TAR KA LO NIH HUNAH CHUAN

December 12th, 2013 11:15 am by BigDaddy Hmahmatea

TAR KA LO NIH HUNAH CHUAN:
*****************************

Hei kan Pathianthu in mihring dam chen atana a lo sawi chanve zet chu ka lo hmang ral ve ta reng mai a, ka hringnun damchung kawng chanve zet chu ka lo zawh zo ve ta. Tawngthu chhia ni suh se mihring dam chen pangngai atana siamtu in a ruat te ka lo dam tluantling ve te a nih ngai chuan chutih hunah chuan ‘tar’ ka lo ni ve tawh mai dawn a, chu hun chu a ni ngun tak a ka’n dawn vang vang a damrei nih ka chak rual rual a ka hupurh em em mai chu. Nang chuan he ka rilru ngaihtuahna hi min tawmpui pha kher lo anga mahse mihringte hi kan dam a kan hriselna te a lo that chuan he lei hringnun kan hman hunbi tawplamah hi chuan tupawh mai hian kan hun hmawr kan bawk hunah chuan ‘tar’ nihna dinhmun hi kan kalkan dawn hauh lo mai a, chu tar dihnmun a ka din ve hun tur chu a ni lungngai taka ka dawn fo thin chu.

TAR KA LO NIH HUNAH CHUAN ka taksa te a lo chak tawh lo in ka tha te a lo thum tawh ngei anga, tiang hawl lo phei chuan inchhung dungah pawh ka kal tha hleithei tawh lo emaw kha a ni anga, chutih hunah chuan pawna han chhuah ve te pawh ka chak ve in ka thlenphak chin hnaivai te te te pawh han kal ve te ka chak ve thin ngei dawn a, ka kal chakna leh ka kal duhna te pawh mahni a thleng chi ka nih tawh dawnloh avangin han sawichhuah pawh ka hreh in ka lo inthlahrung ve tawh ngei anga. chutih hunah chuan kal duhna ka nei em tih te min zawt in ka nun khawhar tak ti hlim a ti harh turin min hruai harh a ka kal duhna hmunah min hruai nachang te i lo hre ve thin dawn nia aw. Chutilo zawng ka tar tawh si a kawm tur nei lo a inchhunga tawm reng ringawt chu ka tan a ninawm dawn em mai.

TAR KA LO NIH HUNAH CHUAN keimah pawh ka intifai tha peih tawh lo ngei anga. Peih pawh ni ila mahni mai chuan ka che tha hleithei tawh dawn lo a, chutia ka intihfai that hleihthei siloh chuan ka thawmhnaw te a lo bal in ka taksa te pawh a lo bal anga ka rim te pawh a lo tuilo ve thuai mai dawn a. Chutih hunah cuan ‘tar rimchhia’ mi ti mai lovin min bualfai in ka thawmhnaw te pawh min sukfai sak ve thin dawn nia, e taka tui min lum sak kha theihnghilh hauh lo la, ka tar tawh avangin vawt ka tuar thei tawhlo hle dawn ania. Ka mutbu te hlei hlei hi nisa ah pho chhuah ngun a ngai in sukfai sak ngun hle ka ngai dawn a ni tih kha hre reng la. Nang pawh naupang mahni pawh in enkawl theilo i nih lai te pawh khan ka lo bual che in ka lo tifai thin che a, enganga bal a i rawn talpawl pawhin uluk takin ka lo tifai thin che a nih kha.

