MLTP ACT BAWK HI SAWI NAWN LEH TEH ANG U

July 25th, 2013 6:03 am by Athana Chhangte

Tualchhung chanchinbu ka chhiarah chuan MLTP Act siamthatna tur Bill pawm a nih thu heading-ah an rawn hmang kelh kulh hlawm a. Mipui mimir tan chuan a that zawkna tur lai tak point pawh hriatthiam a har deuh avangin, a hre zawkte sawifiah turah dah mai ta ila. Khawnge, kan rui tlang ta sa sa, inkarkik deuh deuhin ngaihdante sawi ve leh phawng phawng mai ila. Ngaihdan inan loh vang maia invuak tum uaih uaih chu, kan kalpelh tawh kha maw!

MLTP ACT?: A hlawhtling ring lo pawl thawm a ring tial tial. Chutih laiin he dan hlip tura inzuar ngam chu kan politician zingah hian an la awm lem lo niawm tak a ni. Khap bur duhtute an la tam zawk a ni mahna? Tin, khap bur duhtute duhdan hian hunrei tak chhung chu kan kal a la ngaih hmelin a lang. He dan kengkawhtu Excise department lam chuan thawktu, motor etc. indaihlohna avanga an duh anga an chet theih loh thu an sawi uar hle a. Khawpui daifema zu zawrhna hmuna excise outpost dahna tur takngial pawh sum a awm lo a nih hmel. Nitin deuh thaw zu check tura an zuk pan a ngai tlat.

Tun tum MLTP Act siamthata a thil tum deuh ber ni a lang ta chu, zu khap duhtute tih lawm nan a, sum sen belh chuang si lova pumpelh (short cut method) hmanga, zu hi tihrem tak tak theih inring chuang si lova siamthatna a ang hle. Tin, sorkar hian he dan tihhlawhtlinna tur atan hian sum sen belh hi a tum tawh hrih lo niin a lang ta. A tawi zawngin a sorkar ber hi tuilairapin a awm mek niin a lang.

A BUL KAN TAN FUH LO A NI: MLTP Act kan hman tantir khan vengtina zu zuar kawlten JAC te indinin, tlawmngai pawl dangte nena thawkhoin, zu supply titawp tumin zu zuar kan hnawtchhuak chum chum mai a nih kha. Zu zuar kan hnawhchhuah takte kha khawiah nge an kal tih pawh kan ngaihtuah zui lem lo, mahni veng theuh dry area a puan tumin kan hmanhlel em em mai hlawm a nih kha. Kut inthlaknate hial thlengin, unau kan inhmelmak lek lek mai a nih kha maw!

Zu zuar kan umchhuahte lah kalna tur dang nei lo ta chu khawpui daifem lamah mi hausa insak luahin an bawr khawm ta a. A hmaa tanrualna chang hre reng reng lo kha, loh theih lohna avangin kan tanrual tira, sorkar tan pawh sutdarh huphurhawm khawpin kan siam ta anih hi.

Khang hunlaite khan Dan lekkawh lam kha sorkar kutah dah ngam ta ila, mipuite chuan moral reformation lam kha lo buaipuiin, demand tihniam turin plan mumal tak neiin, inzirtirnate lo nei ila. Tin, zu zuar sim tawhte eizawnna tur lam thlengin buaipui tlang ta suau suau ta zawk ila chuan, tun dinhmun ai hi chuan kawngro a su deuh mahna le?

Zep thu a cheng lo, tunhma deuha sakhaw ruihchilh pawlte zirtirna anga kan inzirtir thin, zu hi sual tinreng bul a ni tia, tualthah,pawngsual etc. te nena sual (sin) inang a ni, kan tih thin kha, tunhnuah chuan hman sual theih thil pakhat ve mai a ni tih kan hre leh si a. Keini ang hnam naupang hi zawng, kan fin hi a tlai leh thin. Kan ngaihdan leh tanfungte pawh hi a inthlak chhen mai a ngai a ni e.

