January 2014, Mizo(ram) Diary

February 7th, 2014 10:06 am by chhana

1st. Wednesday: Lalnunzira (35) s/o Roparliana (L), Mission Vengthlang chu a nilum ai, a tho thut chu a awmna bula khâmah a tla a, ká chhawn lohin a thi.

2nd. Thursday: Mizoram hmun hrang hrangah kumthar nawnin ruai nen hlim takin an la lawm.

3rd. Friday: Mizoram sorkar chuan Mumbai-a Tata Cancer Hospital-a Mizo damlote hman atan January 3, 2014 khan ambulance thar a pe. Cancer vanga Mumbai-a damlo kal leh enkawl mekte chu Mizoram sorkar leh chief minister Lal Thanhawla chungah an lawm hle. Mumbai-ah hian cancer vei damlo mi 200 chuangin Tata Cancer Hospital hi an pan reng a, tunah hian Mumbai Mizoram House-ah damlo 17 leh anmahni hruaitu (attendant) 27 an khawsa mek a; damdawi-inah mi pahnih an awm mek bawk.

4th.Saturday: Kanhmun khuaa Lalnunpari in, Assam type, Laltlanthanga te chhungkaw luah lai chu a kângral vek a, kang ral ta zingah pawisa Rs. 60,000/- a tel.

5th. Sunday: Salvation Army, Kolasib corps-a Salvation Army Reform Movement intite chuan an commanding officer, Maj. Moses Sairengpuia chu Salvation Army ṭhendarhtuah puhin, Biak Ina a inkawm tur an dang a; poster-te an lo tár a, hun eng emaw chen police-te nen an innawr hnuah police-te chuan Moses Sairengpuia chu Biak Inah an hruai a ni. Salvation Army chhunga inhriatthiam lohna chungchangah hian, Kolasib D.C., Jitendre Yadav chuan a aiawh tirin, buaina hawi zawnga awm lo tur leh inrem turin a ngen a; D.C. hian SA Reform Movement mite chu a bangla-a lêngah sáwmin, a titipui a; hemi hmu hian SA CO, Moses Sairengpuia chu a titipui leh bawk.

6th. Monday: Mizoram People Forum General Headquarters hruaitu hlui leh tharte chuan Synod Office-a Committee Room No.1-ah mawhphurhna inhlan chhawnna hun an hmang. Kum 2013 chhunga MPF Gen. Hqrs President Rev. Lalramliana Pachuau chuan President thar tur Rev. K. Lalhmuchhuaka hnenah charge a hlan a, kum 2013 kum tawp thlenga General Secretary hna chelhtu Upa Lalramthanga pawhin kum 2014 atanga General Secretary thar tur Upa F. Lalremthanga hnenah charge a hlan bawk. MPF General Headquarters-a hruaitu thar tur dangte chu- Rev. P.C. Pachhunga (PCI), Vice President; Pu Lalbiakzuala (CYMA), Upa K. Malsawma (MUP), Rev. P. Riabi (ECM) leh Rev. V. Lalhmingsanga (LIKBK) te an ni. Secretary Pu J. Lalsailova, CYMA Treasurer; Treasurer Pi Lalengkimi, MHIP Treasurer; Fin. Secretary Pu P.C. Lalmawia (MUP); Joint Secretary pali- Pu B. Thangtinliana (Catholic); Rev. Lallawmthanga (Wesleyan Methodist); Rev. H. Manga (EFCI) leh Pi Vanlalhriati (MHIP) te an ni. President leh General Secretary te bak hi chu hruaitu hlui a pangngai chhawm zui vek an ni.

7th. Tuesday: Salvation Army-a khawvel puma hotu ber, general Andre Cox leh a nupui, commissioner Silvia Cox te chuan Aizawl an lo thleng a, Aizawl Temple kawtah India Eastern Territory-a Salvation Army mite’n an lo hmuak. Gen. André Cox (60) hi Zimbabwe khawpui, Harare-ah piangin, Switzerland mi leh Britain mite fa a ni a, August 3, 2013-ah Salvation Army general 20-na atan thlan niin, an nupa hian khawvel puma Salvation Army mi nuai 15 vel an kaihruai a ni.

