CHRISTMAS SHOPPING

December 23rd, 2013 6:34 pm by BigDaddy Hmahmatea

CHRISTMAS SHOPPING
*********************
Krismas hi a va lo mawiin a va lo duhawm tak em…

Pawltlak thla (December) laihawl vel a ni chho tan tawh a, mitin mai Lal piang chibai buk nan pawh ni em em lemlo, a hun in a zir vang hrim hrim in lei leh van Lal ber he khawvel a keini chatuan a boral mai tur min hmangaih avanga min chhandam tur a mihring anga Bethlehem a a rawn pian champha mi aia nalh loh leh mawi loh bik hlauh vanga silh leh fen, thawmhnaw thar lei tura bazar lama dar insi thap a an chel-vah hun a lo inher chhuak leh ta reng mai a. Thingtlang lam hmun hrang hrang atangin khawpui a mahni sum neih in a lei phak ang tawk thawmhnaw nalh leh tha tha lei turin nghafuan luite bawm an sawi ang maiin an rawn fuan khawm leh ta tup tup mai a. Khawpui a cheng te pawh kan lei leh van Lal ber a nalh thei ang ber a lo hmuah leh chibai lo buk tum em em vang nilovin a mitin-mitang ina silh leh fen thar tha ber ber inbel hun ni a kan ngaih tawh miau avangin thawmhnaw thar lei tum a kan Aizawl khawpui bazar, khawilai mual bing kawrte chep an sawi ang mai a chep em em maiah chuan kan in ekchhe beng leh tut tut tawh hlawm a. Hetih hunah hian alawm mitin mitang mi chi hrang hrang inanglo tak tak a lian a te a ngo a dum a mitha atanga a michhia kan Aizawl bazar pui ber a hmuh tur an tam em em mai hun chu…

Kei ve hi chu thawmhnaw readymade zawng dawn ila ka hak tawk tur hi kan Aizawl bazar a dawrkai ho a man let thum dawn dawn a hralh thin ho hian lei duh an tam lem lo tih an hriatchian em avang hian an la tha duh mang der lo mai pek a. Ka hak tawk loh chiah chiah vel hi a tam em em ringawt mai a. Heivang hian han ‘shopping’ ve pawh hian mahni nalh tih zawng leh duh zawng ang pawh hi ka melh hleitheilo a, hak tawk ang remchang ang ang hi lei angai mai thin a. Chutiang haktawk remchang ang chi chu showroom ah tih vel ai chuan secondhand dawr velah han hmuh fuh hi a awl zawk a. Mahni pawh secondhand tho alawm kan nih ti in a thar ver vur lam ai hi chuan Sap sendang ho hak hnu bawk hi ka thing pharh a ka lei leh nge nge thin a. Keini ang hak tawk te hi chu midangin an lei duh tawh loh chin ang hi a nih tlangpui thin avang hian rinai tak hian a tlawm thei phian lehnghal a, a tihchi viau tho mai a.

Eng engemaw thlir kual mai mai pahi tiin nikhat chu ka va chhuak ve mai mai e ka ti a. Thawmhnaw nise ka hak tawk lei mai tur ka hmu dawn reng reng lo tih lah chu kan thenawmte arbawm chhia hi chho zawngin a lum dawn reng reng lo tih ka hriatchian tluk zet in ka hrechiang bawk si. Nula hmeltha thlir pah in han ti dawn ila, eng anga hmeltha pawh ni se min duh lo tu tur chu mit mah hek in ka thir tha peih mang der bawk si lo, a sum lam nei em um lemlo mah ila a boruak hrim hrim pawh a nuam ve alawm ti in hak tawkloh awm ve lo eitur tuihnai deuh in lama kan ei phak loh ei pah in kan va teihawi ve mai mai e ka ti a. Hemi tum a ka thil va hmuh hian alawm ka rilru kawih a ka ngaihtuahna ti thui ta em em mai chu…

