REINCARNATION LEH DEJA-VU

February 24th, 2014 10:28 pm by BigDaddy Hmahmatea

Pian nawnlehna leh Awm tawh anga inhriatna:

KHUH HAWNNA: Tuntum chu Pathianthu tehchiam lo lam hi a ngaihnawm ve hrim hrim atan leh hriatna tizautu atan han sawi ve thung teh ang. Mihring tute mai pawh hian kan nunah hian kan thil tawn engemaw hi hmanah hetiang hi tawng tawh a inhriatna, hetiang hian hmanah pawh ka awm tawh tih ang chi hi kan nei theuh mai a, hetiang hi French tawng chuan Deja-Vu an ti a, mi tamtak chuan pian nawnlehna Reincarnation nen hian inzawmna neiin an ngai a, thenkhat erawh chuan, Pre-cognition lam nen inzawmin an ring thung bawk. Reincarnation, Mizovin pian nawnlehna kan tih mai hi sakhaw hrang hrang a ringtu an tam viau mai a, chung zinga langsar zualah chuan Hindu sakhua te, Buddhist sakhua te hi an ni awm e. Reincarnation chungchanga khawvela lar leh langsar ber te pahnih Shanti Devi chungchang leh Dalai Lama chungchang hi entirna angin rawn sawi chho hmasa ila a tha awm e.


REINCARNATION CHU: Shanti Devi hi Old Delhi ah a lo piang a, naupang thangduh tak ni in kum 3 a tlin chuan a hma in Mathura ah a cheng tawh a, pasal nei in, a pasal hming pawh Kedarnath a ni tih a sawi fo mai a. An in thin rawng te, an chenna veng te, a thih dan te, an chhungkaw chanchin a sawi thin te chu an han fiah chuan a lo dik zel mai si. A chanchin chu chanchinbu lamah te chhuah anih takah chuan India ram mai nilo, khawvel in a lo hre darh ta a. Tichuan hetiang lama tui deuh ho chuan a tak a ni ngei em tih chu fiah an tum ta a. Chutia fiahna an neihah chuan Shanti Devi hian mak tak maiin a pasal ni-a a sawi chhungte leh a unau te ala hmuh ngailoh pawh a hre vek mai a ni. Amah chu nau chhiat in a thi tih te a hre vek a, tin, Delhi rail station atanga an in kawng te leh an in thin te, a hma chuan an in chu rawng eng hnawih anih te a sawi dik vek tlat. Heng hi engti kawng mah a atana hriat ngaihna awmlo turah a chanchin zirtu mithiam te chuan an ngai a ni. Hetiang ang hi khawvel ram hrang hrangah sawi tur a tam mai. Dalai Lama ngei pawh hi piang nawn a ni an ti tlat mai.

 

1933 khan Dalai Lama -Thupten Gyatso chu a thi a, Buddhist ho puithiam lal ber , pathian tluk hiala an ngaih ropui a nih avangin Buddhistho tan chuan channa nasa takah ngaih awm, chuti tehchiamin a tuar vak lo tlat mai, a chhan pawh Dalai Lama chu a rawn piang nawn leh dawna an rin vang a ni. Tichuan a ruang chu chhim lam hawi zawng in an thut tir a, ni rei vaklo hnuah chuan a ruang chuan khawchhak lam a lo hawi ta daih mai a . Tichuan khawchhak lamah chuan an Lama senior ho chu Dalai Lama thlak tu tur zawng turin an chhuak ta a. Kumbun Monastery a in pakhat ah chuan kal a lang tlat mai a, chutah chuan an va kal a, nupa leh an fapa kum 2 mi an lo awm a, an va kal chu mipa naupang chuan puithiam ho anmahni inchei danglam vek a va kal chu tute nge an nih a lo hre nghal ta tlat mai. Puithiam ho chuan naupang chu Dalai Lama lal inah chuan hruaiin uluk takin chihrang hrang in an test ta a. Chu naupang chuan Dalai Lama thil dahna zawng zawng tumah dangin an hrelo tura an ngaih te pawh chu hre vek mai a. Tichuan 1940 ‘Year of the Iron Dragon’ thla hmasa ber ni 14 na ah chuan chu naupang chu Dalai Lama 14-na chu ‘Lion Throne’ ah chuan thut tir a ni ta a ni. He naupang hi Buddhist ho chuan Dalai Lama rawn piang nawn leh kha ni ngeiin an pawm nghet hmiah mai a ni.

