BETHLEHEM ARSI MAWLH MAI HI

December 25th, 2013 1:01 pm by BigDaddy Hmahmatea

BETHLEHEM ARSI MAWLH MAI HI
********************************

Krismas te pawh a lo hnai leh ta, ni tlemte bak kan bak ta lo. December thla chawhma lam atanga khawvel pumpuia chhungtin deuhthaw in kan buaipui mahni in chei leh Krismas lo thleng tur atana inpuahchahna chu a tu a te mai pawhin kan buaipui luih luih mai a ni a. Aizawl velah pawh khawlai te kan chei a, ran in lem te siamin arsi lem lian pui pui te kan khai leh ta fur mai a. Kan Lal Isua kha Bible ah hian ran inah a piang tih phei chu a inziah pawh chu kei phei chuan ka hre hlei law. In lo hmu bik anih phei chuan a inziahna bung leh chang te min rawn hrilh ve nghe nghe ula ka duh a, tihian in tinah arsi lem te kan khai eng leh fer fur mai dawn a ni a. Kan naupan lai phei chuan pa te hian ramhnuai ami mau sei tawk hi an han la ngei a, a zik kuaiah hian arsi lem, lehkhakhawng sen a siam, a chhunga electric bulb dah hi kan han khai ngei a, inchhungah saisiak kung a hnah hlawi filh-ah Christmas card leh eng engemaw incheina kan han khai a, lekhamawi vel inchhungah kan han zam kual a, heng hian a lo ti Krismas bik hliah hliah mai thin a lo ni. Krismas huna bang ngai lo, hla ah te pawh an lo phuah Bethlehem arsi, Sap sendang ho in’THE STAR OF BETHLEHEM’an lo tih bawk hi enge anih chiah. Arsi tak tak a ni nge hrilhfiahna dang a awm zawk nge vana thilmak lo thleng tih hi in sawi chho daih teh ang.

Kristian tawh phawt chuan Bethlehem Arsi in khawchhak mifing te a hruai dan chanchin hi hrelo kan awm awm love. He arsi hi Bible a kan hmuh angin khawchhak lam atangin mifing te’n rawn zui in Bethlehem chung zawnah a ding a, tichuan Lal thar lo piang chu chibai bukin thilpek pathum, rangkachak, mura leh beraw te an pe tih kan hmu anih kha. He Bethlehem Arsi hi enge a nih chiah tih hi hmanlai atang tawhin mithiam te leh arsi lam zir mi te, Pathianthu lam zir mi te pawh in an lo bei nasa hle tawh thin a ni.

Khawchhak mifing te kan tih pawh hi MAGI an tih ho an nih hmel a. Dead Sea Scrolls an tih, Dead Sea kama puk a hmanlai thuziak hlui tak tak an hmuhchuah hova a inziah dan chuan hmanlai atang tawh khan Juda ho arsi zir mi te chuan vanah hian’Messiah’lo piang tur chhinchhiahna engemaw a awm ringin van lam hi beiseina sang tak nen ring fan meuhin ‘Tlumte-a thlir takin’ an lo thlir an lo thlir thin tih a lo inziak a. Heng mifing pathum kan tih ho pawh hian van lampang chu beiseina nen an lo thlir reng thin tute zing ami an ni ngei ang tih a rin theih a ni. Heng mifing te pawh hi pathum nge an nih pali nge panga zawk tih hi kan Bible hian a sawi lang reng reng lo leh tlat mai pek a. Thilpek pathum an pek avang khan pathum ni turah kan han ngai ngawt a, panga pawh an lo ni daih thei tlat. Tichuan heng mifing MAGI ho hi Persia lampang a Zoroastrian sakhaw puithiam ho, arsi lampang chanchin hre tak mai ho an ni in a lang bawk. Tin, MAGI an tih ho te hi anmahni inserh thianghlim a, mumang leh arsi lam te zir mi an ni bawk a. Heng khawchhak lam atanga rawn kal ten an rawn zui arsi hi enge anih chiah sawi dan leh ngaihdan hrang hrang a tam hle a ni.

