Pa hun tiam.

December 26th, 2013 9:55 am by PKfanai

“Nimahsela a hun bi a lo kim khan fa nihna kan hmuh theih nan Dan hnuaia awmte chu tlan turin Pathianin a Fapa, hmeichhe hrin, Dan hnuaia lo piangin a tir chhuak ta a” (Galatia 4:4).

Bible-hi ngun taka kan zir chuan, Pathian chatuan thil ruahman kan hmu thei a. Genesis atanga Thupuan thleng hian Pathian thil ruahman leh a lo thlen famkimna te, lo la thleng leh zel tur te kan hmu a ni. Khawvel hun tawpa Sakawlh lo chhuak tur te, He khawvel chunga Pathian thinurna berhbu leihbuak tur te, Harmageddon Indona lo awm tur te, Setana leh Sakawlh te Chatuan hremhmuna paiha awm a, chatuana a chhun a zana nghaisak an nih tur te, Mihring thi tawh te thlarau zawng zawngten Rorelna hnuhnung ber an tawh tur leh, Thiam loh chang Nunna bua hming ziak loh zawng zawng te Hremhmuna paih annih tur te, Isua Krista leh a Kohhran inneih hun tur(Vanrama Ringtute kan lawi luh hun tur)te, Lawmman sem anih tur zia thlengin a inziak lawk vek a ni.
Pathianin a Fapa he khawvela a rawn tirh dawn pawh hian a rawn Sezawl chhuah tawp hauh lo mai a, khawvel hi a lo buatsaih lawk sa diam a, a hun dik takah a rawn pian tir chat mai a ni. Chung chu engte nge ni I han thlir ho dawn teh ang:-

1. Chanchin tha a darh chak theih nan, A fapa Isua Krista pian nan Khawvel laili lai a rawn thlang:
“Pathianin Khawvel a hmangaih em em a, chutichuan a fapa mal neih chhun a pe a’(Johana 3:16) leh
“Ama hmingin simna thu leh sual ngaihhnathiamna thu Jerusalem khuaa tanin, hnam tin hnenah an hril ang”(Luka 24:47)
Tih thu an chhiar hian Kum zabi pahnihna vela mi te chu an nuih a lo za deuh thin ani awm e.
Greek miffing Celsus-a phei chuan AD 175 naah khan Lehkhabu a lo ziak hial a ni.
“Pathian chu a muhil vang vang a rawn thang harh phut a, He Khawvel hi Setana kut atanga a rang thei ang bera chhanchhuah thuai thuai lo duh ni ta se la, He Khawvel kilkhawr lai berah hian a fapa chu a rawn pian tir duh in ring reng reng em ni? Chutiang chu Fiamthu lam ziakmi hoin fiamthua an ziah awm lek a ni” a lo ti nghe nghe a ni.

Khatih lai hun ami te tan chuan, Celsus-a hi ziaktu fing tak angin a lang a, Palestine kha a tein a pawimawh lo a, khawvel kilkhawr tak niin a lang tlat a ni. Amaherawhchu, Christopher Colombus-a ten America khawmualpui zau lutuk tak mai an han hmuhchhuah hnuah erawh chuan, Khawvel Map han pharh ila, Celsus mifinga khan a lo hre lo hle tih kan chiang theuh awm e. Khawvel Map banga intar han thlir vang vang ila, Lawng kal vel dan te, Thlawhna thlawh dan te han en ila, Khawvel laili lai tak kawk dawn ila, Palestine(Israel) ram kan kawk ngei ang. Chuvangin, Celsus-a thuziak pawh khi hetiang hian siam that awm takah an ngai ta zawk a:-
“Pathian chuan…Mihringte hnena a rang thei ang bera a chanchin tha puan darh thuai thuai a duh anih chuan, a fapa chu khawvel hmun laili, Palestine ah a rawn piantir ngei ang…” tia ziah that awm tak ani an ti ta hial a ni. Pathian chuan rilru nei takin ruahmanna fel tak nen, Khawvel ram laili tha lai ber mai Palestine ram hi a fapa pian nan leh chettlat nan a lo thlang anih chu.

