Lehkhazir hi hna hmuh nan ringawt a ni lo

July 26th, 2013 9:55 pm by Charice_mizo

Zirlai tawh phawt chuan ‘Engvangin nge lehkha ka zir?” tih zawhna hi kan tawng theuh tawh awm e. Education nih phung tak hrelo hian tunlai ‘Mizo radical idealists’ tam takin lehkhathiam hna hmulo te an rawn veiin an sawisel fova, inenfiah nan chuan a tha e. Chutih laiin a nawlpuiina kan ngaihdan dik lo em em chu, lehkhathiam tih leh hna thawk tih hi a vun leh a hmul ang vela inkawp emaw kan ti tlat hi.

Lehkhazir hi a hautakin a hahthlak em ema, hautak taka zir (sum sen tam) phei chuan a let (returns) kan beiseina a pung zual. Hei vang hian lehkhathiam sang emaw zir sang chin te chuan hna sang leh tha tak thawh an inbeisei vek a ni. India rama State rethei ber pawlah kan chenga, industry ah kan hniam em em. Tertiary/service sector (60%) leh agriculture (14%) chu kohhran leh khawtlang tih ang vela kan economy innghahna an ni. Social sector adt awm lo phei se buh leh bala kan eizawnna hi chu kan khamkhawp lo chhiava tih a lang renga.

Chutiang dinhmun karah chuan kumtin thalai lehkhathiam, a hming chauhva thiam leh thiam nia inhria kan pung zela. Thiam bawk si lo, thatchhe bawk si, hmantlak siloh kawng dang (incheina adt) a ‘standard’ ti sang leh em em si, chawmhlawm ba ngah an tam em em bawka. Kan State sawrkara beisei ti sang tak tak an awm nual laiin mi tam zawk hi chu kan beidawn luatah kan ‘morale’ a down zova, mahni kutkea din tum aiin eiruk leh mi tanpuina hmanga inhaikuak kan tuma. Lehkhathiam nia kan hriat, degree eng engemaw nei ve si hna hmu silo te lah chu kan hmusitin kan deu em ema. An zinga ‘FRUSTRATION’ nasat zia leh kawng awm thei ang dapa an buai ve zia kan hrelo, engmah ti lova tal zui ta mai mai ho ka sawi lo.

Lehkha taima taka zir tang tangte hnual rawihna turin a tawng chak deuhten a rualpawl tawk chauhva zira hna, mahni thawh tawk zawn mai an lo sawimawi thul. Lehkha thiam hi damchhung daih, kan taksa rilru leh ngaihtuahna vawngtu, nunphung, awmdan, chetzia, ngaihtuah thiamna, chhut thiamna leh hriatthiamna thinlung min petu, huaisen leh nghet taka dinga, khua leh tui tha, rintlak, rawntlak leh mi puitling ni tura min siama min chhertu a ni a. Sumdawn bul tanna emaw Office-a thutna tur kailawn, hmanrua satliah a ni lo.

Mihring kan nih chhung chuan sum chu a hluin a pawimawh reng dawn. A hailuh kawngah pawh kan phelengin kan buai em em reng fovang. Mahse lehkhazir leh thiamna tak hlutna aia hna ringawt ngaihtuaha kan hmanhlel zawk chhung chuan kan ramah hian thalai tum sang, thiamna tak nei silo, mahni degree chhuang hlur ringawt kan pung tial tial anga. Thiamna diktak hlutna leh thatna tak man pha lova rualpawl nan, intih changkan nan leh hna zawn nan chauhva zir, tui fahran lo, ti ve hram hram kan inchhuah teuh zel anga. Nakinah phei chuan pawl sawm chauh passed-a trick eng emaw hmanga sumdawna hausak hluai dante, dan ang lova company/factory dina inchhek arbawm emaw kut tling lova sum hailuh dan hi kan la dap ruai hlawm lovang tih a sawi theih loh.

Tunah pawh Phd tha takin a zova lehkhabu a ziaka, chumi paper chu a publish a, tih vel ai chuan high school drop-out a nia, mahse tunah chuan billionaire a ni tawh tih velin kan rilru a luah tawh zawk hi. Hna kan hmuh loh chuan kan zir hahna zawng zawngte kha a thlawn ta vek niah kan ngai hial emaw ni. Kan society tungdinga, mahni zawna kan ei leh bar dinhmun ti hmasawna, kan kohhran kalphung thalote siam danglam hna thawka, kan inchhungkhur bakah kan thenawm khawvengte hriatna tizautu, khawvel thlir dan thiam tira, an nuna danglamna thlentu kan nih ringawt pawh kha hlawkna ropui tak a ni zawk lovem ni?.

