FURPUI MALSAWMNA

July 23rd, 2013 6:12 pm by Hlutea Hrahsel

(02.05.2012 Dar 01:30 PM – 01:50 PM)

Ka bek chu a rawn huh thawt mai a. Kan ventilator phuilo atang chuan ruah a rawn lut a ni. Pawnlam ah chuan ruahpui vanawn a sur tluk tluk a. Furpui kan lo thleng leh dawn ta reng mai a lo ni. He hun hi tamtak tan chhiatna, leimin, inchim etc. te thlentu ni mahse he hun hian duhawm na leh nawmna tamtak min thlen ve tho a ni.
Furpui intan dawnah a sehsam atan to a rawn haw a, ruahthimpui rawn thawkin khua a rawn ti thim mup mup a, thli a thaw vuk vuk a, a hul lam panin kan phu suau suau thin a ni. He hun hian ka naupan lai min ti hrechhuak thin. Hetiang hunah hi chuan kan zirtirtute khan sikul min ban hma tir ngei a. Thli thaw vuk vukin sam a chhen len suau suau karah mahni in lam panin theihtawpin kan tlan haw sung sung hlawm a. Sikul ipte then nawlh nawlh a in kan thlenin ar ngaihthalo in lawi a lo ngen a, vawk mangang a rawn nguk ruai ruai a. Bawng hlauthawng a lo bu a, Zawhte chiai a lo ngiau a, Ui thlaphang a boh thawt thawt thin. Buh pho nu te’n an seng laiin thing pho kan lo seng ve bawk a. Kan inseng fel hman tawk tihin ruah mal bawkbawn tiat dawn dawnin a rawn tla phuar phuar a. Rialin a rawn zui a. Tawng hriattheih hek suh, inchhung a thim nguk a, laltin (lantern) kan chhi a. Pawnlam rialtla thlirin kan lo nui ver ver thin. Ruah sur a han a, naupang zawng zawng hi rial tla chharin kan ri le lu thin. Furpui malsawmna a ni.
A ni tak a, he hunah hi chuan tui harsa mi te tan pawh tui harsat engto tur a awmlo. A dawnkhawlna nei tan zem-ah a mathei lovin a liam leh pur pur ang a. A dawnkhawlna nei thalo pawhin inchung lam atang a rawn far eng engin emaw an dawh leh far mai ang a. Tui ren ngai miah lovin a awm theih a ni. Khawi lai tuikhur mai pawh, thal va ek char a kang thin pawh fur tuiin an chawm tak tak ang a, a tlangpui liam zawih zawih in a li leh lung hlawm ang a. Tuikhur lam a tuichawi mi tan pawh tuikang nghah a ngai ta lo. Furpui malsawmna a ni.
Nipui khawlum lutuk in boruak a tih khawloh pawh ruahsur chuan a rawn ti thiang leh ang a. Lal pawh zah zolo nipui khawlum sen sa uap lutuk mai chu he fur ngei mai hian hlau hauh lovin van malsawmna ruah hmangin a rawn vaikiang leh ngei awm si a. Zan a ruahsur bawrh bawrh lai a thinthi diai a han tapchhak zawn vawk mut nguk nguk mai te hi a nuam bik asin. Mut hi a tui surh mai a. Delhhlum sa ei tum niawm takin vartian te hi chu kan vei delh hnan hmak zel mai a ni. Chhun a ni emaw zan a ni emaw, pawnlamah hnathawk a chhuah a ngai lo a, Khawi ilo vahchhuah, lenchhuah, committee a ngailo. Enge a chhan? Ruah sur miau hek. Engmah tilo a hahdam tak a kan chawlh theih nan a ni Khuanu hian ruah te hi a lo surtir thin ni. Zan hahdamna hun chu min pe bawk mahse, kan hah rimtawng lutuk loh nan a ’hmalai chawlh’ min pekna hmanrua a lo ni. Nupa tamtak pawn zan hun hman nan ruahsur hnuai hi an duhthusam a ni chawk asin. Furpui malsawmna ani.
Ruah sur chuan Lal leh lal lo thliar hek lo le! Khawtlang hruaitu an ni emaw, Kohhran puipa an ni emaw, Pawl kulhpui an ni emaw, office hotu an ni emaw angkhat rengin ro min relsak a. Chak bik, thu bik, lal bik, huai bik vang emaw a han ngaihthah theih ni heklo. Ruah sur hnuaiah chuan angkhat vekin kan awmho dal a, min hrut rual thin a ni. He ruah hian a sur chhung chuan dinhmun inang, ngaihtuahna inzawl, rilru hmunkhat, thinlung intawm in lei mihringte hi min hrual thin. Lungrualna tlang, intihnat awm tawh lohna hmun a angkhat a hringfate kan len hun tur min thlirpui thin. Furpui malsawmna a ni.
Ruah han do tak tak te hi chuan ruah hian hmeltha leh hmelchhia pawh thliar heklo le, a do tu chu min nan zawr hnap thin. Ruahsur chuan khawlai/kawng a awm lai te hi hmanhmawh takin ‘haw rawh u’ tilo mahse mahni inlam hmanhmawh takin min pantir thin a. Mahni in thleng hman lo te’n mi bathlar bel in a han hun kan nghak a. Theihtawp an chhuah zawh ah meuh hi chuan engkim hi a lo nan fai a. To tur chi te an lo to a, duah tur chi te an lo duah a. Khua a thiang a, he kan khawvel bawlhhlawh tak hi a lo thar vuk ta thin a lo ni. Furpui malsawmna a ni.

Similar Posts:

Recent Posts:

4 Responses to “FURPUI MALSAWMNA”

  1. 1
    Khuangpu Says:

    1st teh ang. Fur hi awmlo se favang khawthiang hmuhtur a awm dawn silo a. Malsawmna vek alo ni e.

    Report this comment

  2. 2
    chhana Says:

    Fur lai chuan tui chawi a ngai lo a, lei thin tan pawn lei loin a awm theih avangin sum save. Tum vak loh pawhin kan inbual maia, a tihchi fu, nupa nun hman nan a that thu i sawi khi a dik thlawt.
    Huan thlai siama eizawng mi tan lah thlai tui pe a hun khawhral a ngai miahlo ringawt pawh hi malsawmna ropui tak chu a ni hrim hrim.
    Naupang tan lah khawlaiah tui kan khuap a, a hlimawm. Ruah do hrim hrim pawh hi a va nuam em!

    Report this comment

  3. 3
    Awmtea Leo Khiangte Says:

    A dik khawp mai.

    Report this comment

  4. 4
    Hlutea Hrahsel Says:

    Nikum lam a ka thutna a ruahin min theh vang a ka ziah a kan post leh mai2..

    Report this comment