December 2013, Mizo(ram) Diary

January 4th, 2014 9:54 pm by chhana

1st. Sunday: Bible Sunday a ni a, Bible Society of India (BSI) zawmtu Kohhran hrang hrangten hemi pual hian programme an hmang. Presbyterian Kohhran chuan thupui pahnih a siam a, Kohhran thenkhat tumhnih programme siam theite tan ruahman a ni. Inkhawm tum khat hmangte tan a eng zawk zawk emaw, a pahnih a kaihkawpin emaw hman theih a ni bawk. Kumin Bible Sunday thupui te chu –
Bible – Krista hnena min hruaitu (Johana 5:39; 17:17) leh Bible – Rinna leh thiltiha thuneitu (Thufingte 30:6; Hebrai 4:12) a ni.

2nd. Monday: Mizoram State Tobacco Control Society (MSTCS) chuan I & PR Conference Hall-ah The Cigarettes & Other Tobacco Products Act, 2003 hnuaia Section 4 zawm dan (a that leh that loh) zirchianna an neih atanga an thil hmuhchhuahte tarlanna hun an buatsaih. He hun hi Dr. Lalbiakkima, Director, Hospital & Medical Education chuan kaihruaiin Dr. Jane Ralte, State Nodal Officer chuan tun tumah an zirchhiana atang zuk leh hmuam chungchangah, Section 4 kaihhnawihte District hrang hrang in an zawm that dan leh thil hrang hrang an hmuhchhuahte a tarlang a ni.

3rd. Tuesday: Rualbanlote ni, International Day of Persons with Disabilities a ni a, he ni pual hian Social Welfare, SSA, SCERT, Health Services, Hospital & Medical Education department leh NIOH, Aizawl-te chuan Vanapa Hall-ah inkhawm an buatsaih a; rualbanlo chhuanawm zualte chawimawina hlan an ni. International Day of Persons with Disabilities hmannaah hian rualbanlo ṭhahnem tak an tel a, rualbanlote’n an thiamthil chi hrang hrang an entir bakah, taksaa rualbanlo chunga hlawhtlinna duhawm tak neitu mi 30 hnenah chawimawina hlan a ni. Rualbanlote Ni hi Serchhip-ah pawh Serchhip DC, SSA leh Shalom Spastic Society-te huaihawtin Serchhip DC bangla-ah hman a ni bawk. Social Welfare department chuan mi 7,894 hnenah rualbanlo certificate a pe chhuak tawh a; chungte chu ruh lam harsatna nei mi 2,360, rilru lam harsatna nei mi 1,874, mit lam harsatna nei mi 1,436, beng lam harsatna nei mi 1,996 leh thil danga harsatna nei mi 228 an ni.

4th. Wednesday: Chhiatrupna thlen thulha chêt lak dan ruahmanna bu, ‘State Disaster Management Plan’ leh Aizawl district chhunga hmun him leh him lote leh, hmun him loa ngaihte derthâwn dan zirchianna map bu, ‘Hazard Risk & Vulnerability Analysis of Aizawl District’ tihte chu nimin khan DM&R secretary, PC Lallawmsanga’n a tlangzarh. State Disaster Management Plan leh Hazard Risk & Vulnerability Analysis of Aizawl District bute hi Mizoram Remote Sensing Application Centre (MIRSAC) buatsaih a ni a; tlangzarhnaah hian MIRSAC project director, RK Lallianthanga’n lehkhabu chhunga thil pawimawh zualte a tarlang a ni. Tun dinhmunah Mizoramah police battalion hrang hranga mi State Disaster Response Force volunteer 425 an awm a, sorkar kum kal mek chhungin mi 120 dang training tir leh tura ruahman a ni.

5th. Thursday: UPC (Mizoram) inkhawmpui lian ber, General Assembly vawi 19-na chu Zonuama Mizoram UPC Assembly Centre-ah ṭan a ni a, rorel palai mi 700 chuang an tel a, Inkhawmpui hi Pathianni zanah a ṭiak ang. Mizoram UPC Assembly rorel hi executive chairman, Upa Lalthlamuana Hnamte-in a kaihruai a; kum 2014 budget atan Rs. 8,93,69,800/- an pawm a, pastor bial thar – Thenzawl bial leh Tripura-a Darchawi bial siam thar an rel bawk. Mizoram UPC-ah hian member 55,297 an awm a, district 13-ah pastor bial 71 an awm a ni.