Mitin mitang, mi chitin mai an punkawm luih luihna leh thil ho te te kekawrte banbul atanga mobile phone changkang ber ber thlenga an zawrhna Zion Street chhukthla a ka kal lai chuan mipui khawi lam ami zozai nge lo pung khawm ta mai le tih tur khawp a tam a phut a an phut lui lui naah chuan nufa, han en reng reng pawh a Aizawl khaw chhung ami an ni lo tih hriat ngawih ngawih mai, an nitin eikhawp bak chu ‘extra’ eng teh ual an nei dawn lo tih hriat reng mai hi an lo inkai hnak hnak mai a. A nu zawk chu hna a thawh nasat avanga nisa leh sik leh sa inthlak danglam kual vel in duhtawk a dim na tel reng reng lova a sawisak tih hriat tak mai hian a vun chu a ung khak mai a. A biangki hriam rat mai leh a taksa fip fang mai han en reng reng chuan kuthna thawk rim tih hriat tak mai hian a fere fap mai a. A incheina lah henglai veng kilkhawr a vaihlenhlo nena inthenawm mai te takngial pawhin bazar kal nan em chuan an in bel chhuah duhloh tur khawp a ropui lo a ni bawk si, mahse chu chu a thawmhnaw neih that ber leh a mawipui ber a ni teh chek aniang chu Zawlkhawpui bazar lun lai bera a rawn in bel chhuah chu a ni ve mauh mai le. A fanu kum 8 kum 9 mi vel bawr a kaih chu han en reng reng pawhin a taksa mamawh tawk chawtha vitamin ilo fahran atanga iron leh calcium vel thlengin a chaw ei atangin a dawng lo tih hriat tak mai hian a vun leh tisa vel chu a chul rap mai a, a hil bal mai bawk a, a nulat hunah pawh nula hleitling ziah-zuah dawng nguak maiah chuan a chhuak dawn hauh lo a ni tih sawilawk tur chuan khawilam zawlnei der emaw nih a ngai hranpa reng reng hek lo. A thawmhna inbel han en reng reng chuan nikum hmasa lam a inkhawmpui kawr mawi atana a nu in a lei sak, nikum leh kumin lamah pawh a dang leina tur chuang an neih loh avanga tawng chham tawh tak chunga a la hak luih hram hram niawm tak hian a chhing tai tawh mai a. A kawr fual ni thin kawr chhing ni tawh mai in a kuh chhin baka a mal rawn lang chu eng lotion mah hian a chiah nem ngai lo tih hriat tak mai hian thlasik boruak ro leh vawt tak mai chuan a hmet chat khir iarh mai bawk a. A pheikhawk kaih chi bun lai te tawh zet mai hnunglamah chuan a pheikhawk chhunglam a leng ve lo a keartui chu a lawr par mai bawk a. A secondhand jacket hak ban tawngchham tawh tak mai in a khuh phak chin baka a ban chat paw iarh mai rawn lang a plastic ngun a sen leh a eng leh a hring pali panga vel rawng khawk deuh nian tawh a bun bak chu a taksa ah chuan tlereuh dang reng hmuh tur a awm lo. A samsei siau mai chuan ataksa atanga a mamawh tawk tur a ti nungtu tur engmah khamkhawp a hmu lotih hriat tak mai hian a a fere fak mai a, mahse fai tak a enkawl sak than a ni tih erawh a hriat hle thung a. Samtawnna man tlawm chi hlui da deuh rap tah chuan a tukhum lamah hian kawh deuh lauh hian a in tawn a, mi neinung fa, eitha nena enkawl chu ni se hmeichhe naupang duhawm tak a ni ngei ang le. Mahse chu dinhmunah chuan engtik khawtikah mah hian a ding dawn lo tih chu thil chiang sa a ni bawk si.

Chu hmeichhe naupang te chuan a nu chu a banah chuan a vuan a, Aizawl Bazar lun em em mai, mipui tamtak in a mawi ber leh tha ber ber, man tho ber ber anmahni tan leh an fate tan an zawn luih luihna zingah chuan a tan chuan han awh tur a tam kher ang le. A nu tak tan pawh chuan a fanu a hmangaih em em, a ei ai leh a neih zawng zawng ama nunna hial pawh a pek phal tur tan chuan han lei sak atan a it deuh deuh chu a ngah khawp ang tih chu tukhaw sawi ngai chuang lo a hriat sa a ni, mahse a fanu duhzawng leh a fanu tan a a it sak zawng han lei sakna tur chu a ipte thui chawp hlui tawh lamapangah laiah chuan India tangka tam a ak lo tih lah chu thil chiangsa a ni bawk si. Amah ang rual an nu leh pa hausak hmel pui pui in an hruai thau mum nalh mai, eitha tinreng a chawm tih hriat tak mai a no suah mai ten an duhzawng an ngen a an kawk kual zut zut mai chu an dinhmun a din ve a chak tih hriat tak mai hian inthlahrung tak chuan a thir leh dauh dauh thin a. Ani ang rual ina an lawm tur leh an duh tur ang chi chu hmuntin maiah chuan a tlep hian a tlep tuar mai bawk si, mahse chung ang thil te chu han ngen ve ngawt dawn mahse a nu chuan leisakna tur a nei dawn lo tih chu naupangte mah nise a hriat ve kar avangin han ngen pawh chu a tum chhin eih lo thung.

