SANA

December 8th, 2013 11:04 pm by BigDaddy Hmahmatea

SANA
*****
Hmanni deuh tawh khan thilpek tha deuh mai ka dawng hlauh mai a. Ka thil dawn chu sana, phone ni nghal hi a ni a. Mobile phone pangngai ang hian engkim a awm ve thlap mai a. Camera pangngai atanga video camera bakah internet khawih nan thleng in a hman theih a. memory card pawh 16Gb thleng a hman ve theih tlat mai a, rinai takin signal a man tha zek lehnghal a, hei ka tangkai pui angreng kawp mai a ka lawm tak tak a ni. Sana hrim hrim hi kei changkang deuh deuh hi ka lawm ve hrim hrim bawk a. Tunlai khawvel thiamna sang chho zelah sana changkang tak tak pawh hi a tam ta ngiang mai reng a. Kum 1994 chho vel khan Casio company siam sana TV remote anga hman theih, ‘Wrist Remote’ an tih ang chi, company hran hran chi 42 lai mil thei ang chi kha Kolkata ah khuan cheng 6000 vel in ka lei a. Khatih lai kha chuan sana changkang ber pawl kha a ni ve a. Chumi hnuah chuan GPS leh altimeter vel leh digital compass awm chi ‘Pathfinder’ kha 7000 vel in Kolkata ah tho ka lei leh a, kha pawh kha adventure vela kan chhuahna velah ka hmang tangkai thei khawp mai a. A hnu deuh khan Casio company tho ‘G-Shock’ an tih ang chi chhe har zet mai, bangah pawh vawm bur mah ila che thei lo tura an siam ang chi te kha a rawn chhuak ta zel a. G-shock ho phei hi chu tun thleng hian khawvel ram hrang hrangah sipai leh Police ho in an intihhmuh chho ta zel a nih hi. Kan naupan deuh lai hian kan awmpui tlangval pakhat hian sana HMT kha a nei ve a, a khaikhup zawng lo chuan a nung thei der lo mai a, a hmai lam a banrek lama dah kan a bun ve reng thin a, dar zat a en dawn apiang khan phelh ziah angai a, “I sana chu enge a hming,” an tih pawhin, “HMT Khup anih hi,” a ti ve hmiah zel, buaithlak ve thei kawp mai.

Sana kan tih mai hunbi enna ang chi hi mihring te kan hman tanna a lo rei tawh khawp mai a. Sana ‘Clock’ tih hrim hrim hi hmanlai Celtic tawng ‘Clagan’ tih leh ‘Clocca’ tih atanga lak ni in ‘dar’ (bell) tihna a ni ber mai a. Engtik lai atang chiah in nge mihringte hian hunbi hi an lo teh tan hi hriat a har tawh khawp mai a. Sana ti mai ila hunbi tehna hi mihringte thil hmuhchhuah hmasaber te zing ami niin an ngai a. Sana leh hunbi tehna chanchin zirna bik hi ‘horology’ an ti nghe nghe a ni. Hmanlai hun tak tak atang tawh kha hunbi darkar te hi hmanraw hrang hrang hmangin an lo teh in an lo chhinchhiah tawh thin a ni a. Chung an hmanraw hman thin tlangpui te ‘Sundails’ an tih ang chi, ni eng hmang a hmawlhte an phun chumi a rawn chhun hlimthla in a thlen chin an chhinchhiah ang chi te, ‘water cloc’k an tih tui far zat leh a far chin chhinchhiah a hunbi an tehna ang chi te, ‘astronomical clock’ an tih ni leh thla leh arsi te her vel dan mil a hunbi chhinchhiahna an siam ang chi te, ‘Spring-driven clock’ an tih spring hmanga khawl tereuhte an tih kal a hun hman chhung en a chumi chu hunbi darkar teh nana an hman thin te, ‘Pendulum clock’ an tih mai, pendulum inthen hmanga sana khawl an kaltir ang chi te, ‘Hour-glass’ an tih mai darthlalang bur a laitaka rek chhunga vaivut dip an dah a hnuailam aa tlakthlak hunchhung darkar en nana an hman te, ‘Hairspring’ an tih mai spring kual sinte hmanga sana khawl an tih kal ang chi te, ‘mechanical clock’ te leh ‘electronic clock’ te chihrang hrang a tam mai a, Babylon leh Egypt velah khuan 4000BC vel lam daih tawh khan ‘water clock’ an tih ang chi hi an hman thu an lo ziak daih tawh a ni. 6th century BC lai vel te pawh khan China velah te chuan water clock hi an hmang ve tawh niin an ngai bawk.

