KHAWPUI HNEN A THINGTLANG LEHKHATHAWN

July 29th, 2013 5:31 pm by Hlutea Hrahsel
To,

Khawpui,

Kut suih loh chibai ka buk a che. Keini chu thingtlang mi kan nia. Mizo awmna khua theuh theuh mah ni ila, Keini khua chu Zokhua an tih chuan hmu ah hian ‘sit’ a tel deuh a. Nangni chu khawpui in ni a, nimahsela zokhua kan tih ve hian ‘chhawrpial’ rim a nam bik tlat. Zokhua ve ve kan ni a.  Keini chu thingtlang mi kan ni mai a ni. Thingtlang mi kan nih avang a leilung ken tel kan hnufual bikna hrang hrang tlem a zawng han hrilh che ka duh a ni.

A hmasa berah chuan zin dun ni ta ila, kan zinna chu khawi thingtlang khaw chengker pawh nise. Thlenin te’n zawhna hmasa ah khawi atanga lo kal nge kan ni tih min zawt ngei ang a, nang khawpui mi i nih a kei thingtlang mi ka nih si chuan a hmasa ber atan nang chu chunglengah, kei chu hnuailengah thlenin te rilru ah kan dinhmun a inthlau ta phawt. Kei aia mawl pawh nila, fing zawk a ngaih i ni ang a, kei aia pawisa nei tlem pawh nila, kei aia hausa a ngaih i ni ang.

Tlangval ni ta ila, nula kan rim dun a, thawmhnaw ka neih that deuh chuan ka neih ang ang a lei anga ngaih ka ni ang a, nang chu i thawmhnaw neih ang ang kha i nawm i mak a lei ang a nghaih a ni bik ang. I hmel aiin ka hmelin puak ti mahse, nula lakah chuan nangmah i tlatlum zawk ang. Fiamthu kan thawh pawhin, ‘pa pakhat pawh kha….’ ka tih chuan thing min tih bakah an nuih a zalo ang a, nangin i tih ve chuan changkang an tih bakah an nula te chu an nui thler duai duai mai ang. Cigarette ka zuk ve chuan inlak changkan duh vang a zu amaw min ti ang a. I zuk ve thung chuan a tur ve rengah an ngai ang. Kuhva ka ei chuan ka ka a thianghlim lo an ti ang a, I ei ve chuan khawpui pawh hian an lo ei nasa anih hi an ti daih mai ang. Ka sam a sei chuan pawih thingzai a ang min ti anga, I sam a sei ve chuan “Ji hu’ an ti daih mai ang che.

Ka sek tel tawl chuan, tenawm min ti daih anga, I sek ve chuan ‘six pack’ a nei, men top ni mai. Ka thau ve chuan chhe terh turh, tenawm hler hluar ka ni ang a, I thau ve chuan lawmawm tep tup a ni mai. Cute reuh ni mai. Khawpui ho chu in  eithat avang a thau nih in hlawh ang a, thingtlang mi chu thau chhia nih kan hlawh ang.

Nula nita ila, ka hmel a that viau chuan thingtlang hmelthat nih ka hlawh ang a, ka hmelchhiat chuan a awm ve reng, thingtlang ho chu hmelchhia kan ni tih tichiangtu a ngaih ka ni ang a. Nang chu i chhiatloh viau chuan khawpui ho hi chu an hmeltha tih in hlawh ang a, I hmel a lo chhe deuh a nih pawhin i hmel a changkang tih i hlawh tho ang. Oriflame, Mary kay etc. ka hman ve chuan neih chhun chhun a lei ve hram hram a ngaih ka ni nag a, I hman ve chuan in incheina pangngai reng a ni bik hliah hliah dawn a ni. Ka san ve viau pawhin sang thlawn, pian zeilo nih ka hlawh ang a, I san ve viau chuan inkhaithli nih i hlawh bik ang. Ka thau chuan chhe ler lur, bing tup min ti ang a, I thau ve chuan ‘khal’ nih i hlawh ang. Ka ngo viau chuan ‘phek phuk’ tih ka hlawh ang a I ngo ve chuan ‘no’ nih i hlawh daih ang. Khawpuiah awm ve pawh ni ila, ka ngeih viau a ka sa te a that phah phei chuan ‘thingtlang nula leh tuikuk vawkte hian khawpui chu an lo ngeih ber mai’ tiin min sawi zui ang a. Nang chuan thingtlang rawn ngeih ve pawh ni la, tuikuk vawkte nen kan tehkhin ve lo che ang a, Pathian in boruak thiang tak min pek that zia kan sawi daih ang.

