KRISMAS LEH A BEHBAWM

December 18th, 2013 3:49 pm by BigDaddy Hmahmatea

KRISMAS LEH A BEHBAWM
*************************
Krismas Special- Krismas chungchanga mak ka tih leh ka thuchah (I lo chhut chiang ve ngai em?)

Hei le, kumtluan a kan nghahhleh em em Krismas alo hnai leh ta bawk a, kan rilru in Bethlehem lam a hawi leh hawi loh lam chu ka hre lem lo a. Mahse he hunpui lo thleng tur hian mitin te thinlungah hian engtin emaw tak chuan hna a thawk a ni tehchek ang chu mimal, chhungkua, khawtlang leh kohhran kan inpuahchah leh ta mup mup mai a. Biak inah te Krismas lam hawi thusawi hriattur a tam in Lal Isua pianna lam hawi a thu sawi leh ziak a tam leh ta hle mai a. Tun tumah pawh hian Krismas lam hawi ka rilrua a lo awm eng engemaw rawn sawi ve ka tum a ni a. A lo pianna tlawm zia te emaw, a ropui zia te emaw rawn sawi ka tum ve lem lova, hetiang ang hawi zawng hi chuan kei aia sawi thiam tak takin an sawi nasa tawh tih pawh ka hria. Ka rawn sawi tum ve erawh chu tawite in Lal Isua lo pian chungchanga thil mak ka tih ve deuh deuh te hi tlemazawng ka rawn sawi ve dawn a ni a. Kan lo chhut chiang ve ngai hlawm emaw phei chu ka hre lemlova. Thil reng reng hi chu mahni ngaihtuah dan zawng te te hi a awm ve a. Chu ka ngaihtuahna mawlmang te a mak ka tih ve deuh deuh ho te hi ka’n rawn pho chhuak ve ange.

A hmasa berah chuan Lal Isua lo pianna hun thu hi a ni. Khawvel pumpui hian tuna kan kum chhiar dan angah hi chuan kan Lal Isua lo pian hun hi khawvel hunbi inthenna Lal Isua lo kal hma Before Christ (BC) an tih leh A lo kal hnu Ano Domini (AD) an tih ah hian AD 1na hi ni awm tak hi a ni a mahse a kum thu ah hian heihi a dik hlel deuh tih hi chu khawvel hian a pawm tawh an ti tlat mai pek a. Lal Heroda(Herod The Great) Lal Isua pian laia lo mangang em em a, a nausen laia thah tuma theihtawpa lo vir buai a, a tawpah phei chuan Bethlehem leh a chhehvela nausen kumhnih hnuailam rawt chimih tir vek tu kha history lam kan en chuan BC4 na, Lal Isua pian hma kum 4 laiah khan hla phuahtu tawngkam takin ‘Rihsangmual liam in thlafam dairial a lo chang daih tawh’ tlat mai. Chuti anih chuan a pian kum kan chhut dan hi a mak ka ti phawt a. Heroda thih kum hi chhut dan a inang hauh lo mai a. History ah chuan BC4 na a thi angin sawi ni mahse, kawng hrang hranga an han chhut in BC 3 na atanga BC 1na vel bawr pawh ni theiin an chhut ve tho tlat mai a. Chutih lai erawh chuan BC 4na hi khawvel in ala pawm dan a ni rih a. Chuti anih chuan AD leh BC hi Lal Isua pian hma leh pian hnu kum inthen chhinchhiah nan kan hmang miau mai bawk si a. AD lamah Lal Isua a pian si chuan Heroda khan ama thih hnuah nausen kha a rawt ta chiam mai tihna a ni daih mai a, helaiah hian thil inhmu fuh theilo a awm tlat mai hi thil maktak ni in ka lo hre ve mai mai pek a. Mahse tihian ka ngaihtuah zui ta a, a pian kum diktak kan hriat te hi a tum ber chu ni se kan Pathian engkim tithei hian “Chumi kum tak chu a ni e,” tiin min rawn hriattir daih tawh ang tih hi ka ring tlat. Khawvela thil la awm ngai reng renglo, awm leh tawh ngailo tur, Lal Isua lo pian tuma Van angel thianghlim berte leh mi hnuaihnung ber, beram ek hing-hang zinga khawsa berampute, Betlehem dai phula an tualchaina hmunhma takngial pawh Chunglam khian “Hetilai hi a ni e,” a rawn tih lemloh avangin Van lam khian a pian hun leh kum te, a hmun hma te hi a ngai pawimawh ber lo tih hi a hriat hle in ka hre ve leh ta deuh a.