2. Rome Sawrkar hnuaia Khawvel a ralmuan lai leh Inkalpawhna a that leh awlsam lai tak a ni: Lal Isua rawn pian lai tak hi, Rome Sawrkar chak tak maiin khawvel hneh taka a awp lai a ni a, Helna a lo chhuah changa Rome Sipaite an va thlen zung zung theih nan, Khawvel hmun pawimawh lai pawh turin Kawngpui an sial riah ruah a, inkal pawh a lo awlsam tawh em em mai a, Lal Isua Zirtirte pawh khan, Chanchin Tha kha an hril darh zung zung thei a ni. Khawvel pawh a ralmuang ang reng a ni. Rome Sawrkar han cho ngam leh Indo bup bup ngam an awm loh lai tak a ni a, Zin vei vah pawh a nuamin a awlsam ang reng a ni.
3. Chanchin tha hril a awlsam theih nan, Khawvelin Greek tawng Common language anga an hman lai a ni: Lal Isua lo pian lai vel khan, Rome-in Khawvel awp mah sela, Tawng lamah chuan, Greek tawng kha Rome ram awp chhunga Common language anga hman ani a, Greek tawng thiam tan chuan, tawng thar zir ngai vak lovin, an kalna hmun apiangah khan Chanchin Tha kha an hril hmiah hmiah thei a ni.
4. Juda Sakhaw Zirtirna a darh that lai ani a, chu chuan Isua Krista lo pian tur thu a lo sawilawk reng si a: Sakhaw inzirtirna mumal tha tak nei Juda Sakhaw zirtirna khan Sakhaw lamah chuan Rome ram awp chhung kha a fan chhuak hneh ang reng a, Chu Juda Sakhaw zirtirna chuan, Pathian Pakhat anih thu te, Mihringte a hmangaih avanga a fapa mal neihchhun Nula Thianghlim laka a piantir tur thu te a lo sawi lawk dim diam si a, Missionary hmasate tan Chanchin Tha hril darh kha a awlsam phah em em a, miten an hrethiam hma a ni.

Kan tunlai Khawvel hi han thlir vang vang ta ila, Bible-in hun hnuhnunga thil lo thleng tur a lo sawi lawk te lo thlenna tur atan hian Khawvel hi a inpeih et awt tawhin in hre ve em?
English(Sap tawng) chu Khawvel tawng alo nita a, China te meuh pawhin an dang zo tawh lova, an zir ve nasa ta. Khawvel huap Sawrkar League of Nations an han din a, Pu Hitler-a ten palzutin a han tliak leh rih a, Nimahsela, a aia chak zawk leh huapzo zawk United Nations Organization(UNO) din a han ni leh ta a, USA hmalaknain Khawvel Police ang reng an awm bawk a. ‘One World Government’ hi Politically chuan Daniala mumang ang khan awm thei tak tak dawn lo mahse, Khawvel huap Sawrkar inzawm khawm chak tak hi chu a awm reng a ni. Computer leh Internet lamah kan sang tawh si a, Sakawlh hi lo chhuak tak tak ta pawh nita se, mitinte hi alak atanga tlanbo leh biru thei miah lovin, min chhinchhiah vek theih dan tur kawng te hi a in hawng ruah tawhin in hre ve lo maw? Jerusalem lah chu Khawvel Sakhaw lian 3 te hmun thianghlim anih tlat avangin, ‘Hnamtinte ruihna hlo’ a ni chho deuh deuh zel bawk si. Inringa ngaihven a hun e.

Similar Posts:

Recent Posts:

11 Responses to “Pa hun tiam.”

  1. 1
    caribou Says:

    (Y)

    Report this comment

  2. 2
    caribou Says:

    AADHAAR Card te hi sakawlh hmalakna a hmahruaitu chu a ni mai lawng maw?

    Report this comment

  3. 3
    Sihtea Says:

    A van tha tak em…”

    Report this comment

  4. 4
    chhana Says:

    A 4engvarthlak hle mai.

