KAN CHHUNGKAW TUKTHUAN EI LAI BURMA MI PATHUM IN MIN RAWN LUHCHILH A MIN TIBUAI:

July 24th, 2013 11:12 am by BigDaddy Hmahmatea

KAN CHHUNGKAW TUKTHUAN EI LAI BURMA MI PATHUM IN MIN RAWN LUHCHILH A MIN TIBUAI:

A hmasa in keini chhungkua hi hmeichhe awmlo, mipa hlang pali khawsa kan ni a. Hmeichhe awmlohna in hi chu inchhung khur bungrua leh inchhung khawsakah te hian a hriat deuh thin an lo tih hi chu a dik zia a tak ngei a hmutu chhungkua kan ni ve a, chutihlai erawh chuan hmeichhe awmlo na na na chu thu nawi pawh a tlem deuh thung. Zawnglai thiau pali kan awm tihna a nih chu. Chhungkaw thawm na bawrh bawrh chi kan nih lemloh avangin mi te angin nei ve le-lua lo mah ila inchhung khurah buaina em em hranpa pawh kan nei ngai lem lova, tin, kan chhungkua nilo atang phei chuan buaina kan tawk ngai lemlo, mahse hemi tuk hi chuan kan khawchhak lam unaute, ‘Burma mi’ kan tih pathumin kan tukthuan ei lai min rawn luhchilh thut mai a, min rawn tibuai ta tlat mai le…

Thawhtanni tuk a ni a, keini chhungkua pawh Chawlhni sa thing inchuh tur tlemazawng a la awm avangin tuk dang anglo takin kan tukthuan(Zing chaw tih a in sawi hi keini Mizo chuan tukthuan kan ti a, tlai chaw in tih hi zanriah kan ti thung) ei tur chu kan phur sarh hlawm mai a, a chuh chak chak kan tlai leh dawn a ni tih rilru a hre ran chungin chhung inkhawm kan neih zawh chuan kan tukthuan ei tur chu kan siam tan nghal a. Kan siam zo kan kil tan deuh chiah tih chuan kan in kawngkhar chu ‘in awm em…’ tih pah chuan an rawn kik ta dawt dawt mai a.

Kan in hi kawngpui atanga in chhawng chunglam a step a chhoh ngai anih avangin kawngkhar pakhat chiah luhna leh chhuahna a awm a, kawngkapui a mi an rawn luh chuan chumi atang vek lo chuan chhuahna tur dang a awm lo. Misual pawh rawn lut in tlanchhiat thut pawh ngai se tlanchhiatna tur dang a awm chuang lova, tukverh lah han zuan chhuah mai na chi lah a ni der lo, sang tak vek an ni hlawm tawp mai a. Hetiang hi kan dinhmun a ni tih an hriat vang nge, zing tukthuan eilai tak hi chuan anni ang ho hi ka lo beisei vak lovin an ring anga chu chu remchhangah hmangin sum leh pai lam kan neih deuh ringin min rawn luhchilh ta nge chu kan hre lova mahse kan beisei loh ber mai lai leh kan inrin loh ber mai lai kan tukthuan ei lai tak chuan min rawn thawng ta thut mai a.

Inchhung an rawn lut chu eng hriamhrei nge an rawn thawhchhuah pui kan hre hauh lova, an rawn in ak puar hlawm viau mai lehnghal a. Chutihlai erawh chuan an thil ah chu a thlawn mai a kei ni chhung min rawn pek tum an ni hauh lo tih chu an hmelah chuan a hriat theih nghal mai a. Pakhat chuan samurai nalh zet mai khawilai officer lian, mahni hlawh chhuah leh ‘ziah chhuah’ te hmanga chhungkaw ei baka in tha tawk sa a lirthei chi-thum chi-li lei nawn awn awn thei ho sitting room number -2 zawk banga ama kah ni miahlo khawilai thingtlangpa lehkha pawimawh tang lachhuak thei lovin an chhungkaw ro ve tumpang ki hnum tha zet mai amah tlawn nana a pek bula khawi sanctuary chhunga a ruk a mi zukchal kah ki a lei sak intar a han khang mawi zan mai atana itawm fahran mai chu a keng ran mai a. Tin, pakhat zawk bag ah lai atang chuan chemte te chhe zawk zawk lo tih hriat tak mai fawng hi a rawn lawr vung mai bawk a. A hma hruaitu ber chuan a bag ah chuan pistol nge enge a ah tih a hriat loh na a, thil eng engemaw chu a ak hnem hle a ni tih chu a puar that dan atangin a hriat nghal mai a.

Chutia min rawn luhchilh ta chu keini chhung tukthuan ei tur kil laih tawh pawh chu kan chawl deuh thap a, anni lah chu an hmel han enin Mizo pangngai henglai tualchhung mi an ni lo tih chu a hriat reng mai si a. Enge ka chhungkaw chungah lo thleng dawn tih reng a hriat ta lo. Rilruah chu hman deuh a misualin mi in an luhchilh a pawisa an laksak vel te kha a rawn lang zut zut mai a. Ka pa chuan bengvar chhuah in, “Enge in duh le…?” a lo ti a. Anni chuan, “In pawisa neih zawng zawng min pe rawh u…” an ti ta hauh lo mai a. Anmahni thil ah theuh chu an phawrh sawk sawk a, an hruaitu deuh ber chuan a rawn sawi chhuah hmasak ber chu, pai deuhhlek hian, “Inchhung bungraw chihrang hrang leh tar mawi chi te kan zuar a mamawh te in nei ve angem…?” tih a ni ta tlat mai le. An bungraw ah te chu chhoka chhuatah chuan an han phawrh zung zung a, an lo keng chikim phian mai lehnghal a. Samurai tar mawi chi atanga frying-pan a mawng bet theilo chi te, chemte lian leh chawhmeh chan chemte atanga thingzaina ara leh tuboh te, sahbon bawm atanga TV remote te, mobile phone charger chihrang hrang atanga sakawrbakcheh thleng mai chuan thil chihrang hrang chu an rawn phawrh ta ruih mai a. Kan thingpuife thlitna a lo tha tawh vaklo bawk a an rawn ken pakhat chu kan han lei sak hram a, tichuan an inkhung sawk sawk a, lawmthu an sawi a an kal liam leh ta nghal a, keini pawh chuan kan chhungkaw sport ve chikhat, samurai aiah thirfian hmang a chawhmeh han hawlh kual vel chu kan tan ve ta nghal a. An thil zuar min rawn luhchilh zet chu min tibuai hrep mai a, chawhmeh suah sa pawh a dai vek hman alawm le.

