February 2014, Mizo(ram) Diary

March 5th, 2014 8:48 am by chhana

1st. Saturday: Aizawla thu thar thehdarhtute chuan Kolasib thlang lama mau sahna leh thawn chhuahna hmunte a hmunah tlawhin an en fiah a, sorkar thu kalhin mau no leh tuai tak takte state páwna thawn chhuah atan sah a ni ngei tih an finfiah. Mau sattute hi hnam dang an ni deuh ber a, thuthar theh darhtute’n an tlawh lai hian KTP, mau sata inhlawhte pawh an awm nghe nghe. Mau sattute chuan, mau sah chin tur hrilh hriat an nih loh thu, thu thar theh darhtute chu an hrilh a, a remchang apiang an sat mai niin an sawi. Mau sah tawh sa, truck-a hlàn tawh leh la hlàn loh zingah mau no tak tak hmuh tur tam tak a awm a ni. Mau phurtu truck khalhtute chuan, an mau phurh chu Hindustan Paper Corporation ta tur a nih thu an sawi a, a phur tura hman mai an nih thu leh, mau man hi an hriat loh thu an sawi a ni. Truck hian a tlangpuiin vawi khatah mau quintal 90 atanga 100 inkar a phur a, thuthar theh darhtute’n an tlawh lai hian truck 30 chuangin Mizoram páwnah mau an phur chhuak a ni. Tunlai hian tui a tam vak loh avangin Tlawng luiah mau tawlh a ni lo a, truck-in an phur chhuak a, Cachar an thlenpui hnuah luiah an tawlh leh thin a ni.

2nd. Sunday: Lawngtlaia All Vehicles Owners & Drivers Association chu kawngpui siam phuta Total Bandh neih an tum chungchang sawiho-in, Lawngtlai DC Conference Hall-ah an thu khawm a, Dist. Bawrhsap, Pu J.Hmingthanmawia’n a kaihruai a ni. Lawngtlai-a Zoram Drivers Union Sub.Hqrs President, Pu J.Rohlupuia chuan Bandh neih an tum chhan sawifiahin, Lawngtlai District khawpui ber, Lawngtlai khaw chhung kawng chu siam that phuta kum 2012 atanga pawl hrang hrangten tan an lo lak tawh dante a sawi a, Total Bandh pawh vawi engemawzat huaihawt a nih dan leh, chuti chung chuan sorkar lam atanga hma thar lak hmuh tur a awm loh thute sawiin, kum 2012-a hemi chungchanga DC ho-a inremna an siam pawh bawhzui loh a nih thu a sawi. He thut khawmnaah hian AH & Vety Minister, Pu C.Ngunlianchunga pawh a tel.

3rd. Monday: 2014 – 2015 atana Rashtriya Swasthya Bima Yojana leh Mizoram State Health Care Scheme hnuaia inziah luhna, kumin atana a hmasa ber chu Govt. Complex-ah neih a ni a, Health Minister Pu Lal Thanzara’n hmanpuiin inziak lut, mipa panga hnenah RSBY atana hman tur Smart Card a hlan a ni. Minister chuan RSBY leh Mizoram State Health Care Scheme chu thil inang, mahse thil hran a ni tih sawiin, thil kal kawp leh hman kawp theih a nih thu a sawi a, heng scheme-in a huam china mite chu hemi chungchang ngaihvena inziak lut turin a chah a ni. Mi harsa, mi chan hai leh sorkar-a MR bill thei lo te tan heng scheme te hi thil hmantlak, damloh nikhuaa innghahna tlak a nih thu sawiin Pu Lal Thanzara chuan, hun tiam chhunga inziah luh ngai pawimawh turin mipuite a sawm a ni. RSBY hi kum 2010-ah hman tan a ni a, MSHCS hi chu kum 2008 atanga hman a ni tawh a, Mizoramin a zawnin tum hnih, National Award a dawn phah tawh a, ‘RSBY hian tun hma khan BPL chhungkua chauh a huam a, kumin atang hian MGNREGA Job Card neite leh AMC hnuaia street vendor-te pawh a huam tawh dawn a ni’, a ti bawk. He Scheme pahnih hi kumin April ni 1 atanga nakkum March ni 31 chhunga hman atan inziah luhna hun hawn tan mek a ni a, kumin April thla thleng inziah luh theih a ni ang.

