CYMA LEH RAM LEH HNAM HUMHALH

August 9th, 2013 2:40 pm by Athana Chhangte

Ni 7, August zana Local news leh ni 8, August 2013-a Vanglaini chanchinbu chuan Pu F.Vanlalenga leh a thuihhruaiten thuthar therdarhtute an kawmna an rawn tichhuak a, An thusawi hian rilru a khawih hle a ni.

An inkawmna tlangpuiah chuan, tunhnaia Central YMA hmalaknaa Phunchawng leh Rangvamual-a zu zuar leh ramdangmi senghawi hna thawh meka mimal inhuatna leh inpuhchhiatna avanga an veng chhungah harsatna a thlen mek thu a ni a. Tin, he hmalakna denchhena din Mizo Insuihkhawm Pawl (MIP) thiltihdana an lungawi lohna leh dan loa awmte leh thilsual titute inlungrual taka beih tlan a, thuneitute hnena pek zel an duh thu te a ni a. CYMA-in section YMA leh Local Council aia MIP thu a lak zawk avanga zu zuar emaw, ramdangmi emawa puh chu sawisel ngaihna a awm loh thu leh thu hre ril nih pawh a ngamawm loh thute a ni ber. A tawi zawngin Phunchawng-a ralmuanna thlen tura Sawrkar leh CYMA ngenna a ni ber e.

Amah Pu F. Vanlalenga hian Phunchawng Local Council a nih mek thu leh Chaltlang Branch YMA hnuaia awm Phunchawng section YMA-ah leh khawtlang huap pawl dangahte nihna a lo chelh tawh thin thute a sawi a. Tuntum thuthar thehdarhtute a kawm dan erawh a nihna lam telloa a mimal thahnemngaihna a ti a nih thu a sawi thung.

He inkawmna atang hian CYMA-in ram leh hnam humhalh a kalpui mekah hian zawhna/ngaihdan awm thei ta chu han tarlang ila.

(1) Engvanga mipuite thlanchhuah Local Council leh section YMA hian rin an hlawh zawh loh a, he MIP hi din ngai ta nge a nih? Tin, an harsatna hi sawrkar chinfel tur nge CYMA chinfel tur zawk?

(2) YMA kumpuan ram leh hnam humhalh CYMA in a kalpui dan hi hriatthiam a har deuh chu a ni. Eng chin hi nge ram leh hnam nia CYMA hian a ngaih le? Ram leh hnam humhalh a tum danah chhim lam ADC pathum te leh CYMA chu an inkalh phawt a, chutah hmar lam hel pawlte nen inmil lo lehin YMA branch leh group engemawzat thiah hial a ngaih phah a. Chumi hnuah khawchhak unaute hnawhchhuah beihpui a thlak leh ta daih a. A tactic leh strategy hi mipui mimir tana man phak loh khawp a ni ta em ni?

(3) Tihluihna leh pawl chakna hmachhuana ram leh hnam humhalh hi thangtharte rilrua tuh atana thil tha a ni angem? Tuna kan kalpui dan hi tun atanga kum 20 hnu velah ram leh hnam humhalh an tum dan ni dawn ta ang se, an survive zo tak tak angem?

(4) Tharum hmangin kan pi leh pu te khan ram leh hnam humhalh tumin Sap an do a, tharum hmang vekin min awp ta hlauh thung. Ram leh hnam tan tia silai chelekin MNF-in India sorkar an kap a, tharum hmanga thungrulha, laklet kan ni. CYMA-in ama chakna hmanga tihluihnaa hnawhchhuah hmanga ram leh hnam humhalh a tum hian eng ang chiaha ram nuam leh hnam him nge min thlenpui dawn?

(5) Ramdangmi awmte a hnawhchhuah zawh hnuah CYMA hian hnamdang dan loa sumdawngte leh awmte hi a hnawhchhuah leh tur ‘target’ chu an ni mai angem?