Rilru leh taksa seng hah taka hun rei tak lehkha zir ve si kan rin anga ‘hna’ engemaw thawk leh mai silo te kan ngaihnepa, anni aia phalna mumal pawh nei lo leh ‘products’ ,eng company siam nge tih pawh hriat mumal loh zuara kan kawtchhuaha rawn sumdawng Burma mi tih angrengte kan ngaihsan zawk chhung chuan kan ram hmakhua chu a eng lovang. Education-in a tihtur diktak ti se, mipuiten theihtawpin support ila. Thalaite pawh an rawn harh chho ve zel anga, mahni intodelh tumin a hranpaa zilh leh sawisel ngai lovin, anmahnia duhna nasa tak awmin a tur vang zawkin sawrkar puihna tellova eizawn dan an la rawn thiam chho telh telh mai ang.

Similar Posts:

Recent Posts:

15 Responses to “Lehkhazir hi hna hmuh nan ringawt a ni lo”

  1. 1
    Borat Says:

    School/College satliah mai a zir chhuak tan chuan life lession hmuh a har thin. Mahse I ziak tha kher mai.

    Report this comment

  2. 2
    VaiVa Says:

    A ropui thin (Y)

    Report this comment

  3. 3
    chhana Says:

    I thu ziak hi 100% in ka thlawp e.

    Report this comment

  4. 4
    H.Vangchhia Says:

    “Lehkhazir hi hna hmuh nan ringawt a ni lo” a dik (Y)

    Mizoram a sawrkar hna hmuh nan a hman tum vek zel mai erawh a dik lo a ni. ;)

    Zirchhuah hrang hrang hmangin(ie, MBA etc.) sawrkar hna ni lova eizawnna tur dap peih Mizoram chhungah hian han awm mai sela aw!!! Mi sutkuak sa lovah bul tan ngam hi kan la vang deuh niin a lang. Hairehai :P

    Miin lehkha zirsang em em sela, mawhphurhna sang tak pawh chelh mahse a hna a a taimak chuan lova, zelthel tak a a thawh chuan, hna zahawm a ni chuang lovang…. (duah mai a) hairehai :D Zelthel lova taimak, ngaihsam loh a pawimawhin ka hria. ;)

    Report this comment

  5. 5
    SHauzelSailo Says:

    Charice’i ani maw, a hming ringawt pawh hian min ei asin hehe

    I ziakthra hle mai. Philosophy lam I zir em ni Charice?
    Ril tak ani e, vawnthrat hle tur ani he lehkhaziah hi

    ‘kan ramah hian thalai tum sang, thiamna tak nei silo..’ I tih hi tum san lo, tih I tumna zawk nge.
    Tihian, ‘..tum san loh vanga thiamna tak nei silo..’ ti hian a dik a.
    Ngaisang khawp mai che. (Y)
    A tawp lama ‘Burma mi’ I tih kher hi chu, tih toh loh tur ani e. Chumi tello in a kim dik em em e.

    I ziak thra ril hle mai, thuin ka sawi seng lo. (Y) Ram leh hnam pawh I hmangaih hle niin ka ring.
    I thuziah hi chu Zirna ina zirlaibu a tel chi ani e, as per this comment (Y)
    Ngaisang che.
    A hma pawh khan thra deuh mai, I ziah niin ka hria, ka chhiar toh in ka hria.

    Lehkhathiam tak tak te chuan, hna ah pawh a sangber eg Scientist… an thok anih loh pawn mi hmantlaktak hriatreng hloh, eg. hengtiang I ziah ang ziak te anni thrin.

    Thutak erawh chatuan daih ani.

    Report this comment

  6. 6
    H.Vangchhia Says:

    ^ Ni e, “Burma mi” tih khi a mawi lo khawp mai.”Burma mi” kan tih zing a Zohnahthlakte hi Mizoram a hnam awm angte vek tho an ni. Mahni chipuite an hmusit a tha ngai love. :-S

    Hemi i post chhan hi post hmasa lam a, “Burma mi te pawhin Mizoram-ah eizawnna an hmuh chuan thalai hovin eizawnna awm lo ang a an sawi thin hi a dik lo,” tih lam hawi a post kha i rawn kher niin ka hria. Khami post kha a dik lohna a awm lova, i post pawh hi a dik lohna em em a awm bawk hek lo. An dik ve ve a, fuihna tawngkam ve ve an ni. I tangulh mah mah niin ka hre deuh. ;)

    “Lehkha zir a tha lo” tuman kan ti lo a nia :) Lehkha zir that zia hrechiangtu ka ni ve ngeiin ka ring. Hei, tunah kum 50 ka tling ve hnai tawh ania, nimin piah mai pawh khan zir belh leh tumin evaluation/assessment ka va tih leh tat tat kha :P

    Report this comment

  7. 7
    Athana Chhangte Says:

    A thupui a i hman atang ringawt pawh hian a chiang tawk viau e. Education tum ber pawh kha mihring mi puitling a siam a ni lawm ni? Puitling turin kan zir zel ang chu le.