A ni lah taka, kan ramah hian khawchhak lam unaute Burma mi kan tih ho te leh Vai ho te, kan ram a sumdawng leh hna eng engemaw thawk a eizawng hi an tam hle mai a. Chutih laiin keini a ram leilung fa te hi kan ramah hna a vang kan ti a kan iak kan iak angreng lawi bawk si a. Heng ramdang mi kan tih ho zozai in an thawh ang hi a ram chhung mi te hian thawk peih ve ta ngat ila kan ramah hian hna a vang, eizawnna a vang hi kan ti kan ti in kei chuan ka ring lo reng reng. Hna a vang kan tih hi chu hna thawh duh bik leh duh loh bik kan neih thin vang leh kan thatchhiat rilru neihloh vang mai mai hi ni hian ka hre ve tlat. Sawrkar hna hi kan beisei vek ringawt a, a sawrkar hna lam in a lo daih thei bawk si lo. Lehkhathiam hna hmulo pawl te kan han din ngawt a, lehkhathiam nih chuan mahni lehkhathiamna kha sawrkar hna kher nilo hna dang ei zawn nana hman theih awm tak hi a ni a, engtinge maw hetiang pawlah te hian a tel pawh an tel zah loh hi ka ti ve thin. Sumdawnna han ti dawn ila, liantham deuh a bul tan a, dawr luah a, counter hnungah chair vir thei nen a inchhawp a, dawr signboard a eng ‘enterprise’ tih vel emaw tal tar loh chuan sumdawng ah pawh kan in chhiar bawk si lo.

Heng Burma mi ka rawn sawi te hian an dawr bungrua chu an ak mai a, dawr luah man an chawi lova, dawr luah man an hlep nghal phawt. Chutah customer in an rawn pan kher nghak lovin an mahni in intinah lut in an pan mai a, luh hnem na na na a, mi duhzawng an ken na na na chuan dawr tu tawk an lo awm leh nge nge thin bawk si. Dawr muk deuh dawrtu awm si lo dawr hming eng enterprise changkang deuh emaw a eng deuh phut thei a intar a mahse nilenga inhralh si lo, dawr luah man to ve fung si te ai chuan an nitin lakluh a tam daih zawk maithei asin. Mi mamawh tur ken thiam leh thiam loh kha a ni tawh mai a. Mahse keini chu MA val te chuan hetiangin mi inah thil zuarin a in ak kual duh der lo a. MA val thil zuar kual a mahni leh chhungkaw chawm zo nih ai chuan MA val inchei nalh zuar chhungte chawm hlawm a in la changkang satliah, mahni bike chhungte lei sak petrol man pawh thawk chhuak lo ni kan zak lo zaw tlat mai thin hi a pawi takzek a ni. “In fapa chu enge a nih tawh ?” “M.com a zo ve tawh a.” “Anih chu eng hna nge a thawh ve tawh a ?” “Hna a la hmu lova, engmah a la thawk lo a awm vel mai mai rih a ni…” Khai khai khai, a zahthlak lam mah mah lo maw le. Hna te chu a awm awm thawk se a ni mai alawm, mahni lehkha zir san pawh chhawr tangkai thiam hlei lo…tlaw lutuk mai.

Mi in a thawh peih a rilru a neih a, thawh hreh a neih loh phawt chuan kan ramah hian eizawnna tur a la tam lutuk. Tu’n ka tawng lo haw lo se CeeCee-a (of CeeCee Pickle), mi tam takin an nuihzat pawhin pickle ama siam hmangin a hming a chhera, ei a zawng thei alawm mawle. Kan ramah hnamdang an tam kan tih kan tih te hi heng hnamdang ho thawh ang hi thawk peih ila, anmahni aia tha a nih loh pawhin anmahni tluka tha in thawk ila, an rate ang tho inchhiar bawk ila tunge sen inang, kuthnu inang rau rauvah hnam dang aiin mahni hnam pui chhawr duh zawk lo ang? An thawh ang kan thawh ve vek chuan hna an nei lo anga, hna awmlohna ramah ei zawng turin an rawn lut ruih ruih lo tawp ang tih kei chuan ka ring tlat.

Chuvangin eng mi pawh ni in eng anga zir sang pawh ni ila, thawh hreh leh thawh peihloh leh thawh duh bik kan nei a nih chuan kan vannei fe te a nih loh chuan ei hmu a chhungkaw chawm thei khawpin kan ding chhuak hauh lo ang a. Chutih laiin matric pawh pass lo pawh ni ila thawh hreh kan neih loh a, rilru fim tak nen kan tih apiang taima tak leh remhre taka kan tih phawt chuan mi sawi hat khawp a hausa te ni pha lo mah ila chhungkua chu kan chawm em em ang tih hi ka ring tlat a ni. Thil thiam chihrang hrang te hi neih tum ve tur. Entirnan mipa tan mi in mau pum khat leh chem pakhat min pe se hralh sum chang thei thil engemaw talah chhuah theih tur. Engkim mai ‘ka thiam lo ang, ka thei lo ang, ka peih chi a ni lo…’ tih zel mai chuan ‘MA val whole thing square’ pawh ni sawmsarih in eng anga inla changkang tukhum sam phir pawh ni mah la i nupui fanau te chu i chhungte thawh chhuah sa choka ami bak in i chawm lo anga, i nupui stayfree man tur i nu leh pa i dil duk duk reng mai ang.

Chuvangin hei hi hria ila kan ram leh hnam tung ding a, ram ti hmasawn tur chuan mitin te hian eng hna mah thawk hreh lova mahni theih tawk a ke kan pen a ngai a ni tih hi. Chu chu kan ram leh hnam damna, hmasawnna leh changkanna atana keini Mizo mipui te’n a kan ram leh hnam laka kan bat a ni tih hi i hre thar leh ila a tha awm e. Keini a ram leilung fa te’n thawh hreh, thawh zah, thawh peih loh leh thawh duh loh kan neih zeng-zung mai chuan kan chhehvel ram atangin hnamdang kan thawh hreh, kan thawh zah, kan thawh peihloh leh kan thawh duhloh te thawk turin an rawn lut zel ang a, an service kan mamawh miau si avangin kan hnar thei si lo anga, reiloteah kan thlang Khasi ho ang deuh khuan chim ral in kan awm anga, kan ramah ngei hian hnamdang in sumdwnna lian leh dinhmun pawimawh tha zawng zawng an chelh anga keini a ram neitute hi kan ramah hian thu lo zet in kan hawi ve lawl lawl mai ang tih hi a hlauhawm riau mai a. Chuvangin Zofate a bikin keini thalaite hi khua a tlai hma hian i hrarh chhuak mawlh teh ang u khai.

