Mizoram Electric Power Dinhmun Leh Hmalakna Te:

August 21st, 2013 8:53 pm by Hruaitluanga Bawitlung

Mizoram hian electric power kan mamawh zat mahni a kan intodelh loh avangin ram pawn hmun hla tak tak thleng atangin kan lei a ngai thin a mahse kan mamawh leh duh ang zat hi kan hmu thei ngai lo. Electric Power chungchanga kan ram harsatna hi Mizoram a sawrkarna siamtu tan luhaina thlentu a ni ziah thin. Keimahni a kan intodelh hma loh hi chuan electric power chungchangah inpuhna leh insawifiahna tawp thei lo sawrkarna siamtu atangin leh opposition atangin a awm reng ang. Heng hi tawngkam thiamna leh hnialhrat vang mai mai a tih chi a ni lo. A tehna dik a tih chi a ni zawk, chuti anih loh chuan awmze nei lova hun khawhralna mai mai a ni.

Kum 2007-08, 2008-09 khan MNF sawrkarin mipui hnenah power 169.39, 165.38 Million Unit a sem theih laiin Congress sawrkar erawh chuan kum 2011-2012, 2012-13 ah chuan 252.30, 282.06 Million Unit zet mai mipui hnenah a sem a. Hetih lai hian Mizoram economy a thang nasa em em a MNF sawkar lai 10th Plan(2002-2007) chhung khan Mizoram Economy GDP chu 5.1%*(Planning Commission of India) in a than laiin Congress sawrkar lai 11th Plan (2007-2012) ah chuan Mizoram GDP chu 8.85% in a thang (hei hi Agriculture Sector 10th Plan a 0.15% a thang thin kha 11th Plan ah 6.7% in NLUP vanga a than chhoh vang a ni). Mizoram Per Capita Income (Mi tinin kum khata sum kan lak luh chawh rual) pawh Rs. 38,582 (2008-2009) atangin Rs. 54,689 (2011-2012) ah a kai chho ta dawr reng a ni. Chuti anih si chuan kan khawsak te pawh a lo awlsam tan a electric kan mamawhna tur thil bungrua leh khawl pawh kan lo nei hnem ta, Congress sawrkar hian mipui hnenah power min pe tam tulh tulh mahse kan indaih thei ta tak tak lo. Hei hi kan sawrkar hian hre rengin ram changkan chhoh zel avanga kan state in power kan mamawh ang kan neih theihna turin keimahni ngei hian kan mamawh zat kan siam chhuahna turin heng ang hian hma a la ta reng a ni.

I. Project thawh mekte :

1. Tuirial HEP (60 MW) : He project hi Central Sector hnuaiah NEEPCO hoin an thawk a, Saipum bula awm a ni. 60 MW pechhuak thei tur a ni. Kum 1998 khan he project lungphum hi Pu Lalthanhawla’n a phum a, hna pawh thawh tan nghal a ni. Vanduaithla takin compensation ngiata lungawiloten rokhawlhna an siam avangin kum 2004 khan hna chawlhsan a ni.
He project chhunzawm leh anih theih nan sorkarin theihtawpin hma a la a, Central sorkara thuneitu te hnenah harsa takin he project chhunzawm lehna tur hian a sawi chhuak a, January ni 14, 2011 khan Central Sorkar chuan remtihpuina (approval) chu a chhuah ta a ni. Order chhuah anih atanga thla 36 chhunga zo hman turin tih a ni nghe nghe a ni. NEEPCO hovin hna an thawk chhunzawm leh tawh a ni. Tuirial Project Generation atang hian Mizoram chuan 12% free power a dawng dawn a ni. A bak pawh Mizoramin Power Purchase Agreement neiin, Central Electricity Regulatory Commission in rate a siam angin a chang bawk ang.

2. Kolodyne-II HEP (460 MW) : Kolodyne-II HEP hi Lawngtlai leh Saiha inkara Kawlchaw lei (bridge) atanga lui hnar lam 3 km vela tuikhuah tur a ni a. Tuikhuah atang hian tui hi tunnel 3.10 km a seia hruaikawia Power House hmun Saizawh rama khawh chhuak tur a ni. Power 460 MW pechhuak thei tur a ni a. Original DPR, CWC ho siam ang chuan estimated cost hi ` 2,985.20 crores a ni.