4th. Tuesday: World Cancer Day a ni a, Vanapa Hall-ah leh district headquarters-ahte hman a ni. Vanapa Hall-a World Cancer Day hmannaa khuallian, Health minister Lal Thanzara chuan, “India rama cancer vei tamna ber kan ni hi vawiin World Cancer Day aṭang kan inenfiah a pawimawh tak zet a ni,” a ti a; kum 2015-16 ah Mizoramah MBBS admission ṭan theih beisei a nih thu a sawi bawk. World Cancer Day hmanna inkhawm hi Health secretary, Esther Lalruatkimi’n a kaihruai a; oncologist, Dr Jeremy L Pautu-in thupui, ‘Ngaihdan dik lo dah bo ang’ tih a sawi a ni.

5th. Wednesday: Mizoram Synod hnuaia rawngbawltu hriat hlawh tak, Moderator hlui, Rev. Thansiama chu Chhinga Venga a chenna inah lung na avangin a thi a, kum 84 mi a ni. Rev. Thansiama hi kum 1930 April ni 14 khan a piang a, kum 1958-ah Pastor-ah ngemngheh a ni. Synod hnuaia a thawh chhungin Synod Moderator hna, vawi hnih a chelh a, kum 1989 January thla-ah a pension a ni. Rev. Thansiama hi mi ze nghet tak nei a ni a, a huaisenna hi mite hriat a hlawhna ber a ni a, dik ni-a a hriat chu mi dang ngaihdan tur ngaihtuah lova huaisen taka tan mi a ni. Nikum October ni 10 khan bual inah a tlu sual a, Aizawl Civil Hospital cabin-ah enkawl a ni a, that chhuah a nei ta meuh lo a, damdawi ina thla khat vel a awm hnu-ah in lama enkawl a ni a, tun hi a lo thleng ta a ni. Rev. Thansiama hi a dam lai pawha Biak Ina mitthi vui duh lo mi a nih avang leh, amah ngei pawhin a thih hunah a ruang chu Biak Ina la lut lo tura a chhungte a hrilh lawk angin, a chenna inah Mizoram Synod Moderator, Rev. K.Lalhmuchhuaka’n thlamuanna thuchah sawiin a vui a, a vuina inkhawmah hian a rawngbawlpui, thenrual tha leh a amah uitu mi thahnem tak an tel a ni. Rev.Thansiama hian a nupui, Pi Thanchhungi leh an fate 6 a kalsan a ni.

6th. Thursday: Excise & Narcotics Department (END) chuan Lunglei Bazar (Kikawn)-ah Ganja 23 Kgs & 400 grams leh aneitu, Thanglianngena (26) s/o Haukhamsuk (L), Hrianghmun, Champhai District chu an man. Thanglianngena hian heng Ganja te hi Myanmar atanga a rawn lak a ni a. Bag lian tak 2-ah a dah a. Lawngtlaia hralh tumin Lai Night Travels Bus-in a rawn keng a, Lunglei-a Excise & Narcotics duty te chuan an lo man ta a ni. Excise & Narcotics Department hian Thanglianngena hi Section 20(b) (ii) (C) of the Narcotics Drugs & Psychotropic Substances Act, 1985 (NDPS Act) hnuaiah thubuai an siamsak a ni.

7th.Friday: Prof. Darchhawna lehkhabu ziah, ‘Beisei ram 2′ tih chu I&PR auditorium-ah Art & Culture minister, R.Romawia’n a tlangzarh. Lehkhabu-ah hian thupui hrang hrang 28 a awm a, a ziaktu hi Padma Shree awardee a ni.
8th. Saturday: Aizawl Kennel Club chuan Pachhunga University College khelmualah Dog Show 2014 an buatsaih a, uite tan inelna chi hrang hrang buatsaih a ni. Dog Show-ah hian hmun hrang hrang aṭangin mi en emaw zatin an uite thawh chhuahpuiin an tel a, MLA, R.Vanlalvena’n a hmanpui a ni.

