ISUA KHA ISRAEL HNAM TANA LO KAL A NIHZIA LEH AN KHAWVEL KHAN TUNA KAN KHAWVEL TIH HI A HUAP LO A NI

July 28th, 2013 11:42 pm by Hnam sakhua

Pakhatnaah chuan, Isuan a zirtîr sawmpahnihte a tirh chhuah lai khân (Matt. 10:5; Marka 6:7; Luka 9:2) heti hian thu a chah a; “Jentailte kawngah kal suh ula, Samari mite khua rêng rêngah pawh lût suh ang che u; amaherawh chu Israel hnam berâm bote hnênah chuan kal zâwk ang che u,” tiin (Matt. 10:5-6). Helai thu hi uluk taka chhût tûr a ni. Israel ram pâwn lam an dai vaih chuan, Israel ram a ni tawh lo a, mi ram a niin hnam dang, Jentai-lte ram a nih tawh avângin Jentail-te kawng an rah a ngai lo thei dâwn lo a, chu chu Isuan a remti lo a, “Jentailte kawngah kal suh u,” a ti a ni. Tin, Samari mite hi hmasâng huna Juda hmeichhia hnam dang pasala neite thlah kal zêl kha an niin an sawi a, Judaho chuan an ten hle a ni. Chuvâng chuan an khuaah pawh Isuan lût lo tûrin a chah a ni. Hei hian Isua thu sawia, “Khawvêl zawng zawngah…,” a tih khân a huam zau lohzia a tilang a ni.

Pahnihnaah chuan, Isuan Tura leh Sidon bial te a fan lai khân hmeichhe pakhat chuan a fanu ramhuai man tidam tûrin a ngên a (Matt. 15:23-27); he hmeichhia hi Marka chuan Grik mi nia a sawi laiin (Marka 7:26-28). Matthaia chuan Kanaan hmeichhia niin a sawi thung a (Matt. 15:22), Israel mi chu ni chiah lo mah sela, Grik leh Kanaan hnam chu thlahkhat tho chu an ni e. Heta Isua chhânna han en hian hnam rilru a pu lian hle a ni tih a lang thei. “Israel hnam berâm bo hnênah lo chuan tirh ka ni lo e,” tiin a chhâng a ni (Matt. 15:24). Mahse hmeichhia khân a ngên ngawl ve hle a, a ûm zui zêl a, Isua chuan, “Fate chhang lâksak a, uite hnêna paih chu, a mawi lo e,” a han ti leh ngat a (Matt. 15:26; Marka 7”27). Hetah hian Judaho rilru chu Isuan a thai lang chiang hlein a hriat theih âwm e. Judaho chuan Jentail mi chu Uicho ang lekah an ngai tih a lang reng a ni. He thu hian chanchin \ha hrilhna tûr atân hian Isua lo kal leh hma chuan Israel ram leh Israel hnamte chauh a huaptîr rih a ni tih a lang chiang hle bawk a ni.

Pathumnaah chuan, “Kaisara Augustan khawvêl zawng zawng hming ziak tûr thu a pe a,” tih Bible-ah kan hmu leh a (Luka 2:1). Kaisara Augusta chu Rom ram lalber (Emperor) hetih hun B.C 6 vêl lai hian a ni a, hetih lai huna ram awp zau ber chu Rom hi an ni mai thei a. Rom lalber chuan a ram awp chhûnga chêngte chhiarpui (Census) bei tûrin thupêk a chhuah ni ngei tûr a ni. Rom lalram ropui lai ber a ni a, he mi hun hma hian Greece lalram chu a lo ropui hle tawh a, lalber Alexander Liana chuan India ram pawh rûnin a lo han hneh tawh a ni. Chu mi hma lehah chuan lalram ropui tak Media leh Persia hnam hotu lalber, Lal Ahasuera a lal laiin India ram hi an lo han awp tawh bawk a ni tih Bible-ah ngei pawh a lang nghe nghe a (Estheri 1:1). He mi thu vek hi Apocripha bu lamah pawh kan hmu thei bawk a (Esth. 1:1). Apocrifa bu lamah chuan lalber Ahasuera hming hi “Artezerzia” tia dah a ni a. Greek \awngin B.C120 dâwn vêlah lehlin a ni. Chutih hun lai deuh tawhah chuan hêng lai lalram lo dingte hian India chu an lo hre bel tawh a nih si chuan, B.C. 6 – 4 vêla Isua pian hun laia khawvêl zawng zawng huapa chhiarpui an neih chu Indian History lamah te a va lang ve si lo ve, kan tih chuan, hetih hun laia an khawvêl chin chu Rom ram awp chin chauh a ni a, khawvêl pum lem (Globe) a khawmual kan hmuh zawng zawng hi chu a huap zo lo nasa tih a lang reng a ni; hei hian an khawvêl sawi hi a zîmzia a tilang chiang hle a ni.

