawngthu Pa comment hi ngaihtuah kawp a ngai reng a ni.

    Report this comment

  14. 14
    kimi colney Says:

    post tha thin hle mai….

    Report this comment

  15. 15
    H.Vangchhia Says:

    Mizoram emaw Mizoram pawn pawh nise, Lusei/Duhlian tawng hmang ho, inti Mizo bikte chipui tho kan vel a Zohnahthlakte hi an ni tlat. Mizoram a “Mizo” intite hi Lai (Pawi), Paite, Hmar, Lusei, Thadou, Ralte, Zahau, Mara, Gangte (a dang pawh kan awm ang) kan ni. Chin Hills a awm Zohnahthlakte hi Paite, Lai (Pawi), Zahau te an ni hlawm. Tahan a Lusei tawng hmang tam tak, “Pawi ho” ti ti zingah pawh khian Lai (Pawi) an awm ve tho, Mizoram ang chiahin.

    Report this comment

  16. 16
    Zohminga Says:

    post tha tak a ni..

    Report this comment

  17. 17
    Diktea_Pa Says:

    Ngaihtuah a va ti thui ve. Post tha tak a ni. (y)

    Report this comment

  18. 18
    Awmtea Leo Khiangte Says:

    Chhiar a nuamin ngaihtuahna a tithui hle mai. Kawm chian lehzual zel te pawh a va tha ve maw le.

    Report this comment

  19. 19
    Dr Mahminga Sailo Says:

    Hei chu chhiar hmaih hauh loh chi a nih hi maw le.. (Y) Nu fel tak leh thil chik tak mi a nih dawn hi.

    Kei pawh thla hmasaa Mysore ka zinin, rin loh tak maiin Bus stand-s vaipa pakhat ka biak chuan, “You are from Mizoram?” a ti hlawl mai a. Ka titi pui ta hrep a. Mahse a tawp lamah erawh ka zak chem chem…

    Mizoramah zu zawrh an khap a, bar pawh pakhatmah a awm lo i ti si, mahse Mysore-a Mizo cheng te hian zu an va heh ve a ti ta mai. Kei chuan, nia mi tlemte thenkhat hi, Mizorama zu in tur an hmuh loh vangin an insum thei lo leh thin a, mahse Mizo thlai zu in hi an tam miah lo a nia.. ka tih tak kha… ;-)

    Report this comment

  20. 20
    H.Vangchhia Says:

    Awmtea #18, thla thar hian kan inhmuh leh ka ring.

    Dr.Mahming #19, A nawm rualin a tawp lam chu a fuh lutuk lo a nih chu mawle. A nia sin, Mizo-te hi Mizoram kan chhuahsan hian kan in nasa mah mah thin. Kei erawh Mizoram kaw haw hian, vacation a haw ka ni thin bawk a ka in ve thung lawi si. Inkhat chuan min hneh awl nek lehnghal a. Hairehai :)

    Report this comment

  21. 21
    Turu^lo Says:

    Tha khawp mai…

    Report this comment

  22. 22
    Hotunu_pasal Says:

    Tlai tawh deuh na a, tha kher mai. VAnglaini velah chhuah teh a. Chhiartu tam se ka va ti ve.

    Report this comment

  23. 23
    H.Vangchhia Says:

    #22 (Y)

    Report this comment