Ni 22.12.2008 a Mizoram sorkar leh NTPC ten Memorandum of Agreement an sign ah chuan he project hi NTPC in BOOM (Build, Own, Operate and Maintain) basis in an thawk ang a, Mizoram sorkarin 13% (12% – State sorkar tan, 1% – Local Area Development Fund) free power a dawng dawn a ni.

NTPC te hian clearance tul zawng zawng an buaipui tur a ni a. Tunah hian DPR siamthat ngai laite, geo-technical survey tih that ngaite an ti tha mek a. Techno-economic clearance hmuh a ni tawh, a bak clearance ngai dangte an bawhzui ang. Project tan tak tak hma a buaipui ngai (Pre-construction activities) chu tunah hian an tan tawh a ni. Lawngtlaiah Site Office neiin tunah hian NTPC ten hma an la mek a ni.

3. Tlawva HEP (5 MW) : Tlawva Project hi 5 MW siamchhuak thei tura duan a ni a. Khawbung atanga 10 km a hlaah Tlawvapui khuah tur a ni. He project hna thawhna tur atana sum mamawh hi NABARD-RIDF Scheme atangin Rs 51 Crore kan hmu tawh a, MNRE atangin Rs. 6.5 Crores subsidy hmuh a nih tawh bawk.
Tunah hian Nortech Projects Pvt. Ltd , Kolkata chuan January, 2013 atang khanTlawva HEP sak hna hi an thawk tan tawh a ni. He hna hi Nortech Power Projects PVT. Ltd hnenah Turnkey Contract a pek a ni.

II. Project ruahmanna kal mekte :

Kum 2008 inthlanpui zawh hnu lawk khan Mizoram Sorkar chuan Hydel Project Development lamah chak zawka hma la tharin project engemawzat thawk turin India rama firm hmingtha tak takte nen THUTHLUNG (Agreement/Understanding) a siampui tawh a. Chung agreement/MoU signed tawhte chu a tlangpui I lo thlir teh ang.

1. Lungreng HEP (815 MW) : Lungreng HEP hi longitude 93008` leh latitude 23000` ah Lungreng tlang zawn vela awm a ni. Dam Site hi Serchhip District chhungah a awm a. Power House Site erawh hi Lunglei District chhunga Thingsai khaw zawn velah a awm thung a ni. Tuikhuah atangin tui hi tunnel 17.73 km thuiin power house ah hruaikawi a ni ang. Power House atanga tui hi Kolodyne ah a in paih chhuak leh dawn a ni. Lungreng HEP hming a putna chhan hi Lungreng tlang hnaiha dam site a awm avang a ni. Power 815 MW pechhuak thei tura beisei a ni.

He project hna thawk tur hian Mizoram sorkar leh NEEPCO chuan ni 23.03.2010 khan Memorandum of Understanding an sign a, NEEPCO hian Survey & Investigation bakah project tih puitlin thlengin BOOM (Build, Own, Operate and Maintain) basis in an thawk ang a. Mizoram sorkarin Project generation atangin 13% free power a dawng ang. Clearance tul zawng zawng pawh NEEPCO hian a buaipui vek dawn a ni.

2.Chhimtuipui HEP (640 MW) : Chhimtuipui HEP hi Kolodyne lui hnar lam Vawmbuk khaw zawn thlang hreta tuikhuah tur a ni a. Tui hi Tunnel hmanga hruaikawia Fungkah khaw zawn vela Power House khawl khawh vir tura duan a ni. Leiverh sei zawng hi 17.25 km vel tur a ni. He project hian power 640 MW pechhuak thei tura beisei a ni.

Lungreng HEP ang bawkin, he project hna thawk tur hian Mizoram sorkar leh NEEPCO chuan ni 23.03.2010 khan Memorandum of Understanding an sign a. NEEPCO hian Survey & Investigation atanga project tih puitlin thlengin BOOM (Build, Own, Operate and Maintain) basis in an thawk ang a, Mizoram sorkarin Project generation atangin 13% free power a dawng ang. Clearance tui zawng zawng hi NEEPCO in a buaipui vek dawn a ni.

