Hlawhtlinna kawng

February 13th, 2014 2:47 pm by Freaky

(a thupui phuah tur ka hre mai lo, ti khian ka’n ti ta vel mai mai a nih khi…ve khanglang i…keini ang duang tan chuan…) -Lalrinthara Pachuau

1. Mi dang ngaihdanah innghat ringawt suh: Thianten chumi chu a tha an tih vang ringawtin eng thil mah pawngpaw bawh huam suh. A titu tur nangmah kha i pawimawh ber a; chuvangin i tuina kawng a ni em tih ngaihtuah phawt la, duhthlanna siam chauh ang che. Thianten an duh loh zawng pawh ni se tha i ti a, i tuina lam a nih phawt chuan maltlat ngam ang che.

2. Duh tak tak rawh: Tha i tih zawng i thlang fel tawh a nih chuan chu chu i duh tak tak tur a ni. Duh ve satliah ringawt tan chuan hlawhtlinna hi a hla thin. Duh tak takna tel lovin tumruhna hi a awm thei ngai lo tih hi theihnghilh suh ang che. I duh tak tak a nih erawh chuan a hranpaa neih chawp tum kher ngai lovin nangmahah tumruhna chu a lo piang chawp mai ang. Chu chuan i thiltuma hlawhtling turin a nawr kal tawh ang che. Duh tak taknain bul a intan a, tumruhna a lo piang a, Thawhrimnain engkim a ti thin thung.

3. Bul tanna dik = Duhthlanna dik: Eng thil pawh ti dawn ila, bul tanna dik chu duhthlanna dik hi a ni. Duhthlanna dik tak hmanga thil kan tih chuan kan bul tanna a tha hle tihna a ni. Zirna kawngah emaw eizawnna kawngah emaw pawh ni sela duh thlan dik a pawimawh hmasa ber. Kan mizia leh theihna nena inmila kan eizawnna tur thlan thiam hi a finthlak ber fo. Eizawnna tur kawng hrang hrang ngaihtuah hnuah kan tuina leh nuam tih zawng, kan mize mil bawk si thlang thiam ila chu chu bul tan dan tha ber a ni phawt.

4. Duh tak tak tur chuan hriat chian phawt a ngai: I thiltum chu engnge a nih hriatchian tum phawt rawh. I hna duhzawng chu eng lam nge a nih dawn? I mizia nena hmehbelin i tuipui tur chi a ni ang em? A hna kalphungah lungawina i hmu ang em? Nuam i tihzawng a ni dawn em? Dam chhunga i thawh atan i duh tak tak em tih te inngaihtuah hmasa la. Hemi hnuah hian i aw thei vek a nih chauhvin chu hna chu thlang ang che. Mihring dam chhung hi a rei lo tih hria la, vawi khat hun tha kan neih hi hloh loh i tum tur a ni ang.

5. I duhthlanna sal i ni: Mihringte hi duhthlanna kan siam hma chuan zalen kan ni a. Duhthlanna kan siam fel hnuah erawh chuan chu kan duhthlanna lakah ngei chuan sal tang kan ni tawh. Hetia kan nih tumte kan nih tawh hnuah hian nuam ti lo tak leh hrehawm tiru tak chungin kan thawk ang tih hi a hlauhawm hle a ni. Eizawnna chungchangah kher kher hi chuan duhthlanna vawi khat hman sual hi a pawi tak zet a ni. I duhthlanna avanga a hnua i lo nih tak eng thil emaw (e.g : IAS, Doctor, Engineer, Driver, Mistiri, etc) lakah khan i dam chhungin sal tang i ni zui zel dawn a, chuvangin sal tanna nuam thlang thiam ang che.

Eizawnna tha leh fuh tih hian hlawh tam a kawk kher lova, changkang kan tih hi a kawk kher hek lo. A hna i hlimpuiin nuam i ti a, chhungkaw chawm zawhna khawp i hlawh chhuak zo a nih chuan chu chu Eizawnna tha chu a ni mai. Zirna leh eizawnna kawnga duhthlanna dik kan hman phawt chuan kan ram hian hma a sawn ngei ang. Chu chuan Ram leh Hnam humhalhna kawngah sulhnu lian tak a nei ngei bawk ang.

