Chhana pa, mangtha le…

August 3rd, 2013 12:32 am by Ruata Pachuau

(Keia bengvar loh tak pawh a ni a, Chhana pa boral hlimah post nachang ka lo hre lova, min hrethiam teh u, misual ho…)

Tahrik ni 24.3.2012 tukthuan eikhawm hlim kha a ni a ni a, ka phone lo ri ral ral chu ka han la a, ka han enchian chuan a hring a hrana ka la hmuh ngai loh Mate Ainawn hi alo ni a, a aw atang chuan zahawm viau e ti lo chuan a nelawm phian bawk a, “MI turin millenium center-ah rawn chho rawh, HVa a rawn haw a kan MI dawn, Muantea Cobain pawh ilo kal loh chuan a zak ang……….” . Tum danga MI kal zak thin kha mi sawmtu zahawm leh nelawm tak avang chuan zak chung chungin ka lo kal ve ta kha a ni a, ka rin aiin a nuam. Kan han inhmu khawm nak nak a, Sheldon, H. vangchhia, Maisek, Fathersphinx, marvin, TSA…adt. mi inanglo leh ze hrang hrang lungrual taka kan han inkawm khawm kha ava nuam tak em! Khami tum zet kha chu a thla pawh kan la ta ngei e……..Vaiva pawh. Midang aia tlai deuh hlekah pa dawlhkai leh ruakhau tha tak mai, hmel en reng reng pawh a misual sual silo tih hriat ngawih ngawih hi a rawn lut a, tuman kan lo hre reng reng lova, Pu Sama’n “tunge i nih ve le?” ti a lo chibai pahin alo lawm a…..”CHHANA PA” tiin a chhang a, kha kha  ani kei Chhana pa ka hriat hmasak ber na chu.


Pu Hmingthanzuala Kawlni(Hmingpuia/Zuala ti a koh bawk), misual.com active member ni thin kha Upa Kawlkunga leh Pi B. Lalnuntluangi te fa hmingkoh niin Dt. 25.12.1987 khan tlabung-ah alo piang a. Govt Primary School Tlabungah Class IV thleng a zir a, Govt Zodin middle school Tlabungah Class VII thleng a zir hnuah 2001 khan New life academy, Lunglei atangin HSLC chu I Div-ah a   pass bawk a, Science subj-ah phei chuan letter mark a hmu hial a ni. Class XII science a zawh hnuin kolkata lamah software engineering lam a zir zawm ta a, a zir zawh hmain hian Rebecca lalmuanzovi fanai nen inneiin, kum 2009-ah fapa duhawm tak Vanlalchhanchhuaha Kawlni an nei a….hei ngei hi alo nih dawn hi Chhana pa alo intih thin ni.

Upper republic-a awm an ni a(Bethesda bul kawng kual lai), kohhran leh khawtlangah pawh a inhmang viau mai a, YMA lamah section comm. member a ni a. Tin, Kohhran lamah BCM central churhah lawiin TKP-ah pawh Group secy niin Unit TKP programme committee a ni bawk a ni.

Eizawnna lamah chuan 2008 khan AG Office, shillong-ah data entry operator hna thawkin, 2010-ah a chawlh san a. 2012 atang khan Mizoram Building & other construction workers Board hnuaiah computer operator hna a thawk leh a, hei hi a thih ni thlengin a vuan zui ta a ni.

Sual hliam theih he khawvela kan awm chhung hian Chhana pa pawh hian harsatna a pumpelh bik lo, harsatna kawng hrang hrang te a tawh hnuah Dt. 24.7.2013 khan a nuin an awmna Lunglei lamah enkawl zui turin a rawn la ta a, Dt. 25.7.2013 khan faith Hospital Lungleiah admit a ni a, a pum na a ti hle a doctor leh nurse te pawhin theih tawp an chhuah pawhin awmzia a nei thei meuh lo! Lalpa ringtute hi sualin min hneh chang awm mah sela A lama kan hawi kir chuan Lalpa chuan min lo lawm leh thin, Vanduaina karah pawh malsawmna kawl alo eng leh thin a, Natna leh harsatna karah hian Pathian alo hnai fo thin. Chhana pa pawh hian hetia natna tuara a awm lai hian A rawng a bawlsak thin a chu a kal bo san thui tawh zia a inhmu chhuak chiang hle a, Missionary/fulltime worker ni tura dam chhuah leh chu a tum hle a ni, a nu hnenah pawh missionary tura kal a dil hial a. Thlemna leh sual thiltihtheihna in a hneh theih tawh lohna hmunah Dt 26.7.2013 (12.30 AM) khan Lalpan alo chawlh tir ta a ni. A ruang hi a nupui fanau te awmna lam Aizawlah lak phei niin Dt. 27.7.2013 khan vuiliam a ni.