MIPUITE HIMNA I NGAIPAWIMAWH HMASA ANG U: Tun dinhmunah chuan kir leh chi ziazang kan ni tawh hrih lo. Kum enge maw zat chu he phurrit hi sorkar leh mipuite hian kan phur dawnin a lang. Chuvangchuan, he dan kan kalpuinaah hian pawisawi lote himna ngaihtuah hi kan tihtur hmasa chu a ni.

Kum 1992-2000 bawr chho a, Red Rose ruihhlo zawrhna hmun lar tak JAC in an umdarh tak vek kha, kan la hre rengin a rinawm. Khang ruihhlo zuar ho kha, a thenin an ruihhlo zawrh bansan phahin thingtlangahte an pem a, Chutih laiin a then Tuirialah, a then Rangvamualah te pemin zu te an zuar tha leh hlawm a nih kha. Anmahni vang a ni e, chu ka tingam hauh lo nangin, khang ruihhlo zuar ho Tuirial a an pem thlak hnu khan zu zawrh aia hlawk zawk, teak thing ruk chu a hluar ta tlat mai a. Hun reilote chhungin forest plantation teak, kawng bul hnaia mi tih lo chu ruk zawh deuh vek a ni. Chumi hnu teak ruk tur a awm tawh loh hnuah Tuirial vela mimal hun neituten an huan thlai venga chawlhniah pawh an riahchilh thin a ngai ta hial a nih kha.

Kan khawpui than dante hi duhthusam a nih lohzia chu sawi vak ngai lovin kan hre vek awm e. Kan insak dante hi rukru tan a him loin, kawngpuia motor kan hun maite hi kan rilru tihahtu a ni tan ta mek a nih hi. Aizawl bik sawi leh ta ila, khawpui daifema chhungkaw enge maw zat, zu zuara eizawng mekte hian an zu zawrh hi bansan ta thut se, engtin nge ei an zawn tak ang? (Heng hmuna zu zuar mekte hian min lo hrethiam lawk se) Dan phal loh a zu zuar ngam chuan rukruk pawh a hreh dawn em ni? tih hi mipuite himna ngaihtuah nana zawhna pawimawh tak a niin ka hre ve tlat.

Kohhran leh tlawmngai pawl hi chuan sual do hi kan tihtur a ni e. Kan la do zel turah pawh ngai ta ila. Mahse titak maia zu in mite kan duh saka, tha leh zung kan sen phah nasa ta lutuk hi chu, thalai zu in ngai lo, zu in hman lo tur khawpa eizawnna zawnga buai mekte tan hian an thikawm palh ang tih a hlauhawm tan tain ka hria. Sorkar laka beisei tur nei lo, eizawnna kawnga baihvai thalaite tan hian kan tha leh zungte hi sawrbingin, malsawmna nih tum zawk ta ila, Zoram nuam lehzual kan siam thei zawk law’ng maw?

Similar Posts:

Recent Posts:

14 Responses to “MLTP ACT BAWK HI SAWI NAWN LEH TEH ANG U”

  1. 1
    Sihtea Says:

    Ziak tha dup dup khawp mai.
    A chhia leh a tha hriat na thing kha mizo te chuan, thiam loh kan chantir zawk hlauh a nih hi. Thu awih lo tu
    Pi Evi leh Pu Adama te nupa kha,
    thiam kan chan tir hlauh zawk a nih hi.
    Isua zuitu te hi, sualna hrang hrang lak a tang a in thiar fi hlim tur in,
    kan zui/kan rin Lal Isua’n min zir tir a.
    Kei ni Mizo Isua zui tu in ti te e rawh chian, kan hnen a tang in, sual in thiar fihlim tir kan tum hlauh zawk a.
    A let ling a kal kan in zir tir a vang in,
    chatuan nun na kawng zawh a kal zel dan tur kan thiam ta lo a ni e. Ti sa leh thi sen nei lo, kut leh ke pawh nei lo, ngaih tuah na pawh nei lo, tawng pawh tawng thei lo hi, khua pawh hmu thei lo, ri pawh hre thei lo hi, kan hnen a tang a in thiar fihlim tir kan tum a. Kal sawn ve thei lo na fam chu kal sawn thei hek lo, kei mah ni duh thu ngei in kan pan a, kan in thin zawk a. Chu vang in, kei mah ni a hna thawk thei chauh zawk a ni si a.

