Fanghma Leh Nunhlui

October 6th, 2013 10:01 am by Dr Mahminga Sailo

Fanghma thar ko
Zanriah chhum hun a pel a, tlai lam ruahsur tur intham tanpuitu khawpui thawm dim ang reng takin a ri nghawr der der a. Ral khat tlang chhip erawh ruah kungin a bawh paw chi chiai thung. Dai hnaia thereng chi khat chuan uar takin “reng-reng-fawk-fawk” tiin uar takin zai a lo vawr bawk. A ni taka sin, chu rengchal hlim taka zai vawr chu keini tan chuan nghahhlelhawm tak a ni tlat – engdang vang ani lo; ‘fanghma thar’ ko tia kan hriat a ni tlat.

Beisei lawk ang ngeiin, losul haw a hun meuh chuan, chhuahtlanga ka nu leh pa feh haw chu nghakhlel taka thlirin, fanghma tuai thar lam tak mai min rawn hawn beiseiin kan phur hle thin. Thenawm nu leh pate’n in an luh hmaa an fate fanghma an han pek a, nu leh pa’n min hawnsak tur an la thar loh chuan a hrehawmin rual awh a na ve thin hle.

Fanghma chanchin!
Fanghma hian hming a nei ve nual asin. Ka hriat leh in hriat hi inang tak maw? Hma-ram leh hma-hnip kan nei thin a; thalai tan chuan hma-ram han thial rik rap rap hi a nuam; chutih rualin hma-hnip hi ei a hahdam, tin a pian a mawi tlangpui zawk bawk.

Fanghma sen
Sen tih hi sihsen tia sen anga lam tur. Fanghma sen hian rin loh tak maiin a hnun hnaihah hling ang deuh hi neiin a bawl ve tiar thin. Fanghma sen pian nalh tak hi a duhawm riau.

Fanghma tuai
Tuai tih hi mautuai tiha tuai lam anga lam tur a ni. Fanghma tuai hian chhawlhal a chhawk ber awm e. Tin, mi tam zawk ei tam ber pawh a niin, a hming ang hian fanghma rah rau raua itawm ber a ni.

Fanghma hur
Fanghma tuai chu lawh mai loh chuan, a rawn a eng tan tuih a. Hetih lai hian thur si, thur tak tak si lo hun lai, fanghma tui loh ber lai a ni awm e. Chuvangin, a hming pawh a mawi teh chiam lo.

Fanghma tai
Fanghma tai chu a eng tak a, thur pawh thur tak a ni. A hawng chhah pawh ei tawh lem lovin, a laia phel phawkin a mu paih fai hnuin a a chhul leh a hawng (a tai chin) thirfianin kan ziat (scoop) thin a. Thur ngam vak lo vin chini an phul bawk thin, a tui thei hle.

Ka nu ipte thui ngei mai a fanghma tuai lian tha ler lawr pum hnih phur zo rual kan nih lai te kha a va ngaihawm thin em. Wai wai, magi, rum pum, ladt lei ngai lova, tui ti tak leh rual awt bik miah lova nu leh pate thar chhuah ngei tui ti tak maia kan han ei hluam hluam thin kha a manhla bik hian ka hre thin. Lung a leng teh e.

Similar Posts:

Recent Posts:

5 Responses to “Fanghma Leh Nunhlui”

  1. 1
    Chhuaklinga Says:

    First :P

    Chhun nisat vanglaia FANGHMA TUAI thlam tlaitlana han keih siah siah mai chu tui ve tak a ni. (*)

    tren tren

    Report this comment

  2. 2
    shailendra Says:

    Fanghma ngei a inchhawlthuai kha hlimawm an ti, nu leh pa ten :-D

    Report this comment

  3. 3
    Manuni Tlau Says:

    Fanghma juice te chenin a tui ka ti :-)

    Report this comment

  4. 4
    Awmtea Leo Khiangte Says:

    Ka chil i tiput…

    Report this comment

  5. 5
    H.Vangchhia Says:

    Lungleng lo vel min mitthla tir daih chu a. ;)

    Fanghma hur ei chu an thur nghur ang a :P hairehai

    Report this comment