BigDaddy Hmahmatea

(R.Lalhmangaiha)

Kulikawn

Similar Posts:

Recent Posts:

25 Responses to “KAN CHHUNGKAW TUKTHUAN EI LAI BURMA MI PATHUM IN MIN RAWN LUHCHILH A MIN TIBUAI:”

  1. 1
    littlerascal Says:

    Va sei ve kan chhiar chhin

    Report this comment

  2. 2
    kilung Says:

    An vaw hrep che maw tih nak lai in… :P
    Mizo te hi chu Burma mi leh Vaiho angin engmah kan ti peih tak tak lo, a hniam ber atang pawha bul tan kan hreh tlat alawm!!!

    Report this comment

  3. 3
    Coolman Says:

    MA val whole thing square chuan eng ‘Enterprise’ nge an lo beisei kher kher?
    BigDaddy Hmahmatea chuan a va ziak tha dap dap ve.
    Mahse he article chhiar chhuak dap ho hi chuan job emaw ‘enterprise’ mumal kan neih deuh fur hmel.
    Kan ramah hian thathhiatna cancer damdawi kan mamawh riau.

    Report this comment

  4. 4
    H.Vangchhia Says:

    Mizoram hi taima tan eizawnna a tam tur zia hi tih tun hnu hian ka hre zual sauh sauh thin!

    Report this comment

  5. 5
    Dr John Says:

    (Y)

    Report this comment

  6. 6
    Charice_mizo Says:

    Hei hi sawifiah ve deuh a ngaiin ka hria.

    1) Hna a vang tih hi a dik. Unemployment problem hi ram thanglai leh ram rethei zawng zawng harsatna, ram changkangah pawh an la buaipui em em a ni.

    3) Sawrkar hna kan beisei thin nachhan chu kan ramah service sector a la lian em ema, Mizoram economy innghahna pawh a ni. (Agri tih lohah chuan).

    2) Miin BA/MA alo passed a hna a hmuh loh hian a tlaw hrim hrim vang, thatchhiat vang, hna hniam hmuhsit vang etc a puh thlu ringawt lovin a chhan diktak a chepa kaia chhut a tha. Thalai BA/MA degree nei, sawrkar hna hmu si lo ten engatinge thirchhia zawn, restaurent-a inhlawhfak, lei laih, sam siam , sumdawnga vah kual an hreh fo thin?

    a) skill a ngai. BA/MA ah hian hetiang tihdan tur hi an zir miau lova, Arts line-a kal tan chuan hmalak dan tur thiam a har em em.

    b) A hnam anga manual labor kan hmuh hniam em vang hian mi luhlul tumtlang ve tak tan lo chuan college rap ve tawh chin thlan tla hluama tuk chhuak chhiara hna thawh chu hrehawm an ti a ni.

    c) Kan thil zir hian kan thawh tur awm a hrila, hah taka kan zir chhuah nena intuha lo lutuk han thawh daih kha mi tam tak chuan risk lak an ngamlo. Entirnan, lo te neiin buh te ching dawn se, kan ram agri dinhmun han thlir hian incentive a awm hlawl lo a ni.

    d) Ram changkangah chuan college rap chin chu an laktlak em em thin. kan ram inzirtir dan kalphung hi ala hniam em maia, BA chu sawiloh MA chin pawh kan confi lo em em, thiamna tak tak zir chhuak aiin zir chhuak lo, degree chauh nei kan tam zawk mah awm e. Kan education system hi ulukly-a enfiaha siam that a ngai a ni. Engpawhnise, thangtharte hi chu kan laktlak ve sawt tawh fu chuan ka hria.

    Tawk rih phawt..

    Report this comment

  7. 7
    Coolman Says:

    # 6. “Kan ram inzirtir dan kalphung hi ala hniam em maia, BA chu sawiloh MA chin pawh kan confi lo em em, thiamna tak tak zir chhuak aiin zir chhuak lo, degree chauh nei kan tam zawk mah awm e”.

    Hei hi ka lo vei ve em em a. Mahse kan ram inzirtirna hi tha tawka ngai hi tawng ring ring anni tlat. MZU a zirlaite hi multinaltional company ten eng tiakah maw an company a thawk turin rawn sawm dawn ni (ka mumang mai mai mah nise).

    School nise Pastor pakhatin a sawi, “Thingtlang lamah lah mi anglo an a sing a sing tel an her chhuak” tia pulpit atang ngata a sawi la la hre reng. Dikna lai a awm tlat, ram danga school nena tehkhin chuan. Central Service a lut pawh kan tlem sawt em hi.

    Zirna a tha, ti kan la tam zawk chhung chuan reform a theih loh bur.

    Report this comment

  8. 8
    chhana Says:

    I thil sawi ho khi 100% in ka thlawp e. Ka ngaihdan nen a inmil vek.

    Report this comment

  9. 9
    Awmtea Leo Khiangte Says:

    Good (Y)

    Report this comment

  10. 10
    Sihtea Says:

    Thu ngaihnawm huang a a post ai-in he tah chuan, comment tu te an phan chang hlawm bawk a, comment pawh a puitling kharh mai a, tha ka ti khawp mai. Kan leh khathiam sawrkar hna leh eng kawmpani ni e maw a, hlawh tha tawktak hlawh chhuah na tur chuah
    hna a ngai tu te hian, in ngah na an mah ni chawm tu nu leh pa an nei tha hlawm rih em a, an thluak bur a fin na awm kha hman na chang an la hre rih lo a nih hmel. En tir nan,
    Burma mi te leh Vai ho hi chuan,
    nu leh pa an mah ni hneh sawh tak a chawm thei tu an nei lo tlang pui a.
    Chu vang in, an in chawm theih na tur hna an ngaih tuah a ngai a, tai ma tak a an thawh a ngai. An thawh loh chuan, chawm tu tur nei ve hlawm hek lo maw le.

    Report this comment

  11. 11
    H.Vangchhia Says:

    #6 hna a vang tih hi a dik ka ti thei ve tlat pek lova!