TAR KA LO NIH HUNAH CHUAN ka in leh lo keima din ngei a rawn seilian chho in nih miau avangin tarchhia engmah ti thei tawhlo pawh ni mah ila keimah vanga i tun dinhmun a ding thei kha i nih ve miau avangin ka la intihthu viau tho dawn a, ka thu leh hla tal hi chu zawm kher dawnlo mah ula min ngaihthlak sak ve thin in engemaw chhungkaw thil pawimawh ah te hi chuan min rawn der ve nachang te in lo hre ve ngei dawn nia aw. Nang pawh engtikniah emaw chuan i la tar ve ngei dawn a, chutih hunah chuan i tu i fa ten i thu engahmah ngai lo in pal zut ta mai mai che sela i duh bik hauh dawn lo tih kha inhre reng la. Chuvangin kei hi tar chaklo, engmah tih theih nei tawh lo ka nih hunah pawh min zahder hram hram la ka lungawina leh ka vuina pawh thil ho te a ni tawh dawn tih ka min hriat sak reng dawn nia.

TAR KA LO NIH HUNAH CHUAN ka lawmzawng pawh a ho hle tawh anga, ka huat zawng te leh ka ngaihtheihloh zawng te pawh a ho hle tawh dawn a, ka naupang chhe leh a ni ringawt mai dawn tih kha min hriat sak reng la, min dawm thiam pawh a ngai viau dawn a. Min duhsakna hote te a in lantir te khan min tilawm thei hle thin dawn a ni tih hre reng la. Chutihlaiin I fa te naupang te te in ‘tar a’ ti a min chhaih nawmnah te kha ka ngaitheilo vuai dawn a, ka hauh lah engatan mah an ngaih dawn tawh siloh avangin ka i fate ho pawh ka laka an rilru puthmang tur thlenga i thunun thiam viau a ngai dawn a ni tih kha i hrereng la, nang ber in ka chunga i rilru puthmang ang kha i fate’n ka lakah an rawn pu chho ve dawn a ni tih kha hre reng bawk la. Kum a lo upat hnu chuan naupang in min zar sek te kha ngaihtheihloh chang ka la nei ngei dawn a, chutih hunah te chuan i fate kha mawihnai taka hun thawl min pe a, min zarbuai lo deuh tura i hrilh thin an ngai fo dawn a ni.

TAR KA LO NIH HUNAH CHUAN ka kum rualpui te leh ka thian kawm thin te’n min lo boral san vek tawh emaw kha a ni anga, ka khua te pawh a har ve thei thin hle dawn a, han titi pui a han kawm tur pawh ka duh ve viau thin ngei dawn a, chutih hunah chuan in titi duhzawng leh ka titi duhzawng te pawh a lo inpersan hle tawh dawn a, in tan chuan ka bula han khawsak a han ti ti vel pawh thil ninawm tak a ni tawh ngei ang, mahse maw dawhtheitakin ka khawhar hnem tur tal chuan min kawm hlim ve thin dawn nia aw. Nang pawh i la tar ve ngei dawn a, chutih hunah chuan nun khawhar taka i awm changa kawm hlim tu tur che i la mamawh ve hle dawn a ni tih kha inhria la. Ka thil hriat ve zawng ang te min han zawt la kan vanglai hun a kan thil tawn leh hriat te chu in tan thil ngaihnawm tak te pawh a lo ni ve thei ania.

TAR KA LO NIH HUNAH CHUAN ei leh in mawlh mai hi ka tan chuan a buaithlak tawh dawn a, ka chak zawng leh ka duhzawng pawh ka ei ve hleithei dawn tawh lo a, chaw nem leh buhhawp te emaw ka ei a lo ngai tawh anga, thil tui tha tha la ei chak mah ila ka ei thei tawh dawn si lo a, chutih hunah chuan ka eitheih ve zawng eitur tuihnai deuh te kha min siamsak nachang in lo hre ve dawn nia a, ka vanglai pawhin eitur hi chu ka duh thin em kha. Chhungkua a chaw kil hunah pawh ka tar tawh miau avangn ka thil ei vel pawh ka che tawp deuh tawh te pawh a lo ni thei, chung hunah pawh chuan min ten a min sit mai lo in min ngaihthiam chin te pawh in neih ve ngei angai anga, in hmel a min tenna neh min sitna in tih lan mai zawngin ka tan a inthlahrun thlak dawn em mai.