3.Mat HEP (76 MW) : He project hi Kolodyne-I HEP kan tih CWC hoin investigation an zawh fel vek tawh; amaherawhchu Kolodyne-II HEP tuikhuah tihsan leh avanga Power House site a chim dawn avanga power house sawn (relocate) ngai ta kha a ni a. Mat luiin Kolodyne a fin hma deuha khuah tur a ni. Mat HEP tiin a hming pawh hi thlak a ni. DPR awmsa hmangin Power House sawnna tur remchang zawn a, a tul anga DPR pawh siamthat tur a ni. A hmaa 120 MW pe thei tura chhut kha

Power House sawn chhak hret a ngaih dawn avangin 76 MW pechhuak thei tura ngaih a ni.
Ni 23.03.2010 khan Mizoram sorkar leh NEEPCO chuan Memorandum of Understanding (MoU) an sign a. MoU ah chuan re-survey hna leh project tih puitlin hna hi NEEPCO hian BOOM (Build, Own, Operate and Maintain) basis in a thawk ang a, Project generation atangin Mizoram sorkarin 13% free power a dawng ang. Clearance ngai zawng zawng hi NEEPCO buaipui vek tur a ni.

4.Tuivawl HEP (42 MW) : Tuivawl HEP hi Aizawl District chhunga East Phaileng khaw bul, Aizawl atangin 131 km a hla a awm a ni. Power 42 MW pechhuak thei tur a ni a. Tuikhuah (earthfill dam) 98 m a sang khuah tur a ni a. Tui hi tunnel 3.14 km hmangin Power House ah khawl khawh vir turin lak pen tur a ni. Power House ah hian khawl pathum 14 MW vek bun tur a ni.

Investigation hna hi Central Water Commission in an thawk a, Detailed Project Report an peihfel hnuin Mizoram sorkar hnenah an thehlut tawh a ni. Estimated cost hi Rs. 379.95 crores (2008 PL) a ni. He project thawk tur hi Empowered Committee in uluk taka an ngaihtuah hnuin M/s Subash Projects and Marketing Ltd. (SPML), Kolkata hnenah hian Letter of Intent pek a remti a. Ni 24.11.2010 khan Letter of Intent chu pek a ni. M/s Subash Projects and Marketing Ltd. (SPML), Kolkata leh Government of Mizoram-in ni 03.11.2011 ah MoU ziahfel a ni. Tunah hian Re-Survey hna an thawk mek.

5.Tuirini HEP (38 MW) : Tuirini HEP hi Sesawng atanga 16 km a hla a awm a ni. Aizawl atangin 54 km vel a ni. Kum 1996 khan Central Water Commission in Survey & Investigation an tan a. Kum 2007 khan DPR peihfel a ni a, Mizoram sorkarah an submit tawh a ni. Tuirini HEP hi power 38 MW pechhuak thei tur a ni a. Estimated Cost hi Rs 259.97 crores (2007 PL) a ni.

Tuikhuah hi lei chhun pawn (Zoned Earthfill Dam) 111m a sang tur a ni a, tuikhuah atanga Power House thlenga tui lak penna Head Race Tunnel hi 2.42 km a sei a ni. Power House hi tuikhuah atanga 3.50 km a hla; lui mawng veilam vau kamah a awm ang. Power House ah hian khawl pahnih 19 MW ve ve pechhuak thei bun a ni ang.

He Project pawh hi Tuivawl Project ruala M/s Subash Projects and Marketing Ltd. (SPML), Kolkata hovin Expression of Interest an thehluh zulzuiin Letter of Intent ni 24.11.2010 khan pek a ni a, M/s Subash Projects and Marketing Ltd. (SPML), Kolkata leh Government of Mizoram-in ni 03.11.2011 ah MoU ziahfel a ni. Tunah hian SPML, Kolkata hian Re-Survey hna an thawk mek.