6th. Friday: ‘Armed Forces Flag Day’ a ni a, indona-a thi nupui fanaute leh hliam tuar, ramtuileilo-a awm te, sipai bang leh an nupui hmeithai harsa te tanpui nan Aizawlah sticker leh flag zuarin tanpuina khawn a ni a, sorkar thu chhuah tarlan danin, flag zura tanpuina sum tur hmuh zat chu Rs. 50,815/- a a ni, mi tlawmngai tanpuina petu zawng zawng te chungah Sainik Welfare and Resettlement Department chuan lawmthu a sawi a ni.

7th. Saturday: Lungleia ni tin chanchinbu Lamtluang editor, K.Lalrochana (36) s/o K.Biakchungnunga, Chanmari, Lunglei chu Faith Hospital-ah lung ná avangin a thi

8th. Sunday: Synod Inkhawmpui vawi 90-na Dec. 3 atanga Ramhlun North Kohhran Biak Ina neih chu Moderator kal chhuak Rev. Lalramliana Pachuau in Valedictory Sermon a sawi hnu in a tiak ta. Synod Inkhawmpui hi kum 2010 atang khan Bial-in an thleng tan a, kum 2010 – ah Dawrpui Bialin Zarkawt Kohhranah thlengin kum 2011 khan Khatla Bialin Khatla Kohhranah an thleng a, kum 2012 khan Chanmari Bialin Chanmari Kohhranah an thleng leh a, kumin (2013) hian Ramhlun North Bialin Ramhlun North Kohhranah an thleng a ni. Kum 2014 chhunga Synod Moderator turin Rev. Lalrinmawia ruat a ni. Tun Synod-ah hian Pro. Pastor 19 lak an ni a, heng zingah hian Synod Pastoral hnuaia thawk tur 15, Synod Mission Board hnuaia thawk tur 3 leh Manipur Area-a thawk tur 1 lak an ni. Kum 2014-a Minister pension tur 1 leh 2015-a Pastor pension tur 3 report a ni. Pastor-te zingah D.Th. zir tur 4, M.Th. zir tur 8 leh D.Min. zir tur 1 phalsak an ni bawk.

9th. Monday: Mizoram Assembly pasarihna atana inthlana vote tlate chu district tinah chhiar a ni a; INC-in seat 33 lain, kum 2008 inthlan aiin seat pakhatin an la tam a; MNF, MPC leh MDF-te thawkho, Mizoram Democratic Alliance (MDA)-in seat 6 an la a; party dang leh independent candidate-te’n seat lak an nei lo thung.Hetih lai hian, Lawngtlai East biala Ṭialdawngilung polling station-a EVM chu a chhiat avangin Election Commission of India thu angin vote thlak ṭhat tur a ni thung. He biala vote chhiar tawh chinah INC candidate H Zothangliana’n vote 7993, Vanupa Zathang (MNF)-in 7910, F Sangdawna (ZNP)-in 642 leh NOTA-in vote 85 na hmu tawh a ni. Sorkar lai, INC hian MLA ni lai tun ṭum inthlana tling zo ta lo mi panga an nei a; MNF-in kum 2008-a an seat lak an hloh vek thung. Mahse, mi thar 5 an tling thar a ni. MPC paw’n MLA an neih laite chan vek mahse MNF nena an thawhhona, MDA angin Aizawl North-II-ah an la thung. Kum 2008 inthlana MLA pahnih nei, ZNP-in seat lak an nei lo bawk. Inhnehna sang ber chu Tuichawng bialah niin, INC candidate Buddha Dhan Chakma chuan amah hnaih bertu MDA candidate Rashik Mohan Chakma chu vote 8,726-in a hneh a; inhnehna tlem ber chu Tuikum bialah niin, MDA candidate Lalrinawma’n amah hnaih bertu INC candidate K Lianzuala chu vote 14-in a hneh a ni. Tun ṭum inthlanah hian MPCC president Lal Thanhawla tih loh, party dang president-te – Zoramthanga, Lalduhoma leh Lalhmangaiha Sailo te chu an tla vek a; MLA la ni ngai lo tling thar mi 10 an awm thung.

