Keini chu thingtlang mi kan ni a

September 28th, 2013 9:28 am by lr hlonchhing

(Ka post khat em mai, hetiang lam bak hi ka ziak thiam ve chuang lo nain)

‘I pian leh murna sawi rawh’ min ti mah ula, ka nu kap karah ka piang a, thingtlanagah ka mur kan ti he haw mai ang. Min dem suh u, dem chi kan ni lo, tahpui chi kan ni. Hawh, mi tahpui hawm hawm teh u.

Put tawrh leh ei tawrh bak thiam leh theih kan la neih loh lai hian, nangni zawngin internet hmanga rawra chhut in lo thiam hman lek lek tawh a. Vaihlo chauh hi zuk tur emaw kan tih laiin, nangni chuan Marijuana thlenga zuk nachangte in lo hre leh hman pek a. Kan ngaisangin nihlawh kan ti lutuk che u ti ila, dawt kan sawi tihna erawh a ni ang.

Iptepui lian hel hawl nen, kawla nichhhuak chhiara kan ta leh hlawhchhuah tak meuh Maian tel kan zakzeh hawn laiin, nangni chuan mi chanvo leh ta tur liau liau in lo paipawn run thei a. Keini’n kan thil neih kan phur a, nangni zawng in thil neihin an phur thung che u a, inawhawm thin ngawt mai.

Keini thingtlanga kamding fanute aia, Muster roll-a thawk fanute keartui a san zawk chhung chuan, pawngsual kan la tawk ve lo turah kan inngai ngawt te hi atthlak hle mah se, kan lawm a la tling thung. Bawkbawn bai, nghathu leh aieng telh Sunday zinga kan la hmeh thei a nih phawt chuan, kan la lawm.

A ni asin, khawpuia chi seh ilo lam tura kan lo chuan kai ve chang ni te hian, “A thing bawn tawp, thing mahse a thaw tal uih lo se” min tih supte hian, kan lo zak ru ve thin lutuk asin. Kan mawl leh kan thin zia pawh kan hai bik lo ve, in hriat ang leh dai hriat ang hi kan la rawn tuipui pha lo mai zawk a ni. Tih tak emah chuan, kan Vawkpui Rangi sawn paina Vawkpa leh a chhiat tak thute hi in hre bik chuang em ni kan ti ve tlat.

Halleluiah Chorus hmanga vun var lem in chan lai hian, nun in ning ru tawh tih hi mawl hle mah ila, kan hre ru ve asin. Hallleluiah Chorus tlan sana, kan hla chuam Thlawi Law Law Chhai Hi A Fair Zawk a ni tih hi min la rawn tawmpui ang tih kan ring tlat asin. Chutih hunah chuan Mengrei Generation leh Pialral Theory ngaisangtute kan lo nuih sawh ve tawh ang che u, na in ti ve ngawt ang le!!

Mahse, hei hi erawh a na kan ti thin. Dam loh nikhuain kan khuaah inentirna a awm ve mai thin lo hi a ni. Kan nun inchhan hman tur kan nih laiin, kan nunna hlu tak kan lo chan fo tawh a, a rilru nat thlak thin ngawtin ka hria. Chhangkhatna (Contraceptive Pill) te hi Vawk hurna a ngaiin, kan vawkte kan lo tulh fo tawh bawk a, hur a hnekin an ching fo tawh bawk. Hetiang kawnga min finchhuahtu leh, min enkawltu erawh kan mamawh ve thin ngawt mai.

Rilru nat thlak tak pakhat chu hei hi a ni. Sazu tur leh di thahna hlo kan hman pawlh nawk thin hi a ni bawk. Sazu tur, di thah nana kan hman chang leh di thahna hlo sazu tur atana kan hman pawlh nawk chang hi chuan, a nghawng a na thin ngiang mai. Di ti rem lem lo hian, kan sazu te hi kan thah phah lek lek zawk fo va. Kan khaw nu fianrial tawngtai tamna ber pawh hetiang lampang case hi a ni nawk ti ila, kan sawi sual tam awm love.

Khawpuia in tu leh fate chu an la vannei bik ngawt mai. Keini thingtlang naupangte chuan infiamna te hi kan han nei tlem khawp a. A fingvar zual deuh te pawh an la pang aw inzial tup tup bang lo va. T.V leh Cell Phone han khal tur nei ve lem lo ta nafam chu, an mit an sawisel ve ngai lem lo thung a, patling thankin thah tawh hi kan lawm a la tling hle thung. Rualawh hi na ve thin hle mahse, awt pha ve tur chuan Tuirial Hydel Project tal kan mang lamah tal kan man phak a ngai rih si a ni.