A dawtleh ah chuan mak ka tih leh deuh mai chu miffing ten Jerusalem an rawn thleng a, “Khawiahnge Judate lal lo piang chu? Khawchhak lamah a arsi kan hmu a chibai buk turin kan lo kal a ni…,” an rawn tih a Lal Heroda mangang ta em em kha chu a mak hran lo. Lal nunrawng lutuk, thin butut tuar lova a nupui Miriam-i leh a nupuia nu Alexandra-i that tu, a fapa upa ber Antipeter-a pawh that lehzel tu, a lalthutthleng rawn chuhpui thei awm apiang chu that zel duhtu, Lalber Kaisara Augusta meuh pawhin, “Heroda fa nih ai chuan vawk nih pawh a chakawm zawk,” a lo tih hial Lal Herodate kha chu lo mangang mai mai ang hmiang…a lalthutthleng rawn chuhpui thei awm thawm a ri tlat alawm, thil mak pawh a ni reng reng lo. Mahse mak ka tih tak ber zawk chu Rom sawrkar rorelna hnuaia kun ning ngawih ngawih, an mahni chhanchhuak tu tur Messia lo nghakhlel em em Jerusalem mipui ho Juda pachal ho lo mangang ve em em kha a ni. A lo pianna chhungkua leh a lo pianna hmun hma chungchang avang khan an lo beisei ang anihloh avanga an lo hai kha chu thudangah pawh lo dah ta ila, an nghahhleh em em Messia kha lo ni ta lo pawh nise engatinge an lo buai ve em em ngawt kha mak deuh mai a ni ve tlat. Hemi tluka mak ka tih bawk chu Juda sakhaw hnarkai tu hovin Lal Heroda an han rawn a, chiangkuang taka zawlnei Mika’n. “Nang Bethlehem Judai rama mi, Judai khawpui te zingah i te ber tawp love, i chhung atangin awptu a lo chhuak dawn si a, ka mi Israel te vengtu tur chu…” ti a a lo sawi lawk hre chiang ber tu ni bawk si in Messia lo kal tur ngaihsakna an nei miahlo leh Jerusalem atanga Bethlehem, mel nga emaw vel lek a hla ami an Messia lo piang tur chu a ni tak tak dawn em tih pawh finfiah tum chuang miahlo leh Lal Herodan a tihlum mai ang tih hlauva lo va zawnchhuah a lo thuhruk emaw pawh an tum miahlo kha thil mak tak mai chu a ni ve leh hrim hrim in in ka hre ve leh bawk.

Lal Isua lo pian chungchanga mak ka tih em em mai dang leh chu Bethlehem arsi chungchang hi a ni tlat mai. Kha Bethlehem arsi kha enge a nih chiah tih hi tunlai mithiam te chuan an chhui nasa em em mai a. Mithiamte chhutdan thenkhatah chuan BC7 na a Jupiter leh Saturn in di kha a ni ange te an ti a, tin, arsi puak supper-nova a ni ange tih te, simeikhu lampang a ni ange tih ten an chhui zawn nasa viau thin a, UFO lam thleng a sawi kai te pawh an awm hial a ni a. An chhui dan chihrang hrang lam hi chu han sawi thui vak pawh ka tum lem lova. A mak ka tih tak ber zawk a chu a enga pawh chu lo ni ta se, chutianga arsi eng, Bethlehem chungzawn a dinga eng ta vu vu mai chu hawkdak vang tal pawn eng thil nge thleng ta ti a lo va thlir luai luai awm tak, mahse an va thlir luai luai thu engmah kan Bible-ah leh thuziak dangah te, hmanlai chanchin ziahnaah te hian kan hmu reng reng lo mai hi a makna tak chu a ni ka ti ve tlat. Kei mi mawl, vengkhat parawn pawh nilo, a eng ‘A’ mah zir chhuaklo ngaihdan mawlmang satliah ve mai maiah chuan eng arsi in di emaw, simeikhu lam emaw nilovin mifingte hruai tur hrim hrim a Pathian inlarna eng, a mi nazawng in an hmuh theih ve lemloh a nih ka’n ring ve thlangawt pek a, chutiang inlarna eng chu a ni chiah em tih phei chu ka hre bik hlei law.