 

Similar Posts:

Recent Posts:

34 Responses to “Chhana pa, mangtha le…”

  1. 1
    century child Says:

    RIP ;-(

    Report this comment

  2. 2
    muansangi pa khawlhring Says:

    a va pawi ve aw, a chhungte Lalpan thlamuanin awmpui mawlh rawh se

    Report this comment

  3. 3
    H.Vangchhia Says:

    Chhanapa chuan Chhana a kalsan ta mai ani maw, a van pawi tak em! Kan inbe ve hman luam a, kan inhre tha dawn chauh a sin mawle aw.

    Misual ho MI hlut zia a tilang zual hle mai. Inhre lo inhria leh inngai takah min chhuah a. Kar hla tak a mi pawh inngai leh innel takin min chhuah. Chhungkua ang maiin kan titi bawrh bawrh hlawm a. Khawmu chawibo ang mai a bo hmak lovin, a chhia a tha kan inhriat sak tawn zel thei, a lawmawm hle mai.

    Chhana Pa, thlamuang takin chawl mawlh rawh khai. Ka hmelhriat hman che avangin ka lawm e.Pathian zarah dam chuan lo haw leh thuai ka tum a, MI leh pawh a chakawm nen a aw!… I chuanna thlalak lah hi pakhat chauh ka lo kawl a nih hi mawle.

    http://i.imgur.com/FdynsUl.jpg

    Report this comment

  4. 4
    sheldon Says:

    A pawi hle mai. A la naupan tehreng nen. Misual hmaichhana ka hmuh, ka chibai ngei kha a nia, a boral thu hriat chuan rilru a khawih khawp mai. A kalsan a chhungte Pathian in awmpui se.

    Chhana Pa ah hian zir tur kan nei. Kan thih hun hi kum tlem leh tam a ni lo, englai pawha inring tur kan ni. Chhana Pa…rest in peace.

    Report this comment

  5. 5
    Chhuaklinga Says:

    A va pawi vawng vawng ve aw, Chhana Pa thlamuang takin chawl ang che. I kalsan tak te Lalpan thlamuanin awmpui mawlh rawh se.

    Report this comment

  6. 6
    chhana Says:

    Ka pa, mamgtha. Thlamuang takin chawl nang che.

    Report this comment

  7. 7
    Awmtea Leo Khiangte Says:

    Ngawi teh u, ngawi teh u, a vui ni tak hian an kohhran hall-ah thisen kan pe a. Mitthi an nei tih chu ka hria a, Chhana Pa a ni ang tih reng reng ka hre lo. A van uiawm tak em! Amah a ni tih hria ila, ka kal ve ang maw le. May his soul Rest In Peace. ;-(

    Report this comment

  8. 8
    H.Vangchhia Says:

    Auld Lang Syne khi ka ngaithla riai riai, a lunglen thlak mang e a! :-S

    An tum lunglen thlak lutuk

    Ka mur er er mai…

    Report this comment

  9. 9
    Phivawk Says:

    A pawi hle mai… RIP

    Report this comment

  10. 10
    malsta27 Says:

    Va pawi ve aw, kan inhre ve hman ta lo ni maw min chawlh san ta mai si a……

    Report this comment

  11. 11
    blackmagicwoman Says:

    Chhana pa, mangtha le. A pawi hle mai. Chhana lah chu a la te si…lainatawm khawp mai.

    Report this comment

  12. 12
    Mr.Fanchun Says:

    Thlamuang takin chawl ang che..

    Report this comment

  13. 13
    H.Vangchhia Says:

    Kan thlalak ho khi a size lian zawkin ka van duh ve aw!

    Report this comment

  14. 14
    Charice_mizo Says:

    RIP

    Report this comment

  15. 15
    lushai_er Says:

    Chhana Pa, RIP ;-(

    Lunglei lam misual te khan zualko nachang kan va hre har ve ??