9th. Sunday: Presbyterian kohhrana Kohhran Hmeichhiaten February 7, Zirtawpni zan aṭang a pastor bial inkhawmpui an hman chu a a tiak ta. Kohhran Hmeichhe bial inkhawmpuiah bial hruaitu thar an thlang nghal.

10th. Monday: Labour, Employment & Industrial Training minister, Lalrinmawia Ralte chuan Aizawla Industrial Training Institute a tlawh a, zirna kalpui dan leh a hmunhmate a enfiah. Minister Lalrinmawia Ralte hian ITI class-room leh an hmanraw neihte an en a; ITI-in a mamawh hrang hrang te leh zirlaite’n an harsatna tawhte minister hnenah hian thlen chungchangah minister chuan, ITI thuam ṭhat kawngah theihtawp chhuah a tum thu a sawi a, zirlaite chu eizawnna tlak thiamna nei ngei tum turin a chah a ni. ITI, Aizawlah hian trade 20 awmin, zirlai 370 leh instructor 33 an awm mek a ni.

11th. Tuesday: Lunglei District Anti Tobacco Squad chuan Lunglei khawpui chhungah vaihlo khuahkhirhna dan, COTPA bawhchhia an awm leh awm loh an enfiah a, phal lohna hmuna meizial zu mi pali manin, pawisa an chawitir.

12th. Wednesday: Falkawna State Referral Hospital pêng bula F.Lalthlamuana in, Assam type, Mangchhuana luah lai chu bungrua engmah chuh hman lohin a kâng ral. In kan chhan hi electric current kal dik lo vang nia rin a ni a, a kan ṭan laiin chhungkaw pa ber, Mangchhuana chu hna thawk turin a chhuak tawh a ni.

13th. Thursday: Lawngtlai-a CMO Conference Hall-ah Lawngtlai District-a ASHA te pualin training neih a ni a, Health Directorate atangin Sr. Malaria Inspector, Pu Rualkhuma’n a hmanpui. Training-ah hian sikserh damdawi thar, ACT-AL leh RDT Bivalent hman dan inzirtir a ni a, kum kal ta chhunga ASHA hna thawk tha, thisen test tam leh hna dang thawk thate chu lawmman pek an ni bawk. Lawngtlai District-ah hian sikserh vei an tlem sawt hle a, he natna avanga thi pawh an tlem hret hret nia hriat a ni.

14th. Friday: Champhaia Excise & Narcotics Enforcement Staff-ten Melbuk-ah ruihhlo, Heroin gram 28 an man. A neitu nia hriat, Hmingthansanga, kum 42, Zokhawthara Biakliana fapa pawh man nghal a ni a, ND&PS Act, 1985 tlawh chhanin thubuai siamsak a ni. He Heroin hawng hnih hi Mizorama hralhna rate anga chhutin Rs. 3,00,000/- man vel a tling a ni.

15th. Saturday: 5th. Dr TAo Memorial Football Cham¬pionship-ah Mizoram leh Meghalaya chu hun pangngaia 1-1 an draw hnuin penalty shootout-ah 3-1 a chakin Mizoram chu a vawihnihna atan Dr TAo Football-ah an champion. Mizoram hian trophy bakah tangkafai Rs 7,00,000/- ngawt an dawng.

16th. Sunday: Champhai Vengthlanga Wesleyan Methodist Kohhran biak-in sak thar chu associate director, Rev. Ben Ward, USA-in a hawng. Biak-in thar lawm hian he kohhranah láwite chuan ruai an ṭheh a ni.

17th. Monday: Aizawl Press Club-ah Aam Admi Party (APP), Mizoram din a ni a, kumina Lok Sabha inthlanpui neih turah candidate neih nghal an tum. APP, Mizoram din a nih thu hi AAP nation executive member, hmarchhak changtu, Habung Payeng chuan a puang a ni. AAP, Mizoramah hian Lalthanzami, Zemabawk chu co-ordinator niin, SL Sailova, Tuikhuahtlang chu joint co-ordinator a ni a; anni bakah hian executive member panga ruat an ni.