Thingtlangah engemaw, hna avang pawhin rawn awm la, Kohhran leh tlawmngai pawl a i rawn inhman viau chuan ‘mi rilru zau leh tha i hlawh thuai anga, I inhman loh pawn ‘a awm’ tih i hlawh tho ang. Khawpuiah chuan hna vangin emaw awm ve ila, khawtlang leh tlawmngai pawl a ka inhman ve pawhin ‘ve vak vak a…’ tih kan hlawh ang a, ka inhman loh chuan ‘thingtlang mawngping zia’ tih ka hlawh ang. I awmna thingtlang hming kha i khaw hming ‘kan khua’ ti a I chhal chuan, “Rei lote  a rawn awm a, an khua angin mi’n ngai a, an rilru zauh dan hi” tih in hlawh anga, kan tan viau ang che u. Aizawlah kan awmna veng hming kha mahni address ah sawi ve ila chuan,”A rawn inla khawpui mi ve raps, hmanni lawk a rawn awm ve a ni sia” min ti daih ang a, inlak changkan tum, changkang silo ah min ngai mai ang.

Zirna avang in khawpuiah awm ve pawh ni ila, thingtlang mi, mi inhnuai luah tawk vel nih kan hlawh ang a, Aizawl mi thingtlang a in rawn luah i nih ve chuan i awmna in chu nawm hmel reuh an ti mai ang. Kumtawpah mahni khua a Christmas hman tum a, Sumo, Bus vel a kan inhlan fel hnuah “mahni khawlam a haw chi…” tiin hmuhsitna nen min sawi zui ang a. Thingtlang atang a Aizawl lama haw erawh chu kan rilru in kan ngai veng veng ang che u. Aizawlah inchei deuh a kan chhuah ve chuan inlak khawpui mi tum nih kan hlawh a, thingtlang a inchei deuh a i len ve chuan, mi fel, mi ningkhawng hriat tum a chhuak vak nih i hlawh leh thung si ang.

Khawpui a Office dawr tur in a nalh thei ang ber in, kan inbual fai a, inkhuih pial hlan chung in kan Chawlhni kawr thulkhung nen a kan rawn kal ve thin. Office a thawktute hian an dawrtute tan a fai thei ang ber leh a nalh thei ang ber, rimtui siin kan hmu che u a, inthlhrung tak chungin, “Ka pi..Ka Pu…” kan han ti dek dek che u a, mitsir pawh a min lo melh duhlo an awm hian a va hahthlak tak em! Kan thil hriatchian tawk loh leh hriatfiah thiam loh ah te hian tam tak hian min hau in min vin chiam thin si a, in hauh leh invin hi kan duh biklo a, min hau vak vak lovin min  hrethiam hram thin ang che u, kan hriatchian tawk loh vang a ni thin si a. Thingtlangah chuan rawn kal ula, in hmunhma hmuh duh te pawh a tul anih chuan hna tul dahtha in, ramriah thulh thakin kan hruai thei che u in kan  kawhhmuh sak thei che u a nia. Ka theihtawpin in hriatfiah loh a awm chuan kan lo hrilhfiah sak che u in, kan engmah hi kan ui ngailo a, kan lo duat viau thin che u hi.