Palinaah chuan, khawvêl zawng zawng chu Nova hun laia tuilet chuan a chîm a, tlâng sâng zawng zawng pawh tuiin a khuh zo vek anga an sawi hi (Gen. 7:19-24; 2 Pet. 3:6) khatih lai huna khawvêl an sawi kha a zau lo hle a ni tih hriat a ngai leh a ni. Khâng lai ram, Asia Minor vêl khu khawvêla hmun hniam ber ber lai a ni a, Tuipui Thi (Dead Sea) phei chu khawvêla hmun hniam ber a tling hial a, tuifinriat zâwl tâwk aia hniam zâwk a ni nghe nghe a, chuvângin tuilêt chuan khûng lai ram chu a chîm pil hma hle ang tih a rin theih nghal a ni. Chuti chu a nih avângin he tuilêtin khawvêl pumpui chîm ang hiala Bible pawhin a sawi hian hetih hun laia an khawvêl sawi hi a zim hle a ni tih a tilang a ni.

Similar Posts:

Recent Posts:

32 Responses to “ISUA KHA ISRAEL HNAM TANA LO KAL A NIHZIA LEH AN KHAWVEL KHAN TUNA KAN KHAWVEL TIH HI A HUAP LO A NI”

  1. 1
    lr hlonchhing Says:

    Chh1ar 1la…

    Report this comment

  2. 2
    Natala Says:

    A va mak dawn ve.. Kei chuan he khawvel tan alo kal ani tih hi ka ring bur.. ka ring zel dawn,,,

    Report this comment

  3. 3
    chhana Says:

    Tunhmaa khawvel pum an tih khan i sawi ang khian khawvel pum tak tak hi chu a huap loang tih chu ka ring ve tho. Mahse, Isua kha Israel hnam tana lo kal mah nise ka tan pawh hian a lo ni ve tho tih chu ka thinlungah hian a chiang.

    Report this comment

  4. 4
    Rinzova Khawlhring Lalhnam Says:

    ^ I inkalh :-D

    Isua khan min be rawh u a tih pawh ka hre hek lo. “Tupawh ka thu hria a, mi tirtu Pa ring chuan chatuan nunna a nei tawh” a ti zawk a nih kha.

    Report this comment

  5. 5
    Rinzova Khawlhring Lalhnam Says:

    ^ I inkalh :-D
    Isua khan min be rawh u a tih pawh ka hre hek lo. “Tupawh ka thu hria a, mi tirtu Pa ring chuan chatuan nunna a nei tawh” a ti zawk a nih kha.

    Report this comment

  6. 6
    chhana Says:

    Engvanginnge Kristian pawh ni silo Bible i chhiar ve fo mai le, hriatzauh nan i ti nge mi hnial/elsen nan i ti?
    Nia, rinna hi chu inkalh ang pawhin a lang fo reng a nia, hriatthiam har tak a ni tih chu kei aiin i hriat zawk ka ring. I kutchhuak erawh bengvarthlak ka ti thin khawp a nia.