8th. Wednesday: Transport minister, John Rotluangliana chuan ACBOA office-ah Aizawl city bus driver leh conductor-te uniform tur a tlangzarh. Bus driver leh conductor-te hian January 15, 2014 aṭangin uniform an ha dawn a ni. John Rotluangliana chuan, driver leh conductor-te tana uniform mawihnai tak buatsaih a ni chu lawmawm a tih thu sawiin, khawpui chhung chei mawitu ṭangkai leh city bus enkawltute tana inthununna hmanraw ṭha tak a nih a beisei thu a sawi a, “Thawmhnaw inbel tur bik hian mihringte thinlungah inthununna ṭha tak a siam ṭhin a ni,” a ti. City bus driver leh conductor-te chu an passenger-te lakah hawihhâwm leh ṭhat chhuah zel turin a chah bawk. City bus driver leh conductor-te hian uniform hi Thawhṭanni, Nilaini leh Zirtawpni-ah an ha dawn a; uniform rawng hi a pawl a ni a, conductor form chu a paw dal a ni.

9th. Thursday: Congress Legislature Party (CLP) chu an leader, Lal Thanhawla, chief minister hoin CMO conference hall-ah an ṭhukhawm a; chief minister, minister, parliamentary secretary leh MLA-te chu an chenna in lamah zing kara interview neih loh an rel.

10th. Friday: Mamit bial aṭanga MLA-a thlan tlin zinga cabinet minister hmasa ber, John Rotluangliana chu Mamit Chhim Veng YMA hall-ah Mamit mipuite’n an chawimawi a; Supply changtu minister John Rotluangliana chuan, public distribution (PDS) aṭanga chini supply tihtawp ṭhin chu January 2014-ah chhunzawm a nih tur thu a sawi. Supply, Transport leh Tourism changtu minister hi Tourism director, Vabeiha Hlychho-in a ṭawiawm a ni.

11th. Saturday: Mizorama Missionary hmasa ber pahnih, FW Savidge (Sap Upa) leh JH Lorrain (Pu Buanga) ten Mizoram leilung an rah champha vawi 120-na, Missionary Day a ni a; Baptist kohhrante’n uar takin an lawm. Missionary Day pual hian Baptist kohhrante chuan awmni khamin an lawm a; tualchhung kohhran tam zawkah chuan chawhma inkhawm buatsaih a nih hnuah zaikhawm a ni a, tlaiah ruai an ṭheh a ni. Sap Upa leh Pu Buanga hian January 11, 1894-ah Mizorama chanchin ṭha hril turin Sairang an thleng a; missionary hmasa ber-ten Mizoram leilung an rah hmasak berna ní hi Missionary Day tih niin, Mizoram sorkar pawhin holiday-ah a puang a ni.

12th. Sunday: Indo-Bangla Boundary Inspection team chuan Tlabung leh a chhehvelah India leh Bangladesh ram chin chhinchhiahna lungphun (boundary pillar)-te an endik. Survey of India-a superintending surveyor, Swapan Das chuan, ramri endik hna an thawh chinah, ramrî chhinchhiahna lungphunte chu a awmna hmunah him taka a la awm hlawm niin a sawi a; ramri endik hna thawh chu sorkar laipuiin a ngaih pawimawh thu leh, tun ṭuma an hna ber chu India leh Bangladesh ramrî bik endik a nih thu a sawi bawk. Indo-Bangla Boundary Inspection team-ah hian India lam aṭangin West Bengal & Sikkim Geo-spatial Data Centre, Survey of India, Kolkata-a an director, NR Bishwas leh Survey of India-a superintending surveyor, Swapan Das te bakah, Survey of India-a mi pawimawh eng emaw zat an tel a; Bangladesh aṭangin Surveyor General of Bangladesh-a mi, Brig.Gen. Mohammad Wahidul Islam Talukdar chu team leader a ni a; BGB director (Chittagong Region) Lt.Col. Mohammad Tauhidul Islam, Survey of Banladesh-a deputy director Mohammad Abul Kalam leh, Bangladesh Ministry of Defence-a sr.assistan secretary Iqbal Mahmud leh Iqbal Mahmud-te an tel bawk.

13th. Monday: BJP Mizoram Pradesh chuan kum 2014 atan an pisa an hawng. Pisa hawnna inkhawm hi an party vice president, Laldinliana’n kaihruaiin, an president, Lalhluna chuan kumina Lok Sabha inthlanna turah Congress kaihhruai sorkar chu BJP sorkarin a thlak dawn tih sawiin, “Congress sorkar chhungin thil man nasa takin a sang a, ei rukna pawh a hluar nasa hle a ni,” a ti.