Engpawh nise, keini thinglang mite hi chu thingtlang background nei kan nih avangin thingtlang a awmdan kan thiam a, kan aia khawpui zawkah pawh kan in adjust awlsam bik mahin ka hria. Khawpui mi in min hmuhsit chuan thingtlang atang a pemkhawm mai mai tiin mahni tapchhak zawlah kan thinrim kan inhrithla ve fo a nia. Khawpui tello in thingtlang a awm theilo ang bawkin, khawpui pawh hi thingtlang a awm avang a khawpui kan ni tih hria ila, lungpui pawh lungtein a kamki loh chuan a awm theilo ang bawkin lungpui pawh lungte a awm loh chuan kamki tur bik a neilo tih hria in, mihringte hi inmamawh tawn vek thei kan ni si a, chuan in keini chu thingtlang mi kan ni miau a.

From:
Thingtlang
(23.08.2012)

Similar Posts:

Recent Posts:

10 Responses to “KHAWPUI HNEN A THINGTLANG LEHKHATHAWN”

  1. 1
    Vladimir Putin Says:

    Mr. Thingtlang,
    Khawpui i tih hian Aizawl a kawk bik turah ngai ta ngawt ila. Sawi hmaih i ngah viau, mahse i tehkhinna khi a tha thuai thuai kher mai.

    I lo hriat ve mai mai atan.

    Aizawla mite hi an inti changkang phian maithei. Mahse Mizo ve tho, khawpui lehzual (Delhi, Bangkok, London, New York, Tokyo adt) vela awm nena tehkhin chuan annni leh nangni danglamna ai pawn a sang zawk. In dawm lian thei anni bik lo.

    Anni leh chung ram changkanga mite aia sanna zawk in ngah mai. Ka la rawn sawi ve mai talawng.

    Report this comment

  2. 2
    chhana Says:

    Khawpui mi chu i er tan tan hle mai maw. Mahse, a then hi chu i ziak thiam reuh ka ti.

    Report this comment

  3. 3
    Hlutea Hrahsel Says:

    He thu hi nikum football tourney lai vel a ka ziah kha ni ta in ka hria. Thuziak mi ka ni hran lova, ka phur thut hian ka ziak mai thin a ni. Ka thuziah nan hian hun tam ka hmang ngai lova, ka ennawn ngailo tluk a ni (ka buai avangin) mahse a hnu hian tihdanglam leh ka ui tawh thin sia. Midang pawisawi a nei anih chuan min lo hrethiam ula, thingtlang mite thlavang hauhnan ka ziahsak a ni.

    Report this comment

  4. 4
    muansakhi Says:

    Ram hausa angin engtikahnge thingtlang mite hian khawpuimite amenities dawn ang kan enjoy ve theih ang aw? Khawpui changkang lai hian ram leh hnam hi min reflect lo khawp a, India a rawn zin tam tak hian Delhi a hotel leh night club changkang aiin slum area leh thingtlang mite retheihna hi a ni hahipa an sawi hawn thin ni. Chuvangin Zawlkhawpui mi chengte changkanna (or inlak changkanna) hian kan ram leh hnam hi min chawimawi pha lutuk lem lovang tih ring ila. Tan lak a ngai a ni.

    Report this comment

  5. 5
    kotlaman Says:

    Post tupa chu thu i thiam hle, ka ennawn ngai lo i inti lehnghala keini ang duang tan chuan ‘khawpui nula’ ang i ni e, thuziak lamah. a tha hle mai.

    Thingtlangpa inferiority complex hi thil pawi tak, awm ve tlat si a ni. A chhan hrang hrang a awm thei ang. Kan politician tam tak zemabawk leh Ngaizel ngaihtuah pel phalo awm nghuk vangte a ni pakhat ang.