Khawvel mithiam ten an chhut dan dang leh ah chuan BC 11 na lai vel khan simeikhu Halley’s Comet chu rawn lang in a en ber hunlai hi Bethlehem chung zawn 31 degree North latitude ah a ni a mahse hei hi Isua pian hun ni a an ngaih 6BC aiin kum 5 zet in a hma tlat mai a, mi tam tak chuan ni thei in an hre meuh lo tlat mai. Tin, hmanlai Chinese ho leh Babylonian ho van lam chanchin chhinchhiahna ah chuan 7BC vel khan Jupiter leh Saturn hi vawithum ngawt a inzawn in an lo awm a, hetianga arsi a inzawna an awm hi ‘conjunction’ an ti a, an lan dan pawh a eng bik em em thin a ni, hei hi a ni thei mai ang em ti pawl an awm bawk. He arsi inzawn, Mizovin an ‘in di’ kan tih ang deuh hi May ni 27 ah a intan a, chuti anih chuan Persia ram atanga khawthlang lam pan a heng mifing te rawn zin tan hun awm ang vel atan pawh a tawk viau mai ni in a ziar mi te chuan an sawi a. Heng arsi pahnih an awm thiang nawn lehna hi September ni 15 vel kha a ni leh a, hei hi Damaska atangin a lang fiah in a lang eng ber a, mifing te pawh khan Damaska an rawn thlen hun ni awm vela a chhut a ni leh bawk a. Tin, a ‘in di’ vawithumna chu December ni 1 khan a ni in hei hi a en ber lai chu Bethlehem chung zawna a awm lai a ni ve leh chiah mai bawk. Arsi chanchin zirna ‘Astrology’ ah chuan Jupiter hi lalna entirna a ni a, tin Saturn leh Jupiter hi Israel te nena in kaihhnawihna nei a ngaih an nih bawk avangin heng mifing te hian Israel te Lal thar tur a lo piang ngei dawn anih ringin he arsi hi an rawn zui ni in angaih ve theih khawp mai bawk, Chutihlai erawh chuan heng zawng zawng hi kan Bible-ah hian a inziak reng reng lo bawk.

Lal Isua pian kum tak hi hriatchian a ni hauh lo mai a, AD leh BC inthenna lai tak a piang ni awm tak si hi a zir mi te chuan BC4na leh BC6na inkar bawr vel a piang niin an chhut tlat pek bawk a. BC 5 na lai vel khan Chinese astronomer te chuan arsi puak darh ‘super-nova’ an tih ang chi a thlen thu an lo chhinchhiah a. He arsi puakdarh hi a en ber lai in Bethlehem chungzawnah a awm tlat mai a, heihi tamtak chuan Bethlehem Arsi hi ni turah an ngai ve thung bawk. 1991 khan Cambridge University a Material science department a an Professor, Colin Humphery chuan Bethlehem Arsi kha BC5 na a favang lai vel a simeikhu lo lang kha a ni ange a rawn ti ve thung a. Tin, thenkhat chuan arsi them thlawk ni ah an ngai bawk.

German astronomer, Johann Kepler(1571-1630)an a chhut ve dan thung chuan BC 6 na lai khan Jupiter leh Saturn leh Mars te chu tlar khat ah awm in lei atanga hmutu tan chuan arsi pakhat eng tak angin alang a, hemi hi a ni thei mai tura ngaihdan a awm bawk. Ngaihdan hrang hrang a tam a, mitamtak chuan Bethlehem arsi kha simeikhu, Halley’s Comet nen a sawizawm an tum hle na in he simeikhu hi hetih hunlai hnaivai deuh a a lan chu BC11 daih kha anih avangin Bethlehem arsi hi chu a ni theiin mi tamtak chuan an ngai lo thung.