10th. Tuesday: Mizoram Higher Secondary School Games vawi 12-na chu Lammualah ṭan a ni a, Education secretary, K.Lalnghinglova’n a hawng. Higher Games hawnna inkhawm hi School Education director, P.Lalchhunga’n a kaihruai a; Education secretary chuan zirlai kalkhawmte fuihin, “Infiamna khawvelah Mizoram tihmingṭhatu in nih theih ngei ka beisei,” a ti a, rilru thianghlim pu a, huaisen taka inelna turin a chah. Mizoram Higher Secondary Games hi kum 1999 aṭangin neih ṭan a ni a, tun ṭumah hian sikul 27 aṭangin zirlai 1,391 an tel a, chung zinga zirlai 432 chu Aizawl pawn lam an ni. Infiamna chi hrang pariatah an inel ang a, December 13-ah zawh a ni ang.

11th. Wednesday: Lawngtlai East constituency huam chhunga Ṭialdawngilungah chuan EVM a chhiat avangin nimin khan inthlan ṭhat a ni a, voter nei mi 257 zinga mi 207 in vote an thlak. Vote tlate hi vawiin zing dar 8 aṭangin Lawngtlai DC office-ah chhiar a ni ang. Lawngtlai East constituency-ah hian vote chhiar tawh chinah INC candidate, H.Zothangliana chuan vote 7993 hmuin, amah hnaih bertu MDA candidate, Vanupa Zathang aiin vote 83 in a hmu tam zawk a ni.

12th. Thursday: Lawngtlai East-a polling station no. 30-na, Ṭialdawngilung polling station-a vote tlate chu chhiar a ni a; he bialah hian INC candidate, H.Zothangliana chuan amah hnaih bertu MDA candidate Vanupa Zathang chu vote 273-in a hneh. Ṭialdawngilungah hian vote 207 tlain, INC candidate H Zothangliana’n vote 198, a hmu a, MDA candidate Vanupa Zathang-in vote pariat hmuin, NOTA-ah vote pakhat a tla bawk. Heti hian Lawngtlai East bial pumpuiah H Zothangliana’n vote 8,191 a hmu a, Vanupa Zathang-in vote 7,918 leh ZNP candidate F.Sangdawna’n vote 641 an hmu bawk. INC candidate thlan tlin a nih leh tak avang hian INC chuan Mizoram Assembly seat 40-ah seat 34 an nei ta a ni.

13th. Friday: Chief Minister Lal Thanhawla chuan Vanapa Hall-ah Sericulture department buatsaih, North East Textile Promotion Scheme leh Workshop on Implementation of Catalytic Development Programme under 12th Plan in Mizoram tihte a hawng. CM chuan, sorkar hnathawkte muangchàn vangin Mizoramin central fund a hmuh loh phah ṭhin thu a sawi. NE Textile Promotion Scheme hawnna inkhawmah hian Moncy Isaac, dy.secretary (tech), Central Silk Board-in scheme chungchang a sawifiah a ni.

14th. Saturday: Chief Minister leh Council of Ministers lak luhna inkhawm ‘Swearing-in-Ceremony’ chu urhsun takin Circular Lawn, Raj Bhawan-ah neih a ni a, Mizoram Larsap Pu Vakkom Purushothaman chuan Chief Minister leh Council of Ministers te hi riawmna thu ‘Oath of Office & Secrecy’ tiam tirin a la lut a ni. A hmasa berin Pu Lal Thanhawla chu Larsap chuan rinawmna thu ‘Oath of Office & Secrecy’ tiam tirin Chief Minister atan a la lut a. Hemi hnu hian Cabinet Ministers atan Pu R Lalzirliana; Pu R Romawia; Pu Lalsawta; Pu H Rohluna; Pu Zodintluanga; Pu PC Lalthanliana leh Pu John Rotluangliana te chu a mal mal in ‘Oath of Office & Secrecy’ Larsap in a tiam tir hnuin lakluh an ni. Hemi dawtah hian Ministers of State atan Pu Lal Thanzara; Pu Lalrinmawia Ralte; Pu C.Ngunlianchunga leh Dr. B D Chakma te chu a mal mal in rinawmna thu ‘Oath of Office & Secrecy’ Larsap in a tiam tir hnuin lakluh an ni. Swearing-in-Ceremony-ah hian ex-Chief Minister Pu Zoramthanga; Pu C L Ruala, Lok Sabha MP; AICC Member Pu Eduardo Falerio; Assam Health Minister Pu Hemanta Biswa Sarma; Minister lo ni tawh engemaw zat; Mizoram Legislative Assembly 7-naah MLA te leh ex-MLA engemaw zat leh Mizoram Sawrkar leh Mizorama Central Sawrkar hotu te an tel a ni.

