Kan duh loh kan tih a ngai leh thin

July 18th, 2013 4:48 pm by TuaiSialA

Tun hnaiah sawrkar hna lak hrang hrangah felhlel a tam ta hle niin a lang a. Hei hi kan ram kalphung ve rëng anga ngaihna pawh a awm ta hial mai. Tun hnaiah MPSC hna lak theih chin chungchangah kan zirlai pawlte atangin dodalna a awm ta hial a. Departmental exam-a hna lak a nih hian duhsak zawngte thunluhna remchang tak a awm thin niin a lang a, hei hi zirlai pawlte duh loh chhan tak pawh niin a lang a. Mizo Students’ Union phei chuan July ni 30-ah Aizawl khawpuiah total bandh huaihawt a tum hial a, heta a hlawhtling lo a nih chuan district headquarters tinah bandh hi neih chhunzawm an tum thu an sawi nghe nghe.

A thawnthu

Kum 1989-a Mizoram Public Service Commission (MPSC) din a nih atang leh, kum 1991-a hna a thawh tan tak tak atanga chhûtin MPSC hna lak theih chin (Limitations of Functions) hi vawi 6 lai siamthata tihdanglam a ni tawh a. Hei hi eng vang nge tih hi zawhna pawimawh tak a ni thei ang. Sawrkar hian an duhsak zawngte sawrkar hnaa thunna remchang an zawng em ni tih mai pawh awl tak tur a ni. Kum 2008 MPSC (limitations of functions) Regulation-ah chuan, sawrkar hna lak reng reng, Group ‘B’ Gazetted leh Non-Gazetted Post chin zawng MPSC kuta dah a ni a, hei hi Mizo thalai, a thiam leh tlingte ngeite sawrkar hnaa an luh ve theih nana a that viau laiin he dân hi kum 2011, May Ni 30-ah sawrkarin a siam danglam leh a. Kum 2011 MPSC (Limitations of Functions) Regulation sawrkar-in a siamthat (ammend)-ah chuan, sawrkar hna lak turah Grade Pay Rs. 4400/- chin MPSC-in hna lakna an kalpui thin chu Gazetted leh Non-Gazetted Post thliar lovin MPSC kut atangin sawrkarin a chhuhsak leh vek a, hei tak hi Mizo thalai hna zawngte tan beidawnna tham a tling. Grade Pay Rs. 4400/- chinah hian hna pawimawh tak tak a tam avangin hei hi ngaihthah mai mai chi a ni lo.

MPSC a tha bik em ni?

Mizo zirlaite zingah graduate leh post graduate hi kum tin sâng têl kan chhuak ve zel a, sawrkar hna inchuhna a lian chho tulh tulh a, hna lak dik lo leh felhlel a huatthlala telh telh bawk a. Chutih laiin deparment-in hna lak a kalpui danah eng party pawh sawrkar se, duhthusam lohna tam tak a awm chhoh tak zel avangin hna lakna tam zawk Mizoram Public Service Commission (MPSC) kuta dah hi Mizo thalai hna zawng mek, hmelhriat tha leh tihpuitu tha nei ve lote tan a him ber niin a lang a. MPSC hna lak zawng zawng hi felfai famkim sawisel bo tihna erawh a ni chuang lo va, zawhna siam chungchangah te pawh eng eng emaw tihsual palh sawi tur chu a awm ve tho mai. Amaherawhchu, MPSC hna lak tawh reng rengah induhsak bik avanga hna lakna kalpui hi sawi tur a vâng khawp mai a, chuvangin duhthusam ni famkim lo mah se department-in hna lakna a kalpui aiin an hna lak chu a felfai zawk tura ngaih a ni hrim hrim a. Chuvangin, hna lak dan dik lo a tlem zawk nan MPSC-in sawrkar hna lakna a tam thei ang ber an kalpui hi a fuh zawk a, zirlaite leh thalai hna zawng mekte duhdan zawk ni pawhin a lang.

