REISISS!

February 18th, 2014 11:39 pm by Dr Mahminga Sailo

(Kan hnam deuhsawhna emaw, kan fellohna emaw tarlan ka tum ber a ni lova, hma kan sawn zel zawk theih nana ka ziah ve theih tawk tlemte ka’n tarlang ve mai a ni.. ;-) )

Eng a ni?
Vaiho sualzia leh mawl si zia hi; Mizoram awmna pawh an hre lo. A tawng thei tawh apiangin, “Nepali in ni em?” tiin min zawt chamchi a. Tlema hre zau deuhin, “Chinese nge Japanese in nih?” min ti thul. Kan ngaihsan em em Korean kan an thu erawh an sawi lang duh ngai miah si lo (lol). Hmar chhak chanchin hre ve deuhin,“Manipuri I ni ti raw?” min la ti khanglang bawk.

India ram khawpuiah kan nulate an pawngsual fo va; khawiah emaw chhuak ila, “Chinky” tiin min au el tawk lah bo lo. Sawi tur a va tam em! Heng zawng zawng hi em ni tunlaia kan sawi lar em em REISISS an tih chu?

Babel In sang
Kan Pathian hian hnam hrang hrangte’n tawng bil kan neih nan Babel in sang sak mup mup chu a tihchim tak avangin; India rama cheng niin, India khua leh tui ni mah ila, kan hmel leh kan tawng erawh a danglam nasa mai si. Keini lahin hnam tawng (Hindi) zir tum hek lo, a tam zawk phei chuan kan la ngainep em em zui leh nghal. Chu achhapah kan thlahtute atanga danglam ta chu, English kan han hman te lah changkang tia kan lam nalh poh leh kan Indian-puite hian an hrethiam lo telh telh zawk si!

Chinky tia koh kan hua maw? Vai-chhia titute kan ni em kha?
Khawchhak lam unaute chu ‘Nghapih’ tiin rukruk ching leh damdawi tha lo zuar hrat em em vekah ngaiin, mi tam zawk chuan kan ngainep em em a. Kan hmarchhakpui Manipuri-te lah ‘Chalrang’ tiin an chawhmeh ui leh rimchhiatzia sawiin, zirna leh infiamnaa kan tluk miah loh chung pawn kan ngaisang em em miah lo te hi a mak phian! Kannadiga, Punjabi, Tamilian, Bengali, ladt., an nih leh nih loh pawh hre hrang bik lova ‘Vai’ tia hmusit taka kan koh thin te; duhthawh fal thenkhat phei chuan ‘Vai chhia’, ‘Vai ngal ria’ tiin kan phak tawkah kan diriam fo a ni lawm ni?

Kan ram thirchhia leh hluihlawn thil hman tangkai ngaihna kan hriat loh kha vaiin taima takin an khawnkhawm a. Vai thirchhe zawng leh cooker chhe siam thiam phei chu kan ngaihsan lohzia leh van sanzia chu hretu vek kan ni e. Thirchhe zawng tam zawk phei chu zu rui phur deuh chuan hmu zuamin pawisa dil bakah, lo vel duh tawk pawh tun thlengin kan hmuin kan hre chamchi a nih hi!

Kan danglam alawm
Nia, sawi belh hran a ngailo. Kan pianzia, kan hmel, vun rawng, incheina, ei leh in duh zawng, sakhua leh leh kan ngaihdan engkim a danglam vek. Mahse, India rama chengin India sawrkar chawm hlawmin kan la khawsa rih tlat si a. Engtikawng mahin (tuna kan ram dinhmunah rih chuan) Mizoram hian India sorkar ngheng lo hian ram kal kan siam a rinawm rih bawk si lo.

Chuvangin zirna in sang leh tha bawhin kan chenna ram atangin India khawpui hrang hrangah kan cheng vel a, hna kan thawh a ngai ta a nih hi. India ramah hnamdang zingah, an khuaa kan chen a bang mai dawn lo.

India khawpui lailiaah…
Ngaihtuahna dang pu miah lovin India ram khawpui khawi berah emaw bazaar lun laiah dingin han hawi vang vang la. Hmarchhak nula tlangval I hmuh khan eng ang mi nge I hmuh le?

I hmuh dan tam zawk tur chu – sam rawng pangngai pu lo, phir kual tlu-awn-ding seng sung mai, vun eng pik piak, mawngfual leh thuamhnaw mawi ang reng mak danglam deuh deuh, tawngchham tak tak inbel I hmuin ka ring. Hmarchhak mite hetiang vek an ni ka ti lova, a tam zawk erawh kan ni tlat. Khawtual mite inchei uchuak an lo awm ve a nih paw’n anni anga inchei tur kan ni em ni? An khua a ni asin. Keini zawng an aia uchuakin kan la inchei ta lehnghal!

