TIHDAMNA MAK

January 8th, 2014 6:36 pm by BigDaddy Hmahmatea

TIHDAMNA MAK
****************
(Sermon lam a ni lo)

Kumthar kan lo chuangkai chu a ni leh ta reng mai a, kumhlui kalta kha engtinge kan hman chu keimahni teuh in kan hre tlang anga. Kumin chu kumhlui aia tha leh hlawk zawk in hman tum theuh ila tih hi kan thu inchah hmasak ber atan ni se. Tun tum atan chuan doctor te damdawi tel lova tihdamna chungchang hi ka’n thlasik mau puah pui ve leh pawp mai teh ang. Hetiang lampang sawi zau deuh hian tlem a kan Mizo Kristian inti fekfawn deuh ho hian lo helh deuh thin an awm avang hian sawi chi a ni ang nge nilo ang tih hi ka ngaihtuah nasa ve hle a, mahse hriatzau nan pawh atha ve hrim hrim a ka hriat avangin a him tawk chin ni a ka ngaih ka rawn ziak ve tawp mai dawn a ni…

Mizoram ringtu ‘inti’ tamna ram, tawngtai damthei ni a an sawi hlek chu ‘fanghmir chithlum hmu’ ang mai a kan bawr luai luai zel na ram angah te hian chuan ‘inti’ zawlnei leh ‘inti’ tawngtai damthei hi sumdawn nana hman tham zet hi an kuh ve tul reng a. Mar deh thiam, mi zut dam thei inti lah an tam nangiang, lo zut fair lo fe fe tawk lah an tam bawk. Mi zut dam thei ka hriat pakhat pawh hmeichhe damlo hmeltha deuh a zut tur chu an chungah a bawh deuh kher zuk han ngai tlat pek a mawle. Eng thlarau tak ni ang maw?! Hetiang ang lampang tihdamna hi chu khawvel hmun dangah pawh hian an lo buaipui ve nasa tho mai. Tun tumah hi chuan tihdamna chihnih PSYCHIC HEALING an tih leh BIOFEEDBACK SYSTEM an tih chungchang hi kan rawn thlur deuh thung dawn a. A tawp lamah atak a ka thil tawn ka rawn zep tel ve thung anga. Heng tihdamna chihnih te hi medical scientist ten an pawm loh ve ve,mahse tawngtaidamna kan tih ang deuh a ataka thil thleng si a ni thung.Tin, hetiang tihdamna hi hmanlai India rama an tih dan atanga rawn in tan chhuak a ni tih hi kan zep tel hmasa leh zauh phawt ange.

PSYCHIC HEALING: Psychic Healing an tih ah hi chuan damlo kha mi tihdam theihna nei khan a khawih emaw, a lu chungah kut a nghah in emaw, eng tin tin emaw a an sawngbawl kual vel khan kha damlo khan a lo dam phah ta thin a. Hetiang tihdamna hi Kristian sakhuaah hian a tam em em laiin sakhaw dangah leh hnam mawl kan tih ho zingah pawh hian a awm ve tho mai a. Mithiam ten research an neih naah pawh sakhaw hrang hrang ami mi tihdam theihna nei hi an hruai khawm a, anmahni sakhaw vawn lai ami nilo sakhaw dang ami theuh damlo lakah tihdamna hi an thawh tir a, a tam zawk chuan an sakhaw pui te nilo pawh an ti dam tho mai. Hetiang hi New York University a an profesror Dr.Dolores Krieger chuan enchhinna a neihah chuan mihringa haemoglobin awm leh Hindu ho in mihringa nunna thahrui awm an tih ‘Prana’ hian inan na lai a nei a, chumi chu mi tihdam theihna nei te atanga thahrui engemaw (energy) chhuak khan damlo nunna thahrui ‘prana’ chu engtin emaw tak zuk ti danglam in an natna ata damna a pe thei a ni tih a hmuchhuak ve tlat.