(6) CYMA in zu do beihpui a thlakah hian zu in thin leh zu zuar hi YMA member deuh vek an ni mai lo’ng maw? Zu hi lo do rem vek ta pawh ni se zu intu in duhna rilru leh ruih chakna thinlung hi tihluihna hmang hian a do rem a ngem? Moral reformation ngai thil a ni zawk lo maw?

(7) Inhnawhchhuah theihna power hi CYMA kuta pek a ni ta em ni? Nge dan loa awm ramdangmi leh zu zuarte senghawi tur hian sawrkar hian chakna leh pawisa a nei leh tawh lo zawk?

(8) Kan telna pawl hmalaknaa kan rilrem loh thil bawhzui a ngaihin leh dan kalh hiala chetna a thlen chang hian siamthat tuma pen chhuak ngam nge kan nih a, mahni chhia leh tha hriatna pawh hmang ngam lo a, engmah sawi ngam lo nih?

Similar Posts:

Recent Posts:

19 Responses to “CYMA LEH RAM LEH HNAM HUMHALH”

  1. 1
    Nirvana Says:

    CYMA hi hman atangin ka kalh thin a. mahse mizorama illegal immigrant leh state dang atanga rawn lut an tam tak em vanga tan an la hi chu ka support tlat.

    Hemi policy chungchanga Mizoram mipui ten an support zia entirna chu political party pakhat mahin an sawisel loh hi.

    Mizo leh Mizoram hi thil dang daih ani. Mizo chu ethnic community pakhat Mizoram leh India hmarchhak leh ram danga cheng. Mizoam chu India hmarchhak a state pakhat, Mizo leh Mizo lo tam tawk awmna. Mioram hi Mizo tan chauh anih lohna a rei tawh a,Mizo zawng zawng tan ani chuang si lo.

    “Ni 7, August zana Local news” ka en ve si lova, MIP pawh ka hre ngai lo.

    Report this comment

  2. 2
    Dr Mahminga Sailo Says:

    Sawi tur ka hre tlat lo mai, mahse ngunthluk leh fimkhur taka hmalak thin ni se (an ngaihtuah nasa viau tho mai thei a) a tha awm mang e. Hun reilotea a reh leh mai zawngin a pawi dawn em mai.. (N)

    Report this comment

  3. 3
    Athana Chhangte Says:

    Nirvana thanks, Dan loa pem lut chungchangah hi chuan mipuite ngaihdan chu a inang tlangpuiin ka ring. Tha kan ti lo. ILP nei loa awmte pawh tha kan tichuang lo.

    Kan pi leh pute kha chuan silai leh chemtum hmangin an ram an chhan mai thin. A bak tihngaihna an hre lo anih hmel e. An thlahte hian ram humhim nan hian tactic dang ka la hre chuang vak lo a ni zawk lo maw?

    Support leh support loh chungchang khi chuan political party-te hian ‘ka support e’ an tih thawm ka hre mai bik lo tlat.

    Mizoram hi Mizote ram a ni, He ramah chauh lo pawh Bangladesh, Myanmar, Tripura, Assam, Manipur ah te pawh Mizo chu an awm tho.Tin, Mizo tih hi hnambil hming ni lovin zo hnahthlak hrang hrangte kan insuihkhawmna hming a ni.

    Min lo hrethiam teh u, Post hi ka edit hman ta lo a ni e.Mipui Insuihkhawmna Pawl tihna a ni e.

    Report this comment

  4. 4
    Athana Chhangte Says:

    Dr Mahminga i rawn daklut hrim hrima a lawmawm e. Leh lawk, dan loa pemlut ni na na dan anga hnawhchhuah theih dan awm awm tak, Ka tideuh.