    Sawrkar hna chu hmelhriat nei tha lo tan chuan vang tak a ni chiah mai. Mahse, sawrkar hna nilo, eizawnna tur pawh a tam mai, tam tak a ni. Keima experienced tawh a ni a, ka hrechiang. Mi hmuh a sawrkar hnathawk emaw, contractor hming put emaw, politics lam khel mi, sumdawng hming put emaw ang chi, Mizoram chhung a kan hmuh langsar/chunglam en deuh a nih loh chuan hna dang hi kan hmuh thelh nasa em a ni e.

    Mi tih lar sa hi bawh huk fo lo ila, thil a tam mai. Ngaihsam sim a tha hle bawk awm e.

    Report this comment

  12. 12
    Charice_mizo Says:

    # 11 Hna a vang tih hian sawrkar hna chauh ka sawi loa, hna hrim hrim ka sawi. Hna a vang tih leh hnathawh tur a vang tih hi thil hrang an ni tih hre bawk ila. Hnathawh tur hrim hrim chu englai pawhin a awm reng, unorganised sector ah ngat phei chuan. Mizorama Job opportunity chhiat zia hi chu kan hre theuh awm e. Mizoram chauh ni lo India rama State rethei zual apiangah job opportunity, prospects etc a vang ang. Hei vang hian alawm mi tam tak State lian leh hausa zawkah an pem (migrate) thin, ramdang chu thuhran. A thu hrimin nagpawh USA ah i pem daih kha, helam ai chuan thawh tur remchang a tam deuh vang a ni lo maw :)
    Eizawnna tur a tam i tihte chu engte nge a mal malin min hrilh thei em? USA ni lo Mizorama thawh theih aw.

    Report this comment

  13. 13
    BigDaddy Hmahmatea Says:

    “Kan thil zir hian kan thawh tur awm a hrila, hah taka kan zir chhuah nena intuha lo lutuk han thawh daih kha mi tam tak chuan risk lak an ngamlo.” tih laiu te chauh hi kan chhang mai mai teh ang, a dang zawng hi chu a zawttu hia amah tho hian a chhanna a hriat hle bawk a. Kan ram dinhmun leh job ooprtunity lam dinhmun hrechiang viau si chuan kan ram a eizawn nan a hman teih ru chi engati nge a zir mai loh tih te mai hian ka’n zawt let ve chhin. Zir san vaka kan rama mahni zir chhuah sa chhar tangkai leh theih siloh chuan a zirna sum leh pai kha a seng thlawn a ni mai dawn lawm ni. Chu ai chuan a rualpawl tawkin zir se ram pawn lam a aim lo rau rau anih chuan ram chhung a mahni a eizawnna apply theih ang chi buaipui ta zawk se chhungkua a chawm hma zawk lo maw le??? Tin college rap ve chin tawh in thlan tla a hna thawh an hreh a, thlan tla lova thawh tur a hmu bawk silo anih chuan ei hmuh loh chu an phu ve reng zawk a ni lo maw le. Het tak hi a ni he post ah pawh hian ka rawn au chhuah pui ber chu zir sang tan pawh a eng hna pawh thawh hreh loh tur tih tak a hi…chumi chu a hranpa a sawi fiah ngai lovin ka post ah hian ka sawifiah chiang tawk viau in ka lo inhre mai asin…in man thiam leh thiamloh chu thudang ni ta se :-)

    Report this comment

  14. 14
    Charice_mizo Says:

    “..Kan ram dinhmun leh job ooprtunity lam dinhmun hrechiang viau si chuan kan ram a eizawn nan a hman teih ru chi engati nge a zir mai loh tih te mai hian ka’n zawt let ve chhin…”

    # Kan rama eizawn nana hman theih chi zirna tur college leh institution a hranpa liau liauin a awm lova. College leh institution kan neih ten zir tur an offer chin zir kha kan tih theih chu a ni mai. Chung chuan ‘eizawnna’ tia in huamtir thil tlemte (thil siam, inhlawhfak etc) atan zirna an pe chhuak thin si lova, BA/MA tam tak chu kan hawihai mai mai reng a ni. ‘Kan’ tih ka hman hi la vung lem lo ula.

    Job opportunity lam dinhmun hi kei ai chuan i hriatchian hmel zawk ka tia, kei chuan a chhiat zia ka hriaa, nang chuan a thatzia i hriaa. Anih chuan a chhehvela tlangau pui duh dup lovin chung hna thawh tur th tak takte chu kan thalai lehkhathiamlo awm awl, in lo hmuh mawh em emte hi kawhhmuh turin ka fuih duh che.

    Mahnia eizawnna i rawn tih hian skill-oriented (hnang tah tur pawhin skill a ngai) works a kawk niin ka hriaa. Commerce zirlai business/management zirlai emaw Sociology graduate emaw te khan an thiam ringawt dawn lo. Vocational training, diploma course etc an ti te anih loh chuan. mahnia an inhaikuakna tur khan tunge guidelines pe? engtinnge bul an tan ang? Chung chu college ah an zirtir lo ka ti mai a ni. Kan specialised na zawna kan thawh hian kan full potential kan hmang thei. Thalai thluak tha lutuk engemawzat kan nei, sawrkarin hman tangkai dan a thiam leh thiamloh a ni tawh mai. Hei hian sawrkar hna kher a kawk lova, sawrkar chu mipuite hamthatna tur ngaihtuahtu tur anih vang zawk a ni. Nge YMA etc kutah kan bel leh dawn?

    Sawrkar puihna tel lova thawh lam in sawimawi dawn anih chuan lehkhazir san (higher education) nen sawipawlh lovin mi zawng zawng, hna thawk thei rual ten hna kan thawh tur leh thawh theih lam chungchang sawi zawk rawh u. Lehkhathiam hna hmulo ai chuan lehkhathiamlo hna hmulo an ngaihtuahawm zawk, an tam zawk bawk.