6.Bairabi HEP (80 MW) : Bairabi Dam Project hi 80 MW pechhuak thei tur a ni a. Investigation hi atirah National Hydro Electric Power Corporation in 1982 khan an thawk a, DPR pawh 1984 khan peihfel a ni. Kum 1996 khan Survey tih kim lohte telh kim veka DPR siamtha turin Brahmaputra Board rawih an ni a. Anni hian DPR thar kum 2000 khan an peihfel a, Mizoram sorkarah an thehlut a ni. Clearance tul zawng zawng pawh hmuh vek tawh a ni.

Tun Kum 10.08.2012 khan Pu Lal Thanhawla kaihhruai Mizoram sawrkar leh M/S Sikaria Power Ltd. in Bairabi Dam Project sakna turin Memorandum of Understanding (MoU) an sign leh thei ta chu a va han lawmawm em. Tunah hian re-Survey hna thawh mek a ni.

7.Tuvai HEP (210 MW) : He Hydel Project hi Ngopa bula din tur a ni a, khawl pathum (3), 70 MW theuh bun tura ruahman a ni a. He hna hi Public Private Partnership (PPP) mode a thawh tur a ni. He hnathawk tura contractor thlanna tura hmalakna hmasaber “Request for Qualification (RfQ)” International Tender chu Dt.10.06.2011 khan tihchhuah a ni a, 01.09.2011 ah tender hawn a ni. Chumi hnuah hnathawk thei tur Company hnenah technical leh commercial bidding te tiin, contractor tur thlanfel a ni anga, agreement siampui a ni ang. Hetiang power generation project hi PPP model a India rama hmasaber a ni bawk. Tuivai Hydel Project (210 MW) chu Central Sawrkarin State Sector a khuah turin ni 12.06.2012 (Nilaini) khan an rawn pawm(approved) ta. He Project hi State Sector Project anih dawn avangin a Power siam chhuah zawng zawng hi Mizoram Sawrkar chan tur a ni anga, kan State mamawh bakte chu State dangah hralh tur a ni dawn a ni. He Project thawh dila tender chhang tute atangin Sawrkarin a thawk tutur a thlang fel thuai ang a, kum 5 chhunga he project hi zo hman tur in hmalak nghal a ni dawn a ni

*According to Mizoram Economics & Statistics Dept. Mizoram GDP Growth Rate is 6.57
Source: Planning Commission of India, Power & Electricity Dept., Economics & Statistics Dept., JERC for Manipur & Mizoram.

Similar Posts:

Recent Posts:

12 Responses to “Mizoram Electric Power Dinhmun Leh Hmalakna Te:”

  1. 1
    ThaiBoy Says:

    Mizoram Sawrkar hian Power lamah hian nasa takin tan ala engtik ni ah emaw chuan Power ah hian kanla in todelh dawn khawp mai. Sawrkar emaw Politician emaw in puhmawh tawn mai mai lova heng Project te alo puitlin nan hian kan thiamna leh finna kan thawh a Sawrkar pawh theihtawp a finchhuah hi kan bat ani.

    Report this comment

  2. 2
    Terema Chhakchhuak Says:

    Mizoramah hian Congress hi term thum tal a zawnin sawrkar leh se NEEPCO chu an hlawk mai mai ang chu aw. hehehe
    A tul vak vak lo khawp mai. A lian zual pahnih khat em maw ni vel lek khi hma se la a tha zawk. Mizoramin power kan mamawh hi a la tam vak lo. Peak value-ah pawh 120 MW a kai lo tluk a ni. Chu bakah chuan hydroelectric power plant reng reng hi kum 30 vel bak hi a hlawk tak tak meuh lo. Kum 30 hnu lamah chuan cost of production a sang tawh a, chu vang chuan hydroelectric power plant reng reng hi a life span hi kum 30-40 velah an chhut tlangpui thin (India ramah chuan). Kan tui khuah theih zawng zawng khuah zawh vek kan tum phei chuan environment pawhin a tuar lutuk ang asin le!

    Report this comment

  3. 3
    chhana hlawnchhing Says:

    A hlawhtlin hun a ngahhlel awm khawp mai a.