BIOFEEDBACK SYSTEM: Biofeedback System ah ve thung chuan damlo kha an taksa hnathawh hrang hrang ngaihtuahna hmang a control dan an zirtir phawt a, an blood preasure te, an body temperature te, an muscle contraction te leh an lungphu chen a thunun dan an zirtir phawt a. Chutah damlo chu an taksa awm hahdam tir a, an marphu, an lungphu leh an body temperature te ngaihtuahna hmang a ti hniam turin an hrilh leh a,chutah hahdam ‘relaxed’ taka an awm hnuah damlo chu an natna chu radiation in a zuk chhun a, chu a natna lai chu zawi zawi a lo dam tial tial angin an suangtuah tir ta a. Hetianga vawi tam tak an tih hian an natna chu a lo ral ve tial tial thin ani. Hetiang anga natna enkawl hi ‘Biofeedback System’ an ti a, a bik takin taksa a bawk (tumor) awm enkawl nan a tangkai hle a ni an ti. Mahse heng natna enkawl dan chihnih kan han sawi tak ‘Psychic Healing’ leh Biofeedback System hi Medical scientist ho chuan a thawh tak tak hi an ring lo hle thung a, chutih rualin mi tamtakin an dampui ve tlat tho mai.

KA THIL TAWN VE THUNG: Dt 26th October 2010 zan dar 1 velah chuan ka khua hi a rawn sik hluah mai a. Khawsik satliah leh tlun satliah tih mai mai ah hi chuan ka chhungte hi ka kaitho ngai lem lova. Mahse hemi zan hi chu ka awmdan a diklo riauva ka hriat avangin leh ka tlun nasat em avangin ka chhungte mu lai chu ka kaitho ta a. Ka taksa zang zawng hi ka tha chhungrilah hian pawt tu awm ang mai hian a na em em mai a, min pawt kawm ngawng ngawng mai a, ka pa te leh ka fapa te ho chuan min han hmet laih laih a, mahse awmzia a awm thei lo. Chutiang chuan rei fe ka awm a, tih ngaihna tak kan hriatloh avangin ka nat deuh a a tih thin dan pangngaiin ka pa chuan ka lu chunga kut nghatin min tawngtai ta a. Hemi hnu rei vakloah chuan ka taksa zawng zawng chua zeng ta vek mai a, ka kut hmawr leh ka lu bak ka ti che thei ta reng reng lo mai. Manganthlak tak hi a ni tawp mai a ni. A tukah chuan Civil Hospital ah min phur phei a min lo admit nghal a, investigation an han ti char char a, ka kal (kidney) chuan hna a lo thawk hauh lo mai tih an hmuchhuak ta a, kal tlak tur min ti ta mauh mai le. Kal thlak hautak zia chu ka hre chiang, kan thianpa pakhat pawh a pa a kal a pe tawh, an in sen hnem zia pawh ka hriat pui, rilru chu a va hah duh bat bat tak em. Tichuan chhungte ho kan hrilh kual zung zung a kal min pe thei tur te, senso chhungkua a thawh khawm dan tur te chu chawplehchih chuan an rel ta chuk chuk mai le.

Hetianga kan buai kual kan buai kual lai hian nikhat chu pa pakhat hi a rawn kal ta hlawl mai a. Hepa hi tunge anih ka hre ngai lova, amah pawhin min hre ngai hek lo. Kan ward ah chuan Aizawl South lam mi, rawn dah luh thar deuh la tlangval thalai tak, taksa che theilo tiin a rawn zawng tawp mai a. Kei lo chutiang midang an awmloh avangin keimah chu an lo kawhhmuh ta a. Ka bul a rawn thlen chuan min en vang vanga, “Khawi maw, i ban ka lo en a,” ti a. Ka ban chu a en a, “Ka mumanga ka hmuh ngei kha i nih hi” a ti ta a.

Amah chu han en reng reng pawh hian veng changkang tak atanga rawn chawr chhuak anilo tih hi a hriat ngawih ngawih mai a. Secondhand kamis tial leh Jacket, kawngkama an sale a hmuh fuh niawm tak leh secondhand kekawr a ipte hmalam khamphei ngat hi a rawn ha a, Bata silipper hlui lampang tawh fai em em lo hi a bun bawk a. A ke-thiah han en in pheikhawkpum chu a bun tam vak lo tih chu a hriat mai bawk a. “Pathianin nangmah zawng chhuak a tawngtai tur che in ka mumang lamah zan hnih ngawt min lo hrih a, tawngtai mi pawh ka ni lova, chhung inkhawmah takngial pawh hun ka hmang ngai lo. Mahse ka hmuh dan a chiang em mai a, ka ti hlawhtlinglo ngam lova ka rawn kal tawp mai ani,” a ti ta hlawl mai a. A hming leh veng te kan zawt a mahse a sawi duh lem lova. Tichuan min tawngtai ta a. Tawngtai ka hriat zawng zawng ah chuan a la thiamlo ber awm e, “ Aw Lalapa hei ka mumanga min hrilh chu ka zawng chhuak a , kan unaupa hi i tihdam dawn avangin lawmthu ka hrilh a che. I mi tirhna chu ka ti hlawhtling e, a bak chu min tir tawh suh ang che…Amen,”  hei zawng hi a tawngtaina chu a ni, a tuihnang lo kher mai…Kan mihlim nuho changsang deuh pawh lo awm ve se , han ‘Amen-het-chhet-det-det…’ na tur chance eih hi an nei hman lo hrim hrim ang, chutiang khawp chuan a mawlmang a a tawi a, mihring taka thlir chuan a ropui lo bawk.