    Report this comment

  5. 5
    chhana hlawnchhing Says:

    CYMA hmalakna hi ka 50% in ka tlawp in ka thlawp lo kei chuan. Kan ram a dan lo ang a lo pem lut te hnawhchuah theihna dan kan nei lo mai ni lo in thuneihna khawi tang mah in kan nei lo. chutih rual chuan kan sorkar lah hian engmah tih a tum lo nge ni tun thleng hian an la ngawi reng bawk si. CYMA hian hma alak mai loh chuan kan sorkar lah heti mai hi a ni bawk si

    MZP ah leh MSU ah hian mizo hnampeng zirlai pawl te(LSA. MSO etc…) Vote kan nei a in thlahrung map lovin mizo kan ni tiin he pawl ah hian kan in thlahrung lo mai ni lovin ka leng em em a, engvang in nge CYMA Pawh hian hnambil pawl ding ho hi an pawl ah lakluh dan emaw teltir dan emaw hi dap ta se MZP leh MSU ang hian, chuti a nih loh va a hmu sakhi reng a nih chuan in lungrualna kan nei thei lovang.

    CYMA hi dem theihna tamtak a awm lai hian demtheihlohna tur tam tak a awm leh lawi si kan sorkar hi a che hnapkhawn tlat mai a an ngawidiak a vote hmuh an duh vang mai mai a nih hmel mizoram an hmangaih vang chu a nih ka ring lo. Silence is no more Gold

    Report this comment

  6. 6
    Athana Chhangte Says:

    Post tingaihnawm deuhtu atan kan bel mai mai ange.

    Starting in 1994, arrests and massive deportations of Burmese nationals began occurring in the border region. According to the Chin Refugee Committee (CRC), more than 10,000 Chin political refugees were taken in lorries by the Mizoram Police to Champhai, Saiha, and Cerhlun (small towns and villages situated on the border). Fortunately, many of the refugees were able to surreptitiously escape before being deported.

    In June 1995, tensions between the local Mizo population and Burmese Chins again increased after Mizoram newspapers reported that the President of a village unit of the Young Mizo Association (YMA), had been shot and killed by three members of the Chin National Front (CNF). A reign of police terror and massive arrests followed. According to local newspapers, Mr Lalsangzuala, Home Minister of the Mizoram State Government, attended a youth rally in Aizawl and told all Burmese nationals to leave Mizoram.

    Tensions worsened after 9 August 1996, when a Mizo pastor was shot in Champhai District. Over the next few days, the CID arrested at least fifteen Chins from Aizawl without laying any formal charges. Many of those detained were tortured. Lian No Thang, a 20-year resident of Aizawl, was threatened by the Mizoram State CID on the 10 and 11 August and was told to leave Mizoram by 13 August 1996.

    Report this comment

  7. 7
    Athana Chhangte Says:

    Chhana Hlawnchhing, CYMA hnambil pawl chungchangah chuan CYMA ngaihdan chu kan hretlang tawh viau lawm ni? Tunhnaia Political party a kawm kualnaah khan a duhdan chu a sawi nawn chian viau tawh kha.

    Sorkar chak loh rah tih hi chu kan pawmtlangin ka ring. Mahse Sorkar chakloh vanga mahnia thuneihna lak kher hian rah tha a chhuah a ngem. Sorkar chak tak siam hmasak kan tum zawk tur a ni dawn lawm ni.

    Report this comment

  8. 8
    H.Vangchhia Says:

    Dan hmang a rorel ngaihna chiah chuan dan kengkawhtute kutah chumi chu a awm tur a nih hmel a, a chingfeltu chu court a nih hmel. “Dan kengkawhtuten engmah an ti si lo a lawm, kan chet a ngai a nih hi..” ti emaw a chhuanlam siamte hian dan leh hrai an kengkawh thiang reng reng lo. Khawvel hmuh leh hriat a hnam leh ram mualpho theihna a ni.

    Dan kengkawhtu tur ten an kengkawh lova an hriat chuan, hetia ngam zawngte kan vir buai peih ang zat aia tlem pawh han vir buai sela, dan kengkawh tha lo ngam an awm meuhin ka ring lo ve tlat. Mahni thu duh leh ngaihsam tak a thil thlir zau loh rah kanla seng mai ang tih hi ka hlau thin takzet a ni. Misual ber pawh hian RIGHT an nei theuh a, chumi chu kan zah sak a ngai. Chuvang a sawrkar leh dan (law) nei kan ni bawkin ka ring.