Mechanical clock an tih mai khawl eng engemaw hmang ve chi ang hi tute siamchhuah tan chiah nge tih a hriat hleihtheih tawh loh a. Hmanlai chuan hetiang khawl hmang sana ang chi hunbi enna chi ho hi ‘horologia’ an ti mai thin a. Kum 1176 vel bawr te pawh khan Sens Cathedral ah chuan heng ang ‘horologia’ an tih ang chi hi an lo dah daih tawh mai a, mahse engang chiah nge a khawl an siam dan erawh chipchiar taka hriat theih a ni tawh lo thung. Hun a lo kal chho zel a sana siamdan pawh an lo thiam chho ve zel a, a khawl innawt lai a innawt ral mai mai lo turin lunghlu tereuhte an hmang thin a, mahse lunghlu them an hman chuan a sana man kha a to lutuk avangin lunghlu pangngai nilo in ‘Quartz crystals’ ang chi hman an ching chho ta a. Tun thleng hian Quartz crystals te hi an la hmang ta reng a ni.

Sana ban a bun chi hi 1920s hmlam kha chuan mipa in an la bun ve ngai lo a. Mipa chuan ‘pocket watch’ an tih ang chi, chain a inthlung iptea a ah a ah chi ang hlir kha an hmang thin a, ban a bun chi kha chu ‘Wristlet’ an ti a, hmeichhe incheina bikah an ngai a, mipa ho inla pa deuh kha chuan ‘hmeichhe sana ‘wristlet’ bun ai chuan pawnfen fen pawh ka duh zawk’ te an lo ti ve hial thin a ni. Mahse indopui pakhatna a rawn chhuah takah khan sana ipte a han ah deuh ruk chu sipai ho tan chuan a lo hnawksak ta riau mai a, tichuan sipai ho chuan sana ban a bun chi chu a bunna atan savun ‘leather strap’ hmang chuan an bun ve tan ta a. Ban a a bun a han bun chu a lo awlsam in a lo remchang zawk bawk si a tichuan sipai lam mai baklah mipui vantlang lam pawh chuan a bun a bun chu an rawn ching chho ta a ni. Hemi hmalam 1880s chho vel khan German imperial Navy ho kha an ral kahna hunbi inmil theih nan sana a bun a bun chi in an lo thuam ve tawh an tih tlat pek chu mawle.

Khawvel thiamna sang chho zelah sana pawh changkang tak tak a rawn chuak ve zel a, thil chihranghrang kawp hnem deuh deuh in an rawn siam chhuak ta chuai chuai mai a ni a. Fashion company hrang hrang te pawhin incheina ang chi atan sana nalh leh manto tak tak te an rawn siamchhuak chho ta zel a. Chutih lai chuan khawvel ina sana a ngaihsan ho erawh chu sana pangngai kan tih ang chi ho hi zu han ni tlat pek a mawle. Hmanlai sana kan tih ang chi te hi zu han ngaihlu em em hlawm a. Thomas Tompion Clock an tih chu 1999 khan $2,092,500 in an hralh hem mai a ni. Chopard 201- carat watch an tih pawh $25.000.000 a ni hem mai bawk. Patek Phillipe – Henry Graves –Pocket watch an tih pawh hi $11.000.000 man lai a ni a tin, The Piaget Eperador Temple an tih te pawh hi a tlawm lemlo $3.300.000 man lai a ni bawk. Hetiang hian sana hi man to tak tak in inchei nan leh ro thil ang atan te in an lo siam ve bawk thin a, incheina atana an siam thin ho phei hi chu lunghlu te leh lungmantam chihrang hrang leh rangkachak hmang te in an siam a, a to thei em em mai a ni. Tin, hmanlai sana kan tih ang chi, hmanlai hun a an lo siamchhuah ‘Grandfather’s clock’ an tih ang chi in kil vela an hun thin ang te kha tunlai hunah chuan an ngaihlu thar leh tawh a to tak tak in heng hmanlai sana te hi an lilam thin bawk.