    Report this comment

  7. 7
    chhana hlawnchhing Says:

    Hun hnuhnung a thil thleng tur pakhkat ah ka ngai ve mai. a chhiar a nuam in a bengvarthlak khawp mai

    Report this comment

  8. 8
    PKfanai Says:

    Lal Isua Krista kha, apa tirha lokal ani a, Strategy, Mission Plan, aim and Vision fel tak neia lokal ani a, Mission chiang tak a nei a, Chumi atang chuan a pengbo duh ngai eih lo a ni. Kraws kawng kha a zawh ngar ngar mai a, a chak leh chak loh emaw, a huphurh leh huphurh loh lam pawh nilovin, a mission khan a pawt kal a, apa thuawihna bawihah a inpe full thlap a ni.
    Thuthlung hlui lam atanga kan enin, Pathianin Abrahama atangin Isua Krista lo pianna tur hnam, Khawvel hnamti ti thawvengtu tur chu din kha a tum ngar ngar tih a hriat theih a. Setana khan kha line kha tihchhiat leh tihchah a tum fo thin a, Juda-a ah te, Boaza-ah te, Rahabi angah te khan a buai teuh ther ther thin hle, kan ti thei ang. Nimahsela, Pathian thiltum chu tlawlh rual a ni lo.
    Lal Isua khan, a hun tlemte neih chhung khan, Khawvel leh Khawvel hnamtinte hnena rawngbawl nghal kha a tum mai lo; Juda ho kha tha taka train chhuah a, anmahni hmang ngei khan Khawvela hnamtinte kha tihen a tum a ni.
    A Zirtirte a tirhchhuah tirh lamah khan, Hnam hrang hrang hnenah tie lovin, Juda ho hnenah chauh a tir a. Thihna hneha a thawhleh khan, Khawvel zawng zawnga kalchhuak dap a, Hnamtin ami Zirtirah siam turin thu a pe(Commissioned) ta a ni.
    Tin, Khawvel pumpui hrutchhuak a, Hnamtin amite Zirtirah siam tur pawh khan, Strategy nei thlapin a tir leh a. A hmasaberin Jerusalem-ah, Chumi hnuah, Judai ram khawtinah, Chumi hnuah Samari ramah, Chumi hnuah Kawlkil thlenga kal turin awmze nei takin thu a pe a ni.
    Tin, anmahni kal kala tekchhuak ve ngawt kha a phal hauh lova, Thlarau Thianghlima thuama an awm phawt hnuah che chhuak chauh turin a ti bawk a ni.
    Khawvel kawlkil hrutchhuaha, Hnamtin amite Zirtira siam hi Pathian hian Keini amah leh a thu Ringtute koah liau liau a nghat a ni. Vantirhkohte pawhin duhin chak viau mahse, Pathianin an kutah a dah tehngawt lo, Keimahni Mihringte kutah a dah tlat a ni.

    Report this comment

  9. 9
    bbney Says:

    Post tu pa khan comment #8 hi han chhang leh sela.

    Report this comment

  10. 10
    Hnam sakhua Says:

    Pahnihna atanga Palina thleng khian chhang law law sela la maw le?
    Tin,

    Report this comment

  11. 11
    chhakchhuak pa Says:

    Hei chu Nunna Lal Chhungkua (Mizo Hnam Sakhua inti) ho Propaganda ni leh pek maw! In bo dan hi a thuk mang e! Chhan chiah pawh ka ngai lem lo, engpawh ni se, Isua Chhandamnain min huap leh huap loh chu Amah ringtu te nunah hian a chiang ber e. ‘Amah ring apiang’ tihah hian Amah ringtu zinga ka tel ve avangin Lalpa chu fakin awm rawh se

    Report this comment

  12. 12
    Rinzova Khawlhring Lalhnam Says:

    Isua khan min ring ula, ka chhandam ang che u anga Chatuan nunna ka pe ang che u a ti em ni?

    Report this comment

  13. 13
    chhakchhuak pa Says:

    Aw ti e, Bible hmun tam takah hetiang sawina tawngkam hi hmuh tur a awm. Mahse, nangni chuan Bible in pawm miau loh avangin sawi mah ila in awih chuang lovang…

    Report this comment

  14. 14
    kotlaman Says:

    A va ngaihnawm ve le! #8 pawh ngaihnawm. Thil dang chu sawi loh helamah phei hi chuan ka ril lo khawp a. Ka Pathian thu hriat dan leh rin ve dan chu, Amah rina, Bible rina, kan nitin nunah ‘a tha’ zawn hram hrama tih hram hram hi a ni deuh mai. Luhchilh thuka buai theihna thil hi chu a kam atanga thlir hi a him ber mai!