    Main site lama luh a theih loh pawn facebook lamah zualko awm tak a nia sin maw le :-(

    Thla hmasa khan Lunglei vawi 3 lai ka tlawh asin maw le, tlawhna chang lo hriat ve awm tak.

    Report this comment

  16. 16
    VaiVa Says:

    A va han zia lo em!!! Pa kawm nuam tak a nih kha le… MI ni ka mitthla ah a awm reng mai. Ka bul chiah, dinglamah khan a thu a, Chhana Pa han tih vanga lo ngai putar deuh hlek te pawh kha an awm a. Kan pahnih thlalak ka lo la kawl nual nia khami MI ni kha. A taka ka vawikhat hmuhna leh tawpna a lo ni reng mai. A thlarau muang takin chawl se la, nakinah intawh leh hun a la awm em ang chu maw khawvel piah lam ah….

    Report this comment

  17. 17
    Pakak Says:

    RIP

    Report this comment

  18. 18
    thachianga Says:

    RIP

    Report this comment

  19. 19
    Lamji Says:

    A van pawi thin ve aw. Rest in peace Chhana Pa. ;(

    Report this comment

  20. 20
    The_Chhamanator Says:

    RIP

    Report this comment

  21. 21
    Maisek Says:

    A pawi hle tak mai… RIP…

    Report this comment

  22. 22
    kilung Says:

    R.I.P

    Report this comment

  23. 23
    caribou Says:

    Engmah ka lo hre ve reng reng hleinem. A va pawi ve aw… RIP.

    A kalsan tak a nupui-fanaute Pathianin awmpuiin veng rawh se.

    Report this comment

  24. 24
    Joel Lrsa Says:

    Muangte’n châwl nang che.

    Report this comment

  25. 25
    Dr John Says:

    ;( Ava pawi tak em! He lei hi zawng Chatuan ram a tling silo alawm le!

    Chhana-pa’n a kalsan tak a nupui leh fa leh chhungte zawng zawng Lalpa’n Van Thlamuanna-in Thlamuan mawlh rawhse, Amen!

    Report this comment

  26. 26
    Sihtea Says:

    Hringnun chan ve pawh hmanghman lova hringnun khawvel a chhuah san ta mai hi, a lainat awmin, a khaw ngaih thlak hle mai. Mi hring te hian kan nun ah hian, thu kan va neilo tak em!!! A kal santak a chhung te Pathian in awm pui in, thlamuan rawh se.

    Report this comment

  27. 27
    Terema Chhakchhuak Says:

    A thla muangten chawl mawlh teh se.

    Report this comment

  28. 28
    muantea Says:

    Ekhai! A va hriat loh theih ve le!

    Amah hi ka hria a, kan ex-std 2002 batch a ni a, tin, a pa te unau nen pawh kan inhre tha viau bawk a, mahse ‘miSualdotcommer’ a ni tih ka hre lo reng reng. A va zia lo em! Lo hria ila chuan Lunglei miSual ho pawhin eng eng emaw chu kan ti ve tur a nia le ;-(

    Report this comment

  29. 29
    Dr Mahminga Sailo Says:

    Facebook-a Mate Ainawn post chiang lo ang reng tak kha ka lo hmu a. A zia lo hle mai. Thlamuang takin chawl rawh se…

    Report this comment

  30. 30
    PKfanai Says:

    A nupui fanaute Lalpa Pathianin vengin awmpui zel rawh se. Misual chhungkua pawh he khawvel dan angin kan kiam zel chu ani si a.

    Report this comment

  31. 31
    zualbonez Says:

    RIP

    Report this comment

  32. 32
    TuaiSialA Says:

    A va han pawi tak em! Chhanapa nen khan kan inhmuh tirhin kan innel nghal em em a, kan infiam bawrh bawrh a…ka ui lutuk! A damloh te khan a chanchin lo hria ila tha tur. Ka ui takzet a ni. Mi hrisel leh harhvang tha tak ni turah ka lo ngai a; ka hre ve chiah a, mi barakhaihin awih a va han harsa tehlul em!

    Report this comment

  33. 33
    lr hlonchhing Says:

    Khai aw…tlai tawh hle mahse ka’n thlah ve hrim hrim ang e. REST IN PEACE…

    Report this comment

  34. 34
    Simplyme Says:

    A uihawm hle mai! Thlamuang takin chawl mawlh rawh se..

    Report this comment

Leave a Reply

You must be logged in to post a comment.