15th. Sunday: Sunday School exam ni a ni a; Sunday School zirlai tam zawkin exam hi an bei a ni. Junior Department chin hnuai lam ten ka a chhangin exam hi beih thin a ni a; kumin atang hian Junior Department chu ziakin an bei ve tan a ni.

16th. Monday: Ni thum awh Mizoram Legislative Assembly pasarihna chu a vawi khatna atan Assembly House-ah protem speaker, R.Lalrinawma kaihhruaiin an ṭhukhawm a, MLA atana thlan tharte rinawmna thu tiamtira lak luh an ni. Assembly speaker tur thlan nghal a ni a, chuhtu awmchhun, Hiphei, Palak bialtu MLA thlan a ni. Assembly Session-ah hian protem speaker, R.Lalrinawma chuan House member atan House leader, Lal Thanhawla a la lut hmasa ber a, chumi hnuah constituency number indawtin MLA-te chu lak luh an ni. Speaker Hiphei chuan, huana pangpar mawi tak pawh a hungtu a ṭhat loh chuan an him lo tih sawiin, “Kan ram leh hnam himna chu Pathian leh he House chhungah hian a innghat a ni. Ram leh hnam humhim tur hian dan kan neih ṭhat a pawimawh a, chumi tur chuan he House chhungah hian dan kan siam dawn a ni,” a ti. House leader, Lal Thanhawla leh Opposition group leader, Vanlalzawma ten Speaker thar Pu Hiphei an rintawk thu an sawi bawk. Hemi hnu hian session tihtawp a ni. Assembly speaker thar Hiphei hi kum 1972-ah Tuipang bial aṭangin MLA atan thlan tlin a ni a, deputy speaker-ah dah a ni. Chumi hnuah UT sorkar hnuaiah Tuipang bial aṭang vêkin ṭum li MLA atan thlan tlin leh a ni. Mizoram state a nih hnua inthlanpui hmasa ber, kum 1987-ah Tuipang bial aṭangin MLA atan thlan tlin a ni leh a, kum 1989-90 chhung speaker hna a chelh. Kum 1990-96 leh 1996-2002 chhung Rajya Sabha MP a ni bawk.

17th. Tuesday: MNF president, Zoramthanga chuan Mizo Hnam Runa MNF office bearers meeting-ah Assembly inthlanah MNF-in hnehna a chan loh avangin, president a nih anga a mawhphurhnaa ngaiin president aṭanga bànna a thehlut a; a banna lehkha chu OB meeting-in an sawiho hnuah, inthlana an chak lohna chu mimal tu emaw vang ni loin, an zavaia an chak lohnaah an pawm tih sawiin, ” ‘Pu Rama’n pa ber chan chang a, mawhphurhna la a, huaisen taka bànna a thehlut hi zahawm’ kan ti a. Pu Zoramthanga leadership hi lungrual takin kan pawm a, a bànna thehluh hi kan pawm lo a, kan president ni zui zel se kan ti,” tiin MNF thuchhuah chuan a tarlang. MNF OB meeting hi sr. vice president, Tawnluia’n a kaihruai a, member 94 an tel. MNF OB meeting chuan, MNF unit, group leh block-te term a tawp tawh hlawm avangin, a rang thei ang bera inthlan tharna buatsaih ni se, an ti a; MNF gen.hqrs. inthlan chungchang chu president hoa ngaihtuah atan an dah thung.

18th. Wednesday: Economics & Statistics department chuan I&PR auditorium-ah Registration of Births & Deaths annual training an buatsaih. Training hawngtu Economics & Statistics director, Saihlira chuan tualchhung a piang leh thi chhinchhiahtute chuan Mizoram dinhmun pholangtu pawimawh tak an ni tih an hriat a pawimawh thu sawiin, hemi lam buaipuitute chu piang leh thi an ziahluhah leh certificate pekchhuah danah fimkhur tak leh uluk taka ti turin a chah a ni. Training-ah hian Mizoram hmun hrang hranga registrar (birth & death) te an kalkhawm a, Directorate of Economics & Statistics, RBD Wing a deputy director leh research officer-te’n training an pe a ni.

