MITIN TA TUR CHANCHINTHA!

December 25th, 2013 9:58 am by Chamliana Ro

Krismas a hnai tawh hle a, a nihna takah chuan Lal pian champha lo thlen nan kar khat em pawh ni a awm tling tawh lova, nili chauhvin a dang tawh a — hnai tawh tak a ni.

Thla thum zen zawn ka tawmna ngaiah ka tawm tawh a ni ber a. Kan tul theih em avang leh ka thil buaipui lai chu zawh fel thuai thuai tuma theihtawp (leh tlem!) ka chhuah avangin university campus pawn lamah inkhawm tura Pathiannia va chhuah takngial pawh thil awlai a ni hranpa vak lo. Tunah erawh chuan buai zualpui a reh ve ta deuhva, hahdam zawka thawk han lakte pawh a chakawm ve tawh reng reng a, krismas lah a lo hnai em em tawh bawk nen — rilrua helhkam ren run awmte pawh ka inthing thla zo deuh thaw tawh a. Hetih hun lai hi thlawhna leh lirthei dang ticket rush lai a ni a. Aizawl lam pan tum mi tamtakte chu ticket ngaihtuahin an phili buai leh fe dawn tih ka hre kar a. Chuvangin, kei chuan Delhi ka pan hma daih khan Zotlangsang lama let lehna tur ticket pawh Aizawlah ka ti fel (thlip thlep) tawh nghe nghe a. Naktip maiah Aizawl lam pana ka haw lehna tur air ticket chu ka bag-ah a awm fel ran tawh a ni.

Tichuan, Pathianni a lo thlen chuan thawveng rilru angreng takin Jawaharlal Nehru University campus kawngkharpui bulah auto ka man a, Delhi-a Mizote inkhawmna hmun Green Park Free Church lam panin ka liam phei ve ta a. He Biak In hi tunah tak phei chuan Delhi Mizote hian an chhuahsan tawh nghe nghe a ni awm e.

Rin ai daihin inkhawm an lo thahnem a — thalai lam buatsaih Krismas lam hawia a bik taka inkhawm anih vang pawh a ni mahna.

Engpawhnise, tunhnua ka han ngaihtuah let leh ngial pawh hian inkhawm chhunga kan hun hmanah khan han sawichhawn tur ka hriat reng thildang engmah ka neih pawh ka hre tawh lova; inkhawm banah hmelhriat engemawzat te nen Biak In kawtah kan in chibai hle tih erawh ka la hre thei.

Thil pakhat erawh hriatreng ka nei a, ka theihngilh tawh kher lo mai thei a ni. Inkhawmah chuan nula pakhat hian thutawi a sawi a, a han sawi thiam lo em em mai lehnghal a! Mahse, a thusawi chuan ka thinlung a khawih kher mai.

Inkhawm banah ka haw kawngah chuan kawtthler chu ka thlir ka thlir a, in ropui tak tak leh naran lo fe fe a khir eih uaih a, car nalh lutuk te chu ka sirah an leu piat piat mai a — chutih mek laiin kawngsirah kutdawh naupang bal leh berh namen lo, ramsa ang maia vak mai mai eng emaw zat ka hmu bawk a.

Khawvel hi zawng intluktlan lohna hmun a ni a, mihringte malsawmna hi chu mitin ta tur engmah a awm lo. Mitin daih a awm thei lova, mitin thleng phak a awm hek lova, NLUP pawhin mamawhtu zawng zawng a thleng dawn lo. Chanchintha erawh mitin ta tur a ni a, a duh apiangte ban phakah a awm reng a — Biak Ina nula pawhin thiam lo takin a sawi kha mawle…

Similar Posts:

Recent Posts:

5 Responses to “MITIN TA TUR CHANCHINTHA!”

  1. 1
    kilung Says:

    A va tha em!!! Christmas Chibai vek u le..

    Report this comment

  2. 2
    caribou Says:

    A last para khi a dik ka ti khawp mai.

    Report this comment

  3. 3
    chhana Says:

    Kan nghah krismass chu a zo ruai chu a ni leh ta der mai le. Inkhawm chu sawi loh tuboh leh perek nen kan rik tak bur bur chu.

    Report this comment

  4. 4
    H.Vangchhia Says:

    Mi te ber a kan ngaih atang a mi lian ber a kan ngaihte thleng a chibai kan buk tlan theih leh kan intawm theih awmchhun chu Isua hi a ni. A pian pawh khan mi hnuai ber a ngaih theih tur berampute leh mi ropui leh thiam berte zing a mi tur khawchhak mifingten an chawimawi ve ve phak a, milian leh in ropui a piang nise mi rethei tan chibai buk ngaihna a awm lo bawkin a rinawm.

    Report this comment

  5. 5
    Dr John Says:

    (Y) Post tha khawp mai. A Pawimawh tawp bawk.

    I thil sawi, “Inkhawmah chuan nula pakhat hian thutawi a sawi a, a han sawi thiam lo em em mai lehnghal a! Mahse, a thusawi chuan ka thinlung a khawih kher mai” i tih hi a pawimawh-in rilru a khawih khawp mai. Chanchin Tha Laimu (the core message of the Gospel of Jesus) a ni tlat mai le!

    Ringtute hian “Pathianin kan inpekna leh kan rilru lam a en zawk” tih hi kan theihnghilh fo mai. I Nula sawi khian mite ngaihthlak tlakin Pathian thu sawithiam hauh lo mahse, a inpekna leh a thinlung lama Pathian a hnaih tlat-na kha Pathianin mal a sawm tih a chiang hle.

    Tunlai ringtute hian, ‘rilru lama Pathian nen-a inzawmna aiin pawnlam lang thei-a Pathian nen-a kan inzawmna hi kan ngai pawimawh zawk’ ta niin a lang. Thusawi thiam te, Thusawi tha te, Incheina leh Lang thei lama Pathian fak leh chawimawi leh rawngbawl hi kan hnapui ber a nih tak hi! Hei hian Pathian Malsawm tlak a ni lova, mihringte thinlung pawh a khawih che zo tawh lo ni berin a lang.

    Tin, “Mitin ta tur Chanchin Tha” tih-in a kawh tum tak phei chu, ‘Thinlung tih tak zeta Lal Isua Lawmtu mi eng-ang tan pawh-a Chhandamna hi a thlawna pek” a nihna lam hi sawi a tum ber zawk a. Heng zinga kan ngaihthah em em group chu, Zu hmun sa hmun-a awm, KS leh Jail-tang, Sual turu tak tak khawihtu-te, etc. tan pawh, Mitin ta tur a nih angin, ‘Misual-te Hnen Thleng Phak Chanchin Tha’ a ni tur a ni.

    Mahse, tunlaia Ringtu Mimal leh Kohhran-te Rawngbawlna hian Zu+drugs-ngawlvei te, KS leh Jail-tangte leh Sual turu khawihtu-te etc. hnen a thleng phak tawh meuh lo a ang khawp mai. A hming chuan kan ti ve ngei e, mahse, Lal Isua Hmangaihte kha kan Hmangaih-pui thei tawh lo niin alang. Zep thu a cheng lo.

    Chuvangin, “Mitin Ta Tur Chanchin Tha” hian huap bik a nei lova, thlauh-thlak bik a nei lova, hel bik a nei lova, thliar bik a nei lova, duhsak bik a nei lova, Pathian siam tawh phawt Mihringte hnen-a hril tura Thupek kan ni.

    A sei ta hle mai! Post aiin a thui hial em aw :P

    Report this comment