Bible a kan hmuh dan chuan arsi chu a kal zel a Bethlehem chung zawn a thlen hma chuan a ding lo tih kan hmuh avangin mi tamtak chuan ‘ARSI’ tak tak ni thei turah an ngai lo thung. Thil mak deuh mai pakhat leh ngaituahna ti thui thei deuh mai pakhat chu kha Bethlehem Arsi kha arsi tak tak lo ni ta se, khatia Bethlehem chungzawn a ding eng ta vu vu mai chu hawkdak vang tal pawn mi tamtakin lo thlir ve awm, an hunlaia ennawm en tur a van tehreng nen, lo chhinchhiah ve tawk te pawh awm awm tak niin kei chuan kan hre ve deuh ngawt a, mahse lo chhinchhiah ve awm hi sawi tur an awm lemlo tlat mai hi a mak viau tlat a ni. Lemziak pakhat, Luka ziah ni a sawiah chuan nausen Isua leh Mari lem bakah Bethlehem arsi lem a inziak a. Heta arsi lem hi a ziah dan a mak khawp mai a, thil eng tak, a mei lam a thla nei leh a lai vela thil eng dangin a kualkhung angin a lantir a. He lemziak hi St Thomas Mount, Madras(Chenai) bul a, Church of Our Lady of Expectations ah dah a ni nghe nghe a, he lemziak avang hian mithenkhat chuan Bethlehem Arsi kha UFO lam anih ring pawl te pawh an awm phah bawk a ni.

Bethlehem Arsi hi a lan dan leh a nihphung vel mithiam hrang hrang ten an sawi atang hian mi tamtak chuan arsi tak tak anih an ring lova, Pathianin mifing ho te rawn hruai tur hrim hrim a eng danglam a bik taka a siama a awmtir, an mahni mifing ho chauh ina an hmuh theih niin an ngai thung bawk a ni. He Bethlehem arsi hi kei mi mawl, vengkhat parawn pawh nilo, a eng ‘A’ mah zir chhuaklo ngaihdan mawlmang satliah ve mai maiah chuan eng arsi in di emaw, simeikhu lam emaw nilovin mifingte hruai tur hrim hrim a Pathian inlarna eng, a mi nazawng in an hmuh theih ve lemloh a nih ka’n ring ve thlangawt pek a, chutiang inlarna eng chu a ni chiah em tih phei chu ka hre bik hlei law.

He Bethlehem arsi hi eng pawh lo ni ta se la, Mifingte chu Bethlehem hruai thlengin, Lal Heroda’n nausen kum2 hnuailam a rawt chimih phah a, tin, Bible-ah meuh lang pha Lal Isua’n he khawvela a rawn kal chhunga a thilpek dawn tlemte zing ami ziah lan anih phah a. Khawvel in a theihnghilh theih tawh loh tur arsi hmingthang BETHLEHEM ARSI an lo tih huai huai leh hla ah te an lo chawi ‘THE STAR OF BETHLEM’ tih a lo nih phah ta a ni.

Bethlehem Arsi sawi apianga sawi tel ngei ngei ngai chu khawchhak mifing te hi an ni a. Heng khawchhak lam ami mifing te hian Lal thar lo piang chu chibai buk turin an rawn pan vang vang a, kawng lakah eng harsatna nge an rawn tawh pawh kan hriat pui hauh lo a, eng anga rei nge an rawn thang tih te, engzatnge an rawn kalna manah hian an in senso tih lam pawh kan hre bawk hek lo. Mahse kan Bible in chiang taka min hrilh chu an rawn kal chhan ber Lal thar lo piang Lal Isua kha an hmuh khan Amah chibai buk nana an tih liau liau Rangkachak te, beraw te leh mura te kha an ro bawm te hawngin an pe tih kan hmu a. Hei tak mai hi keini ringtute pawh hian heng khawchhak mifing te hnen atang hian kan zir atan a tha khawp mai. Keini chuan Lal Isua kan biakna kawngah hian a lak atanga malsawmna te leh a ven na te , a awmpuina te, a tihdamna te enge engemaw dawn tum ran hian kan bia in kan zui thin a. Khawchhak mifing te kha chuan ‘A’ lak atanga engmah phut let nei hauh lo khan ‘A’ tan khan an robawm ami thil tha te kha an thehchhuak zawk a ni a. Chuvangin keini pawh hian hei hi in enfiah nan hmang ila, Lal Isua kan zuina leh kan biak na kawngah hian a lak atanga beisei nei ran in kan zui nge, ‘A’ tan hian keimahni atang leh kan ro bawm te atang hian thil tha kan theh chhuak ve zawk tih hi a thar in he thu chhiartu zawng zawng te hi lo inenfiah thar leh theuh turin ka rawn sawm che u a ni e.