19th. Thursday: Mizoram Secretariat Service Association (MSSA) chuan ATI Auditorium-ah general conference an hmang a; an hun hmanpuitu, Health minister Lal Thanzara chuan, mahni hna thawk ṭha peih lo chu mipui leh a chhawrtu zah lohna a nih thu a sawi. MSSA conference-ah hian chawhnu lamah rorel leh hruaitu thar thlanna hun hman a ni a, hruaitu thar atan mi 10 an thlang chhuak a ni.

20th. Friday: Chief minister, Lal Thanhawla chuan New Delhi-ah prime minister, Dr Manmohan Singh leh UPA chairperson, Sonia Gandhi-te a hmu a; Mizoramin sum lama harsatna a neihte a sawipui. Lal Thanhawla chuan prime minister hi Mizoram sorkarin non-plan hnuaia sum harsatna a neihte sutkiansak turin a ngen a; prime minister chuan, ram pum sum harsatna hre reng chungin Mizoram sum harsatna chu chingfel tura theihtawp a chhuah tur thu a hrilh niin sorkar thuchhuah chuan a tarlang. Chief minister hian Sonia Gandhi hnenah pawh Mizoram sum harsatna sutkian sak turin a ngen a; Sonia Gandhi chuan, Mizoramin sum lama harsatna a neihte chu enpui a, sutkian dan tur ngaihtuahpui a tum thu hrilhin, Finance minister pawh a biakrâwn tur thu a hrilh a ni. Sonia Gandhi hian Lal Thanhawla chu Congress party-in state dang inthlanah hnehna an chan theih loh laia sorkar siam theia chakna a chang chu a lawmpui thu a hrilh a; sorkar chak leh ṭha, langtlang sorkar kalpui zel turin duhsakna a hlan a ni.

21st. Saturday: Mizoram chhim lam a tuialhthei laihchhuah tur endik leh hmala tur a sorkarin contract a lo pek tawh Reliance Natural Resources Ltd chuan hmalakna engmah an la neih loh avangin Director General of Hydro and Carbon, Ministry of Petroleum and Mineral Resources chuan RIL te hi an contract an tih tawp sak.

22nd. Sunday: Phai lam atanga power kan hmuh tlem lai berin 45.5 MW kan hmu a, kan hmuh tam lai berin 71.99 MW kan hmu a thung. Tualchhunga siam chhuah 7.7 MW nen kan hman zawng zawng 79.69 MW a ni a. Transformer load shedding bak load shedding pangngai siam a ni lova, line chhia report a awm lo bawk.

23rd. Monday: Union Public Service Commission (UPSC) Chairman Prof. D.P.Agrawal chuan Chief Minister Pu Lal Thanhawla chu a chenna bungalow-ah a hmuin Mizoram chu mawi atih thu te Pu Hawla hi a hrilh a. Chief Minister chuan UPSC kaltlanga central service-ah Mizo kam tam thin thu leh tunah chuan kan tlem tawh thu te sawiin, hemi ti tha tur hian sorkar ina a din, Youth Commission chuan Mizo thalai tam zawk central service-a an luh theih nan IAS coaching te a siam thu UPSC Chairman hi a hrilh a. Skill Development lam pawh sorkar-in chak taka a kalpui chungchang te a hrilh bawk a, Prof. D.P.Agrawal chuan hetiang lam hi a tuina zawng anih thu a sawi bawk a ni.

24th. Tuesday: Serchhip Bazar hnuai Venga awm, Malsawmtluangi (14) d/o Pi Biakhmingthangi chu a inawkhlum.

25th. Wednesday: K.Lalngena, Bawngkawn chu Krismass tuk a nih angin chhung inkhawmah hun hmang tu a ni a; a tawngtai laia a ‘ekhai’ thawt hnuah a ngawih tak reng avangin a chhungte ngaih thalo an han men meuh chuan biak theih a lo ni tawh lo. Damdawi in kalpui nghal ni mahse chhan theih a ni ta lo a ni. K.Lalngena hi 1st. July 1922 khan ah Bungzungah Rualvunga leh Chhingpuii te fa hmasa ber ni turin a lo pianga, nau pasarih zet a nei. A naupan tet atanga naupang thangduang leh hrisel tak a ni a; thian te zingah pawh a chak bik hle thin. 1942 ah Sawikungi nen inneiin Pathian malsawmna dawngin tu leh fa 80 zet an nei. Hmun hrang hranga an pem kual hnuin 2002 khan tuna an awmna Bawngkawnah hian an in bengbel ta a ni.