An nufa chuan thil chihrang hrang inpho tuarh mai chu an thlek kual ve dan dan a, chutah dawr pakhat kawtah chuan naupang lawm, toys chihrang hrang mipanaupang lawm chi silailem atanga hmeichhe naupang lawm chi nautelem thlengin an lo pho tuarh mai a. Naupang ho chuan an nu leh pate nen chuan chulaia toys lo inpho chhuak chu an bawr laih laih hlawm a, an duhzawng chu an lek sap sap hlawm a, nei deuh ten-tawn a bazar te an nih hlawm avangin an duhzawng ang chu an nu leh pa te chuan an lei sak zel mai a. Anni nufa pawh chuan chung naupanglawm lo inpho te chu an an han din chilh ve chat mai a. An phona dawhkan kil lam a nautelem lian tha tak mai chu chu hmeichhe naupang chuan an la nghal chat mai a, awt tih hriat ngawih nghawi hian a thlek vang vang mai a mahse a ngen ngam chuang lo. A zuartupa chuan, “Lei rawh u kan sale ania 550 a kan zawrh thin a ni a mahse 300 in kan sale tawh a, a tlawm a nia….” a lo ti zung zung a. Mahse chutiang thil chuangtlai lei tur chuan an kal lo a, an neih zawng zawng in a daih ang tawk a krismas kawr mawi ve tur leh a mamawh em em a pheikhawk bun tur lei tur ngawr ngawr a kal an ni tih a hrethiam ve tlat tawh a, tin, engang pawhin ngen mahse a leina tur chu a nu chuan a nei dawn chuanglo tih a hre tlat. Hreh tak chung chuan an dah let leh a, thlang lamah chuan chhukthlak san an tum lai chuan nautelem awmna lam chu a thlir leh leh hrak hrak thin a, a mitmengah chuan a awt tih chu a chiang reng mai a, chiang taka lo en tu tan phei chuan a mitui chu a parawl kiang mai tih chu hmuh hmaih chi rual a ni hauh lo. Enge a rilruah awm tih lam chu kan hriatpui hauh lo anga mahse ama phak tawkah chuan a ngaihtuahna chu a vak kual thui ve hle ang tih chu a hriat reng mai bawk a.

Zawimuang chuan a nu nen chuan an in zui thla zel a, dawr pakhat a naupang hawmhnaw lo inkhai teuhna bulah chuan an ding a, thawmhna inkhai ho a ‘SALE-250’ tih intarna lam ami chu a hak tawk a awm dah lawmmaw tiin a nu chuan a thlek kual dan nan a. Keia kal chak theilo leh thil enkual pah bawk chuan an bul lawkah chuan eng eng emaw ka mamawh lemloh leh a leina tur pawh ka neih lemloh te chu ka lo thlek kual ve mai mai bawk a. A nu chuan thawmhnaw sale ami 3 vel chu a zuartute chu a lakthlak tir a, a fanu chu an teh kual chhin vel a. Chutih lai tak chuan pa pakhat kum 50-60 mi bawr vel, la valai angreng tak mai, a incheina han en chuan neinung em em bik lo mahse khawsak pangngai ve tak ni ngei tur hian chhaklam atang chuan hmanhmawh angreng tak mai hian chumite nufa kawr vel en lai chu a rawn pan ding nalh mai a, chutah a nu zawk hnenah chuan, “Ka Pi, khawngaihtakin reilote ka be lawk thei che angem ?” a rawn ti tawl mai a. An bulhnai lawka ding ka nih avangin a thusawi chu chiang takin ka hre pha nghe nghe a. Naupangte nu chuan, “Thei e, enge ni ta ?” a lo ti a. Chupa chuan, “Ngaihloh lamah lo ngai lo hram la i fanu hi nichin a nautelem in en kha lei sak ka duh a ni,” a ti ta mai a.

