TUIPUI SEN KAN KHA THILMAK A NI EM?

December 4th, 2013 7:02 pm by BigDaddy Hmahmatea

Tuipui Sen kan chungchang hi hrelo kan awm awmlove. Exodus 14:21 chhovah khan chiang takin a inziak anih kha. He Tuipui Sen kan chungchang hi Pu PC Biaksiama te ho leh mithiam tak tak ten an lo ziak teuh hlawm tawh a. Anni ho ziah chu el pha lo in, anni tlukin ziak ngaihnawm in ziak chipchiar thiam ve lo mahila, ka lo chhiar ve tawh atangte in khawvel mithiamten an chhut dan thenkhat te leh a tak takah enge a nih chiah hi tun tumah chuan kan rawn sawi ve thung ang e.

Bible-ah hian thilmak’Mircles’tam tak a awm a, chung thilmak zinga thenkhat te chu khawvel leilung dan atanga awmang taka hrilhfiah ve theih te pawh a awm ve tho mai. Amaherawhchu ‘TUIPUI SEN KAN’ chungchang erawh hi chu khawvel dan/thiamna hmanga hrilhfiah an tum poh leh an hrilhfiahna kha a awihawm loh zawk tlat zel. He thil thleng hi Bible a thilmak tamtak te zingah pawh tun thleng a mithiam ten mak an tih leh sawi fiah har an tih ber a ni tlat.

Bible a kan hmuh angin Mosian a ban an phar a chutah khawchhak lam atangin thli na tak a rawn tleh a, tui chu chhem thenin, a lai ah lei char a rawn siam a, tichuan tui inthen chu a sir tuak dinglamah leh veilamah bang angin a ding ta ur a, chutah Israel ho te kha an kal tlang ta a, a umzui tu te sakawr tawlailir chu a ke te thlawnin an tlan thei ta lova, khawfing chah rualin Lalpa Pathianin Aigupta mite chu meialh leh chhum dingin a zuk timangang bawk a. Pathianin Mosia chu tuipui chuangah chuan a kut a phar tir leh a tichuan khawvar rualin tuipui chu a infin leh vek a a luan pangngai in a luang leh ta a. Aigupta sipaite chu tui in a chim pil vek a, pakhat te mah nungdama chhuak an awm lo tih kan hmu anih kha. Hemi bakah pawh hian Israel fate kha meialh leh chhum ding in a hruai a, Tuipui Sen an kan hma pawh khan anmahni hmalama hruaitu chhum ding kha hnunglamah a rawn awm a, chuchuan Aigupta ho awmna chin kha zan angin a ti thim a, chuvangin an rawn kal pawh thei ta lo kha a ni a. Heng thilmak hi khawvel dan hmangin engtinge an hrilhfiah tlangpui i lo thlir teh ang.

Mithiamte ngaihdan tlangpuiah chuan tui pan lai ah an kai aniang, thli na tak a rawn thawh chuan tui pan deuh chu a chhem then ve thei a ni tih a ni. Russian mithiam Naum Volzinger, St. Petersburg’s Institute of Oceanography a senior researcher leh Alexei Androsov,Hamburg, Germany lam mi a thurualpui chuan uluk takin zirchianna an nei a. Anni ngaihdan chuan Israel fa te khan an vanneih asiamin thli na tak rawn tleh lai kha an nang fuh hlauh anga, tichuan darkar khata mel 67 vel a chak thlipui chuan zankhua a a thleh chuan tuipui chu a chhem then thei em em anga, tuipui pawnlang deuh a tuipui hnim awm ‘reeds’ an tih chu rawn chhem langin chutah chuan Israel ho kha an kal kai ta a nih hmel a, a umzuitu Aigupta sipai ho khan an kan fel ve hma in thlipui tleh kha a lo reh leh hman tawh avangin tui chuan a chim pil ta a ni ange an ti a. He ngaihdan hi tawmpui tu an tam viau mai reng a. Mahse heti hi lo ni ta se Pharoa sakawr tawlailir te kha engatinge a ke te kha a thlawn bik a an tan bik tlat. Tin, tuipui mawng kha lei char angin vawilehkhatah a awm thut thei dawn em ni? Tin, tuipui kha bang angin a sir tuakah a ding ur anih kha.

Heng bakah hian mak leh deuh mai bawk chu khawchhak thli pangngai ni ta se chhim leh hmar zawnga chhem then awm tak tuipui kha chhak leh thlang zawngin a chhem then tlat si. Thli satliah na tak ni ta se tuipui pawh chhem then thei khawp tleh ta chu mihring chu a chhem darh vek loh pawhin han kal kai ngaihna a awm lo hrim hrim ang le. Ngaihdan dang leh ah chuan tuifawn hniam lai’Low tide’lai in an kai aniang tih a ni. Mahse helai tuipui vel ah hian High tide leh Low tide a awm ve lo tlat. Ngaihdan dang leh ah chuan Hebrai tawnga inziakah chuan tuipui an kanna lai hi ‘Yam Suph’ an tih lai hmun Africa leh Arabian peninsula a tuipui al luanluhna lai Saptawnga ‘Red Sea’ tih a an leh tak hi a ni e an ti a. An sawi dan chuan heta Red Sea tih a an leh hi an let diklo a ‘Suph’ tih hi ‘Red’ tihna nilo in tuipui hnim chikhat ‘Reed’ tihna a ni a, heng tuipui a hnim to chikhat ‘Reed’ tamna lai chungah hian an kal kai anga chumi chu sakawr tawlailir te khan an rawn zawh ve anga an rit si a, a dawl lo va an pil aniang tih a ni; mahse hei hi chu a awihawm loh tlat. Bible chuan lei char ah an kal kai a ti bawk si.

