Mizoram pawlitik ka hmuh dan tlem!

February 2nd, 2014 11:05 am by H.Vangchhia

Vai khawpui Delhi lamin Mizo-te chu state pakhatah min hlangkaiin engemaw chen mahni state chhungah thuneihna min pe ta a. Mahni state chhung a thu neihna mipui min pek takah chuan Vai hmunpui rorel dan zulzui zelin leh, an dan (law) remtih chin a kan thiam ang angin, keimahni kan in relbawl nan dan leh hrai-te pawh kan insiam thei ve ta a ni.

Kan in relbawl dan tur han duang chhuak tur chuan state a mipui awm zawng zawngin, YMA general conference ang deuh a rorel a dan thar leh kalphung han siam mup mup mai chu a rem ve lova, tih chi pawh a ni hek lo. Democracy lalna hnuai a state kan nih angin mipuite chuan kan vai a kan tel ngai lovin kan aiawh thei tur, kan aiawh tlak a kan ngaihte chu kum 5 zelah kan thlang thin ta a nih hi. Chumi kan thlante chu political party hrang hrang a nihna chelhte, an mahni party zelin tha an tih, mipui aiawh tlak a an ngaih an rawn thehchhuahte an ni tlangpui thinin a rinawm.

Chutichuan an ni chuan mipui aiawh thei tur leh thlan tlin tlak, mipui vantlang tan a hnathawk thei tur leh kum 5 chhung chhawr tlak an nih chhan an party-in bial a siam sak theuhah mipui rilru hneh tumin an infak ta chiam thin a. A lehlam pawlte, mipui rawngbawl tlak an nih loh chhante pawh uar takin an sawi chiam thin a, anchhia an inlawh a ni berin ka hre thin. Chutiang chu ram danah a thiang niawm tak a ni. Chuti reng reng chuan mipui tan an tangkaina tur leh an in pumpek ngam zia te chu aurinna hmangin awr-phiar tawng tawng a an aupui hnu, ring tak leh hawihhawm theih tawp an chhuah hnu chuan mipui rilru hnehtu chuan kum 5 chhung mipui aiawhin hna a thawk ta thin a ni.

An mawhphurhna state pum enkawl, hmasawnna tur a hmalak te leh ram inenkawl dan tam tak an kutah a innghat a, chu vang chuan an thiam leh mimir tlin zawng theuhah hna an insem ta thin a ni. An hna chelh chu a zahawmin an mawhphurhna a tam em em vang chuan lawmman pawh a mawi tawkin thlatin pek an ni a, kawng dang dang pawhin lawmman pek an ni ngei ang. An hnathawh-in a zir em vangin zah tlak leh zah tak a en phu an ni a, chutiang chuan hawihhawm tak a biak pawh an phu fo thin. An ni pawhin an tiam ang zawng zawng hlen vek theilo mahse, mipui hma a iak thlawn mai ni lova an mawhphurhna chelh tirtute, a ruaitute chu an zah em em tur a ni ngei bawkin a rinawm.

Zoram mipuiten kum 5 an rawih duh nan a rinawmna leh ram hmangaihna thu te, Pathian hming chhal dum dum e tilo chuan mawhphurhna an han chan chiah hian a tam zawk chu an zia a dang zar tawh mai thin, a van pawi tak em! Za ah za an thutiamah an ding thei lovang, mahse an hna chelh chhan leh an chelh mekah tal chuan rinawmna chu han vawng thei tal sela ka va han ti thin tak em aw! Mipuite lah hian kan aiawh tur a kan rawihte hi lal ang main kan hlau a, kan hlauh tlawn zawmah lehnghal fo zui; zah tur an ni a hlauh tur erawh an nih ka hre lo. Chutiang a thlangkawrvai zia kan put tak vang chu ani mahna, anni pawh lal emaw an intih tak hlawm ni. Tam takah chuan mipui rawngbawl aiin mipuiin an rawng kan bawlta zawk thin ni hian ka hre thin. Development pawisa hmang heu theilo tur a dah theitute chu mipuite kan ni. Chutiang turin kan dah lova, a theih na apiangah development pawisa chu ei heu ve duhna nei kan tam tlat. Kawngpui an siam lahin a chhe siam thatna tur chu, “A bo daih zel,” an ti mai mai a.