    Report this comment

  15. 15
    Aryan Says:

    ram changkang ah chuan BA leh MA tih vel zirna aiin Cement leh Thing mistiri, Motor Mechanic, Electrician leh eizawnna trade chi hrang hrang zirna college hi a tam zawka, Mizoramah hian heng sikul hi a awm ve lo (ITI kha a awm thina mahse enge a an le?) emaw ni le, College leh +2 a kal dul dul lo hian khing lamah khian ram changkanga an tih angina high school atang hian zir nghal daih mai ila. An hlawh lah chu a sang fir fer hlawm leh nghal, Mistiri in nikhatah rs 700- darkar khatah Rs 100 hlawh an tih tawh kha. BA/MA nih a khawilai daikilkara sap sikul a Rs 3000-5000 lek hlawh ai chuan a tha feee zawk. heng skill te hi Mizoram mai nilo khawi hmunah pawh awm se a tangkai em em vek bawk si- Eizawn nana hman theih vek ani.

    Report this comment

  16. 16
    malsta27 Says:

    Tha hle mai a hei chu….like 9999

    Report this comment

  17. 17
    H.Vangchhia Says:

    #12 Rangoon a milian nih aiin New Delhi a mi naran nih an thlang thin zawk ang deuh hian, Mizoram a officer lian nih aiin USA a regular labor nih ka thlang zawk ang,” tih vel a ni e.

    Hna a van loh zia chu ka blog-ah ka chanchin, keima tawn ngei ka ziak zingah pawh hmuh theihin tam tak a chuang kelh kulh ang. Lo chhiar mai ta che Hairehai ;) . “Hna chhia” emaw tih vang, chapo vang ka ti mai, vang hian hna thawh tur hi a awmlo emaw kan ti mai mai a ni e. Mutia ringawt pawh khan 1st class officer hlawh pangai zat an hlawh pha asin (Mutia thawk ngei min hrilh). Thatchhiat, chapo vang mai mai a ni e. Ar puah ngawt pawh hian 1st class officer aiin an thawkchhuak hnem zawk asin. Tam lutuk tam lutuk, ngaihtuahna hmang peih tan hna tam tak a ni ringawt.

    Report this comment

  18. 18
    Charice_mizo Says:

    Aryan sawi khi a dik. Thawh tur a tam lutuk tih leh liam puat ringawt thin hi a ni lo. In vanneia, thiam thil in neia, chhungkaw chawm nan in hmang a nih chuan in lawmpuiawm lutuk, mahse kan ram education kalphung ngaihtuah chiang si lova lehkhathiam/ zir sang nia kan hriatte hna thawh tur mumal an neih/hriat loh vanga kan tawngpaw dem nghal vak zel hi a dik lo. Mutia ni turin BA nih a ngai reng reng lo. BA ah mutia nih dan an zir hek lo. Anih chuan thiamna nge pawimawh mutia hna?

    I blog chu mitinin kan chhiar peih hmel si lohva, helamah rawn suan phei zawk mai ta che :)

    Report this comment

  19. 19
    H.Vangchhia Says:

    Eng kawngah pawh thiam thil hi zirchawp a thiam chi vek a nih hmel. Tih tirh a thiam nghal tumah an awm ka ring lo. Taimak a ngai a ni.

    Mi tu emawin taima leh dik tak a hna a thawh chuan , a hnathawh chu hna zahawm a ni. Hna chelhsan/mawhphurhna sang lam chi hnachelh hi hna zahawm a ni kher lo, tih kan hriat hunahte, ngaihsam kan sim hunah te, lo experienced tawh ten an sawi “alo nih tak chu mawle” tih ngamna rilru kan put hunah te, proud lova, pride kan neih zawk hunah te Mizoramah hian chhungkaw chawmna tur hna a tam zia kan la hre telh telh ang.

    Lehkha zirsan hi hriat tamna a nih laiin, mi hnuai a hnathawk tur a min siamtu tha tak a ni. Eiruk ngawt loh chuan hausakna chi pawh a ni hek lo. Chhungkaw chawm nan BA nih kher a ngai lova, dâktawr emaw, engineer emaw nih kher a ngai hek lo. Engkim mai hi a hun leh a hmunin eizawnna kawng dap dan a hril thei viau. Rilru a retheih sa nghal ngawt hian hma a sawn theih ngai hek loh :)
    Kei hi tumah pawhin an biak that peih tawh loh, melh pawh an melh peih mang loh, an nuihzat huai huai ni hman khawpinka nun a ho. Mahni intihhlum chakna pawh nei iaih uaih fo tawh ka ni. Beidawng lovin antam-te la in Thakthing bazarah ka thutpui a. Chuta tang chuan hma zawi zawiin ka sawn chho hret hret a, Lungleng ramah ka tih ngai hauh loh, mi zawt chawpin hmuhphiah ka kek khawl a. A keh kun a lo i tawh lo deuh nen, “A nget tawh hlawm ang…” an ti chungin ka kek khawm a. Phiah thir leh phiah pui pawh hre ngai lovin ka hriat phah a,hmunphiah siam san thlengin mi zawt chawp zelin ka buaipui. Aizawl lamah Lungleng bus chung a phurin ka rawn kalpui a. Chu’ngte chu office hrang hrangah te, mi inah te ka pu kual thin a, chutiang a ka pawisa hmuh chu ka khawl a, vawk te ka vulh ta a. Aizawl lamah vawkchaw a van em avangin Serchhip lamte thleng chho hial thinin, an kawngpui sirah chhunah buarain zapanhlo ka zawng khawm thin a ni; Iskut man nei ve hek lovi. Chutiang chuan ei ka hmu reng a, pawisa ka inkhawl zel a, a tawpah chuan Pathian zar tak meuhin tun a ka dinhmun hi ka theng ta a ni.

    Tum chuan Mizoramah hian eizawnna a tam lutuk. Taihmak leh rilru sen peih erawh a ngai a ni. Ka thianpa Madawnga of Kulikawn pawh high school pawh a zo thei hleinem. Jeep recondition khalhin buhfai a thiar thin a, chuta tang a intuak chuan jeep thar a lei a. A intuak zel a, pickup a lei leh a, truck a lei chho zel a, tunah chuan Kulikawn, Ngaizel ah sawn truck workshop lianpui a din tawh a, in tha tak sain nuamsa takin ei a hmu tawhin, a hnuaiah mi tam tak an thawk tawh a ni. Mi zah a kai em em a, YMA ah pawh president a tan thlan nawn a ni sek mai, a taihmakna khawtlangin an hai lo hle. (Y)

    Report this comment

  20. 20
    Borat Says:

    In dik vek. Tum mumal nei mang lo, emaw Gazetted officer nih duh vang ringawta graduate, post graduate zir hi a tawk lo tih a lang chiang hle nachungin sing telin an la zir reng tho.