TAR KA LO NIH HUNAH CHUAN ka mo te fel leh fel lo a zir in ka tan nun a nuam in a nuamlo tawh mai dawn a. Ka mo ten min duat thiam chuan keimah pawhin nuam ka ti anga, ka mo te pawh an langmawi bawk anga. Mahse ka mo ten min duat thiam loh erawh chuan kei in pa ber hi ka nunkhua a hrehawm hle anga ka mo te pawh mi bulah ka rel ka rel emaw ka a ni anga, chuvangin nupui i neih ve hunah pawh nangmah an hmangaih che anga kei min hmangaih a min duat thiam tel ve tutur ngei mi rilru tha tak i thlang ngei dawn nia aw.

TAR KA LO NIH HUNAH CHUAN ka hringnun tawp lampang hmawr ka bawk ve tawh dawn a, he khawvelah hian rei in zingah ka cham dawn tawhlo a ni tih kha lo hre reng ula. He khawvel eng in hmuh theihna leh mi anga in lo seilen a tun dinhmun a in din theihnana ka rilru leh theihna zawng zawng, ka tha leh zung ka lo sen tawhna te kha min hriatreng sak ve ula. In zingah rei ka awm dawn tawh lo tih hria in ka awmloh hnuah chuan min zawng min zawng in min au min au mah ula kei chu piallei thuahriat karah chhamang ka zal tawh dawn avangin auh eih tur ka awm tawh dawn lo a, zawn hmuh tur lah ka awm tawh dawn hek lo. Chutih hunah chuan nangni chu mite ngaihah ‘Pa nei lo’ in lo ni tawh mai dawn a ni tih kha hrereng chungin ka hringnun damchhung kawng ka zawh lai ka zawh tawp hma na na na hi chuan min dawm thiam a, min duat thiam a, min enkawl thiam a, ka damchhung hun tawite ka la neih hi hlim leh hahdam taka min hman zawh tir hi ka beisei in ka phut ve tlat a ni.

Dt. Thursday 5th December, 2013
BigDaddy Hmahmatea
Kulikawn

Similar Posts:

Recent Posts:

9 Responses to “TAR KA LO NIH HUNAH CHUAN”

  1. 1
    Phivawk Says:

    Ngaihnawm hle mai (Y)
    Le, kawmen chhunzawm zel i1a…

    Report this comment

  2. 2
    XaiA Says:

    Tha ve.. (K)

    Report this comment

  3. 3
    caribou Says:

    A va tha e aw. Tar te hi an khua a lo har thin hle dawn a lo nih hi. Thian kawm tur an van dawn si. Pathian zarah ka dam ve zel anih chuan ka la tar ngei ang a, engtin awm ang i maw???

    Report this comment

  4. 4
    H.Vangchhia Says:

    Bawn-a, ngaihtuah I van tithui ve mawle :P hairehai (Y)

    Report this comment

  5. 5
    BigDaddy Hmahmatea Says:

    Tak tak a tar mai mai hi ka tum lo rengsssss :)

    Report this comment

  6. 6
    H.Vangchhia Says:

    #5 nia tar duh miah loh tur. Rodingliana pawhin, “Pu Sang, i thi vat ang min ti a, hei kan ti nek nek a, kum 2000 chu kan kai mai dawn,” kawi chhar a ding chungin a tih kha mawle hairehai :P

    Dam tek tek chuan rik zah tum zel tur :D (Y)

    Report this comment

  7. 7
    Awmtea Leo Khiangte Says:

    Tha e. (Y)

    Report this comment

  8. 8
    Dr John Says:

    (Y) Ngaihnawm khawp mai

    Report this comment

  9. 9
    BigDaddy Hmahmatea Says:

    Damrei hi chu a chakawm viau a tar erawh hi chu a chakawm tehchiam lemlo a ni :)

    Report this comment