Kan tanrual a tul

Sawrkar hna lak reng rengah eng party pawh sawrkar se mimal leh party induhsakna hleihluak tak avanga Mizo thalai, a thiam leh tlingte, hmelhriat tha neih ve loh avanga hnawl an ni fo hi a pawi lungrun a, a thiam leh tlingte hnawl an nih zel chuan, Mizoram hian a la tuar ngei ang tih a lang reng mai. Mizoram sawrkar-in Grade Pay Rs. 4600/- hnuai lam Departmental Exam-a hna lakna a kalpui mekah hian, a thiam leh tling zawkte duhsaktu tha neih loh avanga lak tâk loh an awm thin avangin sawiselna thawm a ri ring hle thin a. Eng sawrkarah pawh, hna laknaah Minister, Department Officers-te leh Party Office zuan khum a harsat thin em avangin sawrkar hna pawimawh Group B, Grade Pay 4400/- chin post pawimawh takte phei hi chu MPSC kuta dah a dik leh felfai taka hna lakna buatsaih hi Mizo thalai hna zawng mekte tan leh Mizoram tan a him ber a ni. Chuvang chuan Group ‘B’ Grade Pay Rs. 4400/- china hna lak awm reng reng, Gazetted leh Non-Gazetted Post huam vekin MPSC kuta dah let leh tura Mizo Students’ Union-in hun rei tak kal ta atanga hma a lo la tawh hi a lawmawm a, a hlawhtlin ngei theih nan Mizo mipuite’n kan thlâwp a tul takzet a ni.

Thalai lehkhathiam lo kan pung a, hna zawng kan tam telh telh a. Hna lak dik lo a huatthlala telh telh a. Mizo thalaite pawh he lamah kan thangharh tan niin a lang a, a lawmawm hle. Dik lo taka hna lak hi a huatthlala em em a, mi’n rim tak leh hah taka kum tam tak an lo sual chhuah tawh thiamna mimal induhsakna avanga inhnâwlsak phei chu a na takmeuh a ni. Tunah phei chuan hna lak chungchanga duhsak zawngte thun thin hi fiamthu-ah tak kan hmang ta hial mai! Hna lak tur thâwm awm ‘Tihpuitu tan lo chuan chance a awm lo’ tih hian a zawm zat thin. A sawi uar deuhte phei chuan ‘Interview & Written Test hmain an la fel vek tawh’ an ti fo!

Hetianga hna lak dik lo hian thil pawi tak a thlen thei a, kan moral pawh a hruai dik lo zo ta a nih ber hi maw! Hna lakah lo pawh, exam leh test a awm reng rengin hmelhriat nei chuan an zar zo kan tum ran a, sawipuitu tur kan dap ruai thin. Hei hi kan moral chhiat tawhzia a lanchhuahna a ni. Hei hi kan tihbo a tul! A tul takzet! Chumi tur chuan, MPSC kuta sawrkar hna a tam thei ang ber dah hi a kawng awlsam a ni. Chumi tur chuan sawrkar a chêt a ngai a, nawrkal ngai sawrkar a nih avangin a nawrkal turin Mizo mipuite inthurual taka kan thawhchhuah a tul hle a ni.

Grade Pay Rs. 4400 chin hna hrang hrang te

Hna hmingDepartment
1. Asst/Steno-II – Common Service
2. Computer Operator – Common Service
3. JE – Common Service
4. Staff Nurse – Common Service
5. Asst. Treasury Accountant – Account & Treasury
6. Asst. Divisional Accountant – Account & Treasury
7. Asst. Auditor – Account & Treasury
8. Jr. Extension Officer – AH & Vety
9. Jr. Farm Manager – AH & Vety
10. Research Investigator – Art & Culture
11. Inspector of Statistics – Economics & Statistics
12. Forest Ranger – Environment & Forest
13. Sub. Inspector – Excise
14. Asst. Supdt. of Accounts – Food, Civil Supply & Consumer Affairs
15. Inspector of Supplies – Food, Civil Supply & Consumer Affairs
16. Inpector of Legal Metrology – Food, Civil Supply & Consumer Affairs
17. Technical Asst. – Fisheries
18. Technical Asst. – Health & Family Welfare
19. Physio Therapies – Health & Family Welfare
20. Sr. X-Ray Technician – Health & Family Welfare
21. Sr. Laboratory Technician – Health & Family Welfare
22. Radio Therapy Technologies – Health & Family Welfare
23. Deputy Librarian – Higher & Technical Education
24. Sr. Horti Demonstrator – Horticulture
25. Foreman – Industries
26. Handloom Officers – Induatries
27. Forensic Science – Police
28. Sub Inspector – Police
29. Asst. Jailor – Prison
30. Depo Manager – Printing & Stationaries
31. Asst. Technical Officer – Printing & Stationaries
32. Draftmans – Power & Electricity
33. Revenue Inspector – Revenue
34. Cartographer/Surveyor-I – Revenue
35. Train Graduate Teacher – School Education
36. Seri Extension Officer – Sericulture
37. Soil Ranger – Soil & Water Conservation
38. Inspector of Taxes – Taxation
39. Asst. Tourist Officer – Tourism
40. MVI – Transport
41. Asst. Station Superintendent – Transport