    Report this comment

  9. 9
    Awmtea Leo Khiangte Says:

    Tun dinhmunah chuan CYMA hian ram leh hman an hmangaih ber a ni mai lo maw?

    Report this comment

  10. 10
    malsta27 Says:

    Saikhumphai tih lovah chuan kei an thiltih hi demna tur em2 ka hre lo,eng ang mi pawh nise khatiang a khaw hal leh tanpuina pek tur dan kha chu eng ground atang pawhin a dik thei lovin a lang. Khawvel hmun hrang2 ah hian burma mi(refugee) kan tih hi an ram dinhmun avang hian pawm an ni a, an ram neih ve anga an ngaih theih mizoram erawh chuan a pawm lo thung mak ve tak chu ni. kan kal diklo lam mah chu a ang tawh zawk. Written law hi conventional law tih mai,mipui vantlang pawm dan atanga lo chhuak a ni a, chumi in a a hrin chhuah chu insuihkhawm lam ai mahin inthen hranna a kawk zawmah tawh awm e.

    Political boundary in a a then hran zofate heti tak mai a, kan inthliar ta erawh hi chu ngaihtuah ngai tak chu ni ve, german ho khu ram hran2 ah an awm darh nasa viau a, hetiang hian an inthliar ve viau a ngem tih hriat a chakom ngot mai. Nationality nge pawimawh zawk a political boundary hi ngaihtuah tham pawh a tling awm e.

    Report this comment

  11. 11
    Nirvana Says:

    Sorkar hna tur NGO kuta dah hi thil hlauhawm tak ani. Sorkar nawi leh themtlaw, sum leh pai heh zet mai neih reng hi ka ning tawh.

    Report this comment

  12. 12
    Athana Chhangte Says:

    Pu H.Vangchhia sawi khi educated chin chuan an hriat hnu vek a ni. Mahse pawl anga chetnaah hian kan a leh buang thin. Rilru fim neih thiam hi ava tha tawh em! Enge maw kan huaihawt/buaipui dawn a nih chuan thui tak thlir hmasak a tha. Mizo vek zinga ‘Mizo Insuihkhawm Pawl’ din ngawt maite hi a kawnghmang lo viau a ni.

    Awmte Leo Khiangte, CYMA hian ram hi a hmangaih ber leh ber loh chu khawchhak unaute leh Mizoram chhim leh hmar chhak a mite hian engtin nge an ngaih ve ang aw. A hmangaihna hi ‘a mak a na’ an tih palh ka va hlau em!

    Malsta27, Saikhumphai hal kha vawilehkhata thleng a ni lo, a hma atanga boruak tha lo kal tawh chinfel loh vang a ni. CYMA hian a duh phawt chuan dan loa awmte chungchangah hian thuneitute hmala turin a ‘peaceful’ takin a dawr thei a lawm. Sorkar nawr mai rawh se, unau leh unau inhnawhchhuah chu a mawi lo, rilru a na hma bik.

    Nirvana, i sawi dik khawp mai. Sorkar pawh hi rorel ngaihna hre tawh loin pawl hrang hrang leh kohhrante hian kan siam a ang ta khawp mai.

    Report this comment

  13. 13
    malsta27 Says:

    @ Post tupa: Eng anga lo in urlawk tawh nge ni anga, Engvang tak chuan nge khatiang thilthlen theihna tur khawp chu ni ta ang? Court ah lah prove emaw documents show tur awm leh bawk silo. Heta YMA in tanpuina pek an phallo erawh hi chu thiltih awm lo tak chu a ni, mizoram huap a pawl lian ber tih atan chuan. Tunlai an thiltih tamtak zinga saikhumphai in a nghawng avanga an tih ho hi chu thiltih awmah kei chuan tih chi ah ka ngailo.

