Archive for October, 2013

KA FARNU DUHTAK

Thursday, October 31st, 2013

http://imgur.com/fQmq45d

Ka farnu duhtak, Chingal bai tuitak leh Saum sawhbâwl pir phak lovin thangkhat lian dâwn i lo awm bo ve tareng mai!!! Zoram khawvel leh thalai te ningkhawng hmu leh hre phak lova i awm hnu ah; Tuithiang tualnuam a tualchai turin i puanthuah te i rawn têl dawnta tih ka lo hria a. Phûr namenin kan phur lo!!! Amaherawhchu, kan sumtual leh chhuahtlang nunphung changkanna chimawm tak tak leh danglamna dangdai tak tak tena a lo barakhaih che a; i men phar awn awn loh nan kei i û hian thu kam hnih khat ka’n rawlruk teh ang che.

Thawhrimna avanga i sakhmel pawr tak leh phuai tak te chu tuaihnum lovin Zo khaw ‘Tribalywood’ ah i rawn pho chhuak dawn a ni a, changkanna chihrang hrang ina a chiahpiah te khawvel ah hian hralh a tlâk loh chu sawi loh melh pawh a hlawh lo maithei e, mite angin sakhmel hmatheh tur hmaifang felfai neilo mahla, Belvâl val a vâl satliah te thlang mai lo tur leh an lak a kut kuangkuah thiam deuh turin ka duh hle a che. Kawtthler a chak tak tak a tlan ching te hi, Biakin kawng a tlan muang tak tak te an nih thin avangin an lakah mit lên lo la, i thinlung phei chu hawng hauh suh ang che.
(more…)

Masihi Sangati Convention tluang taka neih zawh a ni

Wednesday, October 30th, 2013

http://i44.tinypic.com/6teemf.jpg

Masihi Sangati (Non Mizo tia kan hriat lar) Convention vawi 28 na chu tluang takin Sihphir Presbyterian Kohhran Biak Inah tluang takin dt. 18th.-20th. Oct. khan hman zawh a ni ta. He convention a speaker chu Rev. R.Lalthangvunga a nia; thupui chu ‘Isua chu kawng, thutak leh nunna’ (Joh 14:16) a ni. Speaker hian thupui hi tum nga sawiin Pathian Thlarau Thianghlim pawlna nasa takin a thleng a ni. Convention chhung hian speaker in thupui a sawi bakah bible study-te neih a nia; councelling class neih reng a ni bawk. Pathian ni chawhnuah Sihphir bialtu pastor Rev.H.Laltlanthanga’n Lalpa zanriah Sakrament a theh bawk.

Kum 1965 daih tawh khan Nepali Kristian ten anmahni pualin inkhawmpui hi an lo nei tan tawh a; Nepali Kristian Fellowship tih hming pu a Synod hriatpuia an din chu 1975 khan a ni. (more…)

MIZO TAWNG CHUNGCHANGA ZAWHNA PAKHAT

Tuesday, October 29th, 2013

Mizotawngah hian mipa leh hmeichhia sawikawpna kan nei nual a. Chung tawngkamah chuan hmeichhe sawina hi kan dah hmasa zawk tlangpui zel bawk a. Entirnan: nu leh pa, pitar putar, nula tlangval, chun leh zua, mo(nu) leh mopa.

Chutihlaiin, tunlai kan thuziak tam takah hian MIPAT HMEICHHIATNA (sex) kan ti ta zel mai thung a. Ka hriat sual loh chuan Rev. Dr. Zairema khan ‘hmeichhiat mipatna’ tih tur ni awm takin a article pakhatah (Thu leh Hla, MAL) khan a ziak a (?). Ka buai riau mai. Ka awmna ah hian he article ka sawi hi han en mai tur ka nei remchang si lo.

Mizote hian hetiang tawngkamah hian hmeichhia hi kan dah hmasa zawk zel hrim hrim em? Chu chuan enge a entir? A nih chuan hmeichhiate hi kan ngai pawimawhin, priority kan pe in kan care zia kan lantirna a ni em? Mipat hmeichhiatna tih nge dik hmeichhiat mipatna?