    Report this comment

  2. 2
    Vladimir Putin Says:

    Kohhran kal sual leh sorkar corrupt inkarah chuan engmah a kal dik thei lo.

    Tun hma chuan “remna leh muanna” chhuanlamin, tun hnaiah Total Prohibition chhuanlamin mipui attendion an la peng sauh sauh va, politician thankhat leh officer thenkat an multi millionaire sup sup theih phah anih hi.

    Report this comment

  3. 3
    Xingibera Says:

    I ziak tha, tawngkam i thiam a chhiar a nuam zaih mai. Zu hi, kan sawi zing tawh lutuk a, i sawi ang deuh khian zu khuahkhirhna dan hi ka rui ni ber tawhin ka hria, ngaihdan ka nei mumal thei lo.

    Amaherawhchu, “khuahkhirh pumhlum” leh “thlah zalen” tih inkar velah hian zu hi dah thei/thiam ila, kan hnamzia leh kan tunlai nun nen pawn a inmil viau ka ring.

    Report this comment

  4. 4
    muansakhi Says:

    Sawrkarin India siam bakah ramdang beer leh wine brand tha lalutin zuar se, a strong chu khap chhunzawm rih ila. A tir kum 3 kum 4 chhung chu kohhran leh tlawmngai pawlin zu in ethics lo zirtir se… An duh awm teuh si lova.

    Report this comment

  5. 5
    H.Vangchhia Says:

    Lemchanna khawvel!

    Report this comment

  6. 6
    chhana Says:

    Zu kan in a nih rau rau chuan ruih chhum hmawk hi a tha ber. In ve ting tanga thil hriat lawi si chuan buaina a chhuak duh.

    Report this comment

  7. 7
    hiho Says:

    good post
    (Y)

    Report this comment

  8. 8
    Mr.Fanchun Says:

    I thuziah chu chhiar a nuam hle mai a.. MLTP Act chungchang sawia ka hriat chhuah ziah chu Officer pakhat thusawi ”MLTP Act hlih hlih a ngailo, Zu tha leh changkang in anti common mai mai” a tih kha.. :)

    ‘Zu chu mimawl hnenah chiah a thawk’ antih kha maw.!. Kan rama Zu khap a la ngaih hi chu kan la mawl deuh a niang e.

    Report this comment

  9. 9
    chhana hlawnchhing Says:

    Zu in thiam ram hi khawvel ah kei chuan ka chiar zim deuh nge ni ka hre lo, chuan an khap hlawhtlinna hmun leh ram sawi tur pawh ka hre hek lo, zu zawrhna dan kan buaipui reng ai chuan a zuar ve lo leh in ve lo te hmakhua hi ngai pawimawh zawk ang u.

    A duh in in se a duh loh in kan in lovang a, mahni fate pawh zu in lo tur a hrilh thei lo hian zu zuartute kan han hua in hnawhchhuah nghial kan duh thin a , i fa i ril arah ngei pawh i hrilh fing zolo va i thunun zawh loh chuan engtin nge ruihhlo zuar ho chu i do zawh ang.

    kan officer lian tam tak hian a sen chi an ngaihsanna hi a reh hlei thei lo nge pawisa sing chuang pek ai in a senchi um khat ah an lungawi zawk zaw mah an tam mai.