14th. Tuesday: NLUP Implementing Board (NIB) buatsaihin Tourist Lodge, Chaltlangah ‘Kut Hnathawktute Ni’ hman a ni a; khuallian, Agriculture minister R.Lalzirliana chuan, sorkar hnathawkte chu hlawh lakna atan chiaha an hna hmang lo turin a chah. Inkhawm hi NIB chairman, JH Roṭhuama’n a kaihruai a; R Lalzirliana chuan, “Sorkar hna hi hlawh lakna atana chauh thawka inngaih tur a ni lo. Ram leh hnam tana thawk kan ni tih hre reng chunga kan thiamna leh theihnate hman a pawimawh a ni,” a ti a; sorkar ṭhat leh ṭhat loh chu official-teah thui tak a innghah thu a sawi bawk. Kut Hnathawktute Ni hmannaah hian Mizoram hmun hrang hrang aṭangin kuthnathawktute an kalkhawm a ni.

15th. Wednesday: Aijal Club-ah Planning Department buatsaihin ‘ANNUAL PLAN’ siam dan inzirtirna, workshop neih a ni a, Mizoram sorkar hnuaia department zawng zawnga Plan sum lama mawhphurtu, Officer leh Clerk lamten uluk leh fimkhur taka Annual Plan siam dan leh Scheme hrang hrang, state pawisa leh Central sum atanga ruahmanna mumal tak siam dante inzirtir a ni a, ‘Quarterly Progress Report’ QPR pawm tlak siam dan te pawh inzirtir nghal a ni. He workshop-ah hian Planning Department hotu Principal Adviser, Planning Addl Secy. ni bawk, Pu Ngunlal Chinzah, Dy. Adviser, Pu Lalchhuanawma Hrahsel leh Sr. Research Officer, Dr. Lalrinchhana’n Mizoram sum hmuh dan leh hman dante zirtirin thahnemngai taka sum hmuhna tur ngaihtuah chunga plan leh project-te siam turin kal khawmte an ngen a ni. Sorkar kum thar atana Plan Budget ruahman chu hun tiam chhunga thehlut vek turin Department zawng zawng hriattir nghal an ni bawk.
16th. Thursday:Mizoram State Law Commission Chairman Office thar, New Capital Complex-a an building ding lai chunga sak thar chu Law & Judicial Minister, Pu Lalsawta’n a hawng. Minister chuan mipui rorelna ramah chuan dan fel tak a neih a tul thu sawiin, ‘tumahin dan hi an bawh chhe thiang lo a, dan hman tangkai theih tawh loh turte paih a, la mamawh turte leh siam belh ngaite ngaihtuah a zir chianna kawngah Law Commission hi a pawimawh hle a ni,’ a ti bawk. Law Commission Chairman Office hawnna inkhawm hi he Commission Chairman, Pu John Siamkunga’n a kaihruai a ni.

17th. Friday: Pu Chalrosanga (Mavala) Lunglei West Bialtu MLA chuan Lunglei Civil Hospital tan thisen a pe. Hei hi Lunglei Chanchinthar 2nd. Anniversary denchhenin tih a nia, hmeichhia 6 leh mipa 21 in an pe a ni.

18th. Saturday: Synod Conference Centre-ah Mizo Moral Reformation Network International buatsaihin Kohhran hrang hrang thalaite pualin seminar neih a ni a, Rev.TC Laltlawmlova’n a kaihruai. He seminar-ah hian Rev Zosangliana Colney-in ‘Kristian thalaite rilru put hmang siam that’ tih thupui a sawi a, kohhran pawl hrang hrang atangin mi 124 an tel a ni.

19th. Sunday: Baptist Church of Mizoram (BCM) chuan Lunglei Zotlang North biak-inah missionary tir chhuah inkhawm an buatsaih. He hunah hian AGS i/c Mission, Rev. KV Thanga’n thlahna thuchah sawiin, general secretary, Rev. H Lianngaia’n missionary pathum a tir chhuak a ni.

20th. Monday: Land Revenue & Settlement minister, R.Romawia chuan a bial chhunga Bawngkawn Local Council House chu a hawng. Minister chuan Bawngkawna Brigade ram chu sorkarin a chinfel hunah vantlang tana hmun pawimawh siamna atan hman a nih tur thu a sawi.

21st. Tuesday: November 23rd., 2013-a Bru helhoin Dampa ngaw aṭanga an rûkbo mi pathum zinga Mizo pahnih – Sanglianthanga s/o VL Hmuaka, Mamit Charkawn leh Lalzamliana s/o Buanga (L), Kolasib Vengthar te chu a rubo tu NLFT-te’n an chhuah hnuah an awmna Bangladesh atangin, Mizoram thlenpui an ni. Deep Mondal, West Bengal erawh chu chhuah a la ni ve lo thung. Mizorama pawl hrang hrangte chuan thuchhuah an siam a, Sanglianthanga leh Lalzamliana te chhuah an ni chu lawmawm an tih thu leh la chhuah ve loh Deep Mondal pawh a rang thei ang bera chhuah an phût thu an tarlang hlawm.