    Eizawnna nghet kan nei thei vek lo erawh kan buaina a ni.

    Report this comment

  8. 8
    Charice_mizo Says:

    Burma mi tih khi a dik. Mizoram mi tih pawh a dik. Chutiangin USA lam mi, Bangladesh mi, Singapore mi, tih pawh a dik vek. Burma tih hming lamrik ruala inhmuhsitna tawngkam emaw kan ti tlat zel hi Burmese ni ta ila ‘i’ll be greatly offended’.

    Chuan Burma mi tih hian Zo hnahthlak kher lo pawh a huam vek. Burma-a Mizo hnathlak Chin te chu an tlem em, very small minority an ni. Southeast Asia region ah research ti turin ka inbuatsaih meka, Burma hi chu ka la rawn sawi fo ang.

    Post comment tute, ka lawm e.

    Report this comment

  9. 9
    Sihtea Says:

    A sak hmel pawh ka la tawn loh,
    a mah Charice eng lam pang nge
    research i tum a? Ni e, education in a tum chu, mi hring rawn piang chhuak tawh phawt mi pa ngai, mah ni a in hai kaw thei tur a chher chhuah hi a ni ber ah kei chuan ka ngai a.
    BA lai ni ve si mah ni pawh in hai kaw zo lo khawp a, mi lak tlak loh hi
    mizoram hian, kan thar chhuak hnem tawh lu tuk a a mang an thlak ka ti khawp mai.

    Report this comment

  10. 10
    SHauzelSailo Says:

    I thiam hle naa ti lo hram la.

    Hmanlaia English ho pawn Burmese min tih loh laia, kei ni leh keini Burmese/Burma mi intih hi chu aa researcher atan chuan a thrat ka ring lo.
    Hetia kan intih chuan mahni leh mahni inziah bo deuh deuhna ani e.
    Mizo hnahthlak nilovin Zo hnam an ni e, keini pawh.

    English ho khum lo anih pawn, antih ang a thra ho zawng tal tih ve zawk tur.
    Helaiah hian ka ngaihsanna tur che ala bak, I ban phak doin em (Y)

    Thutak hria/Lehkhathiam chuan a ban phakthuai ka ring (Y)

    I lawmna chu kan tih duhzawng ni e (Y)

    Report this comment

  11. 11
    H.Vangchhia Says:

    #8 Burma ram a Zohnahthlakte hi “Burma mi” tih hman hi dik lohna a awm lo, mahse India ram a Mizo te pawh hian sawi dan mawi zawk kan neih sa a awm ie., khawchhak lam unaute, Burma lam Mizo te etc. Thusawi inang rau rauah pawh hian tawngkam hman a zirin midang beng tan a ngaihthlak nuam/dawnsawn nuam hi a awm thin a nia :)

    Vairam khawpuiah, vai changkang ho inkawmkhawmnaah Mizo pakhat awm ve ila, anni chuan, “tribal a nih hi” minti sek ta sela, chutiang ang deuh chu a ni ngei ang.

    “For all those who exalt themselves will be humbled, and those who humble themselves will be exalted.” Luke 14:11

    Report this comment

  12. 12
    Dr John Says:

    (Y) A Tha dap dap hle mai. Ka SUPER-LIKE E (L)

    “EDUCATION IS ALL ROUND DEVELOPMENT” tih te mai hian a Hrilh-fiah chiang berin ka hria :)

    Report this comment

  13. 13
    Vladimir Putin Says:

    Theih ang tawk tawka zir chhuak ve, chhungte chawm emaw mahni inchawm tan chuan unemployed nih hi a hrehawm satliah mai lo, pum ruak khawpa riltam theihna emaw, inkhawm ngam lohna khawpa retheihna ani thei asin. Hna hmuh ai mah, hlawh hmuh, hi a tul khawp.

    In cheering group ka rawn tibuai lawk che u a, pawi ka ti khawp mai.

    Report this comment

  14. 14
    caribou Says:

    I ziak tha hle mai. Lehkhathiam kan pung thur thur a, hna erawh a pung chak ve si lo. Lehkhathiam, hna hmu lo nih a lo hrehawm dan tur hi aw………

    Report this comment

  15. 15
    Kawhterenga Says:

    A ziaktu Charice a nih chhung chuan eng pawh ni se ṭha ka ti vek….:-D
    A ṭha bon top.

    Report this comment