    Report this comment

  15. 15
    PKfanai Says:

    Pakhatna leh pahnihna te chu chhang tawhah inngai ta ila. Point 3 na leh point lina te pawh hi an awm ang ve viau mai.
    Bible-ah hian Lal Ahasuera(Xerxes) Lal ram khan India ram atanga Ethiopia thleng a awh thu kan hmu a. Khatihlai huna India tia an sawi thin kha, tunlaia India nen hian a inang chiah lo a, India Sub-Continent tawp hi ani mai a, Bangladesh, Nepal, Pakistan leh Afghanistan te a huam tel vek a ni. Ahasuera khan tuna Afghanistan hi a rawn awp tel ve hlek niin a lang.
    India ram rawn thleng hmasa Alexander the Great khan BC 326 khan India(Tuna Pakistan leh Punjab vel lai) hi a rawn thleng a, Porus nen indion a rawn hneh a. Chhak lam la nawr chhoh zel a duh em em laiin, a Sipai ten an peih tawh ngang lova, India ram chu a kirsan leh ta mai a, a hming chauh chauhin a aiawh a dah ve a, nimahsela, Lal chak anni lova, anmahni karah buaina a awm bawk a, an daih rei lem lo. Alexander-a lah chu BC 323 khan a thi ta mai bawk si a.
    Rome ho meuh pawh khan India ram tak hi chu an rawn awp lem lo a, India ram rawn run a, awpzui nghal tak tak tute chu Mughals ho kha anni a, Babur an Ibrahim Lodi Panipat phaizawlah kum 1526 a hneh atang khan a intan a, Mughal Dynasty ropui tak a din chho a, Aurangzeb-a nep avangin, Kum 1707 a ahan thih khan, a tawp ti tih ta a. A tawp tak tak erawhchu, Kum 1857 a British hoin Bahadur Shah Jafar an hneh a, Burma rama a raltlan tak atang khan a ni. Khatih laia Rome ram awp kha Khawvel tia an sawi mai pawh kha a awm ve reng mai.
    Lal Isuan “Kal ula hnam tina mi zirtirahte siam ula”(Make Disciples of all nations) a tih erawh kha chuan All nations (Hnam zawng zawng) a huap a, “Kei kumkhuain Khawvel tawp thleng pawhin in hnenah ka awm zel ang” a ti zui a, Khawvel hi a huap hneh hle a ni. All nations ah khian kan leng vek a, Khawvel tawp tih khian, Khawvel zawng zawng a huap hneh hle a ni.
    Greek mifing Celsus-an intifing tak mai a, “Pathian hian a rang thei ang bera khawvel zawng zawnga a chanchintha hi hrilh chhuah thuai thuai a duh anih si chuan, engatinge Khawvel kilkhawr tak Palestine-ah a fapa chu a rawn piantir duh teh lul ang ni, Khawvel laili takah a piantir ngei tur ani dawn lovem nji?” an han tih ve thang thang te kha, America Khawmualpui 2 an han hmuhchhuah hnuah chuan, Palestine chu Khawvel laili lai tak alo ni reng tih an han hrechhuak leh hnuhnawh te pawh kha an thiamawm ve tho e. Fing inti tak tak pawh hian, an la hriat tlem zia leh, an la hriat famkim loh zia hi an inhre thin lo mai mai a ni. Mihring finna ber ai pawhin Pathian atna lai ber pawh ala fing zawk fe si a.
    Tuilet chung changah pawh hian, i sawi khi a awm ang ve tho, Mahse, Bible-in Lei chungah hian tui chu nasa takin a lo pung ta chiam a, Van hnuaia tlang sang zawng zawngre a pil zo ta vek a” a ti miau mai a, Historical fact, a paihthlakna chiang tak a awm hma chuan kan awih mai tur a ni ang.

    Report this comment

  16. 16
    Natala Says:

    PKfanai thu han chhiar hi chu a nuam thin teh e..
    A hrim hrimin Ka rin, ka innghahna,, ka lungpui.. Ka tana thi a , tho leh heti em em a rawn sawi/post ho hi chu ka chhiar peih lo e a…. Ringtu leh ringlotu a in rem theih loh.