Hmarchhak mi tam zawk hi chu kan veng leh khuaa kan inbel ngam miah loh leh kan lan chhuah ngam reng reng lohin kan inchei fo thin. India ram khawpui, mi tam zawk, Hindu sakhaw zui; inlafekfawn leh rilru zim em em mit atan zawng nangin I hmuh aia a let tam khan hmarchhak mite an hmuh dan chu a danglam dawn tih hre reng ang che.

Mizoram an hre lo!
Nia, vai tam zawkin Mizoram an hre lo, mawl tak an ni I ti ngawt dawn em ni? I ti dik chiah, mahni ram chanchin pawh hre lo lehkha zir sang tak tak an tam mai.

Mahse, India ram pum huapa chanchin chhinchhiahtlak leh zirtlak Mizote hian kan pipute atangin kan hnutchhiah tawh em le? Ram pum huapa mi chhuanawm leh hmingtha engzat nge awm tawh? Kan hnam a naupang, sawi thui a ngailo; mahse kan thenawm Manipur erawh hre lo an awm mang miah lo thung asin. Mizoram an hriat theihna tur chuan kan zirna leh kan hnathawhnaah mawhphurhna sang tak kan nei a ni tih I hre reng ang u.

In luah tur hmuh a har!
Leh ta zel chuan. India ram khawpui thenkhatah hmarchhak mite tan in luah tur hmuh a har hle. Mi fel tam zawk kan awm, mahse mi sual tlemte avangin kan hmel a chhe fo. Hmarchhak mite min sawi dan hi kan hre vek. Mi in luaha awm dan tawk kan hre lo, thian kan khawi dul dul a; a tlangpuii kan bengchheng viau bawk thin. Thalai tam zawk lah zu in thiam lo, thenawmte zahpah leh ngaihthiam nachang hre miah lo an awm bawk.

Mahni ringawt inngaihtuah thei kan ni lo. Khawvel a awm chhung chuan kan naute leh zel pawn zirna leh hna avangin India ram khawpui an rawn pan zel dawn. Tuna I in luah leh I hnathawha I awmdan mawi avang khan I nau te tan kawng sialtu I ni tih inhre reng ang che.

Ka tawnhriat
Kum thum chuang hret a ni ve ta reng mai, ka hna avangin scooty/bike khalhin ka chenna khawpuiah hian ka kual ve ta a. Office kala, thuamhnaw pangngai tak inbela lirthei ka khalh hian vawi khat chiah traffic police-in min man a. Chu pawh kawng kual lutuk tlan ngai, a diklo zawng mi an tlan thin avanga ka tlan ve tuma min man a ni a. Office chawlh changa thuamhnaw pangngai lutuk lo, kekawrbul emaw haa ka inkhalh chhuah erawhin vawi thum vawi li lai traffic police hian min tiding tawh thung.

Ka tawnhriat hi a dik ber e ka ti hauh lo, mahse hei erawh ka sawi thei. Pangngai taka ka inthuam leh pangngai vak lova inthuama bike ka khalha danglamna ka hmuh hi.

Hei vang hian engtik laia pawha smart tak maia inthuam ap reng tur ka tihna a ni chuang lo. Mahse, mi te hmuha thuamhnaw hmuh nuam leh zahawm (dissent dress) erawh a awm a. Uchuak leh over lutuka inchei kher hi a tul lo. Ka incheina a nia, ka thu thu ti vei thin mah ila, mi rama cheng, tual mite aia danglam leh an mit fukna kan ni tih hre reng chunga fimkhur leh zahawma inchei a tulzia ka sawi duh vang mai a ni.

Kristian Nunmawi
Khawvel a awm chhung chuan, Mizoram hi India ram chhungah a awm zel hmel si a. India rama thlamuang taka chenga, kan danglamna avanga Pathian malsawmna kan dawn tam takte hria a, Isua Krista ringlotu maktaduai tam tak zingah hian Kristian nunmawi nunpui zel ila. Mizo-Kristian nun, inngaihtlawm leh thuhnuairawlh taka kan zirna leh hna te zira thawkin; kan ram leh kan hnam tan kan awmna hmun theuhah kan danglamna te hi malsawmna min petu atan I hmang zawk zel ang u hmiang.

