KAN RAM THIL HLU KAN HUMHALH VE DAN HI

December 20th, 2013 9:00 pm by BigDaddy Hmahmatea

KAN RAM THIL HLU KAN HUMHALH VE DAN HI
********************************************
{Sawrkar leh mipui te hi i harh chhuak tawh teh ang u…}

Tunlai chu helam hi ka vei ve riau mai a chuvangin ka rawn post chhuak ve thuai mai a min lo hrethiam dawn nia. Hman deuh khan Sialsuk tlang sawrkar in a cheibawl tur chungchang sawi a awm nasa tan leh hle mai a. Kan ram thil hlu kan ‘Historical Monuments’ te leh kan ‘Natural Beauty’ te kan enkawl a kan sawngbawl dan hi kan sawrkar leh mipui te pawh kan in bih chian deuh a ngai a ka hriat ve avangin hemi chungchang hi kan sawi ve lawk ange.

 
He thlalak a kan hmuh hmasak ber hi Kan Mizo thawnthu a Chawngchilhi puk, Thenzawl khaw bul mai Vantawngkhawhthla penna bul lawk a awm kha a ni a ni a. Heti hian chei danglam a ni a, a ropui tawh khawp mai, mahse a thawnthu nena han mitthla chuan tunah chuan ngaihruat in lunglen a hril pha meuh ta lo. A kal chhohna step hi an siam dawn a nih pawh in thla han lak vel a lang chho tuarh tur lo deuh hian a sir lam deuh ah hian siam ni ta se thil buaithlak engmah a awm hmel lemloh. Tunah hi chuan a step lang tel lo a a thlalak hi chu a theihloh tluk a ni ta. A originality a ti bo khawp mai.

 
A dawt leh ami hi Farkawn khua Fiara Tui kha ni. Hei pawh a thawnthu nena ngaihthua chuan in zawmna nei awm pawh in a lang meuh tawh lo. Veng mawng tuikhur ang lek a ni tawh. An humhalh dawn a nih chuan a awmdan pangngai ang khan awm tir mai se, a hmelhem tur leh a riral tur hi thatak leh uluk takin humhalh in veng ta zawk se a hlu zawk ngei ang le. Heti hi chuan amah Fiara kha rawn tho leh pawh ni se a ‘tui thuihruk’ kha a ni tih a rawn hre thawh hauh lo ang le.

 
A dawt leh ami hi Hmuifang tlang a Sailo lal Lallianvunga hmun thin phul nuam lutuk mai, a phul chi a that avanga phai lam atang te pawh a chin darh atana an rawn lak hial kha ni. Tunah chuan in a ding ta khup mai. Va kal mah ila rilruah Lallianvunga lam reng reng a lang tawh lo, kan hawi changkang veng veng tawh mai a ni. An cheibawl a an tuaihnum dawn a nih pawh in a hun hlui laiah tak ni lo a chheh velah hian in te hi chu sa ta zawk se, a phul hmun hi chu uluk takin a hranpa in enkawl ta zawk se chu a ‘natural beauty’ kha a ngai ngai in ala awm thei tur hi a ni a.

 
A tawp ber ami hi khawvel ‘natural monuments’ ziangah pawh lang pha tur hial khawp a thil mawi, Thasiama se no neihna kha a ni. Hei pawh tunah chuan a thawnthu nen inzawlna nei awm pawh a lang tawlo hial khawp a sawngbawl danglam a ni tawh bawk. Step a awm chho zui a, a chung zawl pawh plaster ni in railings nen a inhung kual ta pup mai. A changkang tawh khawp mai. Khuangchera puk lah chu thir Gate nen a lo in hung khup tawh mai bawk, hei erawh mi in an chil phul lutuk tur ven nan chuan a tha viau maithei.

 
Kan hnam thil hlui te hi humhalh a tha, Historical Monuments te, kan ram hmun mawi leh thil hlu te humhalh tih hian chei danglam a sawngbawl kual vak hi a kawk lo a, a riral tur te, a hmelhem tur te ven a, a bo pil mai tur te pawh humhalh tur a ni zawk a. ramdangah te pawh an natural leh historical monuments te hi a humhalh in ataka kha an sawngbawl danglam vak vak ngai lo a, anihna pangngai ang kha a hmelhem tur leh a riral tur kha uluk takin an humhalh mai thin a ni a. MAHSE hei kan ram ro hlu te hi a hlutna bo thak khawp in kan sawngbawl ta zel mai chu ani si a. Hetianga kan hnam thil hlui te a originality bo thak khawpa kan chei danglam thin hi chu kan A nge kan mawl kan ti dawn. A tira a nihna ang khan siam let leh pawh tum ila a thei tawh si loh…Kei zawng ka ui a ni..Hetianga ti danglam vak lo hian a humhalh theih a ni tih hi i hrechhuak tawh teh ang u. Hei kan tlai tawh e. Pi leh pu te hmanlai sulhnu mah kan neih tlem nak alaiin. Hetiang tih danglam hian kan humhalh nilovin kan ti riral zawk a ni tih hi i hre thar leh mawlh teh ang u… Hetiang anih zel zawngin thang leh thar lo la awm tur te leh ramdang khual kan ram thil hlui a nihna ang anga rawn hmuh tum tu ten min la dem lutuk palh ange…ZOFA TE I HARH CHHUAK TAWH TEH ANG U KHAI. Sialsuk tlang te pawh saw an cheibawl dawn a nih chuan a tlang nuam lai a in sa tlep tuarh lo in thing mawi deuh deuh te awmze nei in phun se, len thawven nan a nuam leh mawi takah siam ta zawk se kei chuan a fuh ka ring zawk daih mai le.