Tuipui Sen kan hi a mak leh na em em pakhat chu khatia tuipui an inthen khan, a inthen nachhan kha chu thudangah pawh lo dah ta ila, a tuipui mawng dum vek ni awm tak kha lei char a ni tlat mai kha a ni. Hei tak hi kan Bible in chiang takin a sawi lang tel tlat mai si. Kan Bible hian Israel fa te kha ‘dumah an kal kai’ a ti lo a ‘tuipui a hnim to reeds ah an kalkai’ a ti hek lova, Exodus 14:22 ah khan “Tin, Israel thlahte chu tuipui chhung lei charah chuan an kal ta a;” a ti mauh mai a nih kha. Helai tuipui mawng leichar lo ni ta thut mai hi khawvel mithiamte hian engtinge an sawifiah ve tak ang le. Tin, Israel fate hruaitu meialh leh chhum ding kha engtinge an sawifiah tak ang? An chhut dan pakhatah chuan zan a meialh anmahni hruaitu anga lang kha chu ralkhat atanga an meichher chhit eng leh meipui chheh eng vel an lo hmu dan a ni ange an ti a, tin, chhuna chhumding anmahni hruaitu pawh kha mipui tam lutuk in thlaler vaivut an pal khuk van lama khu ding chho luih luih mai kha a ni ange an ti bawk a. Mahse kan Bible hian an meipui chheh eng in a hruai a ti lo a, an vaivut pal khuk in a hruai a ti hek lo a, meialh leh chhum ding in a hruai a ti zawk tlat. Tin,meialh leh vaivut khu ding satliah ni ta se Aigupta sipai tha lutuk mai ho kha zu tibuai turin a thawk thei ang em? A teuh lo mai. Khawvel mithiamte hian chhut chhut thin mahse khawvel mithiamte finna leh thiamna hian Tuipui Sen kan chungchang hi engtikah mah a hrilhfiah tak tak thei lovang. Chuvangin he Tuipui Sen kan hi a sawifiahna tha ber leh dik ber awmchhun chu PATHIAN thilmak tih a ni e tih bak hi chu sawitur a awm lo. Anih leh heihian enge a entir??? Ele kan Pathian ropui zia leh engkim tithei a nihzia leh rintlak Pathian a mite thlahthlam ngai lo a nih zia mawle….

BigDaddy Hmahmatea

Kulikawn

Similar Posts:

Recent Posts:

8 Responses to “TUIPUI SEN KAN KHA THILMAK A NI EM?”

  1. 1
    VaiVa Says:

    Mak ti 1st (Y)

    Report this comment

  2. 2
    H.Vangchhia Says:

    Lo kan ve mai mai teh se :P hairehai :D

    An chhuina awmang tak tak chu History nge Discory tih velah ka en tawh. A ngaihnawm ka ti khawp mai. Good post (Y)

    Kan hotute hian post hi vil tha peih deuh phei sela chuan chhiar tui a awl zual khawpin ka ring!

    Report this comment

  3. 3
    Borat Says:

    Mithiamte chu an thiam tawk lo ani mai alawm.

    Report this comment

  4. 4
    H.Vangchhia Says:

    Scientist hovin an chhina pakhat:

    http://www.youtube.com/watch?v=bR50uC_1Krg

    Red Sea hnuai hi an zawng hneh hle tawh a, Aigupa sipaite ralthuam etc. engmah an la hmu thei lo, sipai chuti zozai thi chu hmuh neih ve awm tak chu a ni ve tho mai. ;)

    Report this comment

  5. 5
    chhana hlawnchhing Says:

    Scientist pakhat a hming ka hre ta mai lo chuan hetiang hian a ti vet hung a, tunlai science thiamna hi chu Pathian thiltihtheihna hrilhfiah tur chuan a hniam lutuk a ti ve leh tlat bawk a.
    Eng pawh chu nise mithhiamten kan LAL ISUA Thilmak tih an hrilh fiah thei ngai anih chuan kan PATHIAN hi a theuneu dawn lutuk

    Report this comment

  6. 6
    caribou Says:

    Scientist inti tamtak, Bible kalh zawnga thulak tlat ching thinte hi kei chuan scientist tak takah ka ngai lo. Scientist chuan science khawvel ah hna a nei a, a hna chu tha takin a thawk mai tur a ni a, sakhaw pakhat a kher ngat ngat tur a ni lo.

    Pathian thil mak tih te hi mihring taka chhui zui chiam chiam ching ho hian engmah an chhui chhuak tak tak chuang lovang. “Hei zet hi zawng engkimtithei Pathian thil tih a ni e” ti mai se la, an tan a hahdamthlak zawk ngei ang.

    Mithiam inti te’n sawihnawm tum thin mahse, keini chuan kan lehkhabu thianghlim, Bible ina a sawi hi kan pawmin kan zawm hmak mai tur a ni.

    Report this comment

  7. 7
    H.Vangchhia Says:

    Scientist pangai ti mai ang, fact scientist-te hi ka chhuang em em. Scientist thenkhat, theorists tam tak thil chhui dan erawh an mimal ngaihdan a nih fo thin avangin pawm harsa a tam duh khawp mai.

    Report this comment

  8. 8
    XaiA Says:

    Mak a lawm le…

    Report this comment

Leave a Reply

You must be logged in to post a comment.