22nd. Wednesday: Chakma Autonomous District Council Chief Executive Member thar atan Pu Buddha Lila Chakma chu rinawmna thu tiamtira lak luh a ni. Rinawmna thu leh sorkar thuruk vawng tha tura intiamna thu hi Chakma Autonomous District Council Art & Culture Hall-ah Lawngtlai Bawrhsap, Pu J. Hmingthanmawia’n tiamtir a ni. CEM lak luhna inkhawmah hian CADC MDC te, Officer-te leh party hruaitute bakah SDO Civil, Pu L. Rinliana te an tel a ni. Pu Buddha Lila Chakma hi Vaseitlang bial atanga MDC atana thlan tlin a ni a, tun tum hi MDC atan a zawna tum thum thlan tlin a nihna a ni. Lak luh a nih hnu-a thusawiin, Pu Buddha Lila Chakma chuan a ngaih pawimawh hmasak tur chu Kamlanagar khawpui chhung kawng black top a nih tur thu a sawi a, hemi bakah hian District Council-a MDC te leh officer-te’n hnathawh dan an thiam theih nan training pek an nih tur thu leh, thalaite tan Annual Sports Meet siam tum a nih thu a sawi bawk.

23rd. Thursday: Mizo Academy of Science (MAS) leh Zirtiri Residential Science College (GZRSC) ṭangkawp chuan GZRSC seminar hall-ah thlai thar hlawk zawk dan leh mihring tana him zawka thlai chi siam danglam dan zirna an buatsaih. Seminar-ah hian GZRSC principal, JH Zoremthanga’n seminar buatsaih chhante a sawifiah a; Dr PC Lalrinfela, GZRSC-a zirtirtu leh, Dr Nuchhungi, asst. professor, Department of Horticulture, Mizoram University ten paper an present a ni.

24th. Friday: Court thupek angin Police-te’n PWD motor an man tan. Hei hi kum 1984-85 vela Maubawk atanga Govt. Complex inkar kawngpui laihna-a ram neitute hnenah Court-in zangnadawmna, cheng nuai 52/- leh a pungte pe tura thupek a chhuah, PWD-in an zawm loh avanga Court in PWD motor 48 manna tur thupek a chhuah bawhzuina a ni. Police-te hian motor an manna tur thupek leh motor an man tur ziahna te chu an keng a, mahse, Tuikhuahtlanga PWD pisa-ah hian motor man tura court-in a tih 48 zinga 4 chauh a awm avangin heng motor 4-te chauh hi an man rih a ni.

25th. Saturday: Vote nei tharte puala ram pum huapa National Voters’ Day hman chu Mizoramah pawh Vanapa Hall-ahpawh hman a ni a, hetah hian Larsap, Pu Vakkom Purushothaman chuan, “Tun hnaia Mizoram Assembly Inthlanpui neih kha inthlanna muanawm, thianghlim leh fel fai tak a ni,” a ti. He inkhawm hi Chief Electoral Officer, Pu Ashwani Kumar-a’n a kaihruai a, he ni hman chhan a sawifiah bakah, he ni pual hian kal khawmte chuan ram leh mipuite ham that nan thu an tiam a, Chief Election Commissioner, Pu VS Sampath-a thuchah chu mipuite hmuh theih turin tihchhuah a ni bawk.He inkhawmah hian Central YMA President, Pu Lalbiakzuala, MPF Vice President ni bawk leh Joint CEO, Pu H. Lalengmawia-te pawhin thu an sawi a ni.National Voters’ Day hi kum 2011 atang khan ram pum huapin January ni 25-ah hman thin a ni.

26th. Sunday: UPC (North East India) General Missions department chuan Aizawl East District Biak In, Ramhlun South-ah missionary atana an lak thar mi palite chu rawngbawl turin a tir chhuak. Missionary palite hi UPC (NEI) general superintendent, Rev. VL Dika Sailo-in Pathian hnenah a hlan a ni.