Nia, engpawh nise i in kawtah khan arsi lem chu lo khai eng ve leh phawt mai la, mahse arsi kil nga nei chi i hmang anih chuan a kil zum pahnih kha van lam kawk lo thu zawnga khai turin i fimkhur dawn nia, a kil zum pahnih vanlam i kawh tir chuan tunlaia an buaipui em em satanic sign a ni daih dawn tih i lo hre tel ve mai mai bawk dawn nia.

BigDaddy Hmahmatea
(R.Lalhmangaiha)
Kulikawn

Similar Posts:

Recent Posts:

14 Responses to “BETHLEHEM ARSI MAWLH MAI HI”

  1. 1
    mihring Says:

    Universe awm tirh a ta a vawikhat nan ka 1st e! :P Chhiar nghal ang :O

    Report this comment

  2. 2
    Sony Says:

    Kristmas chibai ule, Bethlehem arsi lan hmaa mu daih ho leh arsi lan hnu daih a tlaivar ta te u, ruai theh turin kal tawh ila.

    Star of Bethlehem kha tak tak awm niawmin an finfiah chiah lo nachungin ringtu tan chuan a awm ngei si ani.

    http://en.wikipedia.org/wiki/Star_of_Bethlehem

    Report this comment

  3. 3
    mihring Says:

    #2 Sony Ruai kan theh zo chiah e. (D) hei hian charge kan tum mek :P

    Star of Bethlehem hi scientifically in a finfiahna awm lo mahse kan Bible in a awm a tih chuan keini ang duang ho chuan ‘E’ kan ti a, kan ring tho. :)

    Report this comment

  4. 4
    caribou Says:

    A ngaihnawm hle mai. Thuziak hi a harsat tehreng nen, ngaihnawm taka thu ziak phei chu a lo va har lehzual dawn em.. BigDaddy zarah thungaihnawm chhiar tur ka nei leh ta a nih hi.

    Report this comment

  5. 5
    Sihtea Says:

    A beng var thlak hle mai.

    Report this comment

  6. 6
    chhana Says:

    A bengvarthlak viau naa, hetiang chi hi ringtu naupang te tan chuan a himlo.

    Report this comment

  7. 7
    Awmtea Leo Khiangte Says:

    A tha e.

    Report this comment

  8. 8
    рдпģŤіСHAЩЯ Says:

    Post tupa hian vil lo thei rem rem

    Report this comment

  9. 9
    mihring Says:

    Post ka entirh khan BidDaddy a nih kha ka ring rengah! :D

    #7 A dik khawp mai. Laiking fa nei an sawi ang maiin a post zawh veleh ek hnutchhiahin a hnut chhiah ringawt mai. :P (N)

    Report this comment

  10. 10
    mihring Says:

    #8 tih zawk tur :D

    Report this comment

  11. 11
    BigDaddy Hmahmatea Says:

    Helamah hi chuan mi puitling thehthawh in post hi an chhiar in ka hriat avangin vil ngai lutukah ka dah lemlo bawk alawm. Ka thuziak te min lo ngaihhluh sak ve thin avangin ka lawm takzet a ni. Fb lam ah hian englai pawh a vil ve deuh reng angaih bawk avang hian indaih te hi a har ve phian ania. Engpawh ni se min lo chhar sak ve zel avangin ka lawm takzet a ni e.