Similar Posts:

Recent Posts:

21 Responses to “REISISS!”

  1. 1
    H.Vangchhia Says:

    A van tha thiai thuai ve le. Hairehai (Y)

    Report this comment

  2. 2
    sonrize Says:

    Ava thain ava dik si em

    Report this comment

  3. 3
    Puii Says:

    Ka chhiar chhuak dap e…. (Y)

    Ka tawn hriat i tih hi a dik ka ring ngawt mai….incheina hi ka ngai pawimawh thin, a nawlpuia han inzirtir ve deuh dan hi ka lo ngaihtuah ve fo thin…..a hrana sawi chi a ni…. (*)

    Kan northeast puite nen hian kan hmel hi a lo danglam deuh a, kan vak zau ve bawk si, a huho phei chuan khawiah pawh mi mitmei veng lem lovin kan leng ve halh halh hlawm bawk si… min ngeitu tan chuan a awm ve pah reng…. ;-)

    Mizoram hi an hre lo hi kan ti teh fo va, keini mizoho tak hi kan ram chhung hi kan hre lo hle ka ti thin…(O)

    mizo khaw hming zawng zawng chu sawi loh…. district cheng ker deuh pawh sawi loh…. aizawl districta khua te hi tuna misualho ngei pawh hian kan hriat loh an awm nual mai thei a ni… :-$

    tunah te chuan IT lamah kan thang a, internet te a lo lar chho nen tlemin kan inhre pawh ta deuh zawk a,

    Aizawl a cheng te ho tan chuan Saiha emawa kal aiin kolkota kal kan awlsam em em zawk mah a…kan zoram hrechiang lo hi kan tam ngawtin ka hria…

    Report this comment

  4. 4
    TuaiSialA Says:

    HELLO CHINA. :-D

    Report this comment

  5. 5
    hltau Says:

    a va han tha teh lul em. ka chhiar zawh thak chu. NE ho hi kan tan a ngai khop mai.Zirna ah te, kan hnathawh ah te, kan ram te hi kan tih hmsawn ve a va tul tak em.

    Report this comment

  6. 6
    Nirvana Says:

    Manipur hi a lar aniang. Mi pakhat Nepal kal tur pawh a sawi dek dek a, a thian pa’n “I know, I know, Nepal is in Manipur” ati.

    Report this comment

  7. 7
    chhana hlawnchhing Says:

    Vai ho zingah pawh hian Kum 25 chin hnuai lam chin hi chu an zau ve khawp chuan ka hria,thian ka nei nual hlawm a, an zau ang reng khawp mai, 2012 ah khan nita in ka hria ka thianpa leh vaipa an in tibuai a ka thianpa chuan a mitte thi vek khawp in a hnek a, Local mi an rawn pung khawm a, ka thianpa chu an man Mizoram tang a lo kal a nih thu a sawi chuan Mizoram chu India ram lawm tiin tleirawl ho chuan an ti sap sap a vaipa kha a dik lo zawk a ni bawk a, an vin hrep nghe nghe a, kum upa lam deuh ho chuan Nepali chu e kha e an ti a,
    Police ho pawh hi ka ngei nia, ka hnathawhna lam a ka kal laiin min ti ding a ka travel card min chhuh ringawt a, ka ipte a dap nghal ringawt a mi rukru an ang zawk mah, Mizoram tang a lokal ka nih thu ka sawi chuan Mizoram chu khawnge min la ti tal a, ziak leh chhiar thiam tamna state kan nih thu te ka hrilh hlawm a, an zak ang reng khawp mai chuan ka card chu min pe let leh nghal a, Police duty leh zel pawh A tak tak an tam khawp mai.

    Report this comment

  8. 8
    caribou Says:

    Post tupa thuziak han thiam zia bik thin hi aw…. A thra thrak thrak khawp mai.

    Report this comment

  9. 9
    chhana Says:

    A tha hle mai. Current kan neilo zuka, ka chhiar lo hman dawna; a eng leh hlauh e.

    Report this comment

  10. 10
    Awmtea Leo Khiangte Says:

    Dik hle mai.

    Report this comment

  11. 11
    kimi colney Says:

    tha khop mai….tan kan lak angai ani….engtin nge Mizo te hian ram pum huapa chanchin chhinchhiah tlak kan siam ve ang aw…..