HMEICHHIATE HI….

Saturday, October 26th, 2013

1. I mitmei i hmuh a, i ngaina in hmeltha i ti tih a hriat chuan a induh khum deuh sawt ang che.

2. I mitmei i hmuh a ani pawhin a mitmei a rawn hmuh let ve che a, i ngawihsan leh si chuan nep a ti ang che.

3. I mitmei i hmuh a, a rawn hmuh let ve che a, i bawhzui leh vut vut chuan a ning thuai ang che.

4. In inngaihzawn hnu a i len tlut tlut chuan a hne thuai ang che. I len khat erawh chuan induh a ti thung ang che.

5. I len laia i tawngtam viau chuan ‘tawngthei’ a ti ang che; i tawngtlem viau erawh chuan ‘chut’ a ti thung ang che.
(more…)

Inneih Sawmna

Monday, October 21st, 2013

Kei VaiVa te reuh hian October ni 25 (Zirtawpni) hian Champhai Vengthlang Presbyterian Kohhran Biak Inah ‘Tiam tlat e’ ka ti ve dawn a. Misual member zawng zawng te ka rawn sawm che u a ni e.

(more…)

HRIAT ZAU NAN – “ZOTAWNGIN – COURT RORELNA” (Mizoram Health Care Scheme Thubuai)

Monday, October 21st, 2013

Ni 8.10.2013 khan Special Court zahawm takin Pi Lianthuampuii leh mi dangte (a tlangpuia kan hriat danah zawk chuan – Pu R. Tlanghmingthanga, Ex-Minister leh mi dangte) thubuai chungchang a ngaihtuahnaah thu tlukna a siam a. He Judgment Copy hi RTI hmanga lak chhuah a ni a, Public Property a ni tawh a. Chanchinbu leh TV lama kan hriat hi Court thu tlukna famkim a nih bik lem loh avangin engmah thu belh nei lovin Zotawngin ka thiam ang angin ka han letling a, mipuiin an lo hriatte hriat ve a, hriat zauna tha tak a nih ka rin avangin hetiang hian ka han pho chhuak a ni. Zotawng leh English hi ‘sentence’ kalhmangte a inan loh avangin English-a Sentence pakhata sawi kha a fiah zawk nan Zotawnga sentence pahnih emaw a aia tam mah emawa dah a ngaih fo avangin chhiartute hriatthiamna ka ngen a.

He Judgment zahawm takah hian ‘Morally’ tih ‘adjective’ hi Zotawnga ziak thiam a har ka ti hle mai a. Entirnan, Sorkar Officer, Kohhran Upa ni bawk kha awm ta se. Upa ni chunga inkhawm ngai lo leh Kohhran thil tih engmah ti lovin chutiang thil bansan ta hial se, Sorkar Officer a nihna ang chuan Sorkar tan hrem theih a ni lova, mahse, Kohhran Upa a nihna atanga teh erawh chuan Kohhran leh vantlang ngaihah chuan a tih tur a ti lova, a tih loh tur a ti ve thung a ni. Chuvangin Judge zahawm takin, “R.Tlanghmingthanga hi ‘morally’ chuan dik lo ka ti a, amaherawh chu Prevention of Corruption Act bawhchhia erawh a nihna ka hre lo” a tih pawh hi chutiang chu niin ka hria.
(more…)

Khawtlang tana thiltha tih

Sunday, October 20th, 2013

(Gen.12:1-3; Lk.10:33-34)

1. Mi tin kan in zawm tawn vek

Mihring hi awmkhawm tura Pathian siam kan ni a, mahni chauhva awm tur kan ni lo. Pathianin, “Mihring amah chauhva awm chu a tha lo ve; amah tanpuitu tur a kawppui awm mi ka siamsak teh ang” (Gen.2:18) a ti a. Tichuan a tira mihring pakhat chauh awm kha mi dang pakhatin a belh a, pahnih an lo ni ta a. An pahnih chuan awmdun tura ruat an ni. Mihring an lo pun zel hnuah pawh awm khawmin khua a lo indin chho ta zel a. Hei hi Pathian chatuan remruat a nih avangin khawpuiah phei chuan mihring nuai tam tak kan lo awm ta thin a ni.