18th. Tuesday: Parliamentary secretary, TT Zothansanga chuan Mamit Chhim Veng YMA Hall-ah Mamita MPSC exam centre dah thar a hawng. Exam centre hawnna inkhawm hi Mamit DC, RS Lalzamliana’n a kaihruai a; TT Zothansanga chuan, “Tumna kan nei a, mahse hlawhchham kan tam a, hlawhtling lo tur kan la tam bawk. Taimâk tawk loh vang te, tumruh loh vangtein kan nih tur ang kan ni lo fo. Result ṭha tak kan nei a, mahse hriatzui tlak loh kan tam, thiam thei aiin taimâk leh tumruh a pawimawh tawh zawk,” a ti.

19th. Wednesday: Mizoram Ministerial Service Association (MMSA), Assistant Unit chuan Khatla-a Circuit House-ah August 2013 leh February 2014 inkara an member, pension-a chhuak mi 25-te thlahna inkhawm an buatsaih. Inkhawm hi MMSA Assistant unit finance secretary, Lalchhuana’n a kaihruai a; tunah hian Mizoram sorkara assistant hna awm zawng zawng 837 zinga 643 chu hnawh khah a ni a, hnawhkhah loh 194 a awm a, sorkar kum kal mekah pension-a chhuak mi 61 an awm bawk. MMSA hruaitute chuan, assistant post ruak hawhkhah loha awm reng hi an ngaihmawh thu sawiin, sorkarin hnawh khat thuai se an duh thu leh, duhsak zawng ringawt dah loin, mi thiam, naupang zawkte dah ni thei se an duh thu an sawi a ni.

20th. Thursday: Mizoram police-te’n Zuangtuiah ruihhlo, heroin gram 72, cheng nuai 4 chuang man an man. CID Crime hnuaia Special Narcotic PS Staff-te hian an thu dawn bawhzuiin Zuangtuia Pu Lalhmunliana In luahtu, Lalramchhana, kum 26 In luah lai ceiling atangin heroin gram 72 hi an man a, ruihhlo hi tualchhungah Rs. 4,00,000/- man vel a ni a, a neitu hi thubuai an siamsak a ni.

21st. Friday:Nikum tawp lam atanga neih tawh Zonet Cable TV Mizo Idol thlanna final a ni a, Mizo Idol 2014 atan Grace Lalchhanhimi Kolasib thlan a ni ta.

22nd. Saturday: Serchhipa Legal Metrology enforcement-te chuan Chhingchhip-a dah tur eirawngbawlna gas phur truck, MZ-02 9152 aṭangin gas bûk tling lo bûr 25 an man. Gas phurtu truck hi Zothansangi ta niin, Lalrinliana Sailo, Lunglei Venghlun khalh a ni a, gas-te chu SK Indane, Serchhipa dah tur niin, Mualkhang Gas Blotting Plant aṭanga phurh chhuah a ni. Lalrinliana Sailo hian gas bur 10 chu kawngah a hralh a, a hralh takte hnawhkhah leh nan gas bûr dang aṭangin gas a la chhuak a, bûr 25 chu a bûk a tlin loh phah ta a ni.

23rd. Sunday: Isua Krista Kohhran (IKK) hmeichhe inkhawmpui rampum huap vawi 39-na February 21st Hmunpui kohhrana neih chu.a tiak ta. He inkhawm pui thupui chu ‘Tho la, êng rawh’ tih a ni. Kum 2014 budget atan Rs. 3,15,000/- an pawm a, kum 2015 inkhawmpui chu Armed Veng South kohhrana nghah turin an rel bawk.

24th. Monday: Lawngtlai AOC venga Tomba Singh in chu bungraw chuh hman loin a kang ral. In hi bedroom aṭanga chhuak niin, kangmei chhuah lai hian Tomba Singh fanu chu choka-ah a awm a, hliam tuar loin a tlan chhuak hman a ni.