Hetiang hian sana hi manto tak tak leh changkang tak tak te’n siam mahse sana hnathawh pawimawh ber mai chu hun vawn dik hi a ni a, engang pawhin man to in changkang mahse sana anihna anga a hnathawh tur ber a thawh dik theih loh chuan hun mawi leh incheina angah a hlutna chu thudangah dah ta ila sana a nihna anga a hlutna khan awmzia a nei miahlo tihna a ni a, sana pangngai hun vang dik thei miahlo phei chu engatanmah hmanna a awm lo hrim hrim a, a bun tu nih pawh thil zahthlak mai a ni tlat mai a, tuman sana hun vawngdik theilo leh sana thi chu a bun pawh an bun ngailo reng a ni. Chutiang chiah chuan keini Lal Isua ringtu, a hnung zuitu intite pawh hi Lal Isua duhdan a kan awm loh chuan sana chhia kan sawi ang chiah in kan Lalpa tan chuan hmantlak loh, engatan mah a tlak loh kan ni mai dawn a ni. Sana chhia pawh thar vur mai, design enganga nalh pawh nise hun a vawn dik theih miau loh chuan sana anihna angin tangkaina a nei tlat lo, bun chi pawh a ni hek lo. Chutiang bawkin ringtute pawh engang pawhin inkhawm peihhin kohhrannah te inhmang thin in mite hmuhah lang mawi thin mah ila, chungril lam nunah tihtak tak na nena kan Lal Isua hnung kan zui a, a duhdana kan awm si loh chuan kan Lalpa tan chuan sana chhia hun vawng dik theilo ang chauh kan ni anga, hmantlakloh, tangkaina nei lo leh zahpuiawm mai kan ni dawn a ni tih hi in hre thar leh theuh ila a tha viau anga. Keini ringtu inti te hi sana ni ta ila kan rin Lal Isua hian bun tlakak min ngai ang em le…???

BigDaddy Hmahmatea

Kulikawn

Similar Posts:

Recent Posts:

5 Responses to “SANA”

  1. 1
    lr hlonchhing Says:

    1st nih chaka post publish tur kan chan thin lai kha ka va ngai ve ;-(

    Report this comment

  2. 2
    caribou Says:

    A ngaihnawm leh pek mang e. Thanks to BigDaddy.

    Report this comment

  3. 3
    maawma Says:

    Sana chungchang a rawn lang tlat, beng a verh zak mai :-). Sana hi nia a mak reuh khawp mai, mechanical marvel te, micro mechanic ti te pawhin an sawi nual hlawm reng a ni. Tunlai sana tam tak hi chu technology nen hian in kaih hnawih nasa hlawm lutuk a, battery hmang ho ngat phei chu quartz crystal hmanga tih nun deuh vek an ni hlawm.

    Chutih laiin mihring themthiamna tak tak chu mechanical watch ah hian a lang chhuak ber a ngaih a ni, heng battery operate te hi chu khawl thil ni tho mahse electronics lam an awn deuh zawk mah mah a ni. Mechanical watch tih ho chu tunhma HMT chawpek ngai leh awtawmatik (Automatic) kan tih ho kha an ni. Automatic sana duli tiat lek ah hian part 200 chuang te a in rem khawm thin a, hetiang siam chhuak thei (Manufacture) hi mi bik a ngaih an ni thin. A ni reng bawk a, lo repair ringawt pawh hi thil awlai lo tak a ni. Che miah lo a kut khur bawk si lo a darkar 3 dawn, lopue(eye glass/lens) nen a thut chilh te pawh a ngai thin a ni.

    Tichuan mechnanical watch technology (chabi pek ngai + automatic) spring driven watch hi tunhnai hian SWISS ho bawk hian an rawn tuai hriam thar leh a, a man pawh a to thei far far khawp mai. Khawvel sana man to ber ber kan tih ho pawh hi “mechanical” zu han ni tlat pek a. Tourbillon an tih ho phei chu to tak hi a ni ringawt. Mechanical sana ah chuan “balance” che hian second hand hi a ti che a, balance hi sana khawl ah a in vit phun thin chumi che chuan Train wheel ho ti che in khawl ha nei hmangin hunbi hi a rawn her dik ta thin a ni. Tourbillon ah ve thung chuan balance zawk kha a vir kual ta char char mai, hei hi Horology ah chuan extreme engineering a ngaih a ni.
    Tourbillion technology sana reng reng tlawm tak a awm thei lo. He Richard Mille sana hi 10 crore man a ni e

    http://www.wthejournal.com/en/.....re-crystal

    Report this comment

  4. 4
    maawma Says:

    Tourbillon sana hi a taka hmuh ve chhin a chakawm ngawt mai,
    Heta 3D animation a an tih lan hi Tourbillon sana chu a nia, a tak ah chuan kutzung te tin tiat vel lek a ni ang, India ah hian leitur pawh a la awm lo ang, chuti khawp chuan a to in a vang a ni.

    http://www.youtube.com/watch?v=zMzdWLPIgHo

    Report this comment

  5. 5
    Dr John Says:

    (Y) Gud post. Sana-ah chuan, “HMT” bakah, “Seiko 5″ Sana kha ka bun ve hman :P

    Report this comment