Hmeichhe naupang nu hmel a mak tihna te, hrilhhaina te, rinhlehna te lawmna te, lungchhiatna te rawn lang chu a hma a anmahni lo hmu lo hmu tawh tan chuan hmuh hmaih chi a ni hauh lo mai le, nutling pui e ti lo chuan bah deuh nak hian, “Engatinge… engeni i sawi awmzia chu mawh engatinge…?” an rawn ti tham deuh tiak a. A thusawi ber pawh chu amah chuan a hre chiang kher pawhin a rinawm loh hial zawk a. Chupa chuan, “A, englo ania, nichin lawk a nautelem in en lai khan in bulah khan ka lo awm ve a, i fanu in a awt tih hriat tak mai a a en lai te, a ngen ngam si lo te leh in kalsan hnu pawh a a thir zui vawng vawng mai kha ka lo hmu fuh hlauh mai a. Pawisa phei chu ka nei bik em em chuang hauh lo a, mahse hei nupui fanau nei in sawrkar hna chhete ka thawk ve a. Ka fanu te ber hi i fanu ang rual vel hi a ni a, chu chuan engemaaw awh deuh nei ta se lei sak thei ta si lo ila ka rilru a na hle dawn a, chutiang dinhmunah chuan i ding ve in ka hria a…” a ti a. Nu chuan, “Ni e, hei a pa hi kum khat mi vel lek a nih lai hian a boral a, thinglanga awm kan ni a tihian nitin eichawp dapin kan nufa hian kan khawsa ve a, chhung leh khat han belh tur em em kan nei bawk si lo a. Nikum leh kum hmasa lam te kha Mas kawr thar pawh ka lei sak thei lo a, kumin chu ka in tuak ve tang tang a, tihian a mamawh zualpui tak tak lei turin Aizawl kan rawn pan ve rawih mai a ni a, thildang nautelem tih vel chu awh sak viau mah ila han lei sak thei chi ziazang ka ni lo a…” a lo ti ve a. Chupa chuan, “A nih tak chu a, a pa in a boral san che u chu a pawi ka tih pui hle mai che u, tiru min rawn zui chho ula nautelem na na na chu ka lo lei sak ve ange, kan Lalpa pawhin he hun hi kan sual te tlan nana a Fapa mal neihchhun min pekna hun alawm le,” a ti a. Naute nu chuan, “Ka pu, i rilru thatnaah leh i thil min tihsak tumnaah chuan kan lawm lutuk ringawt mai a, lawmthu sawi dan pawh ka thiamlo zawk a, mahse tunge i nih ka hre hauh lo a, nang pawhin tutenge kan nih pawh i hre lo a, chutianga a thlawn ringawt a keini tan a i sum i sen chu a dik lo ang,” a lo ti ve thung a. Chupa lah chuan, “Chutiang sawi angai lo, min rawn zui ula a ni mai,” tih leh hmeichhe naupang te chu a ban a kaih pah in, “Mami, lokal rawh i nautelem awh deuh kha ka lei sak ang che…” tih leh kal chu a rual chu a ni ta mai a. A nu pawh chuan a zui ve ta nghal a. Mipui karah chuan kei pawh chuan chu thil thleng danglam tak mai chu a tawp kharna hriat ka chak ve tlat avangin an hnung deuhah chuan ka zui chho ve ta nghal a.