Khaw te deuhvah chuan mihring awm an tlem avangin kum tam tak hnuah chuan inneihna avangin in chhungkhat kual vek an lo ni ta thin a. An inlaichinna pawh a lo thuk tual tual thin a ni. Mi tin hi famkim lo veka siam kan nih avangin tlak chhamna lai nei vek kan ni a. Kan tlakchhamna chu midangin min phuhruk sak thei.

Entir nan, thirdeng thiam
vek kan ni lo va, a thiamin hmanrua, tuthlawh etc. min chher sak a. A then mistiri thiam tak an ni a, a ni ve lovin in sak a duh chuan a sa thiam mistiri a ruai a, a mamawh a phuhruk sak a. Motor nei lovin hla taka zin a duh si a, motor neitu chuan a mamawh a lo phuhruk sak leh a. Chawhmeh zuartu chuan a nei ve lote lei turin a zuar a, sum a mamawh chu a leitu atangin a hmu a, chawhmeh thar ve lo chuan a zuartu hnen atangin chawhmeh a lo nei ve leh thei bawk a. Chu chuan mitin kan in mamawh tawnzia a entir a ni. Ram leh ram pawh chutiang tho chu a ni. Oil ngah ram (Arab ram etc.) an awm a, a nei tam ve lo hnenah an hralh a, tichuan mamawh phuhrukna an lo hmu tlang ta thin a. Khawvela ram hausa kan tihte pawh hian engkim an mamawh tawk an nei bik chuang lo va, ram dang atangin an lakluh a ngai ve tho.

(more…)

SAWRKAR THAR LO PIANG TUR ATANA HMATHLIR by ZoRO

Saturday, October 19th, 2013

Tuivai leh hmun hrang hranga Hydel Project te leh Mizoram chhunga Oil leh Gas lakchhuah tur chungchanga Mizoram Sawrkar leh Company inremna te chu sawi nawn lo ta mai ila. Hemi chungchangah hian ZoRO chuan kan duh lohna thu hi a thu leh lehkha hmangin vawi tam tak kan sawi tawhin, a thlenna tur hrang hrangah te  vawi tam tak kan lo thlen tawh a. Hetianga kan beihna hi duhthusam ram mai ni lovin, UN DECLARATION ON THE RIGHTS OF INDIGENEOUS PEOPLES: 2007 thlawhchhana kan dikna leh kan chanvo tur dik tak kan hauhna a ni a.

UNO-a he Zo Indigeneous People(Chin-Kuki-Mizo)nihna dinhmun chang ve tura ZoRO in kawng thui tak a lo zawh tawhna chu hlawhtlingin, tunah hian UNO in ‘Indigeneous People’ a tih te zingah Zo HNAM(Chin-Kuki-Mizo)te hi 2004 kum atanga kan tel ve tak avangin he ‘UN DECLARATION’ pawh hi hauh theitu nihna dinhmunah kan ding ve ta a ni.

UN Declaration zulzuia ZoRO-in Hydel Project chungchanga kan duh dan kan sawi ve hi chu- ALGERIA  ramah te pawh 100-a 90% a ram neitu ten anlo chan angin, Mizoram ah pawh tihve theih a ni a,100-a 10% hi a KHUAPTU COMPANY te chan tur a ni thung zawk ang.

Hetianga Mizoram Tuikhuah tur hi her lehlin(upside down) danglam nita sela chuan Mizoram in  kan power neih theih,kan mamawh bak,hralhchhuahna atang hian,tunlai kan Budget mamawh ang kum 5 daih hi kum khatah kan tel dawn a ni.