Dan (law) hi ka hre tam lova mahse hei hi zawhna ni pahfawmin kan sawi belh ang e. MLA emaw minister emaw hian police emaw eng sawrkar hnathawk pawh hi an thuin sawn (transfer) theihna hi an nei em ni? An sawn tur hnachelhna department changtu khan chhuanlam a siam kha khinglet ngam kan awm loh vang nge, khin chi lova kan ngaih vang? Entirnan, MLA/Minister khan PWD a thawk pakhat chu an party a sawi chhiat vang emawin thildang chhuanlam hmang a an E.E. emaw hotu dangte hnenah thingtlang kilkhawr tak a sawn turin a hrilh ta a, kha E.E. khan a hnathawh lamah engmah tih dik lohna a neih hre silo sela, a tan tlat thei em nge, a tna tlat chuan a ma tan pawh a hlauh vangin thiam lohna nei a a hriat loh chu Pilata iangin thiam loh a chan tir zel mai dawn? Nge, hotu lamah hian hlemhletna hi a nasa tawh lutuk a tumah an intichhe tak tak ngam tawhlo zawk?

Ram hruaitute hi an thutiam a dintir theitu chu a ram mipuite kan ni. Ram hruaitute leh contractor te leh sawrkar officer te hlemhletna lak a chhanchhuak emaw dang theitu chu a ram mipuite kan ni e. Midang tih tur a dah zel lovin, mahni phak ang tawk tawk a hma kan lak theuh a ngai a ni. Mizoram hi Kristian ang a inchhal-te ram a nih angin Kristian zirtirna ang a dikna lalna ram han ni thei mai sela aw!

Similar Posts:

Recent Posts:

12 Responses to “Mizoram pawlitik ka hmuh dan tlem!”

  1. 1
    Sihtea Says:

    Mizoram hi Kristian ang a in chhal ram, Krista’n a thu zawm tur a thu min pek e rawh, zawm duh leh miah si lo awm khawm kan ni mah zawk awm e. Kan he ti vang hi a ni ang e;
    Milem be awm khawm na State kan then awm State ten hmasawn na kawng tin reng ah, hma min sawn khalh tak ni.

    Report this comment

  2. 2
    Borat Says:

    “vai hmunpui rorel dan” hi alawm, minister leh officer te ram hmangaih, thahnem ngai turin an imagine ringawt a, chu tiang anni aw zawng si lo. Ram tana thahnrmngai map lova an lo lal hian dan mumal taka hrem an harsa tawh thin.

    Report this comment

  3. 3
    caribou Says:

    A ngiahnawm tham hle mai. Kan ram hruaitu te hian inthlan dawn hnaih ah chauh mipui min hmangaih ang a, an tlin veleh an thiante leh an chhungkhat laina hnaivai te chauh min hmangaih san leh daih si ang tih ka hlau………..

    Report this comment

  4. 4
    H.Vangchhia Says:

    Min comment sak a, ka lawm em em (Y) in insum mah mahin ka hria hairehai :P

    Report this comment

  5. 5
    Borat Says:

    Kei mimawl hmuh ve dan mai mai chuan sual ngaihdamna kan ngah lutuk hi ani. Hlawh phu lova cnocrete in sa uaih maite hi hrem ahnekin kan ngaisang hlum dawn a, ek ang leka kan huha, na htei ang bera official dinhmun leh thuneihna hmang sual hrem kan thiam hma chuan ram rethei kan ni reng ang.

    Corrupt zual mi 5 tal kum 25 tang tura dah emaw, dismissed from service tal annih hun ka nghakhlel.

    Report this comment

  6. 6
    H.Vangchhia Says:

    Borat #5 (Y)

    A dik khawp mai. Mi rethei dan palzut deuh hlek chu a khawnawt ten an luhkhung a, ram thanmawh bawk leh ram tan a thil pawi nasa tak khawih ho erawh mak tak maiin kan en sang vei fu lawi si. Kan zia hi kan thlak a ngai takzet. Kohhran leh khawtlangah hruaitu atan pawh thlan ni hlawm lo sela ka va ti thin tak em! :( :-(

    Report this comment

  7. 7
    drake Says:

    I hmuh dan a tlem em nih chu…hmu tam tawh rawh :-P A tam ve tho sia :-P

    Report this comment

  8. 8
    chhana Says:

    Trasnfer chungchang chuan ngaihtuahna a ti thui hle mai.

    Report this comment

  9. 9
    Awmtea Leo Khiangte Says:

    Ka hman ve ta, chhiar dawn ang.

    Report this comment

  10. 10
    H.Vangchhia Says:

    Han chhiar chiah la :) hairehai

    Report this comment

  11. 11
    Saitawk Says:

    I lo la va ziak tha thei thuai thuai ve…

    Report this comment

  12. 12
    H.Vangchhia Says:

    Saitawk, ka lawm e (Y) hairehai :)

    Report this comment

Leave a Reply

You must be logged in to post a comment.