A mumang te chu ka zawt a , a sawi tha duh lem hlei lova. Tichuan chanchin chiang pawh zawh tur awm lo chuan a kal bo leh ta mai a. A hnu lamah pawh vawikhatmah ka hmu leh ta lo a ni. Hemi tuk atang hian ka zung tha theilo chu ka lo zung tha thei tan ta a, tin ka taksa pawh chu a rawn che tha ve leh tan ta a. Doctor te pawh chuan  mak an ti viau mai a tichuan ka zun leh thisen vel kal(kidney) function vel chu an en tha leh ta vek mai a, ka dam chu a ni ta der mai a kar khat chhung lek in kal thlak ngai an tih kha ka dam fel der a damdawiin atang chuan ka chhuak leh der mai a ni.

Kan naupan lai hian kan vengah hian Pi Laibati kan tih kan thianpa nu tawngtai mi hi a awm a, mi pawh hian an rawn in an ko ve nasa viau thin a. Ani tihdan phung chu a dang deuh a, damlo kha a tawngtai a tichuan a tawngtaina atang chuan damdawi chawh tur a lo lang a chu chu a chawh a an dampui tlangpui thin a. Kei pawh hi naupan lai atanga hrisel lo tak mai ka nih avang hian engemaw hlekah chuan kan ko a min tawngtai a damdawi min chawh a ka dam ve mai zel a. A damdawi min chawh erawh tunhnua ka’n ngaituah leh hian a natna nen khan a lo in tu-ha lo thei khawp mai a. Khawsik tlun hluah hluah te kha vitamin-C te an chawh tlat mai a, mum-uk kha a uar hle bawk a mahse a natna nen in mil lo deuh deuh a chawh pawh khan kan dampui ve zel hlawm tho thin tlat.

Henghi ka’n sawi kual duah nachhan chu engkim hi Pathian siam Pathian atanga chhuak kan ti a, a dik pawh a dik pawh a dik reng a. Pathian in mihring a siam pianken ah hian engemaw thiltihtheihna riau nei bik ‘Psychic Energy’ nei chak bik hi an awm tlat mai a. Hei hi Pathian in a mihringa a bika a dah a ni ve tlat. Mi tihdam theihna nei kan tih te pawh hi hetiang ‘Psychic Energy’ chak bik te an ni ve mai a nih hmel khawp mai a. Thil dang dang mak tak tak tithei pawh an tam hi. Mi thenkhat chuan heng te hi Kristian sakhaw chhung ami anih chuan Pathian hnathawh ah emaw Kristian sakhaw pawn ami anih chuan Setana  hnathawh ah emaw an ngai mai a. Thenkhat erawh chuan chutiang lam ni kher lovin ‘Gift of Nature’ a ni mah zawkah an ngai ve thung. Medical science lam chuan hetiang ‘Psychic Energy’ tih vel hi a tak tak awm theia an rin loh laiin a awmlo tih pawh an prove thei bik chuang tlat lo.

Kei ka ti ve thin a heng ang tihdamna ang chi tawngtai damna kan tih ang chi te, a tira ka’n rawn sawi Psychic Healing leh Biofeedback System ang chi te, Kristian sakhaw chhung ami ni kher lo hnam mawl ho leh sakhaw dang zinga thihdamna ang chi te thleng hian kan Pathian ropui zia leh a thilsiam mihringte a lo siam ropui zia te, A themthiam zia te tilangtu leh puangchhuak tu tha tak a ni ka ti ve tlat mai a. Heng ang thil atang te a kan Pathian ropui zia leh thiltihtheih zia te kan hmu thiam chuang lo anih chuan keimahni lam zawk hi kan in emfiah fe chu angai ve a nih hmel khawp mai.