 

DEJA-VU LAM VE THUNG: Barborne-a te nupa chu a vawikhat na atan Bombay(Mumbai) ah an zin a, an vawikhat kalna a ni na a, an pa chuan a hmun leh kawng te chu a kal tawh thinna niin a hre tlat mai a,a kawng awmdan te chu a hre sa vek mai a. An nu hnen ah chuan, “Thui lo te kan kal leh anga De Lisle road kan thleng ang,” te a ti a. Tichuan hmun pakhat Hmawng kung lian tak bulah chuan in a awm thin em tih Police pakhat a zawt ta a. Police chuan Bhan family ho in a awm thin a, kum 90 kal ta ah thiah ani tawh tih a lo hrilh a. Mak a ti nasa, ama hming kha Bhan Barborne a lo ni ve reng mai lehnghal. He thil thleng hi hetiang lam zir mi te chuan Reincarnation leh Deja-Vu inlaichinna sawinan leh entirnan an hmang thin a ni.

 

TICHUAN: Sawi tawh ang khan Reincarnation hi Hindu te Buddhist te chuan pian nawn lehnaah an ngai a. Ka han sawi tak ang chi hi chu Parapsychologist hovina an chhut dan chuan, mihring kan thih hian a mithi a kha midangah taksa neia rawn piang nawn leh nilovin, kan hriatna pangngai kan ‘concious mind’ hi a thi ral ve mai lo va, boruakah hian radio wave ang deuh hian a chambang a, chumi chu minung thenkhat thluak hian radio in radio sisnal a lo man ang deuh hian a lo man fuh thei ta thin a, chutianga a man fuh chuan a man a te hriatna ang kha an nei ta thin a ni an ti. Hei hi ngaihdan a ni a , finfiahna tak erawh chu a awm lo thung.

 

Deja-Vu ve thung erawh hi chu thil zirchian har tak mai a ni a. Mithiam te leh hetiang lam zirmi te ngaihdanah chuan, mihringin kan mita kan thil hmuh reng reng hi kan thluakah hian inthawn in chumi chu kan thluak chuan enge anih chu a lo let ta thin a. chutianga kan thluakin enge a nih a lo lehlin tura kan mit in a va hmuh veleh a inthawn chu engemaw vangin a in delay ve thei thin a. Chutianga kan mitin a hmuh tawh si, kan thluak thleng tlai deuh anga a awm chuan chu thil chu Deja-Vu kan tih ang chi hian hmanan lo hre tawh emaw, lo hmu tawh angin emaw, chutiang chuan lo awm tawh angin emaw kan awm thin a ni an ti. Hei pawh hi finfiah tak tak theih a ni chuang lo. Thenkhat thung erawh chuan Deja-Vu hi chu mihringin thil hriattheihna engemaw bik kan neih Extra Sensory Perception an tih atanga rawn awm niin an sawi ve thung.

 

TLIPNA: Heng Reincarnation chungchang te, Deja-Vu chungchang te hi chu kan khawvel in a tawng phak chin thiamna atang hi chuan a awmzia diktak leh a nihna tak hi tun thleng hian an la hrechhuak tak tak theilo chu a ni e…Rinthu mai lo chu. Mahse in ti teh ang kan Pathianthu lam atang chuan mihringte hi a hring a hran a piang nawn leh tur ang hian mi sawi hauh lo mai a, chuvangin keini ringtute hi chu hetiang lamah hian kan lo buai vak hi a ngai lemlo anga. Chutihlai erawhchuan hriatna tizautu atana hriat ve hrim hrim atan te a tha in a ngainawm ang zawng a chhiar liam mai maiah te erawh chuan a tha ve tho a. Tin, ka ti ve mai mai thin a he ang thil mihringte thiamna in a anihna tak a hriatfiah zawh loh ang chi te atang hian engkim siamtu kan Pathian ropui zia hi hmu thiamin chharchhuak thar zel ila, chu chu ringtu kan nihna anga kan Pathian laka a bat a kan bat ve ngawih ngawi a ni tih pawh hre thar leh ila a tha awm e.

BigDaddy Hmahmatea

Kulikawn

 

 

Similar Posts:

Recent Posts:

12 Responses to “REINCARNATION LEH DEJA-VU”

  1. 1
    Borat Says:

    Kei chu present tense a cheng tih takah deja vu leh reincarnation hi ka experience pek lo va, ring lo tawp. Sorry.