Tin, mak ka tih leh deuh mai pakhat chu Van zaipawl mawlh mai kha a ni tlat mai. Eng sound system nge an hman tih lam chu kan hriatpui hauh lo anga, mahse khatia Van mipui ho zaipawl, berampu te hnena an han zai ta mai kha an thawm a that awm tehreng nen, ka Bible-ah phei chuan, “Vana mipui ho an lo awm ta chiam a,” a ti hial kha a ni si a, beram lah ram hla em emah an tlat tir a rinawm chiah bawk si loh nen. Kha Van mipui zaipawl rawn zaina hmun kha khaw dai lawk a nih hmel riau mai a, mahse mak ta ber mai chu a tuamah in an hriat pui ve lo kha a ni. Khang hunlai khan beram vulh kha an eizawnna ber pakhat anih avangin khua amite’n lo hrephak ve talo pawh nise, an bulhnaiah khan beram vengtu dang te pawh awm ve awm tak hi a ni a. Eng thawm nge ni ta ti a hawkdak vang leh beng hlei vang hrim hrim pawh a lo va ngaihven ve awm tak hi a ni a, mahse kang berampute bak kha chuan midangin an hirat ve thu hi kan Bible-ah emaw thuziak dangah emaw pawh zu han chuang hauh lo a mawle. Mahse in ti daih teh ang, he thil thleng hian Pathian ropui zia leh a hnathawh zawng zawng hi mi zawng zawng hian kan hrethiam vek in kan hmu thiam vek kher thin lo tih a lo entirna te pawh a ni daih ve thei tlat mai.

Krismas lo thlen apianga mak ka tih em em mai pakhat chu kan sawi nasat em em mai leh a mitin mitang, a ka kaw nazawng in kan dem rawn luih luih, a thu mai duhtawk lova lo hla ah te thleng thleng a khuangpui leh khuangte nen, mittui nen hnaptui nena chumchilh chunga kan dem rawn khualbuk vengtu chungchang thu leh Lal Isua pianna hmun chungchang hi a ni leh tlat mai. Khualbuk an rawn thlen khan Josefate chhung kha khualbuk vengtu khan a lo hnar tih reng reng Bible-ah hian kan hmu lova, tin, a hnar lo tih pawh kan hmu hek lo, mahse khualbukah riahna an chang ve lo tih erawh kan hmu thung. Khati khawpa mipui tamah kha chuan khualbukah hmun an changlo kha a awm hliah hliah ve tho tlat mai. Heti tak mai a khualbuk vengtu a chhia zawng zawng kan burbun vek hi chu kan ti dik chiah in ka ring lo ve tlat mai bawk. Kan Bible a Lal Isua pian chungchang inziahna Chanchintha Bu hova hian a khawilaiah hian nge kan Lal Isua kha ran inah a piang tih thu a inziah tih hi kei chuan ka hmuzo tlat pek lo mai a, Chanchintha bu nilo kan Bible a ziak dangah lah ka hmuzo chuang heklo. Chanchin Tha Luka ziak 2:7 ah khualbuka an lenloh avangin ran chawpekna thlenga an mut tir thu kan hmu a, tin, chang 12 ah vantirhkoh in berampute hnenah nausen puana tuam ranchaw pekna thleng a mu an hmuh tur thu a sawi kan hmu a, chang 16 ah vantirhkoh sawi anga ran chaw pekna thlenga nausen mu an va hmuh thu kan hmu leh a. Chanchin Tha Matthaia ziak 2:11 lamah phei chuan mifingten chibai buk tura an va kal khan ‘in chhungah’ Mari hnena naute mu an va hmuh thu chiah kan hmu a, ran in lam hi a sawi lang reng reng lo tlat. Khualbuk vengtu khan anni riahna tur neilo kha a khawngaih a, hmun dang a awm tawh ngang silo a, ran in kha a tihfai sak a, a riah tir ta pawh zu ni fahmiang, kan hre hleinem. Anihlohleh a in hulhliap khawi emaw laiah emaw a riahtir anga, chutia nausen a lo pian tak si ah chuan han mut tirna mai tur khum kha a lo awm remchang si lo anga, ranchaw pekna thleng ruak kha emergency thilah naute mutna tur ang atan han cheibawl nawk nawkin an hmang ta mai pawn zu ni fahmiang kan hre reng reng lo tlat. Tin, Mari kha an Juda serh leh sang danah nau an neih khan bawlhhlawh a ni ta tlat, khualbuka thleng pawh lo ni ta sela nau a neih khan a inthiar fihlim a ngai hrim hrim. Kan sawi tak ang khan Khawchhak miffing te’n an va hmuh a, chibai an va buk phei kha chuan inchhungah an awm tawh anih hmel tlat, Bible-ah khan ‘inchhung ah an va lut a, a nu Mari hnena naute chu an va hmu a’ tih a ni tlat, ‘ranin chhungah an va lut a…’ a tih a ni tlat lo. Chuvangin kan Lal Isua ran in a kan piantir tlat mai te, khualbuk vengtu a chhia zawng zawng kan burbun a, misualber, englai pawh a sual in a bawm reng anga kan han chhuah tlat mai te hi kei chu mak ka ti ve riau tlat mai a ni.