    Kan ramah industry mumal a awm mang loh avangin job tha a vang si. Investment tha tlem emmna chhan nia ka hmuh:

    1. Mizoam hi khawi lai angtang pawn a hla vek. Chuvangin transport man a sang lutuk.

    2. Sorkarin chhiah khawn mang si lovin ram mimal hnenah a semdarh hmem lutuk. Investor lian pawh lo kal se, sorkarin ram tha leh zau pek tur a neih ka ring lo. Mimal ram an lei a ngai anih chuan an invest duh kher lovang.

    3. Ram pawh awm tehreng se utilities (electric supply, gas, tui) a tam tawk lo.

    4. Law and order a tha tawk lo (in awih lo maithei, mahse ani tlat).

    5. Mizo zingah technical lama train chhuah an tlem, Techical, vacational training kan mamawh.

    Report this comment

  21. 21
    Dr Mahminga Sailo Says:

    Rin loh lam taka post chu a that tak phian chu le, comment lah a ngaihnawm… (Y) Ka sawi ve tur zawng zawng in sawi zo vek alawm.. :-D

    Report this comment

  22. 22
    H.Vangchhia Says:

    Posttu-in a thianpa taimak rah chhuah a ziah hi ka rawn hmet bei teh ang. A ngaihnawm takzet:

    ‘Hlawhtlinna lamtluang’

    A pumraw en a thil ropui tak hmuh in tum anih chuan in ti sual nghal duai ngei ang le. Khawvelah hian mi lar ngaihsanawm tak tak an awm in kan ramah ngei pawh mi lar leh ropui ngaihsanawm deuh deuh kan nei ve teuh mai a, chutih lai chuan lar lemlo mahse an hringnun kawng zawh han belh chian a ngaisanawm tak si hi an awm ve bawka, chutiang nihna ropui leh mi hriat hlawh na nei em em siloah chuan ka thianpa hi ka mi ngaihsan te zingah a tel ve tlat mai le.

    Pumraw hleitlin leh hmelthat vanga mi hi eizawnna kawngah hlawhtlin tur chu nise ka thianpa hi chu nitin chawkawpuar hmu lovin kut a dawh hial angai ang tih tur khawpin khuanu hian a pawt dawk thui lo ve in a hmel pawh chuti teh chiamin a design uluk bik hauh lo mai a. Chu-a-chhapah a sam hi a tam vak bik lo a, chuvangin a lu hi a ziat kawl tul reng thin a. A figure hi a dangdai ve reng reng a, a kekawr kawng a tawk hi chu a sei zawng hi 1ft leh a chanve vel dawn hi tan ziah hi a ngai a, a zuartute zawk hian an ui thin khawp mai. Keini ai in kum 10 dawnin a upa a mahse kei han rawlthar chhuah zawt atanga aia upa kawm ta na na na chuan pi leh pu te lam atanga kan lam hnai te an lo ni bawk nen, duhzawng lo inang ve bawk nen kan rawlthar chhuak zawt tih atangin kan inkawm cho a. An in hi kan thianho kan inhmuhkhawna ber pakhat a ni in farnu te a lo nei ve dih-diah bawk nen vengdang rawn leng an awm ve reng bawk a, an chhungkua an zau a, a tu a te pawh kha ngampa tak khan kan tal bawrh bawrh zel mai kha ania. Ka thianpa hian an inhnuaiah room a nei a, chu chu kan thian ho office a ni ringawt thin. Zantin hian kan lengchhuak tur hi kan lut khawm a, khang hun lai kha chuan Bar/Wine shop vel kha a la awm a, MLTP Act tih vel khan min la phuar ve lemlo bawk a, kan pawisa neihdn mil tawk ang hi duh ang ang kan khai haw mai thin kha ania. Chhun lama kan lak sa hi kan han in liam liam phawt a, kan phur a kal tluan viau chuan kan nula rimtur thulh takin a tape recorder Panasonic double cassette a lehlam chhia ngeiah khan Motley Crew ‘Girls Girls Girls’ tih vel, Bill Idol ‘Money Money’ tih vel ‘Rebel Yell’ tih vel bawr kan han play a, kan lam suau suau tawh mai thin. Kan lam dan style hi chu sawi lo mai ang…chhelo tak a ni tawp mai.

    Ka thianpa hi hmel leh figure lamah kan chhuan vakloh tehreng nen hian a mit a dik nge khabe a sep thiam zawk nula chhelo deuh deuh hi veng hrang hrangah hian rim tur hi a hre thei zek mai leh nghal a, keini ai hian a lo phanchang deuh tawh bawk nen kan zui kan zui mai thin a ni. A palian lemlo na a, a sa hi a muk khat tlat mai a, insual te hi a thei phian a. Khanglai hunah kha chuan veng danga nula rim hi chuan insual hi inpeih at reng hi a ngai a, hetiang hunah pawh hian kan hmatheh ber hi a ni ve thin. Kawm a nuam a tawngkam a thiamin ti ti pawh a thiam a, engpawh hi sawi se ngaihawm tak hian a sawi thei vek mai a, a ti ti kotlangah hian kan dak far mai thin a ni. Lehkha erawh a zir thui vak bik lemlo thung a, hna thawh hreh a nei lo bawk a eng hna hna emaw hi chu a thawk kual ve duah thin a ni. Kan thian ho hi Bonn-a/Mr.Bonn tih vek hian kan in au a, ani pawh hi patawi satha lin-len, kuhva sehsen ve thei tak mah ni se Mr.Bonn-a ve tho a ni ve tlat mai.