Ni e, mi fate pawh thla leilung an rah tawh chuan, Zawngtah kung sang thei ang bera lawnin, suangtuahna nen thla lei lung kan chuan ve poh a ni ang chu. Chumi hma chuan, kan thingtlang nihna hian min la delh bet dawn a la ang a. Khawpui pa lunglawm ang hi chil puta kan la thihsan lo te a nih ngai chuan, khawpui lamah rual awt leh zual turin kan la rawnin vawm lut ve thawr mai thei a nia.

Similar Posts:

Recent Posts:

15 Responses to “Keini chu thingtlang mi kan ni a”

  1. 1
    Awmtea Leo Khiangte Says:

    Comment tan dawn ila.

    Report this comment

  2. 2
    lr hlonchhing Says:

    A va reh ve :-D

    Report this comment

  3. 3
    chhana Says:

    Chhangkhatna vawk pui pek chu a fuh lo ve ngawt ang.
    A ngaihnawmin a lunglen thlak hle mai, i thil post chu.

    Report this comment

  4. 4
    Hriata kawlni Says:

    A ngaihawn dap²ve..ziak thiam hle mai.

    Report this comment

  5. 5
    Hriata kawlni Says:

    A ngaihnawm hle mai ..ziak thiam hle mai.

    Report this comment

  6. 6
    lr hlonchhing Says:

    Misual.com hi fb avangin a ram zo ta.

    Report this comment

  7. 7
    Dr John Says:

    (Y) a tha hle mai

    Report this comment

  8. 8
    Manuni Tlau Says:

    I ziak thiamin, a ngaihnawm hle mai. In ti khawpui mi deuh, eng teh ual ni si lo hi kan tam hmel :-)

    Report this comment

  9. 9
    chhana hlawnchhing Says:

    Chhiar nuam hle mai a.

    Report this comment

  10. 10
    Dr Mahminga Sailo Says:

    Naupan laia ‘chumi te chhungkaw hla chu’ tia hla thenkhat chhungkaw bil hlaa kan ngaihruat thin angin, he thuziak chu kan tana ziak a ang bik riau mai.. (Y) :-)

    Thu hi i thiam ngawt mai, reh vang vang mah la; i’n post leh zauh hi chuan hmaih phal chi a ni tlat lo..

    Report this comment

  11. 11
    rotekawlasepa Says:

    Thingtlanga piang leh seilian, khawpuimi nupuia nei lawisi ka ni a. Kan nu pawh hian thingtlang nun hi a hre pha hauh law.

    Zankhatchu, a rei deuh ta, khumlaizawlah ka nupui fanaute nen kan titi a, Nuber hoin kan naupan laia kan retheih thin ziate, school kan kal laia pencil pawh tawite a nih thleng a ipte hruia lazaia kan thlunte, a nihlohleh mau hmawra kan thun thin thute leh thingtlang naupang nun ka sawi kha an ngaithla thap mai a. Nakinah chuan kan fapa chu rawn tawngchhuakin “a ho e, ngaihnawm loh e” an ti mai chu ka dang chiang teh a sin. Nu ber nen kan inena kan nui ringawt mawle. An tan chuan a ngaihnawm loh bawk lah taka!

    Report this comment

  12. 12
    chhana hlawnchhing Says:

    Chhiar nuam khawp mai kei pawh thingtlang tlangval ka nia nula tlangval in hmangaihna ah pawh thingtlang ho kan in hmangaihdan hi a tak in a romantic zawk in ka hria.Chrismas leh kumthar dawn a zochhang den ringawt pawh hi nuam nia lo vil rawh aw min tih phei chuan ni hi a tla har thin a sin

    Report this comment

  13. 13
    Chhuaklinga Says:

    Thingtlang mi nih i ti nuam e, ka hawi champ deuh sawt. :)

    tren tren

    Report this comment

  14. 14
    lr hlonchhing Says:

    Misual.com lam nge nge, kawmnen pawh a dangdai deuh e…

    Report this comment

  15. 15
    meroby Says:

    lung van len thlak ve aw,, tlam ah Mai an hnah bei ngei chhun chaw fak hmeh a tan han bei zawr hnup mai ei leh ka van chak tak em aw.. Aikaiden zan ngei a Tingtang nen a thingpui sen hang leh Kur tai pir pah a zai te kha van nuam tak em aw.. kha tiang ka hmuh phak loh na a rei tawh si a..kan u te ho Fanghma no a chhawl inthuai lo ei ruk hrat hun lai pawh a rei ve ta hle msi..

    Report this comment