    Report this comment

  10. 10
    Athana Chhangte Says:

    #1 Sihte, A lawmawm e. Pathian thu man fuh inti tam tak hian kan man fuh lo palh a ni ange. Pathian mihriat tan chuan Amah atangin hriatfiahna an dawng thin an tih kha maw.

    #2 Vladimir, I sawi dik khawp. Lar theihna tur leh vote hmuh theihna tur hi kan dap char char mai a nih hi.

    #3 Xingbera, hmanhmawh takin ka type a, ka type hmasak zawk ka lo auto save si lo, a ka la tibo zui haha. Hawrawp kim lo leh ziah dik loh lai min hmuh kansak avangin ka lawm. Misuala fakna dawn hi chu a lawmawm bik.

    #4 muansakhi, i rawtna hi ka fin phah sawt mai. Mahse Zowine (Zawlaidi) tuna an hralh theih em em hi an hralh theih loh phah mai angah.haha.

    #5 Pu H Vangchhia hi ka nu nen an hnam a inang a nih hmel, chuan maw zu sawi hi an ning ve ve tawh bawk.

    #6 chhana hahaha. Ruih viau chuan buaina siam a har ngawt ang

    #7 hiho, thanks, mahse ka kzp ve thiam lo tlats.haha

    #8 Mr. Fanchun, ka lawm e, Ni e, khap al ngai ani mahna le?
    Sawi leh sawi hnu misuala fakna dawn hi chu a dan a dang, a lawmawm bik.

    Report this comment

  11. 11
    Athana Chhangte Says:

    Chhana, Thanks, kan ngaihdan a inang.

    Report this comment

  12. 12
    malsta27 Says:

    MLTP act hi ka thlawp theih hun tur chu, kan culture ah hian leh kan pi leh pute hunlai khan lo ZU hi lo awm ta miah lo se chutichuan ka thlawp ve thei chauh chuan ka ring…..Sual a nih na hi ka va hmuthiam phalo tun thleng hian hehe

    Report this comment

  13. 13
    H.Vangchhia Says:

    Synod hlauh vang a MLTP awm hi a uih ka ti pha ve tlat (ka hmuh dan). Synod hian mipui a chawm lo. Mipui enkawltu sawrkar revenue tha tak a leh zu chhia avanga Mizo thih vak vak lohna tur khap luih tlat mai hi a suahsual thlak hi ka ti thlawt a ni.

    Mizoram-ah hian zu in duh an tam lutuk, a rem ngai lovang. Thalai tlem zawkin drugs an duh vangin drugs zuar an awm reng. Zu phei chu a duhtu tam tak an ni tam tak, a ti rem emaw, khuahkhirh ngai lovang. Zu tha chiah an khuahkhirh. Chumi nghawng chu state rethei ber dawttu revenue tha tak an chhu chat tihna a ni. Central puihna zarah hlawh lak tur etc. a la awm a nih mai hmel zawk a, development pawisa tur lah a thei theiin an paipawn hmiah hmiah mai bawk si. Tenawm theih dan dan hian kohhran leh mipui aiawhtute reng reng mai hi an khawsa niin ka hria. (N)

    Zu chhia lenkual tir reng lovin, zu tha zuar sela, a intu lamah dan khauh tak siamin kengkawh ngei bawk sela, kan changkang zawk ngeiin a rinawm.

    Report this comment

  14. 14
    Dr Mahminga Sailo Says:

    I ngaihtuah kimin i dawn thui hle mai. Mizoram MLTP Act, hi chuan Mizote hi min tibuai ve ngawtin ka hria. Zu dawr a awm tak avanga zu ngawlvei pung thut tura ngaihna mi tam zawkin an nei te hi, hnam pum tan a zahthlak ka ti. A inthunun theih loh thlak em mai.. (N)

    Ka sawi leh ang, duh hun huna a ler atang thil nuai mih kan tum ngawt zel hi zawng a fuh tak tak dawn lo a nih hi.. :-(

    Report this comment