    Report this comment

  4. 4
    VL Hminga Says:

    Tuikhuah hi electric siamna atan hman raw tha tak ni mah sela. Kei zawng kan ram environment a nghawng nat tur zia ka chhut hian ka thlawp lo. Project lian tham ah hian Mizoram chan tur hi ala tlem em em zui a nia…

    Report this comment

  5. 5
    chhana Says:

    A bengvarthlak hle mai.

    Report this comment

  6. 6
    zualbonez Says:

    durtlang leitan tleng khuap ila thianpa…hehe

    Report this comment

  7. 7
    muana97 Says:

    Tun a i rawn tarlan Project-7 a tang ringawt pawh hian Power Generate tur zat chu 1901 MW zet a tling der mai !!!. A tak erawh a la hla si a…!!! Tun ah hian neuh neuh a vang in la Commissioned chiah lo mahse Serlui a tang in 12 MW leh a bak Small Hydel Project a tang in tlem a zawng kan nei mek a, Tuirial 60 MW chu 2014 ah zawh beisei a nih thu Chief Minister meuh in tunhnai ah a sawilang bawk. Mizoram hian tundinhmun ah hian Peak Hour ah 100 MW lo liam kan la mamawh loh bak ah kum-20/50 dang pawh lo awm leh ta se 200/300 MW bak Power hi kan mamawh in ka ring lo ve mai mai a. A chhan chu Power mamawh tam Industry lian dinna tur in, tlangram chhengchhia kan nih miau a vang in Transport Connectivity i.e. Road, Train, Air Connectivity a tha tawk thei tak tak lo ang.
    Tun a Project-7 rawn tarlan te zing a tang khian Tuivai 210 MW leh Chhimtuipui 640 MW te-2 bik chiah hi tih tak zet in Sawrkar mek leh nakin a lo la Sawrkar turte hian hmalakna tur a neih chho mai se, a tawk viau lawng maw? Mizoram a lui zawng zawng tih tawngkam han hman ngawt ang chite hi chu a sawitu leh a sawi hretute pawh in tu’n an aw lem chuan loh bak ah tawng chuang satliah mai a ngaih loh theih a ni lo.
    A thuhrim in Hydro Electric Power Project te hi ‘Hnawl leh Chirh a lenkhawmte (Silt Deposit) a vang in kum 25 chunglam ah chuan enkawl hautak tan chho hle tih a ni. Tin, heng bak ah hian Tuikhuah lian tham in a chimpil tur ram zau tak, khawi khua khua emaw a cheng ten huan leh lo an lo neih thinna te leh tuan leh mang a ta tawh nungcha tam tak te chenna chu tihchereu in a lo awm dawn tihna a ni bawk.
    Tun ah mai pawh Serlui 12 MW tuilhuah bulhnai a khaw thenkhat chu a tuikhuah him tawk lo deuh a an hriat a vang in, hlauhthawnna hun eng emaw lai khan an nei tih tualchhung chanchinbu thenkhat ah a lo lan kha. Tun hnai ah Uttarakhand State a chhiatna nasa tak, mi engzat chiah nge thi tih pawh a zat chiah sawi theih ni lo kha a tirlam ah chuan Media in ‘Natural Disaster’ ti in an tarlang a; a hnulam ah chuan “Man Made Disaster’ an tih tak ber kha..!!!
    Mizoram hi Oil leh Gas lipui chung a awm, Oil lipui phei chu Khawvel a Oil leh Gas ngahber te zing a sawi Iran ram ai a ngah zawk ah kan Politician thenkhat ten mipui hriat a an sawi lan hi a dik a nih ngai phei chuan hautak deuh a tuikhuah tum hi I atchilh lo ang u. Kan mamawh tawk leh him tawk bak a chuangliam a neih tum kher hi nakin lawk ah mahni tan chhiatna rapthlak tak kan tan tawh ve palhna tur a ni hlauh thei a nia. Hawh u, Phengphehlep a khua a tlai hma ngei hian, Bengsik in kan kawngzawhlai hi ngaihtuahnawn fo thin teh ang U…!!!