Nautelem zawrhna an thlen chuan chupa chuan an nautelem zawrh lai chu a la a, a zuartupa pa te lam deuh tawngtheih hmel zet mai lo au lauh lauh lai henah chuan, “Heihi engzat man maw ni a?” ti in an zawt a. A zuartupa te chuan, “550 a kan zawrh thin ania 300 in kan sale a, a hniam theih tawh lo thung,” a lo ti nghal zat zat mai a. Chupa chuan a wallet chu a phawrh a cheng za note pathum hi a phawrh a, a zuartupa hnenah chuan a pe a, nautelem chu hmeichhe naupang hnenah chuan nui var var chunga pek pah in, “Kha le, duat viau ang che aw. I thiante’n khawi ami nge an tih chuan Masi putar in min pek i ti zel dawn nia…” a ti a. Naupangte chuan a nautelem chu duh tak mai a pawm vawng vawng chung chuan lawm tih hriat tak si, zak deuh bawk si hian, “Ka pu ka lawm e…” a ti a. A bula a nu lo ding chu lawm avangin a biangah hian mittui a lo luang ngiai ngiai mai a, tham deuh tiak hian, “Ka pu, ka van lawm tak em, Pathian in a let tam takin mal sawm che rawh se, i hming leh veng tal chu kawngaihtakin min lo hrilh ve ta che, kei hi chu Zampuii ka ni a, ka fanu hi Lalmalsawmi a ni a, Sawmte tiin kan ko thin a” a lo ti a. Chupa chuan, “Ka hming chu hriat a tul vak hleinem, tikhan Mas hlim deuh in in hmang dawn nia, Sawmte i nu thu kha lo awih hle la, i nu kha duat hle la, tha deuhin sikul te kal in lehkha te i zir ang, i nu kha i la chawm ve dawn nia aw…” a ti a. Sawmtei chuan, “Aw le ka pu, i thu min hrilh chu ka lo vawng reng ange, ka lawm lutuk e,” a lo ti ve a. Chupa chuan an nufa chuan a chibai a, mipui zi nuaih nuaih karah chuan a pil bo ve ta a. Kei pawh chu chulai hmuah chuan han tih tur em em ka neih tawh lemloh avang chuan in lam pan chuan ka haw ve ta a.

Kumin Krismas ah hian midang tan thiltha pakhat tal i tih sak ve dawn em le…??? Krismas hman nuam vek ule.

BigDaddy Hmahmatea
Kulikawn
Dt 19th December 2013

*Category: Fiction- Krismas lai a ni a Krismas thawnthu puitling leh naupang lam pawh in an chhiar tlan theih tur ang chi Sap ho ziah ami han lehlin tur ka zawng ka zawng a, mahse mi ziah sa han leh ngawt thin hi chu ka ti ta deuh a. Mizote hian Christmas Story a settings vel keimahni ram chhung ami ang chi hi chuti tehchiamin kan ngah lemlo a ka hriat avangin thian kan Mizo Krismas thawnthu belhchhah nan tiin ka thiam ang tawkin ka rawn phuah chhuak ve a ni e.

Similar Posts:

Recent Posts:

11 Responses to “CHRISTMAS SHOPPING”

  1. 1
    Benny Says:

    A ngaihnawm hle mai

    Report this comment

  2. 2
    Benny Says:

    Nang pawh krismas hman nuam le.

    Report this comment

  3. 3
    Benny Says:

    Zaninahte hian, khawhartaka krismas hun hmang mek an awm ve ang a…

    Report this comment

  4. 4
    Benny Says:

    Zaninah hian naktuka an fate hak ve tur kawrmawi leina neih loh avanga nu leh pa, pi leh pu lungngaia insehruh fan fante hi khawilaiah emaw an awm ang a…

    Report this comment

  5. 5
    Benny Says:

    Zaninah hian naupang thenkhat, naktuka krismas kawrmawi hak tur neih ve loh avanga kimki taka inkhawm turte hi an awm mai angem aw…

    Report this comment

  6. 6
    caribou Says:

    A ngaihnawmin rilru a hneh hle mai.

    Report this comment

  7. 7
    Borat Says:

    Kristmas chibai vek ule. Kei chu Kristmas shopping ka zo daih tawh

    Report this comment

  8. 8
    H.Vangchhia Says:

    A van sei em em ve :P hairehai Mahse a ngaihnawm e (Y)

    Report this comment

  9. 9
    chhana Says:

    A tha hle mai. I thahnemngaihna a ropui e.

    Report this comment

  10. 10
    Dr John Says:

    (y) Post tha thei hle mai. Chhiar a man hla thin e

    Report this comment

  11. 11
    BigDaddy Hmahmatea Says:

    Ka thuziak te min lo chhiar sak thin a ka lawm tak zet a ni

    Report this comment