    An chungkua hi chhungkaw khawsak pangngai tak an ni a chutih lai chuan mi taima chi, tawng bawrh bawrh mai, hna pawh thawk bawrh bawrh mai an ni a, Ngaizel a lung lak an la phal lai te khan quarry te kha an nei ve a, chungah te pawh chuan an unau ho kha a hnathawk rual kha chu an thawk ve bawrh bawrh mai a, an insakna tur birick ang chi ‘hollow block’ an tih ang te hi anmahni chhun chawp vek an in sak nan an hmang nia mawle. Ka thianpa pawh hian eizawnna hrang hrang a dap lawr chho ve a. A chang leh phai lamah two wheeler te zu la chhuak in an hralh chhawng leh a, a chang leh two wheller workshop te an hawng leh thul, a chang leh teak thing ten an sumdawng kual leh rih a. Vawikhat chu Jeep secondhand hi ka lei pui a, chu chuan khawthlang lamah supply te a zuk thiar ve a, a Jeep neih hi a luck pui ta viau nge phei chu ka hre lova nupui chhelo zet mai fel deuh mai amah aia sang lehnghal hi a rawn hawn ve nawlh mai a. Hemi hnu hian sumdanna eng engemaw an ti kual chho ve leh a, 2wheeler parts dawr te pawh an siam ve zawk a, mahse a che fuh tak tak hleithei lo. Banga tharmawi ang chi han zawrh kual zak zak chang te pawh a nei ve a ni, mahse a beidawng ngai lo a, tin thawh hreh pawh a nei ngai bawk hek lo. Chutia nupui te an neih ve takah chuan eizawnna ngialnghet deuhhlek chu ngaihtuah ngai a ti ve ta a, mahse lehkha te an lo zir sang vak bik lo nen, bul han tan na tur sum lam a lo nei remchang mai bik lo nen an tal buai ve deuh bap bap thin a, mahse a thla a phang in a lungngai ve ngai chuang lo.

    Tichuan le nupui fanau chawmna ngaihtuah a ngaih miau avangin a neih ang anga bul a tan a ngai ve tawh si a a pawisa neih zawng zawng cheng sangkhat chuan petrol 40 litres (American lo khuan Liters zu han ti tlat a mawle) a la ve tawp a, Ngaizel phei tawntirha a pu te in kawtah chuan black a hralh turin a thut pui ve ta ran mai a. Litre khatah cheng nga lo liam hlep a neih theih loh. Tichuan rei vaklovah chuan a hralh zo ve ta mai a, a hlep nen chuan a hma aia tam a la leh a, chutiang chuan a ti chho ta zel a. Hun rei vaklovah chuan tlema tamtham deuhhlek in a la chho ve thei ta a. A pu te chuan an in kawnganah chuan amah leng lek hian an pindan sak a, chumi ah chuan a petrol zawrh chu a thut pui ve ran thin a. Zingah thim lai atangin a in hawng a, zan lamah zan dar 9:00 vel thleng te a inhawng bawk a, thahnem hi a ngai em em mai a. Kan venga zuar ve dang pakhat vel bak an awmloh avangin dawrtu hi a hmu phian mai lehnghal a. Amah a lo sumdawng mi bawk nen, pa kawm nuam leh tawngkam thiam a lo ni bawk nen, a dawr tawh hi chuan an dawr nawn zel a, reiloteah tamtham deuh hlek in a la chho ve thei ta mai a.

    Taima takin, tih tak tak in, thahnemngai takin a ti chho zel a, a pawisa hlawh chhuah pawh a pawimawh ah bak chuan hmang lovin a inpeipung chho zel a, loan te la in a dar bul lawkah chuan dawr pangngai tain a hawng ve ta a. Mihring hi hlawhtling tur chuan risk lak te pawh hi lo huai ve angai khawp mai a, loan nen tin motor parts agent leh Motor Oil agent velah te a ba thlau deuh nen bungrua a la chho ve zela tichuan reiloteah dawr muk leh lian tha tak mai a din chho ta der mai a. A dawr pawh a ti lian chho zel a, motor parts te nen a zuar chho a, Oil leh motor parts dawr lian tha tak mai chu a nei chu a ni ta der mai a. Petrol leh diesel a zuar tel bawk a, mi 3 vel a chhawr bawk a, sum pawh a khawi vir kual hnem ta hle mai a. Pawisa hmun hrang hrangah daily deposit ang chi in a thla inkar indawt in a dah thluah mai a, chung chu a lo mature a, thlatin hian a pung lakchhuah tur hi a nei reng bawk a, an chhugkaw khawsak pawh a kang ta awk awk mai a. Kan veng a sumdawng hovah chuan nitin a pawisa khawih che kual hnem ber te zing ami a ni chho ve ta mai a. Lirthei te pawh Jeep secondhand tawng lam nilovin a duh ang chi an dawr tan a tangkai tur chi te a lei ve a, two wheeler mi chhawr te ho hman tur nen a ri ve ta rup mai a. An in te a chei tha a, kawng sir kawr kam chep tak a rem leh rem lova in ding hlui ve tawh lam chu amah thil duh uluk chi a ni bawk a in nalh zet maiah a chhuah ta daih mai a, a tir atang reng a architech ho in uluk taka an planned ang mai in a chhuah ta a ni. An in a chei that dawn hian veng hrng hrang a mi in sak dan design mawi deuh en kual tur ringawt in tuk tam fe chu a chuak ve a ni. An nu paawh a nalh thei ta khawp mai

    Hetih lai hian ka thianpa hi mihring ve tho, famkim bik lo a ni ve tlat tho mai a, ama mimal nunah eng eng emaw han sawisel zauh zauhna tur te chu a awm ve tho a, mahse a tlangpui ah chuan inchhung rorel, an dawr manage velah leh thil duh uluk lamah chuan perfect ve tak hi a ni tawp mai a ni. A senchi te hi han lem ve leh zawk hi a ching leh zauh thin na a chaw ei dawn leh mut dawn a no 2-1 a in bak hi rui khawp ang chi hian a in ve ngai tlat lo( Hei hi amahin mawilo lamah lo ngai lo se entawn tlak takah kei chuan ka ngai ve tlat). Tin thil pakhat a sumdawnna a hlawk a, a lo tluan em em nachhan ni a ka hriat pakhat sawi hmaih chi miah loh chu amah hi a rilru a tha em em mai a. A dawrah hian vawitam ka leng in nileng lenga awm chang ka ngah a, chuta ka thil hmuh chu, mi harsa leh engemaw retheih hmel deuh te hian thil te rawn zuar ta se, an thil zawrh kha a duh leh mamawh miah loh pawh nise tam deuh a lo lei sak ngei ngei a, a chang phei chuan papawr kan tih mai mai te hi an neih zawng zawng a khawngaih hian a lei zawh sak vek mai a, an ei duh loh pawh in naupang te a sem kual leh mai thin a ni. Tin tu paw’n pawisa puk dil se a puk tir mai a, thenkhat in an pe leh lo a, an bat ral sak a, zu man tur tih a hriatchian pawh a puk tir tho a, an pek leh loh pawhin a be chhe chuang lo a, bat ral sak tu te pawhin puk dil nawn leh se a puk tir leh tho a, tin a dawrah kutdawh te kal ta se hlawhchham in an chhuak ngai lova, thahnem tham tak pe lo in a kal tir ngai lo. Hetiang anga pa rilru tha anih avang hian amah hi Pathianthu lamah te ‘Rau’ teh lua lo mahse Chunglam hian malsawmna in a vur ve ah kei chuan ka ngai nghet tlat a ni.