    Report this comment

  17. 17
    chhana hlawnchhing Says:

    chhiar a nuam in a bengvar thlak hle mai. sawibelh zel teh u.PKfanai chhanna khi ka pawm zawng leh dikber a ka ngaih a ni

    Report this comment

  18. 18
    H.Vangchhia Says:

    Tlat mai a! Hairehai :P

    Report this comment

  19. 19
    Hnam sakhua Says:

    PK-a, a bul atang retin han swi ila, Isua kha engvanga Pathian fapa ti bik nge in nih le, han chhui chian tak tak chuan a ni meuh a maw ni le. Zakaria sawn a nih mah zawk lo maw.Tin khawvel tithawveng tutur in ti a, a ti buai zawk chu a nih hi maw. A sawi chin bak pelin chanchin tha an hrila sakhaw dang nen buaina a chhuah phah fo chu a nih hi.

    Report this comment

  20. 20
    Hnam sakhua Says:

    6-Chhanna, sakhaw lehkhabu dangte hi chhiar thin tur,

    Report this comment

  21. 21
    Hnam sakhua Says:

    Tun hmaa Bible chhuak hmasaah chuan Genesis bung bul berah lei leh van siam kum anga an ruat, „B.C. 4004,‟ tih hi dah a ni thin a, hei hi Evi leh Adama siama an lo awm kum niin an ngai nghal bawk a ni. James Ussher-a te, Dr.Livefoot-a te chuan B.C. 4004 October ni 23/26 zing dar 9:00 hi Evi leh Adama pian kum angin an chhui thei a ni. Mosia chuan Aigupta finna zawng zawng a zir chhuah hnuin he Israel-hote history hi a ziak ta a ni. He thu pawh hian belhchian a dawl loh zia a tilang.

    Report this comment

  22. 22
    zofa'Z puluN Says:

    I thlir dan hi a dangdaiin a khermei khawp mai. Bible hi i chhiar ngun hlein ka ring a, chuan i hming atang hian kalkhat kan tih ang hi i nih ka ring. Israel/Judate tan a ni ngei a, Jentailte tan pawh a nihzia hi chhui peih ta la, tuna ril taka i sawi theih aia ropui hian i sawi thei ngei ang. Engpawh nise * hnam sakhua chu ka hnial peih lo. An tanna ngaiah an tang tlat a, tanhmun dang an nei tam lo tih ka hriat vangin..ha3, good saying.

    Report this comment

  23. 23
    Athana Chhangte Says:

    Ngaihnawm riap riap ve. Hetiang hi ka chhiar chak zawng tak a ni. Isua kha Isrel hnam tana lo kal a nihzia chu, hei zawng hi em ni a point chu ni ta?

    A thenlaiah chuan, Bible ziaktute pawh kha Mizoram ang tho hian ‘ram leh hnam humhalh’ lamah an lo tui ve deuhte pawh a ni mahna?. Mahse,Isua khawvel chhandamtu a nihna hi chu an ziak bo chuang em ni?

    Report this comment

  24. 24
    Hnam sakhua Says:

    Khawvel ram dang History-ah te a chuang ve em? Khawvel zawng zawng a nih si chuan.