6. Insawrbing rawh : I thil tum i thlang fel tawh a, a kawng pawh i chiang tawh a nih chuan chutah chuan insawrbing rawh. Thiltumah chuan chiang ve fu si, thil dang tih tel nei tam lutuk tan hlawhtlin a har thin. Thil tum fel tak thlan tawh hnuah chuan hlawhtling ngei turin chumi atan chuan inpumpek tur; a nih loh chuan thil dangte kha tha ve tho ni mahse kan chakna leh theihna min eiheksaktu an ni thin.

Vawi khat chu zirtirtu pakhat hian a zirlaite chu an piah thinglera sava fu lai chu kap turin a ti a. An kap diat diat a, an thelh zel a; a tawpah chuan pakhat chuan a rawn kap fuh ta a. Zirtirtu chuan a kap thelh hote chu engnge an hmuh tih a zawh chuan anni chuan sava te, thing buk te leh a zarte an ti a. A kap fuhtu erawh sava chauh ka hmu a ti a ni. Hetiang deuh hian kan thiltumah kan insawrbingin thildang hmuh tell eh tih tel hi ngah lo ila, chu chu hlawhtlinna kawng khat chu a ni phawt.

7. Beiseina nei rawh : Mihringte hian kan dam chhunga thilthlawnpek kan dawn hlu ber chu Beiseina hi a ni hial awm e. Eng thilah mah beiseina nei lo, beih ahmaa beidawng nghal thinte nun hrehawmzia leh dam a nawm lohzia hi kan hriatthiampui phak em aw? Mi beidawngte tan hlawhtlin tuma beih fan fan a theih loh va; chhelna siamtu beiseina an tlakchham tlat avangin. Hlawhtling tur chuan teirei peih mi nih a ngai a, chu chu mi tuarchhelte tan chauhva ruat a ni. Mahse mi tuarchhel takte hi mi dangte aia an danglam bikna chu beiseina an neih tlat vang a ni. I thil tumah khan hlawhtlin tum tlatna leh i hlawhtling ngei ang tih beisei tlatna i nei em? I la nei lo a nih chuan beiseina neih tum la, chumi atan chuan rim zawkin thawk ang che. Beiseina hi thilthlawnpek a nih ang thovin hloh theih a ni a; tuna thalai chak leh theihna ngah zawk i nih chhunga i beiseina kha hloh lo turin veng him tlat la, vawng nung reng ang che; chu chu i tihtur ve renga Siamtuin i mawhphurhna atana a dah a ni.

8. I nunna turin tlan rawh / Risk rawh : Hmanni chu rilrua ka lo vei thin, ka sawi chhuah mai thiam si loh hi chiang tak main Pu Vanneihtluanga’n a rawn sawi chhuak hlauh mai a. Hring nun hi a nihna takah chuan Risk a ni, eng thil mah hi a chiang tak tak lo; kan la thi leh dawn tih chauh lo chu. Lehkha kan zir a, eng emaw ber nih kan tum a, mahse kan ni dawn tih kan hre chuang reng reng lo. School/College-ah thiamna sang zawk zir turin kan kal a, khawlaiah kan tlu hlum ringawt dawn nge dawn lo tih pawh kan hre hek lo. Thil dang thil tha ti turin kan chhuahnaah tawhsual tawkin kan va thi ringawt dawn em tih pawh tumah hian kan hre lo. Thiamna sang zawk zir turin phaiah kan kal a, kan zuk thi emaw, a hma aia laktlak loh zawkin emaw kan rawn haw dawn em tih lah kan hre hek lo. A nihna takah chuan kan thil tih engkimah hian risk kan la a, ngaiah kan neih tawh avangin risk a ni tih kan hre lo mai chauh a ni zawk. Hetiang taka Hringnun hi chiang lo teh nuai a nih vang tak hian Pathian pawh hi kan mamawh reng a ni

Mahse engmah a chiang lo tih vang maia risk ngam lo nih erawh thil pawi ber zing ami a ni ngei ang. Kan duh emaw duh lo emaw kan nitin nun hi risk a ni tho tho va, chutiang thovin kan eizawnna tura kawng kan thlan pawh hian risk a ni tho. Engineer, Doctor, IAS, etc nih kan tum a, lehkha kan zir hian kan ni dawn tih kan hre reng reng lo, risk kan la a ni. Hetah tak hian risk fing hman a ngai ta thin a ni. Risk fing leh risk mawl a awm. Engineer nih tum chung sia CL-X pass hnua Science zir ve siin Mathematics la lo ta ila risk mawl a ni ang. Thil tum chu nei ve sia a kawng hre chiang si lova tum ve vak hi risk mawl a ni. Chutiang laka fihlima kan kawng thlanah nal tak leh tluang taka kan kal theihna atan zirna in sang zawkah kan zir thin a ni. Risk fing chi kan hman thiam theih nan a nih mai chu.