27th. Monday: Mizoram-in a vawi khat nan senior national football intihsiak kan dawng ve ta. Hei hi 68th National Football Championship For Santosh Trophy a nia; Northeast Zone atanga khel phak tur zawnna a ni. Lammual khata mipui pungkhawm hmaah Mizoram team chuan Nagaland lamah goal thum an khung a, an lamah a lut ve lo thung. Mizoram hi group A-ah awmin Nagaland, Manipur leh Arunachal Pradesh ten en an awm ho a ni. Group pahnih aṭangin hian team khat chauhin final round an luh dawn avangin tan a ngai khawp mai. 24th. Feb. atangin final round hi Silliguri, West Bengal-ah an khel dawn a ni.

28th. Tuesday: Excise Minister, Pu R.Lalzirliana’n zu khap burna dan thlah dul tum thu-ah sorkar-in Kohhran rawn a tum loh thu a sawi nawn. He thu hi Tualbunga sorkar thar lawmna inkhawmah a sawi a ni.Excise Minister chuan, sorkar-in zu khap burna dan chu thlahdul hret a tum a, hemi chungchangah hian ‘Kohhran rawn a nih chuan sorkar-in Kohhran pawih khawih a hlauh avangin rawn a tum lo a ni, Kohhran chuan englai mahin zu khapna dan chu thlahdul a duh dawn lo tih hriat sa ni mah se, Mizo thalai zingah zu tha lo chhiatpui an tam tak avang leh, zu in lo thei lote’n zu tha an in theih nan ngun taka ngaihtuah chungin zu khap burna dan chu sorkarin thlahdul hret a tum mai a ni,’ a ti.

29th. Wednesday: Roll ennawnna neih takah kumin January ni 1-a kum 18 tling chin, Electoral Roll-a thun nana Roll ennawn a nih hnua Roll siam tharah Mizoram pumah vote nei, mi 6,96,448 an awm ta. Heta a lan danin Mizoram puma vote nei 6,96,448 hi mipa 3,41,934 leh hmeichhia 3,54,514 an ni a, roll hnuhnung ber aiin mi 9,577 in an tam a ni. Draft Roll, tlangzarh takah hian vote nei thar 18,450 an awm a, mi 8,873 paih an ni a, Aizawl District-ah vote nei an tam ber a, mi 2,60,427 an awm a, Lunglei District-ah 95,697, Champhai-ah 78,347, Lawngtlai-ah 72,076 Mamit-ah 58,299, Kolasib-ah 55,801, Serchhip Dist. ah 45,407 an awm a, vote nei tlemna ber, Saiha Dist-ah vote nei 34,394 an awm a ni.

30th. Thursday: Aizawl Treasury Square hmuna Mizoram Legislative Assembly House leh Information & PUblic Relations Office inkar, chawhmeh leh thildang zawrhna hmunah bomb chak tak a puak a, mihring thi leh hliam erawh an awmlo hlauh.Bungraw tih chhiat erawh a ngah hle.

31st. Friday: Edenthar Venga NH-54 kawngpui âna Assam type in pahnih leh RCC building pakhat a kâng a, Assam type in pahnihte chu bungrua chuh hman loin a kâng ral a, thi leh hliam erawh an awm lo. In kan ṭanna hi Assam type in pakhat zawk, Hlua Rethread Tyre Works in hnuai, Lalrinhlua in aṭangin a ni a, electric current kal sual vang nia sawi a ni. Assam type building kâng ralte hi Wesleyan Methodist-ten mi luah atana an sak leh C Lalrengliana, Saron Veng te in a ni. Concrete bulding hi J.Zamanthangi in niin, a nau Lalramthanga luah lai a ni a; bedroom leh bulding-a M/s Freight Company Pvt. Ltd. ten bungrua an dahte chu a kâng ral. In kan ṭanna Assam type chung ber chu motor ke (tyre) zawrnaah a ni a, kângmei chhuak hi a chak phah hle a ni. Kângmei a chhuah hnu lawkah Fire & Emergency Service-te’n a hmun an thleng nghal a, Edenthar Veng mipuite’n a ṭhelh hna an thawk bawk.

Similar Posts:

Recent Posts:

3 Responses to “January 2014, Mizo(ram) Diary”

  1. 1
    filaxis Says:

    1st keuh teng..1-na khi chu a Mizoram diary lo deuh em?!bengvarthlak hle mai

    Report this comment

  2. 2
    chhana Says:

    Mizo te news emaw ramchhunga thil thleng, hnam dang poh telin ka huam tira, chubakah, sorkar thu leh thu lian thamin event a daih seng lo a tin ni.

    Report this comment

  3. 3
    Awmtea Leo Khiangte Says:

    Tha lutuk (Y)

    Report this comment