    Tin Nova lawng chungchangah.
    1. Nova Lawng len zawng hi lo chhinchhiah hmasa i la. Genesis 6:15
    a)A dung lam tawng 300 feet 450 vel
    b)A vang lam tawng 50 feet 75 vel
    c)A san lam tawng 30feet 45 vel
    a ni a.Khel mual tiat vel emaw, Queen Elizabeth lawng lian(a dung ft 987’a vang ft 118’) chanve tiat vel a ni.
    2.Lawng chhunga awm turte; Genesis 6:18-22.
    a)Nova leh a chhungkua te,
    b)Tisa zawng zawnga thil nung tinreng zing ami, chitin pahnih zel, a nu leh a pa an ni tur a ni.
    c)Chaw, an eimi zawng zawng te nen an dah tur a ni
    d)Bung 7:2,3-ah Sa thiang tinreng zing ami, a nu leh a pa, tuak 7 zel.
    Bung 7:4, Ni 7 a la bak a, chumi hnuah chuan, lei chungah hian, ni 40 leh zan 40 chhung zawng ruah ka surtir anga, ka thilnung siam tinreng hi ka tiboral ang,” a ti a.
    Heng sa tinreng leh ran zawng zawng te lawnga dah luh te hi a harsa hmel hle a. Heng bakah Sava tinreng leh thla nei tinreng te pawh lawngah hian khalh luh an ni a. Engtinnge Nova hian ni sarih chhung hian a khalh luh theih? Pathian hian lawnga lut tura a hrilh atang hian “Ni sarih a la awm” a ti chauh si a.
    3. Lawng chhunga awm rei zawng: 7:6,11.
    a)Nova kum 600 a nih kum, a thla hnihna ni 17 niah ruah a sur tan.
    .b)A kum 601-na, a thla 2-na, ni 27 niah lawng atangin a chhuak.. Lawng chhungah kum 1 leh ni 10 an awm tihna a ni.

    4. 7:12-ah “ Tin ni 40 leh zan 40 chhung zawng leiah hian ruahpui vanawn a sur ta a”.
    7: 16 “Tin, LALPA’N a ni chu a kharkhum ta a. a ti a.
    7:17- ah, “Tin, tui chu leiah hian ni 40 chhung zawng a let a” a ti a.
    7:24-ah chuan, “Tin, tui chu ni 150 chhung zawng chuan leiah hian a awm ta pung mai a.” a ti leh a.
    8:6-12 han chhiar chuan tui let chhung chu ni 60 bawr vel ni awm takin a lang leh bawk a.
    Tui let leh Nova lawng chung chang te hi, uluk taka han chhiar chuan, thil hriatthim har tak tak a tam mai.
    1)Nova lawng len zawng leh a chhunga awm turte han ngaihtuah hian, ran sa leh chung leng sava zawng zawng tuak khat theuh bakah, sa thiang chi phei chu tuak 7 theuh an ni tur a ni a. chu bakah an chaw ei tur nen dah tur a ni a. (6:21) Hetah hian thil hriatthiam har tak chu, Nova te lawnga an awm chhung hi, kum khat leh ni sawm vel a ni a. ‘Sai nupa nikhat tla chaw chu, quintal 3 vel a ni’ an ti a. Chuti a nih chuan, sai nupa ni 375 vel tla tawk tur chu, 1125 Qt vel a ni ang a. Sai ei tur ringawt pawh heti hi a nih chuan, Sa hel ei ho ei tur te, hnim pet ho ei tur te, Par zu lam ei mite ei tur te leh nungcha chi hrang hrangte ei tur leh an kum khat tla tawk hi Novate chhungkua hian eng tin nge an dah khawl theih ang ? lo dah
    khawl thei dawn tehreng pawh ni se, lawngah hian a leng thei dawn em ni? tih zawhna te pawh a awm thei bawk.
    2)7:1-4 ah hian Pathianin Nova hnenah lawnga lut turte a hrilh thu kan hmu a. A hrilh atanga ni 7 hnuah ruah a sur tawh dawn thu a hrilh bawk a. Ni 7 chhung hian Nova te hian eng tin nge ran sa leh sava leh nungcha lawnga lut tur hote hi an khung zawh hman tihte pawh hi zawhna awm thei a ni.
    3)7:16-ah hian “Lalpan a ni chu a khar khum ta a,” a ti a.Nova leh Pathian thawh dun dan hi mihring thian dun thil tidun ang mai an ni a. Nova lawng tukverh pawh Novan khar lovin, Pathianin a khar sak a ni. Hetiang chi deuh hi Ththlung Hluiah hian hmun engemaw zatah kan hmu a. Thuthlung Thar kan tih hun leh tun hun thleng pawh hian, mi bikte hnenah chuan, awih phak loh emaw, thil ni theia ngaih loh thil thleng si hi a awm thin.
    5.7:12-ah, Ruah chu ni 40 leh zan 40 chhung a sur a, tin, 7:17-ah chuan, ni 40 chhung zawng leiah hian tui a let a ti leh a. 7: 24-ah chuan, “Tin, tui chu ni 150 chhung zawng leiah hian a awm ta pung mai,” a ti leh thung te hi, han ngaihtuah hian, Bible thu a ni a, dik vekin han pawm tum dawn mah i la, tute thu khawchang ang mai hian, “Ka thu hi i hnial tur a ni lo, chuvangin, a dum pawh hi a var a ni ka tih chuan, i ti ve mai tur a ni,” tih angte a nih ngawt loh chuan, a ziak ang ang hi chuan, dika pawm chu thil har tak a ni.