BigDaddy Hmahmatea

Kulikawn

Similar Posts:

Recent Posts:

10 Responses to “TIHDAMNA MAK”

  1. 1
    Vladimir Putin Says:

    “Mizo Kristian inti fekfawn deuh ho” zingah ka tel lo bawka, tui ti taka ka chhiar chhuah dap chu!

    Placebo effect an tih ang a va ang hlawm ve, an vaiin. Prana pawh hi Yoga chi khat emaw a laichin hnai niin a lang. “‘fanghmir chithlum hmu’ ang mai a kan bawr luai luai zel na ram” ah pawh hian Prana ni lo, phurna hmangin an dam phah ve nual.

    “Aw Lalapa” hnena tawngtai thiam lo pa erawh khi chu a maksak ve viau. Lala pa chu tunge maw ni dawn tehreng.

    North America lama “global warming” vanga vawt ta lutuk an khurh pui laia hetiang lo sawi pawh ka in thlahrung zo.

    Report this comment

  2. 2
    Dr John Says:

    (Y) Nangma tawn-hriat dik tak niin alang a, a ropui hle mai.

    Ni e, Pathianin a hman ngei leh a tirh ngei mihring (rawngbawltu) hi chu an awm chiang tih a rawn nemnghet leh a. Hairual an nih loh zia te, anmahni ngei pawhin chapopui chu sawi loh, Pathianin a tirhnaah hian hreh em em-in an kal a ni tih a ti-chiang bawk.

    Amaherawhchu, Setana hian Pathian Tihdamna anga a lan theih nan a Duplicate ve nasa a, “Duplicate Healing” ang chi hi a thleng nasa ve bawk a ni tih hi hriat reng a tul a. Hetiang hi thliar-hran thiam a har viau nang a, Tawngtaina nen-a tihtakzeta beih chuan “a Tak leh a Suak ” chu hriat a har lo khawp mai.

    I sawi ang khian, Pathianin, Ringlo mite etc. kaltlang pawhin a inpuang chhuak ve thin, Hmanruaah hengte hi a hmang thei vek bawk tih hi thudik a ni. Chubakah, Paula’n a lo sawi tawh angin, “Pathianin, khawvel thila fingte aiin, khawvel thila a te hi a ropuina puanchhuahna atan Hmanruaah a hmang tam hle” tih hi Bible min zirtirna a ni.

    Report this comment

  3. 3
    PKfanai Says:

    Pathian hian tihdam theihna thilpek min pe chu ka ti chiah lo a. Amaherawhchu, Na nei reng reng, tawngtai tul tih tlatna a rawn awm a, a na lai khawiha Pathian hnena ka tawngtai hi a la hlawhchham bik miah lo. Chawp leh chilh ani kher lova, amaherawhchu, an la dam ve zel emaw, thil pawi a la thleng bik miah lo. Rul chuk pawh hi, a chukna lai khawihin tum 2 chu ka tawngtai tawh a, engtinmah an awm lo(Rul tur neilo pawh ani mai thei?) Ka fate an damloh pawh hian, ka thingthia ka kut nghatin ka tawngtai thin a, Pathian hian a lo ngaithla a, thil engemaw chu a ti thin ngei mai.

    Report this comment

  4. 4
    H.Vangchhia Says:

    Va tha ve (Y) Bawn-a hairehai

    Report this comment

  5. 5
    Chhuaklinga Says:

    A heading bracket chhunga mi khi ka chhiar a, ka nui huk. :D

    A bengvarthlak hle mai, comment-te nen lam khian.

    tren tren

    Report this comment

  6. 6
    H.Vangchhia Says:

    #5 Hairehai :P

    Report this comment

  7. 7
    meroby Says:

    tha ta thuai e

    Report this comment

  8. 8
    caribou Says:

    A bengvarthlak thin hle mai.

    Report this comment

  9. 9
    BigDaddy Hmahmatea Says:

    Tawngtai atanga damna hi mak ve deuh deuh in vawithum vawi li vel chu ka chang ve tawh a, thenkhat phei chuan an awihlo hial thin.

    Report this comment

  10. 10
    Sihtea Says:

    Ngaih thlak a nuam hle mai.
    A nei sei thei bik e mai pawh a.

    Report this comment

Leave a Reply

You must be logged in to post a comment.