    Report this comment

  2. 2
    Awmtea Leo Khiangte Says:

    Ka ring lo va. Ka sawisel ngai chuang lem hlei law. Ngaihnawm lamah hian la ila, a fel thek mai.

    Report this comment

  3. 3
    Chhuaklinga Says:

    A ngaihawm hle mai. Log in a har ta riau, han comment duh ve chang pawhin ka beidawn san leh thin.

    tren tren

    Report this comment

  4. 4
    Chhuaklinga Says:

    Ngaihnawm tih zawk tur.

    tren tren

    Report this comment

  5. 5
    RZA Says:

    Hetiang buaipui awm tawk te te hi awm ve a nia.

    Report this comment

  6. 6
    Manuni Pachuau Says:

    thilmak tak tak hi alo tam khawp mai…a ngaihnawm lamah la leh rih phawt mai teh ang…. (Y)

    Report this comment

  7. 7
    sheldon Says:

    Ti daih ila Aryan kha engtin awm ta zel maw? :-O

    Report this comment

  8. 8
    chhana Says:

    A ngaihnawmin a bengvarthlak hle mai. Juda ho pawh khuan hetiang ngaihdan hi an nei. An sawi dan erawh awihawm loh tawpkhawk a ni thung.
    Kei chuan ka awih lo naa; i sawi ang khi chu mak ka ti khawp mai. Mumang lama kan lo hmuh tawh hnu hi chianglo taka kan hriat riruai avangin kan kal leh pawn kan hmuh/hriat hnu ni tlatin kan hre thin. Chutiang lam chu a nih ka ring zawk mange.

    Report this comment

  9. 9
    chhana hlawnchhing Says:

    A bengvarthlak hle mai, hetiang deuh sawi tur hi an awm ve nual tlat mai.Hetiang ni lo deuh ang chi hi chu kei pawn hriat ka nei a. Kan vengah an hming sawi lang lo mai ila. a nu leh pa chu an hlim lo kher mai an fa pakhat chuan ka nu leh pa in ni lo, saw lai ah sawn ka nu leh pa chu an awm a ti tlat a, kan vengmi tho vengchhak lam a awm te kha ka chhungte an ni, ka nu leh pa an ni a ti a,

    ka nu leh pa a tihte chuan kan fa thi tawh hemi te nupa fa ah a lo kir leh a nih hi an ti a, duat pawh an duat khawp mai.

    Paber emaw nuber emaw thikthu chhe viau tan chuan in rinhlelh a awl duh ngawt ang le.

    Report this comment

  10. 10
    BigDaddy Hmahmatea Says:

    Ka thuziak hovah hi chuan a tawp ka kharna hi ka ngaih pawimawh ber lai a ni tlangpui thin.

    Report this comment

  11. 11
    RZA Says:

    Zaik thiam lo si, mizotawng thiam hlawl bawk si lo.

    Report this comment

  12. 12
    Dr John Says:

    (Y) BVT hle mai.

    “Human/Animal Re-incarnation” chungchang hi Theological Circle ah hian chai leh sawi a hlawh vak lova, ring lo leh pawm lo an tam zawk vang a ni awm e. Mahse, Bible scholar thenkhat chuan, heng hi “Setana hnathawh a ni a, temporary-in an hriatna (knowledge) kha a hmang a. Setana’n Pathian Fapa Isua Krista Incarnation model kha a copy a, Lal Isua Mihringa a lo channa kha hmuh-nep tir leh sawi-nep tir a tumna a ni e,” an ti.

    Post-tupa sawi ang khian, Khawvel hmun hrang hrangah, Mission History-ah phei chuan sawi tur a awm nual a, a chhan ber an hriat loh avangin kha mihring or animal (incarnated human/animal) kha ‘pathian angin an be zui’ ta mai thin a ni.

    Mahse, Lal Isua anga ‘Pathian Mihringa lo Chang’ chu ni hlawm se chuan, thil mak tam tak tiin, nun danglam chungchuangin an hun a hmang tawp tura ngaih an nih laiin, pangngai takin an hun an hmang tawp mai thin si a ni! Hemi avang hian, Engkimtithei leh Engkim Siamtu Pathian hnathawh ni lovin, Setana hnathawh zawk a nih-zia a chiangin an hria a ni.

    Report this comment