    Report this comment

  25. 25
    zofa'Z puluN Says:

    Wah.. I chhiar zau lutuk a i fing ta mah mah nge, i at phah zawk le? Nova leh tuilet chungchangah hian Pathian a inrawlh tih engati nge i sawi lan ve miah loh mai le? Lei leh van Siamtu, tui tilettu chuan engkim a tithei tih rinhlelhna thu i sawi mek a nih hi le. Nova lawng chu a la lian lutuk, i thluak te tak te chhunga thil tam tak dahtu chuan i thluak bawm aia lian Nova lawng chhungah chuan lei chunga thil nung tinreng, leh an ei tur chu a dah thei lo ang em ni? Tin, mihring tan ni 7 chhunga khalh luh hman loh chu ni khat chhung lekin Pathianin a khalh lut thei tih a lang reng alawm. He thuah hian hmu thiam lang chuan Siamtu ropuina leh thiltihtheihna chu i hmuh thelh lo tur hi a nia. Mahse, a pawm harsa zawnga i rawn sawi pawh hi a awm lo hran lo- Bible thu rau rau pawm chin leh pawm loh chin nei ‘hnam sakhua’ i ni miau hek. Babel insang thilmakte kha i awih lo tawp ang tiraw. Tirhkoh Paula phei chu in awih lo lehzual ang. I sawi tam poh leh Pathian thu tak dawta chantir i tum tam ting a nih ber mai hi… Lo kal zel phawt teh u.

    Report this comment

  26. 26
    Lalzam Neihsial Says:

    As for me and my house, we will serve the Lord.

    Report this comment

  27. 27
    Hnam sakhua Says:

    Tuilet in tih khan khawvel a chim pil a nih si chuan, a nih leh he kan chenna khawvelah hian chawl miah lo a fang chhuak thei sava a awm ang em? Kha tuilet laia sava kha eng sava nge ni ang le. Tin,Kha tuilet laia khawvel kha tuna kan khawvel hi ni ta se, khawmual pui hrang hranga nungchate hi a inang der si lo a, khang zawng zawng khalh khawm chu thil theih ni hek lo. Kei chu Pathian hian awm lo tak takin thil a ti thin hi zuk ring ve hauh lo i.

    Report this comment

  28. 28
    zofa'Z puluN Says:

    Hah.. Ni e, i zawhna chu ka hrethiam, a chhan chu i rin miau loh avangin. A bulthum atanga hrut i duh chuan ka lo kir leh ang, tin, lo active hle ang che. A nuam dawn hauh lo a nia aw. Hnehna chu Thutakah a innghat ang. Tu pa thu veivung emaw kha chu tanchhan lo la aw.

    A hmasa berin- Bible chhunga Pathian Thu ziaka awmte hi i pawm em?

    Report this comment

  29. 29
    Rinzova Khawlhring Lalhnam Says:

    #13# Ka sawi ang khi chuan a ti lo ang aw.

    Report this comment

  30. 30
    zofa'Z puluN Says:

    Ka zawhna chhan hun a nghahhlelhawm tawh e. I chhan dik hram ka beisei.

    Report this comment

  31. 31
    Rinzova Khawlhring Lalhnam Says:

    ‘Bible-in a ti alawm’ tia pawm tawp ho hi chu Thluak Sûk vang a ni e. Pawm laklawh tawh hi chu hnawl a har a nia.

    Report this comment

  32. 32
    Hnam sakhua Says:

    A kal khat zawk chu nang ni hi in ni ngei ang?

    Report this comment