FANU HNEN-A THUCHAH

December 10th, 2013 7:42 pm by Mapuia Hmar BZy

Bawihte, vawiin tahrik ni Sawmpasarih, Mim Kut thla, kum sanghnih sawmpathum hian thla kua zet hun i lo hman tawhna i nu chhul chuan kumkhuaa inhmu leh tawh lo turin a lo thlah liam ta che a; Siamtu remruatna ang ngeiin a hmangaih mihringte tana a buatsaih khawvel eng chu i lo hmu ve ta.

Tichuan, Adama thlahte zinga chhiar tel i lo ni ve-in, Evi pawh kha ‘ka pi Evi’ tih kherin sawi duh pawh ni la tuma’n demna thu chhakchhuak turin an ka an-an ka ring hauh lo, tin, lo awm pawh nise i pi Evi thlarau ngei khan anchhia a lawh ang a, vawi khat mai duh tawk lovin a lawh nawn awn awn duh hialin ka ring. A va ropui em Bawihte i thlavang hauhtu tur i nei nghal tlat mai! Mahse rul ang mai-a mi vervek tak tak ten an hual dawn che avangin i Pi Evi ang maia bum sam chuan i nung tur a ni lovang.

Tichuan i pa hian rimawi tum thiam neih eih si lovin zai a ngaina em em a, a hla thiam zingah chuan, ‘Thisen, Thisen’ tih kha a duh hle bawk a, a ‘Do, Re, Me’ paw’n a sa chhuak vek thei hial asin. Eng vang nge ni ang le? Eng dang a ni lo, vanram billboard countdown-a No. 1# nihna chelh rengtu tur hla a nih avangin he hla hi a thiam loh chuan vana i pu Adama leh i pi Evi te’n ‘Pa’ nih tling lo ti-a an kamkhat a hlauh vang chauh zawk maw le.

Tichuan, i Pa hi thenrual hui khawm thiam lamah phei chuan a kut a kawm tlat a. Chhungkhat lainate hui khawm chu sawi loh hui khawm sa pawh ti darhin chhungkaw inlungrualna hrui suih pawh ti suih tak thei lova ti suihtungturuh tirtu mai a ni si.

Tichuan maw Bawihte, i Pa hi mi ‘all-round’ ve hrim hrim hi a ni a, khawthlang lam unaute hla chham mi te lah hi Lal Davida ang maiin a chham zuah zuah thei a, an rimawi kalphungte lah chu NLUP dawngtu tura Rulling Party member-te leh Opposition member-te thliar hran a awl ang zet hian a lo thliar hrang ve zung zung thin. Mahse, he ni atang kher kher hi chuan hun rei tak khawngkhawbai leh tluk-leh-dingawn tak meuh meuh a lo kalpui ve tawh rimawi khawvel chu tihdanglamin a awm a, a rimawi hriat ve chhunte pawh chu nang hian i thlak danglamsak ta si.

Bawihte, i hmel tak ngial pawh ka hmuh hmaa i aw tliang taka i tap ri khan ka beng chhung a rawn fan a, khawvela ri ka hriat tawh zawng zawnga rimawi ber a rawn tum a, a nemngheh nan chu i tap ri ngei chu mittuiah changin ka biangah hian a lo luang chhuak nguah nguah asin.

Chutiang taka mi tling lo chu i ‘Pa’ nihna pek ka ni ta si a, i duh-a i duh loh theih lah va ni hek suh. I Pa ka nihna anga ka mawhphurhna te ka hlenchhuahna kawngah i mi tanpuina ka ngen nghal a, chuvangin ka thu i awih em em tur a ni tih ka hriattir che a ni.

Similar Posts:

Recent Posts:

6 Responses to “FANU HNEN-A THUCHAH”

  1. 1
    H.Vangchhia Says:

    (Y)

    Report this comment

  2. 2
    Natea Says:

    (Y) :-)

    Report this comment

  3. 3
    chhana Says:

    Fanu i nei bika, ka thik ngei mai che.

    Report this comment

  4. 4
    Dr John Says:

    (Y) Tha khawp mai

    Report this comment

  5. 5
    Popeye R Says:

    Thla hle mai, ka like e.

    Report this comment

  6. 6
    BigZy Says:

    In zavaiin ka (Y) vek che u.

    Report this comment