    Report this comment

  12. 12
    Dr John Says:

    (Y) Pu Hmahmatea Thuziak hi a tha-in belhchian a dawl thei khawp mai. Post-tupa hi Theological College rap pha ve tawh, Theology in-zir-sil tawh hiala mawi a ni :)
    Pathian Thu hi ‘Pathian Thuruk’ (Mystery of God) a nih miau avangin Hriat-Fuh-Fai-Fiah-Kil-Kel hi chu a har dawn a ni tih hre phawt mai ila. Mihring-te hi ‘Pathian Siper’ (image of God) ni mahila, kan Hriatna leh Theihna (knowledge & ability) hi a tawi (limit) em a. ‘Hria anga kan in-ngaih’ pawh ‘kan lo hre lo hle’ a. ‘Hre lo’ emaw kan intih kha ‘kan lo hre em em’ lawi a!!! Chuvangin, Paula chuan, “He luikam atang hian a then pawh kan hre thei lo” tiin Conclusion a siam tawp mai a nih kha.

    Tin, Pathian Thu (Bible) hi Hun rei tak kal taa ziak a nih avangin, a Ziak Hunlai Dinhmun (Context/background) te, a Ziak Chhan dik tak (Purpose of writing) te, Tawngkam Hman (Literary usage) te, leh a Ziaktu Chanchin (Author’s context) zawng zawngte Hriat chian kil-kel loh phei chuan Sentence (thu-hlawm khat) mai chu sawi loh, thumal leh alphabet pakhat ringawt pawhin Thu tam tak a sawi thei a, he Word or Alphabet pakhat ringawt Lehlin sual emaw Hman-sual (mis-interpretation/understanding of word or letter) emaw pawhin thil pawi nasa tak a khawih thei a, a him lo a ni, tih an Hriat avangin Pathian Thu Zirna Huang (Biblical Scholarship)-ah pawh a ‘Zir-Sang Apiang an Fimkhur Emaw’ tih tur a ni hial a. A Chang chuan Bible Hrilhfiahna chungchangah hian Ph.D. chin ngat te hi chu ‘Dawihzep’ nih pawh an hlawh hial reng a ni ;)
    Post-tupa Ngaihdan rawn Lak-khawm leh Thu rawn Chhawp-chhuah hi a Pawmawmin, a Hah-damthlak hle-in ka hria.

    Ka Ziak-thui leh ta hle mai, ngaidam ngaidam :P

    Report this comment

  13. 13
    BigDaddy Hmahmatea Says:

    Dr John comments chu a va tha in a va hlu ve le. Chuhtihlaiin min fakderna tawngkama i rawn zeh Theology lam hi chu ka in zir sil thui lo khawp mai thung, keini zir ve chhun chun ‘Center Theology’ vel a ni awrh mai a, chutih lai erawh chuan mahni phak ang tawk a han in chhiar kual ve erawh chu ka tuipui viau thung a. Pathianthu hi a him lo chin thleng hian ka lo tuipui ang tih hi ka thil hlauh ber chu a ni ve a. Mahni in ngaih danah hi chuan ‘Bible in a ti’ tih hi kan pafa a zawm tlat chi kan ni ve a mahse mi min hmuh dan erawh ka hre lemlo thung a. Chutih lai erawh chuan Bible a kan hmuh bak a han thlur kual deuh erawh hi chu ka ching viau thung a, chu pawh chu ka theih ang tawk chuan Bible thu sawh ngheh nan tih hi ka duhdan a ni thung…Keia pawh chu ka’n tlak ve leh tak duah chu a :D

    Report this comment

  14. 14
    mihring Says:

    He post ah hian ka va han comment tam em! BidDaddy in a rawn coment ve maw le a post zawng2 deuh thaw ah.. :D He tia a post tu ten an rawn comment hian a nuam thin.. :)

    Report this comment

Leave a Reply

You must be logged in to post a comment.