KAN RAM THIL HLU KAN HUMHALH VE DAN HI

February 4th, 2014 9:00 am by BigDaddy Hmahmatea

KAN RAM THIL HLU KAN HUMHALH VE DAN HI
********************************************
{Sawrkar leh mipui te hi i harh chhuak tawh teh ang u…}

Tunlai chu helam hi ka vei ve riau mai a chuvangin ka rawn post chhuak ve thuai mai a min lo hrethiam dawn nia. Hman deuh khan Sialsuk tlang sawrkar in a cheibawl tur chungchang sawi a awm nasa tan leh hle mai a. Kan ram thil hlu kan ‘Historical Monuments’ te leh kan ‘Natural Beauty’ te kan enkawl a kan sawngbawl dan hi kan sawrkar leh mipui te pawh kan in bih chian deuh a ngai a ka hriat ve avangin hemi chungchang hi kan sawi ve lawk ange.

 

He thlalak a kan hmuh hmasak ber hi Kan Mizo thawnthu a Chawngchilhi puk, Thenzawl khaw bul mai Vantawngkhawhthla penna bul lawk a awm kha a ni a ni a. Heti hian chei danglam a ni a, a ropui tawh khawp mai, mahse a thawnthu nena han mitthla chuan tunah chuan ngaihruat in lunglen a hril pha meuh ta lo. A kal chhohna step hi an siam dawn a nih pawh in thla han lak vel a lang chho tuarh tur lo deuh hian a sir lam deuh ah hian siam ni ta se thil buaithlak engmah a awm hmel lemloh. Tunah hi chuan a step lang tel lo a a thlalak hi chu a theihloh tluk a ni ta. A originality a ti bo khawp mai.

A dawt leh ami hi Farkawn khua Fiara Tui kha ni. Hei pawh a thawnthu nena ngaihthua chuan in zawmna nei awm pawh in a lang meuh tawh lo. Veng mawng tuikhur ang lek a ni tawh. An humhalh dawn a nih chuan a awmdan pangngai ang khan awm tir mai se, a hmelhem tur leh a riral tur hi thatak leh uluk takin humhalh in veng ta zawk se a hlu zawk ngei ang le. Heti hi chuan amah Fiara kha rawn tho leh pawh ni se a ‘tui thuihruk’ kha a ni tih a rawn hre thawh hauh lo ang le.

 

A dawt leh ami hi Hmuifang tlang a Sailo lal Lallianvunga hmun thin phul nuam lutuk mai, a phul chi a that avanga phai lam atang te pawh a chin darh atana an rawn lak hial kha ni. Tunah chuan in a ding ta khup mai. Va kal mah ila rilruah Lallianvunga lam reng reng a lang tawh lo, kan hawi changkang veng veng tawh mai a ni. An cheibawl a an tuaihnum dawn a nih pawh in a hun hlui laiah tak ni lo a chheh velah hian in te hi chu sa ta zawk se, a phul hmun hi chu uluk takin a hranpa in enkawl ta zawk se chu a ‘natural beauty’ kha a ngai ngai in ala awm thei tur hi a ni a.

 

A tawp ber ami hi khawvel ‘natural monuments’ ziangah pawh lang pha tur hial khawp a thil mawi, Thasiama se no neihna kha a ni. Hei pawh tunah chuan a thawnthu nen inzawlna nei awm pawh a lang tawlo hial khawp a sawngbawl danglam a ni tawh bawk. Step a awm chho zui a, a chung zawl pawh plaster ni in railings nen a inhung kual ta pup mai. A changkang tawh khawp mai. Khuangchera puk lah chu thir Gate nen a lo in hung khup tawh mai bawk, hei erawh mi in an chil phul lutuk tur ven nan chuan a tha viau maithei.