    Report this comment

  8. 8
    Eve Says:

    Buanahmaakherh sawi ang deuha ka hmaa mi thenkhat thusawi hi……akekekeke….

    tupawh sorkar se…. power neih tam hi tum vek se…. power hi chu nei tin ten ila,forenahte han hralh chhuak ve hem hem ila tih nakalaiaaaaa…..

    hmun tam taka khuah kha chuan a khaw hnaite tan a chhawrnahawm bik dawn alawm….. chuti lo va, km tam tak ami chu thipui leh ruahsur leh leimin ilovah a chhe duh em maiiii….

    Report this comment

  9. 9
    Terema Chhakchhuak Says:

    #7 pawh khi electrical engineer emaw a nih loh vek chuan zir mek emaw zir zo tawh emaw a nih ka ring. Buana hmaa kherh kan ti a, kan nuih a za a ni mai thei. Mahse, nuihza thei din hmuna din dawn chuan zir ve phawt a ngai a nia. akekeke

    Report this comment

  10. 10
    Hruaitluanga Bawitlung Says:

    NEEPCO hi Mizoram sawrkar hian purchase agreement a neih puia a commission tirh atanga kum sawmthum chhung chu unit khatah Rs 3.50 paise in he HEP atanga power an genrate hi a lei sak ang tih a ni. An commission hun meuh ah chuan NEEPCO in power an generate man hi Rs 3.50 aiin a to tawh mai thei mahse Mizoram sawrkar chuan a leisak reng ang, kum 30 hnuah phei chuan Rs 3.50 ai chuan a to tawh viau anga mahse chumi huna a power unit rate leh Rs 3.50 inkar chu Mizoram sawrkar hian a hlep vek tawh ang. Electric a kan sum hmuh tur hi kan pawisa sum hnar ber a la ni dawn a ni.

    Report this comment

  11. 11
    Puii Says:

    Eheu…. hruaitluang, hlep hlang ani thei dawn a ni maw? chutih hun chu Pathian zarah kan zavai hian kan la dam thleng ngei ang chu,,,,

    power han hralh chhuah ve ham ham ka va chak tawh em… :-) (F)

    tun hun hi chu kan va ngai dawn lo em… (O) O KA NGHAKHLEL TAWH E …

    Report this comment

  12. 12
    hming_a Says:

    Power Purchase Aggreement ah hian a man an decide hi a generating company te hian an chhut sa vek thin (profit tur zawng zawng tel in). Tin, hydro ah hian generating cost hi fixed cost a nih avangin a hnuah a to thut thei lo. He ti ang hi khawvel a thil thleng pangai a nih avangin kan vanneihna bik a awm lem lo.
    Kan hriat ve tura tha chu capacity ang chih chiah hian Hydro power te hian an generate lem lo a, tui hmang an nih avang in Plant Load Factor te hi an sang lem lo.
    http://en.wikipedia.org/wiki/Capacity_factor
    Amaherawh chu hma sawnna tha tak a ni ngei mai
    Zawhna tlem ka zawh duh te:
    1. Bairabi Hydel hi eng vang a MOU ngai nge anih? Public Private Partnership a ni em ni? Lo ni ta se, tu in nge loan la, tu nge ni guarantor?
    2. Tuirini ah hian enga ti nge ni MOU a awm? LOI pek tawh hnuah MOU a awm leh chhan hi a hriat ve theih em aw?
    3. CERC recommended tariff for Hydro electric project hi a hriat theih em aw?
    4. Local mi te tan a hna awm ve sawrkar hian a reserve em le? Skilled and unskilled labour a tan te hian eng tin nge ni hma a lak? MOU an hian a awm em?
    5. Project execution hi a lan mai danah chuan tariff based bidding a ang hle mai. MOU a awm chuan ownership hi engemaw chen chu contractor hian a chanhmel bawk, a aia chiang deuhin a hriat theih em aw?
    6. Public private partnership scheme ah hian power hralh chhuah zawng zawng hi eng tin nge ni sawrkar hian a chan theih? partner company hian buyout scheme an hmang dawn em ni?
    Ka tui ve zawng tak mai subject a han awm ve hlauh chu, ka hriat zawng ka han ti ve a ni e.
    Hmasawnna erawh chu ropui tak a ni dawn e, mipui hian kan chan tur hi kan hriat ve erawh a ngai dawn a ni e.

    Report this comment

Leave a Reply

You must be logged in to post a comment.