A tawp ber atan chuan, Krismas chungchanga mak ka tih tawp theihloh chu mifing te kha thilpek pathum an pek avanga pathum kher ni tura kan ngai tlat mai hi a ni. Panga pawh an ni thei, pahnih in thilpek an keng ve lo pawh a ni thei tunge hria? Heng zawng zawng kan han sawi tak a hmun hma thu te, a hun thu te lam ai chuan pawimawh ta ber chu a hun laia mipangngai chunglam a leng, mi te’n an ngaih ropui leh an zah em em mifing te leh mi hnuaihnung ber te zinga ngaih berampu te khan Lal Isua chu an va hmu ta ngei a, anmahni inphah hnuaina tawp leh an zah a ni tih entir nana thingthi bawkkhupa chibai an buk kha a ni. Hei hi kan Krismas thuchah chu ni ve se; India hmarchhak kila State kilkhawr ber leh mahni intodelh lo ber a mihausa ber leh ropui ber kan ni emaw, mi rethei ber veng tlabirh ber a veng mawng lam tuikhur bula vaihlenhlo nena inthenawm a khawsa mai kan ni emaw, nu leh pa chawmhlawm a lirthei changkang ber ber petrol man pawh chhungte dil chawp ngai chunga nitin fawr chhuak thin kan ni emaw, nu leh pa te leisak, a nu leh pa ten internet pack leh top-up an thun sak hmanga mobile phone changkang chi ngat a CK thin kan ni emaw, a-lang-a-mawi-a kohhran leh thalai leh klhawtlang a rawngbawl thin kan ni emaw, a ruk leh ruk lo a sumdawnna bungraw lak belh ngailo chi a sumdawng call-girl leh KS kan ni emaw, contractor leh officer lian manni nupui fanau te thlim a khawi hotel changkangah emaw zan lama khawilai tleirawl an phone leh an mahni top-up theih te nen a ‘official duty’ thin kan ni emaw, a lu ti hai chem chem chi tawhphawt chu duh vek mai mi kan ni emaw, mitha ber ni a inhria kan ni emaw, misual ber ni a inhria kan ni emaw tun Krismas lo thleng turah hian kan engkim kalsanin chatuan a nun kan neih theihna tur a kan tana Lal lo piang hi silh leh fen, kan mawi tumna zawng zawng te kalsanin, a huau huau zawnga kan rilru put te dahtha in vawikhat tal chu thinlung takin chibai i buk ve ang u tih hi ni se…

 

BigDaddy Hmahmatea

Kulikawn

Similar Posts:

Recent Posts:

8 Responses to “KRISMAS LEH A BEHBAWM”

  1. 1
    s dala Says:

    I thil chhut dan leh PATHIAN thu ngaih tuah mitak i nihna ahhi chuan tlukloh val i nihlai in hekan khawvel fin leh thiam na hi chuan a chhut chhuak pha ngailo in lochhut ve viau maipawhhi kantih tur ber a niem aw? pu chawngkhupa hlasiam in asawi angkhan MIFING MIHRIN NA HIAN A CHHUT CHHUAK ZOLO E KACHHANDAMTU I THURUKHI TIHHI kan pawmdan tur nimai inka hria a hnungzui tute chuan???

    Report this comment

  2. 2
    Kawhterenga Says:

    A va’n tha dap dap em….i X-ray kim chang hle mai…….a scientific fu bawk….

    Report this comment

  3. 3
    H.Vangchhia Says:

    Ziak tha e. I ngaihtuahna i hmang viau (Y) hairehai

    Report this comment

  4. 4
    chhana hlawnchhing Says:

    Ka chhiarchhuak dap e. Chhiar a nuam in a bengvar thlak khawp mai a

    Report this comment

  5. 5
    chhana Says:

    Hmanah ka chhiar tawh. Ngaihtuah a ti thui, ngaihtuah chi meuh silo a ni e. Hnamsakhua post niawm zawk tak lah ni.

    Report this comment

  6. 6
    mihring Says:

    A bengvar thlak hle mai. (y) :) Hetianga han chik(chhuizau) deuh hian thenkhat chuan kan Pathian thu pawlh dalna emaw an ti thina. Mahse hei hian Pathian ropui zia, chhuichhuah rualloh a nih zia a tarlang zawk thin a ni ka ti ve tlat :)

    Report this comment

  7. 7
    Dr John Says:

    (y) Post tha leh hlu tak a ni

    Report this comment

  8. 8
    BigDaddy Hmahmatea Says:

    Nia hetiang zawnga thu han ziah hian mi thenkhat chuan kan Kristianna pawlh dalna angah te hian min ngaih sak fo thin a, mahse kan Pathianthu hi kawng hrang hrang a han zir chian a han zir zau ve te hi a tha ve viau i ka hre ve thin a. A nihloh dan ang deuh te hian kan lo pawm bur angtih te hi a hlauhawm ve viau ania.

    Report this comment