BigDaddy Hmahmatea

Kulikawn

Similar Posts:

Recent Posts:

12 Responses to “KAN RAM THIL HLU KAN HUMHALH VE DAN HI”

  1. 1
    H.Vangchhia Says:

    Kan thil hlu neihte hi an fahrah te te mah nise humhalh tlat hi a pawimawh tehlul nen hian kan ti chingpen zo ta vek mai chu a nih hi le, a mak ngawt mai.

    Ram changkangah chuan nise chu khawih kher emaw, han chuan kher emaw lovin, a thlirna hmun an siam ang a ta tang chuan an thlir mai tur a ni a. Chutiang chuan kan tu tu tu lehte thlengin an hmuh theihin, a thawnthu milin an la awm thei tur hi a nia. Concrete leh thir tlawn kan hmang uar mah mah a ni.

    Ka ngaimawh em em mai chu, he kan tlangram chhengchhe tak mai a tourist-tan emaw, khawtlang tan a kan hmun nuam neihve chhunte lah hi ‘tourist hahchawlh nan’ ti niawm tak hian cottage/cabin an sa thluah zel mai bawk a. Hetiang, natural beauty appreciate a admire duhte chuan, a ram mawina, a nih ang ang kha an duh zawk thin ngai. An hahchawl duh a nih leh puan-in kaih mai sela, kaihna hmun tur siamin. A hmun pawnah pawh a ram mawilai tichhe lovin chawlhna lailawk chu siam a harsa tawp lovang. A hmun thu kher hian siam kan tum tlat zel a… hotu lehkha zir sang tak tak ngaihtuahna chhuak a nih ka ring, an hawizau loh bakah, nakin hun an dawn phalo reng reng tih a chiang reng. :(

    Report this comment

  2. 2
    Kawhterenga Says:

    Thil hlui hi an chei that zel chuan thil tharah a chang zel dawn tihna……..Original-Modified…..

    Report this comment

  3. 3
    Kawhterenga Says:

    Bid Daddy, blog hi nangma pual liau liauin siam teh, follower I ngah viau ang. Facebook leh misual.com mai ni loin I blog liau liauah I thu tha, ngaihnawm leh bengvarthlak tak takte hi han dah teuh mai la a hlu dawn em asin..

    Report this comment

  4. 4
    caribou Says:

    A nihna leh a hlutna tichhe vek zawnga humhalh hi chu thil tul lo ber a ni.

    Report this comment

  5. 5
    chhana Says:

    Ngaihtuah a ngai e.

    Report this comment

  6. 6
    Sihtea Says:

    I rawn ziak tha hle mai.

    Report this comment

  7. 7
    mihring Says:

    Mizo pasaltha Khuangchera Puk YMA in an hung rup nachhan chu i sawi ang khian miin an chil phul lutuk an hlauh vang a ni pakhata. Chubakah chuan YMA sum tuak nana an tih a ni bawk.. An hung hi a tha ka ti khawp mai, a danglam phah chuang si lo a. A chhungah te khan sawrkar khan step siam an tuma mahse a originallity a hlauh an hlaua an phal ta lo a ni. :)

    Report this comment

  8. 8
    H.Vangchhia Says:

    #4 khi (Y)

    Report this comment

  9. 9
    Dr John Says:

    (y) Post tha khawp mai. I sawi dik chiah

    Report this comment

  10. 10
    meroby Says:

    hei hi tha ka ti khawp mai,,

    Report this comment

  11. 11
    BigDaddy Hmahmatea Says:

    Mahni a bolg siam h ka lo tum ve tawh thin a thu ziah duh ve reng bawk si nen, Fb lam a group vil ngai bawk si nen chuan hun ka nei thlawt lo a ni. Vawikhat ka siam ve tawh a, ka chhunzawm hleithei ta lo a ni e. Hetia a remchang apianga beh mai hi a tha mai te ka ti ta mai mai a ni.

    Report this comment

  12. 12
    Jennifer Lo Says:

    post ka (Y) i thlalak ron tar ho khi mi ram/hnam tih chu nise kan nuihzat ngot ang

    Report this comment