    Report this comment

  12. 12
    Khuangpu Says:

    Facebook ah chuan post la Vai haw laklawh mawl tak takin an chilh hrep ang che, i sawitum loh lamah an kawipui anga. I post tha e. Vairama kan hawiher hrim hrim(Chapo hawiher/Vai style hmusit hawiher) hi a ram neitu tan chuan ngeiawm tak tur ani. SR groupa ka thianpa in Vai ramah ti dekin kan awm tih lam hawiin a rawn post ngawt pek a, inbox ah ka va chhu zat a. A khauphar thawven leh vai kutthlak bakah Mizo tawng hmanga Vaichhia tih fo hi a ching reuh a. Vai rama a kawlhrawn zia hre tu kan ni si. Stray dog lar lai, Punjab MLA in a sawi lo vung ta chiam lai te khan Ui talh a rawt tlat a, kan inluah neitu ten min ngaithiam hram zawk. Kan ramah nise kan teu hle awm si a.

    Report this comment

  13. 13
    Dr Mahminga Sailo Says:

    @ Pu HVa.. Ka lawm e.. Ka thuziak awmzia min hriatthiampui a (vai i ngaisang vak lo a tiaa.. Funny hian..Hairehai.. :-D
    @ Sonrize.. Ka lawm e.. :-)
    @ Puii.. A dik chiah asin. Mahni inhre chiang lo hian, keimahni dinhmun leh nihna ngei hi kan pawm lo chawk zel a ni ti raw..

    @ TSa.. Hello China thlalak kha a HIT khawp mai.. :-D

    @ hltau… Hmasawnna tur kan ngah khawp asin, a nawlpui hian (NE hnamdang pawh), kan khawsak dan hi a pawnlawi mah mah em aw.. a tih theih tlat.. ;-)
    @ Nirvana… Infiamna leh lehkhazir kawngah chuan kan tluk lo em bawk a ni.. Tin, an hnam an lo upa zawk bawk nen..

    @ chhana hlawnchhing.. A dik chiah, mi fel tam tak zinga mi sual thil tih hi a langsar hma thin si a le.. :-(
    @ caribou… Ka va lawm thin em!

    @ chhana.. current in nei tam thei bik riau mai.. :-D

    @ Awmtea… Ka lawm e..

    @ kimi colney.. A dik chiah asin. Football kan ngaisangin ka uar em em a, senior level-ah erawh laktlak an la awm ngai meuh lo.. hei hi entirna pakhat ni se.. :-)
    @ Khuangpu… I tidik chiah. Chuvang chuan, ka vei ruk ve ran ran hi chu mi(sual)-ho bak ka khilai ngailo. Facebook-mi ho zawng chu tunlai tawng takin an ROUGH em mai.. :-D

    Ka thuziah awmzia leh rilru puthmang min hriatthiampui hlawm a, ka lawm e.. :-)

    Report this comment

  14. 14
    muantea Says:

    Ka thlawp e. Kan rama hnam dang kan ngaih theih lohzia te, ram danga kan fimkhur tawk loh thinzia te hi a side thim lam langsar tak si a ni (Y)

    Report this comment

  15. 15
    saint sammoo Says:

    comment lam ka thatchhe ta deuh mai pawh a…. ka lo chhiar ve zel a nia.. =D

    Report this comment

  16. 16
    sheldon Says:

    Awi! A van lunglenthlak tak. Ka misual hman ta reng reng lo mai a, ka rilru chuan a hrereng thin. Hei ka rawn lut zuai a in nick te ka hmu a ka lung a leng thar ;-(

    Diktak chuan Mahminga post pawh hi tlar khat pawh ka chhiar lo. Mahse Mahminga ziak anih chuan a tha ngei ang tih ka ring (Y)

    Report this comment

  17. 17
    Thangpasaisira Says:

    Post tha tak a ni. Sawi sawi ngai lo (Y) la tawk ;-)

    Report this comment

  18. 18
    Dr John Says:

    (y) Tha khawp mai.

    “Nepali mi i nih?” tih leh “China atanga lo kal mi in nih?” min tih hian ka sa zak zel… ka va ReisisS tak Em!!! :P :D

    Report this comment

  19. 19
    Diktea_Pa Says:

    Va’n ziak tha em.

    Report this comment

  20. 20
    Hermona Duhlian Says:

    chuan han sawi mai ila … kan nula te an pawngsual te hi kan diklohna( tihchu dress lampang) pawh aloawm maithei mahse hetiang a vaiho in an tihnachhan hi Punjab, haryana leh Bihar leh state dang dang te ah hian sex ratio a athatloh vang pawh ani. hmeichhia antlem vang pawh ani hetia an chet hi…

    Report this comment

  21. 21
    mihring Says:

    Aw… mi(sual) Doctor :P :D Va tha ve, ziak thiam khawp mai. Fb i Note ah khan ka chhiar tawh; ka LIKE khawp mai :)

    Report this comment