Similar Posts:

Recent Posts:

24 Responses to “Hlawhtlinna kawng”

  1. 1
    shailendra Says:

    Ka la chhiar chhuak lo deuh. Chhiar zawm leh hma in ka han 1st zuai ang e. Badboy te, pangtichawr te ho in 1st chuh lai te kha a ngaihawm mai dawn a lawm maw le…

    Report this comment

  2. 2
    Zoram Fapa Says:

    A ngaihnawm piahlam ah a tha e (Y)

    Report this comment

  3. 3
    Chhuaklinga Says:

    Tha hle mai. (Y)
    tren tren

    Report this comment

  4. 4
    Leo dtea Says:

    Tha khawp mai (Y)

    Report this comment

  5. 5
    Natala Says:

    Ava tha teh reng em.. Ka fing sawt mai…

    Report this comment

  6. 6
    Sony Says:

    Happy Valentine’s Day, ti ve phawng the ang.

    Hlawhtlinna kawng zinga tum ruhna a tel khi ka duh khawp mai. Midang tanpuina dawn hi thil pawi ani lova, mahse tanpuina tel lova chet tum tlat lo hian hlawhtlinna kawn an zawh dik em le?

    Report this comment

  7. 7
    Vailalte Says:

    Risk fuhlo hnem tawh viau sin mawle!

    Report this comment

  8. 8
    H.Vangchhia Says:

    A tha vei phian e (Y) Hairehai.

    shailendra sawi ang khian a lunglen thlak. :(

    Report this comment

  9. 9
    vakul Says:

    Tha hle mai. Khawharthlak rem rem ve.

    Report this comment

  10. 10
    skimi Says:

    ekhai….tha hle mai…hmanlai min ti ngai a, ka rawn lang ve hlawl:-)

    Report this comment

  11. 11
    caribou Says:

    A tha hle mai

    Report this comment

  12. 12
    sparta Says:

    A va hlu em ka mamawh lai tak a ni, save hmak teng……

    Report this comment

  13. 13
    chhana Says:

    A tha hlawmin fuihna hlu tak a ni. Pahnihna khi ka duh zualin tunlaia ka nuna ka mamawh tak thil a ni. Ka thil tum hi ka duh tak tak tur a ni.

    Report this comment

  14. 14
    ninja Says:

    Fb lamah status tawi te te kan chhiar thanga, thui pangngai deuh chu chhiar a huphurhawm mai dawn a lawm le

    Report this comment

  15. 15
    filaxis Says:

    tha hle mai..8-na hi a dik lehzual Pathian tello chuan risk kan la fuh ngailo ang

    Report this comment

  16. 16
    kiddo Says:

    Ka zawm ngei ngei tur thil vek a nih hi a, a tha hle mai

    Report this comment

  17. 17
    Dr Mahminga Sailo Says:

    Zirtirna leh fuihna tha tak a ni hi le… i thupui then pawh i sawifiah thiam ngei mai.. (Y)

    Report this comment

  18. 18
    kimi colney Says:

    tha hle mai…(Y)

    Report this comment

  19. 19
    Kawhterenga Says:

    Ṭha lutuk tlat…(Y)

    Report this comment

  20. 20
    Chhakchhuak Says:

    Hmana ka fiamthu hriat pakhat..

    Hlawhtlinna hi kawng hnih chiah a awm, chungte chu:
    1. I thil hriat zawng zawng midang hrilh vek suh

    Report this comment

  21. 21
    Awmtea Leo Khiangte Says:

    A tha e (Y)

    Report this comment

  22. 22
    Vittea Says:

    Tlai deuh tawh mahse tha ka ti e

    Report this comment

  23. 23
    Dr John Says:

    (Y)

    Report this comment

  24. 24
    Msquare Says:

    #Freaky I thu ziah hi Facebook group ah share I phal em?A tha ka ti lutuk,ka thalaipuite hian hre ve se ka ti,facebook chauh hria misual.com a luhnachang hrelo te tan hian.. :)

    Report this comment