    Champhai tlangval ka ni a, Aizawl chu sawi loh Delhi-ah pawh leng ve viauin ka inhria; a chhan chu a chunga ka sawi complex khi ka chinral tawh vang a ni awm e. Hemi complex kan neih chhung chuan thingtlangpa ngaihtuahna a fuh thei lovang.Mizo theuh kan ni a, America rama an thingtlangmi ten khawpuimite an hmusit ang zet khuan tih ve chu a tul lo nain, khawpuimi nih vang ringawta dahsan hi a tul lem love. Tunah hian Aizawl veng laili pawl takah ka khawsa meka, ka thenawmte ka dahsangin ka dah hniam hran lova, khawdang atanga lokalten Office-ah dawr hrehawm min tih ngawt bik ka duh hek lo. Ka normal hle a ni awm e (nor…. ni lovin)!

    Report this comment

  6. 6
    PKfanai Says:

    I ziak thiamin a nih duh hmel viau mai. Thingtlang naupang leh rawlthar nun hlimawm tin reng, Pawn to, Dai vah, Krismas ruai hnah lak, thang kam, Sava veh, Sangha vuak, Chakai khawrh/chhit leh Aiawt chiah, Mautuai khawrh, Tui chen, Nghafuan ven, Lo vah, Feh, Lo zawh etc. te ka experience ve vek hi a lawmawm ka ti thin. Chutih rualin, Ka rawlthar chhuaha kum 5 chhung vel Aizawla Rawlthar changkang ber berte nena kan lo inkawm kha, Nun sual dai phah hlek mah ila, ka inchhir lutuk lem lo, An rilru sang vah ang kha ka chhawm ta tlat a, mahni inrintawkna leh midang chung en bik lohna ka neih phah a, a tha ang reng ka ti.

    Report this comment

  7. 7
    Awmtea Leo Khiangte Says:

    To,
    Thingtlang

    I lehkhathawn ka lo hmu e. Ka chhiar dawn mek. Rawn zin leh thuai thuai rawh aw. Ka hmu leh chak tawh lutuk che. I rawn kal tuma rawtuai min rawn ken ang kha min rawn kensak leh rawh aw. Hetah chuan a to lutuk a.

    I thian,
    Khawpui

    Report this comment

  8. 8
    Charice_mizo Says:

    Lunglei khua ka nia, Delhi ah ka awm meka. Engvang mahin thingtlang hi ka ngainep ngailo. Thingtlangah hian chhungte kan ngah em ema, an lo zin changa an inthlahrung/mahni insit thei lutuk hi ka lainat rualin pawi ka ti thin. Mahse maw, khawvel a changkang zela tunah chuan thingtlang khaw lian deuh phei chu khawpui nen danglamna awm tawh lo khawpin kan hawiher a inchen tawha. Development a kal rual loh em vanga kan inthlauhna hi chu thuhran.

    Chuan thingtlang chhuak hi ka hriat chinah chuan Mizo nunphung leh mihring mirhinnaa quality pawimawh kan tih rinawmna, midang hriatthiamna etc -a chiang zawk leh nei nasa zawk an ni zel ka tawn chinah. Kan Mizo thawnthuah pawh thingtlang atanga lo chawrchhhuak hlawhtling ta tih lampang a lar ber. Lungngai mah che. Khawpui-a cheng moral hniam fe fe, principle neilo, nunze pawnlawi tam tak hi awt duh suh u. Nun ngelnghet tak neih hi a hlu ber.

    Kan thuziak thin dan chu a inang phian lehnghal, alo lan thuta ziak chi ka nia keipawh, ka edit khat khawp :) I ziak thiam lutuk e.

    Report this comment

  9. 9
    Charice_mizo Says:

    E chuan first person-i’n ziak mah la, a title hi a fuh ka ti. Creative khawp mai.

    Report this comment

  10. 10
    ninja Says:

    Va pui ve….lut kan tam yhin lai khan lo post tawh ni la, kan sawi zui nasa ngawt ang

    Report this comment