(more…)

Thu dik lo sawiah PWD E-in-C an puh Contractor thlangtu – Mizoram PWD: MNF

Saturday, October 19th, 2013

MNF Action Plan Committee chuan, NH-54 Kawnpui-Buichali inkar siamnaah Mizoram sorkar a inrawlh lo anga PWD engineer-in-chief, Lianchungnunga’n a sawi chu thu dik loh a niin an sawi a; kawng siam hna thawktu tur thlanna tura tender chhuahtu leh contractor thlangtu chu Mizoram PWD ngei an nih thu an sawi.

MNF Action Plan Committee hian nimin khan Aizawl Press Club-ah thuthar thehdarhtute an kâwm a; an vice president, Lalthlengliana chuan, NH-54 chu Mizoram PWD enkawl a nih thu sawiin, “Kawnpui-Buichali kawng pawh hi PWD National Highway Division-III enkawl a ni a, a enkawltu EE pawh Lalsangliana a ni,” a ti a; NH siam hna tender chu cheng vbc. 100 chin chunglam chu Central Road Transport & Highway-in a khawih a, vbc. 100 tling lote chu state sorkar buaipui a nih thu a sawi.
(more…)

September 2013, Mizo(ram) Diary

Wednesday, October 16th, 2013

1st. Sunday: Border Security Force (BSF) 42nd. battalion chuan Airfield Venga an battalion headquarters-ah an dincham vawi 48-na an lawm a, DM&R minister Nihar Kanti Chakma-in a hmanpui. BSF-te hi ram tana hnathawktu ropui, a bikin ramri bula an thawhrim avanga India ram hi him a ni. Mizoram pawh Bangladesh leh Myanmar nena inri a nih avangin BSF-te’n ram venhim hna an thawk nasa hle bawk. BSF kum 48-na lawmnaah hian deputy accountant general Hatinlal Suantak bakah, BSF hotute leh CRPF hotute pawh an tel. 42 Bn. BSF hi September 1, 1965-ah Jalandhar, Punjab-a din a ni.

2nd. Monday: Synod Committee Room-ah Central YMA hruaitute leh Mizoram Kohhran Hruaitu Committee (MKHC) hruaitute an inkâwm a, tunlaia YMA-in Phunchawng, Rangvamual, Airfield, Tuirial leh Tuikhurhlu-a ruihhlo an do chungchang an sawiho. Inkawmhona hi CYMA hruaitute rawtna anga neih a ni a; MKHC hruaitute chuan, YMA-in ruihhlo an do chu ṭha an ti a, ṭawingṭainaah pawh an dilsak ṭhin thu an sawi a, ruihhlo do kawngah tha thlah loin YMA chu kal zel se an duh a, fimkhur taka kal turin an chah a ni. Central YMA hruaitute hi president T.Sangkunga’n a ho a, MKHC lam chu an chairman, Rev. Lalramliana Pachuau, Synod Moderator-in a ho a ni.

3rd. Tuesday: Ṭawipui North khuaa pitar pakhat, Lianengi (70) leh a fapa Vanlalbela (46) leh a tupa Chhakchhuakthanga (12)-te chu an inah thi hmuh an ni. Lianengi te inah hian zing dar 7 vel khan mi kal an tum a, tukverh inhawng aṭangin an bih a, ruang an hmu a ni. He thil thleng hi an hriat velah Lunglei Police Station an hriattirin, Lunglei police-te chu endik turin Addl. SP, Stephen Lalrinawma leh OC, Zonghinga te an kal nghal a ni. Vanlalbela hian Hmawngbu khuaah nupui neiin an khawsa a, tun hnai khan a fapa nen a nute hi an tlawh a ni. He thil thleng rapthlak tak hi Lianengi chenpui a fapa, Lalramzauva nupui neih ngiat thiltih a ni a; a u Vanlalbela hian rem a tih theih loh avangin an inkar boruak a chhe hle a; Lalramzaua hian remchang zawngin a riakchhuak a; zanlaiah hetiang thil hi a ti ta mai a ni. A tum dan tak chuan a u chauh hi kutthlak tum a ni a, midangin thawm an lo neih ve si avang leh an sawi chhuak ngei dawna a hriat avangin midang hi a that tel ve ta a ni. (more…)