    Tin sawi hmaih miah loh chi bawk chu Sap ho in ‘Mi hlawhtling/mi ropui phenah an nupui thatak te an lo awm thin’ an tih ang deuh in, an nu hi an nei fuh mai mai khawp a, diktak chuan a rawn hawn tirh te kha chuan a ni, khulai a supply vel thiar a zu tal mai mai kha nupui ropui tak hi a rawn hawn hi a thiante hian kan ring lo hrim hrim a, mahse chutiang a lo ni awzawng lo mai a. Kawng engkimah an nu hian a backup tha em em a, tin an nupa nunah pawh mi nupui te chu ni se sum an chuah daih tawh ang tih ang tur chi a kan thiana hi an tal kual ve deuh nawk nawk pawh hian, dam tlap hian ‘Hetiang huam hian alawm kan neih, ti hian a reh ve leh mai ang’ hi a ti a, han tlan chhin te hi a tum ngilo rengreng a, a tawpah chuan thatna in an pa hi a hneh leh nge nge thin. Ka thianpa ka ngaihsan tluk zet hian an nu hi ka ngaisang tel tlat bawk. Tin a vai vai chuan sawi sen chi a ni hauh lo anga, ka thianpa hi lehkha zir sang lemlo mahse Sap tawng te, Vai tawng te, Khasi tawng te leh eng tawng tawng emaw te hi a hmang ve thei vek a, tin mihring nunphung thil engkim, a Pathianthu ang thleng hian a rualpawl tawk in a titi pui theih in eng thil ah pawh hian ngaihdan tha tak thurawn tha tak tak hi a phuhchhuak ve thei vek mai a, hei hi mi pakhat tak a ni tih tilang tu a ni bawk awm e.

    Awle sawi tawp a awm thei tak tak dawn chuang lova, heti chinah hian lo duhtawk dawn ila. He thu ka thianpa chanchin hi ka rawn ziah duah nachhan chu thil reng reng hi tum chuan kawng a awm a ni tih hi ka thianpa nun atang hian a lang in ka hria a, cheng 1000 atangin vengchhung sumdawng lian pawlah a insiam thei a, hei hi a entawn tlak ka ti in a chanchin ka rawn sawi atang hian he thu chhiartu tuemaw talin hlawkna an lo chharchhuak ve ngei ka beisei tlat a. Tin mihring hi malsawm tlak a hna kan thawh a, kan hna ah kan rinawm a, titakzet a kan tih a, tin kan rilru puthmang pawh malsawm tlaka a that phawt chuan Pathian hian chutiang mi te chu mal a sawm ngei thin a ni tih he ka thianpa chanchin hian chiang takin a tarlang ve bawk in ka hria a ni. Chutih lai erawh chuan hausa viau tawh mahse a dawra leh luh hi chuan tu pawh hi tunhma a a kawm ang tho khan a la kawm reng a, han intih milen inhmuamup tih vel a la awm chuang lo a, a fiamthu pawh a la ngai reng a, kuhva pawh a la ei sen reng a, a lu pawh a la kawlh reng a, amah hi in hmu ve duh a, tunge a nih in hre duh a, eng ang hmel design nge anih in hre duh anih chuan Kulikawn Alpha Hospital piah deuh a Southern Oil Depot tih dawr, Oil leh motor parts vel zawrhna ah khan han dak lut ve chawm mai ula, lukawlh pakhat a lo thu bial hmam anga, a bulah nu valai tak, nula emaw tih mai tur hmelchhe lo tak in card a lo rem bawk anga, chu lukawlh lo thu chuan kuhva thial nuau nuau pah in Far Star cigarette (Far Star lo a zu ngai lo) a lo pak khu tual tual bawk anga, tunge Mr. Bonn-a in zuk ti lut anih chuan a lo nui sen sung anga zawt kher lo mah ula amah ang hi design dang an awm miau loh avangin hei ngei hi a ni ka thianpa, ka u, ka ngaihsan leh chhuan em em, hringnun kalphung thlir dan kawng tamtak min zirtirtu, tuna a chanchin ka sawi lai mek Lalhmingliana, Mr.Bonn-a ngei chu a ni tih in lo hre ve mai dawn nia. Han chibai ula a lawm khawp ang…chibai tu a hmu khat a nia…chuan a bula thu card lo rem kha nula emaw in ti palh hlauh ange, a chhuan em em leh a thainten kan nel leh ngainat em em a nupui Atei a ni a, ani hi nei lo se ka thiana hian tun dinhmun hi a tlen ka rin loh avangin in rawn chibai ve bawk dawn nia…mahse a kut kha chelh rei sak lutuk lo ula. Tin lirthei nei te in nih chuan in mamawh zawng te a awm anih chuan han dawr ve ula amah pawh a lawm khawp ang dawr hi a phu ve thlawt ania. Tin, eng kawngah pawh thurawn in la duh a nih chuan engtiklai pawhin eng subject ah paw thurawn thatak pek tur che hu a nei reng thei bawk ang…La leng lut ve ula, vawikhat in kawm tawh chuan in zawmchhang ngei ngei ang…Hetiang mi hi a ni ka thianpa Mr.Bonn-a chu…

    http://i.imgur.com/6SW9Dcu.jpg

    Report this comment

  23. 23
    SHauzelSailo Says:

    Ziak thra khawp mai. Awm mai mai ai chuan engpawh thawh a thra, thil hlawhtlin tuma thawk hram hram kan nih loh chuan.

    Mahni hnampui ‘Burma mi’ tih ziah erawh I sim ang u, Burma mi an ni lo, keini pawh Indian kan ni lova, Indian tiin min ko ngailo.
    Kan unau Zo ram thlang lam emaw chhimlam emaw thlang-chhimlam amite emaw tih zawk mai tur.

    Report this comment

  24. 24
    SHauzelSailo Says:

    #22 Pu H.V.. Ron bel thra hle mai (Y)
    Ngaisang khawp mai (Y)
    All the luck and best (Y)

    Report this comment

  25. 25
    H.Vangchhia Says:

    SHauzelSailo #24 a lawmawm e (Y)

    Report this comment

Leave a Reply

You must be logged in to post a comment.