 

Kan hnam thil hlui te hi humhalh a tha, Historical Monuments te, kan ram hmun mawi leh thil hlu te humhalh tih hian chei danglam a sawngbawl kual vak hi a kawk lo a, a riral tur te, a hmelhem tur te ven a, a bo pil mai tur te pawh humhalh tur a ni zawk a. ramdangah te pawh an natural leh historical monuments te hi a humhalh in ataka kha an sawngbawl danglam vak vak ngai lo a, anihna pangngai ang kha a hmelhem tur leh a riral tur kha uluk takin an humhalh mai thin a ni a. MAHSE hei kan ram ro hlu te hi a hlutna bo thak khawp in kan sawngbawl ta zel mai chu ani si a. Hetianga kan hnam thil hlui te a originality bo thak khawpa kan chei danglam thin hi chu kan A nge kan mawl kan ti dawn.

A tira a nihna ang khan siam let leh pawh tum ila a thei tawh si loh…Kei zawng ka ui a ni..Hetianga ti danglam vak lo hian a humhalh theih a ni tih hi i hrechhuak tawh teh ang u. Hei kan tlai tawh e. Pi leh pu te hmanlai sulhnu mah kan neih tlem nak alaiin. Hetiang tih danglam hian kan humhalh nilovin kan ti riral zawk a ni tih hi i hre thar leh mawlh teh ang u… Hetiang anih zel zawngin thang leh thar lo la awm tur te leh ramdang khual kan ram thil hlui a nihna ang anga rawn hmuh tum tu ten min la dem lutuk palh ange…ZOFA TE I HARH CHHUAK TAWH TEH ANG U KHAI. Sialsuk tlang te pawh saw an cheibawl dawn a nih chuan a tlang nuam lai a in sa tlep tuarh lo in thing mawi deuh deuh te awmze nei in phun se, len thawven nan a nuam leh mawi takah siam ta zawk se kei chuan a fuh ka ring zawk daih mai le.

BigDaddy Hmahmatea

Kulikawn

Similar Posts:

Recent Posts:

10 Responses to “KAN RAM THIL HLU KAN HUMHALH VE DAN HI”

  1. 1
    Kawhterenga Says:

    Thil hlui chei danglam hian a nihna mai bakah a hlutna a tibo thin. Humhalh chu a tha lutuk tlat, theih hram chuan khawih danglam lo thei ang bera thawm that erawh a pawimawh ve tho bawk.

    Report this comment

  2. 2
    chhana Says:

    A dik. Khawvel ringtu, Kristian mai pawh ni lo, Juda leh Muslim ho thlenga kan khawpui ngaihhlut Jerusalem te khu ka tal ve nasa tawh hle a; a mawi zawng a chhut chuan mawilo in thing tak a ni. Mahse, hmanlai an hmun hluite erawh rilru la thei tur ang berin an la dah hlawm a ni.
    A awmzia ber nia ka hriatah chuan Mizote chu kan chapo em a ni!

    Report this comment

  3. 3
    Sony Says:

    Korean ho tih dan chu anih hmel loh (Kan entawn berte ka rawn sawi ve phawng anih chu)

    Report this comment

  4. 4
    H.Vangchhia Says:

    A pawi a ni.

    Report this comment

  5. 5
    Awmtea Leo Khiangte Says:

    A nih ang anga humhalh mai hi a tha ber maw le.

    Report this comment

  6. 6
    Sihtea Says:

    Thil hlui hi chu a nih dan ang ang khan humhalh a fuh in, a hah dam thlak bawk.

    Report this comment

  7. 7
    Lalhnam Rinzova Khawlhring Says:

    Post tha hle mai (Y)

    Report this comment

  8. 8
    Zoram Fapa Says:

    Hmanni kan zin haw lam Hmuifang Lallianvunga hmun ah chawlh kan tuma, Lal Thanhawla Park tiin an lo thlak daih tawh mai alo nia (Y) Lallianvunga Hmun tih kha a mawi teh reng nen. Hming thlak pawh hi kan Uar lutak a hlutna a bozo thin.

    Report this comment

  9. 9
    caribou Says:

    Mizo history a hmun luahtu pawimawh Lallianvung hmun tih aia “Lal Thanhawla Park” tia hming thlak chu Pu Hawla hian pawi tihna a nei lo emaw ni le?

    Report this comment

  10. 10
    BigDaddy Hmahmatea Says:

    Kei chuan Ka dam chhungin Lallianvunga hmun tih ngat zel in ka sawi dawn ….

    Report this comment