    Report this comment

  14. 14
    Athana Chhangte Says:

    malsta27, SKP chungchang hi Mizoramin sorkarin High court order a khinlet mek lai a niin ka hria a. An rel relin han rel teh se.

    Komen #3 ah khian ka la type sual tho chu le Mizo Insuihkhawm Pawl tih zawk tur. Keyboard alo nuar ve chhen a tin ni. haha

    Report this comment

  15. 15
    Vailalte Says:

    Nangmah i inhmangaih angin i vengte i hmangaih tur a ni tih hian mihring lam inkara dan zawng zawng cu a zawh famkim tawh

    Report this comment

  16. 16
    ninja Says:

    J Sawma VanchhawngTukina ka thu hriat chuan min va deng na em:Phunchawng venga Central YMA hmalakna avanga vengchhung mipuiinkara inphiarrukna thleng mek chanchin leh chumi avanga pawisawilote pawhin an tawrh chhohmek thu sawichhuak a, Remna a awm theihna tura Pathian hming meuh chhala Chanchinbumite hmaa thudik puangchhuaktu kha Central YMA chuan kutthlaka vaubeh mai duh tawk lovin Mizoram chhuahsan turin a ti leh ta. CYMA pawl ropui ber hi kalsual ve palh thei a ni a, He pawl ropui hmangaihtute tan chuan inrawlh a va hun em…..53 minutes agoLike · 9 Comments · Share

    Report this comment

  17. 17
    Athana Chhangte Says:

    Vailaltea, a dik khawp mai. Mipui nuaih 10 bawr vel lek kan la nia vengte pawh kan ngah loh tehlul nen nuaih 30 vel kan tlin hnuah chuan he thu hi a pawimawh lehzual ang.

    Ninja, keipaawhin ka lo hria a. Tunah hian Phunchawng boruak hi a tha vak lo niawm tak a ni a. Kutinthlakna hial pawh a thlenga sawi a ni. Reign of terror chu a thleng lo turah ngai phawt ang. Thua sawifel theih leh dan hmanga chinfel vek theih ni mawlh teh se.

    Report this comment

  18. 18
    shylo Says:

    He thil hi CYMA hian fimkhur taka a kalpui lehzual a ngai a ni.Tumloh deuhin kan unaute rilru kan tina anga, kohhran rilru kan hliam palh ang tih a hlauhawm hle.

    Phunchawng ah hian mi chi hrang hrang an cheng a,eizawnna in ang lo fe fe an ni. Chutih lai mekin mahni sahmim tih puar duh avanga CYMA mawng hiata, a dik a dawk thlu lova vai hma vek mai pawh a awl hle dawn a, sual leh thil thalo do kan duhna lamah hian a aia thalo zawk kan tih palh ka hlau tlat.

    Zofate tan Zoram hi kan tizim lutuk ta a ni lo maw? Zu & Ruih hlo leh ramdang mi(Dan loa khawsa) nekchhuah duhna tak tak nge rethei zawkte chunga hlei-lenna tih pawh chhut chian ngai tak a ni fo thin.Foreigner kan ti maw… he khua-ah chauh lo pawh hian an tam lutuk, ngam zawng lakah kan kut a rang deuh mai niin ka hria, tun tum thil chauh-ah lo pawh.

    Post tha e.

    Report this comment

  19. 19
    Puii Says:

    Ram leh hnam humhalh duh vang hian han rah pelh nawk nawk a awl thei dawn riau anih hi….

    inhnawhchhuah tih lam kher hi chu a tha lo em mai, khawi vengah emaw ber an va awm leh thei tho si…. khawi thleng nge hnawhchhuah tur le…

    chi khat, hnam khat, tawng khat ni bawk si,sual vang leh dan bawhchhiat vang ni si lo, geographical boundary vanga han inthen tlat te hi engtikahnge kan insuihkhawm ang le…

    Report this comment