26th. Thursday: Aizawla Assam Rifles Quarter Guard kawt, Mahatma Gandhi-a lim dahna bul kawng kual laiah Jacob Lalnunthara (21) s/o C.Lalthanmawia Dinthar-I leh Zodinthari (14) d/o Zahmuaki Vaivakawn Zohnuai te chu Truck AS-19C/3768, Bipul Koch (32) s/o. BC Koch, Goalpara, Assam ami khalh chuan a chil hlum. Jacob Lalnunthara hian R15 Bike MZ-01/F-5863 khalhin Zodinthari hi a phur a, Treasury Square lam pana an tlanin Gandhi lim zawn kawng kual lai takah an hmaa Truck an tlan pel chu Truck hmaah tak an tlu palh ta a, Truck driver hian brake hman lovin an pahnih hian a chil ta ni a. Bike erawh mak takin a chhe lo hlauh. Truck driver bakah a chuang ve mi pahnih chu police ten an man nghal.

27th. Friday: Pu Lalbulliana s/o B.Pachhunga(L) Tuithumhnar chuan Presbyterian Kohhran ruaithehna hmunah zurui chung leh zurui dang khawmin buaina a siam a, kohhranhote thlabarin a siam. Pu Lalbulliana hian tuiso chhirbuain hliam tuar te pawh an awma. Bucket a petchhiaa, kohhranhote tawngkaa vauin a rikrap a, kohhran bungbel zawng zawng vuakchhiatah a vau bawk. Kohhran committee te hmusit takin hnam zawnga tawngkhumin a bei a, Pastor leh Pro.Pastor te pawh tawngkain na takin a bei bawk. Pu Lalbulliana hian Dt 30.12.2012(Pathianni) khan kohhran inkhawm laiin Biak In Compound ah Geletine Bomb a lo tipuak tawh bawk. Hetianga sakhuana tibawrhbang zawnga hunpui tibuai leh mipui tithlabar zawnga chetna hi Tuithumhnar Presbyterian Kohhran Committee chuan tha lo a ti takzet a, a lo chet tawh dante enin kohhran member a nihna hlihsak mai thaa hriain a hlihsak a, Bungtlang ‘S’ Police Station-ah FIR an thehlut nghal bawk.

28th. Saturday: Lallianzela (11) s/o Lalruatmawia Keitum VCP chu Tuichang N.Vanlaiphai kai thlang lawkah tuiah a tla hlum. Lallianzela hi a pa thing tuah tur lak naah kal ve in a pa’n hna a thawh lai hian a thiante nen tui an lo chen na lamah a chesual ta a ni.

29th. Sunday: Media lama kan miril Pu Khawvelthanga Joint Director, I & PR (Retd.) chu cancer natna anmahni chenna in Tlangnuamah a boral. Tlangnuam thlanmualah vuiliam nghal a ni.

30th. Monday: South Khawbunga thian rual ramvak zinga mi Pu Hranghleia Khawbung Dinthar chu Ramsa emaw tiin an zinga mi pakhat in a kap palh a,a hliam tuar lo in a boral. Pu Hranghleia hian a fate pa 3 a kalsan.

31st. Tuesday: C H Thankhuma (16) s/o. C.Lalkhumthanga, Kikawn, Bazar Veng, Lunglei chu veng dang mite nen Kikawn chhak Lungchhengaw a an insualbuaina lamah a boral. He insualbuainaa telte hi Police ten an man nghal.

Similar Posts:

Recent Posts:

4 Responses to “December 2013, Mizo(ram) Diary”

  1. 1
    PKfanai Says:

    Chhana hi a fakawm thin mang tak e aw. (Y)

    Report this comment

  2. 2
    PKfanai Says:

    Chhana hi a fakawm thin mang tak e aw. (Y)

    Report this comment

  3. 3
    H.Vangchhia Says:

    A bengvar thlak thin hle mai (Y) hairehai

    Report this comment

  4. 4
    wiki.nlpower.com Says:

    wiki.nlpower.com

    December 2013, Mizo(ram) Diary | mi(sual).com

    Report this comment