25th. Tuesday: Mizoram Presbyterian Church Synod hruaitute chuan an pisa-ah MLA-te lêngah sáwmin, an inkâwmho a, Synod hruaitute chuan MLTP Act thlahdul ṭha an tih loh thu an hrilh. Assembly speaker, Hiphei chuan, MLTP Act thlahdul chungchang chu uluk taka ngaihtuah a ṭul thu sawiin, “Zu khapna dan hi a kil lehlam aṭanga thlir chuan accident leh buainate a tlem phah nia sawi a ni a, a lawmawm hle. Hetih lai hian, zu in châk si, zu ṭha in tur hmu lote’n zu ṭha lo an in avangin mi tam takin zu hi an thih phah a ni. Kristian ram dangah pawh zu an khap ka hre lo,” a ti a; zu khap leh zu khap loh inkarah kohhran leh sorkarin kal dan thiam se a duh thu a sawi. Inkawmhonaah hian MLA 31 an tel a; Synod chuan MLA-a an tlin lawmpuina atan Holy Bible leh memento an pe vek a ni.

26th. Wednesday: Gauhati High Court chuan Mizoram Judicial Service Officer eng emawzat a sawn kual. High Court thuchhuak ang hian Gauhati High Court Aizawl Bench-a Registrar, Pu R. Thanga chu Aizawl District & Sessions Judge a ni ang a, Lunglei District & Sessions Judge, Pi Lucy Lalrinthari chu NDPS khawih turin Judge atan dah a ni a, Aizawl District & Sessions Judge, Pu KL Liana chu Motor Accident Claims Tribunal-ah Presiding Officer thar a ni ang. High Court chuan, Aizawl Addl. District & Sessions Judge, Pi Marli Vankung chu Lunglei District & Sessions Judge-ah a dah a, Motor Accident Claims Tribunal Presiding Officer, Pu Joel Joseph Denga chu Mizoram State Legal Service Authority Member Secretary-ah dah a ni a, Chief Judicial Magistrate, Pu Michael Lalrinsanga Sailo chu Aizawl Sr. Civil Judge a ni ang a, Aizawl Sr. Civil Judge, Pi Sylvie Zomuanpuii Ralte chu Chief Judicial Magistrate a ni ang. Anni bakah hian Aizawl Civil Judge, Pu Malsawmdawngzuala chu Lawngtlai Civil Judge-ah, Aizawl Civil Judge, Pu Lalramsanga chu Serchhip Civil Judge-ah dah an ni bawk.

27th. Thursday: Police-te’n Health Minister hlui, Pu R.Tlanghmingthanga an man a, bail-a chhuah lehnghal a ni. Police-te hnen atanga thu dawn danin, Court thupek an hmuh angin Minister hlui, Pu R.Tlanghmingthanga hi an man na a, a thubuai hi bail theih chi a nih avangin bail-in a chhuak leh nghal a ni. Chief Judicial Magistrate-in Health Minister hlui, Pu R.Tlanghmingtanga manna thupek hi a chhuah a, hei hi nikum kum 2013 Assembly inthlanpuia RO hnena affidavit dik lo a thehluh vang nia hriat a ni a, kha inthlanpuiah khan Pu R.Tlanghmingthanga khan affidavit-ah thubuai nei lo angin a inziak a, mahse Ayush building sak chungchanga a thubuai chu a la tawp loh avangin Aizawl South II RO-in a lakah hian FIR a thehlut a ni.

28th. Friday: Kolasib bialtu MLA leh minister hlui, PC Zoram Sangliana chu a kal thlak turin Super Speciality Hospital, Kolkata-ah tha taka zai a ni. PC Zoram Sangliana kal thlakna tur hi a makpa-in a pe a ni.

Similar Posts:

Recent Posts:

5 Responses to “February 2014, Mizo(ram) Diary”

  1. 1
    Dr John Says:

    (y) BVT hle mai. Post-tupa thawhrimna a ropui e

    Report this comment

  2. 2
    saint sammoo Says:

    misual ti hlu tu i ni… bang suh….

    Report this comment

  3. 3
    H.Vangchhia Says:

    A bengvar thlak thin e (Y)

    Report this comment

  4. 4
    karei Says:

    Ka kawngpui tha neih ve chu Vai ho Mau leh Teak lak awlsamna mai alo ni e, jeepable road lekin kan siam leh mai dawn ami?

    Report this comment

  5. 5
    Awmtea Leo Khiangte Says:

    Very tha em em!

    Report this comment

Leave a Reply

You must be logged in to post a comment.