    Report this comment

  5. 5
    Awmtea Leo Khiangte Says:

    A tha hle mai (Y)

    Report this comment

  6. 6
    Borat Says:

    Pathianin a Fapa, hmeichhe hrin, Dan hnuaia lo piangin a tir chhuak ta a, tih ziaka capital D (Dan) a tih khi Mosia dan (Ten Commandments) ani lovang tu r’u? Galatia 4.4 hi a thu aril raih raih viau.

    Report this comment

  7. 7
    PKfanai Says:

    Pathian fapa, dan siam/pe tu leh, dan chunga leng(above the Law) ni thin kha, mihring nihna famkim neiin, dan hnuai kun ve turin a rawn pian tir tihnaah ka lo ngai deuh mai a sin.

    Report this comment

  8. 8
    Benny Says:

    A ngaihnawm hle mai

    Report this comment

  9. 9
    mihring Says:

    Thu ziah hi a har teh lul nen hetianga Mizo tawng ngei a thu tha, bengvarthlak bawk si chhiar tur a awm thin hi mi(sual) nih ti nuamtu a ni. Thu chhete pawh ziak peih reng mi chu mi taima, mi chunga leng, miin an chung en an ni. Miin an hmusit tak2 ngam ngai lo. Mizo zinga ka mi ngaihsan pakhat Rev Liangkhaia khan, zantin mahni hming tal pawh ziak peih thinlo mi chu mi taima tak an ni ngai lo, tih lam pang deuh khan thu a lo keuh thlu daih tawh. Tun hnaiah hian social networking hian Mizo te pawh min chen chilh ve mek a. Kei phei chu mahni hming ziah chu sawi loh, tun hmaa lehkha bu ka chhiar peih thin ang khan ka chhiar peih tawh mang der lo mai. Net vel a mi bak ka chhiar peih tawh mang lo achha chu a ni. Chumi avang chuan ziakmi, taima tak2 te thuziak hi source berah ka hmang tawh a. Taima takin han ziak zel teh u.. :)

    Report this comment

  10. 10
    Dr John Says:

    (Y) Pu Pk-a nge nge a tha hle mai.

    I sawi bakah khian, “Hunbi ti-kimtu pawimawh tak 1 chu… Kum 400 Chhung Zawlnei etc. te Kaltlanga Pathian Inpuanchhuahna Thawm ri-va reng reng awm lova Israel fate chunga Pathian a ngawih hnu-ah Lal Isua (Messiah) a lo Piang ta mai hi Pathian Thutiam Nghet leh Danglam ngai lo ti-kimtu leh ti-chiangtu” a ni bawk a ni.

    He “Pathian Ngawih Hun” hi “Intertestamental Period” tia vuah a ni a. Kum 400 bawr a huam a (Malakia, 420 BC hun atanga Baptistu Johana, 1st Century AD thleng vel). Protestant Kohhran chuan “400 Silent Years” tiin kan sawi tlangpui a. He Hun chhung hian Pathianin a mite hnenah ‘Inpuanchhuahna Thar-lam’ engmah a nei lo (God revealed nothing new to his people) nia ngaih a ni.

    Thil mak tak erawhchu, he “Pathian Ngawih Hun Chhung”-ah hian Protestant Kohhran leh Catholic Kohhran-ten Bible-a telh atana kan pawm tak loh “Lehkhabu Ziak” (Pseudopigrapha Works) tam tak chu a lo chhuak thung a! Kohhran pawh a tibuai hle a nih kha.

    Achunga “Pseudopigrapha Books” bakah khian, Protestant Kohhran-ten Bible-a telh atana kan pawm tak loh, Mahse, Roman Catholic leh Eastern Orthodox kohhran-ten an pawm tak – Apocryphal or Deutero-canonical Books tam tak-te pawh he “400 Silent Years” Hun chhunga Ziak an ni deuh vek bawk a ni!

    Report this comment

  11. 11
    PKfanai Says:

    Dr.John & mihring (Y)

    Report this comment