Similar Posts:

Recent Posts:

16 Responses to “Kan duh loh kan tih a ngai leh thin”

  1. 1
    chhana Says:

    A tha h1e mai.

    Report this comment

  2. 2
    Nirvana Says:

    He state sorkar hian hnaisai lo taka duhsak zawng sorkar hna an pe fo mai a. Phu ve reng lak chu an awm pheuh pheuh ang.

    Solution. #1. Sorkar hnathawk hlawh hi 90% in cut sela. Thla khata Cheng 2000 hlawh tur chuan heti em emin an lainate duhsak bik lovang. Motor pawh Secretary chin chauhvin, chu pawh chu pakhat entitle sela.

    #2. Sorkar hnatawk lak hian kum 5 chhung probation in thlir phawt sela. Party dang an lo lal pawha ban lawng lawng theihin.

    Ualau takin corrupt lawl law mai sela a fel phian zawk ang.

    Benefits: Sorakrin kum tin Cheng vaibelchhe 3000 tal mipui tan a sem thei dawn a. Chu chuan loneitute thar chhuah man tha tawkin lei sak sela, retailer hnenah tlawm taka hralh leh siin. Chuti chung pawn sum chuangbang a tam ngawt ang.

    Report this comment

  3. 3
    aduhi Says:

    source: Vanlalngaia, Vanglaini

    Report this comment

  4. 4
    chhangte_ll Says:

    Mizoram Staff Selection Commission din te nguit zawk awm tak, NLUP Project Director tih vel ai chuan ka ngaisang daih awm si a :-D

    Report this comment

  5. 5
    Charice_mizo Says:

    Hei hi thil pawimawh tak a ni, hetianga chiang kelh kawlh taka rawn sawi ngam an awm hi a lawmawm. Chuan a dik leh a him chinah, MSU pawhin huaisen takin an hmalakna kalpui sela, Mizo thalaite hmakhaw ngai tak chungin issue dang nen inpawlh chingchivet lo turin fimkhur se. An hmalakna hi keini thalaite chuan kan thlawp zel ang.

    Report this comment

  6. 6
    TuaiSialA Says:

    Tukin The Zozam Times-a rawn chhuakah a ziaktu ‘Vanlalngaia, Kulikawn’ tih a ni a, naktukah The Zozam Times hian a tihdikna emaw, thupha chawina emaw an rawn chhuah ngei ka beisei.

    Report this comment

  7. 7
    lr hlonchhing Says:

    A va BVT ve. Bookmark nghe nghe te’ng…

    Report this comment

  8. 8
    Dr John Says:

    (Y) Post BVT tak leh Pawimawh tak a ni

    Report this comment

  9. 9
    Xingibera Says:

    Grade Pay Rs 4400 tih hi a laklawh ka ti hrim hrim. Central pay scale siam ang hi zui ve mai se a tha. Tuna MSU thil ngiat hi chu a tha a, mahse MPSC in hna hniam ber thlenga a vai hma vek chuan a chhangchhe lutuk ang tih erawh ka hlau deuh. Comment 4 na sawi ang khian State Staff Selection Commission emaw a ang deuh emaw chu din a tha phian ang

    Report this comment

  10. 10
    Awmtea Leo Khiangte Says:

    A va tha tehlul em! Bengvarthlak e! Tuaisiala nge nge.

    Report this comment

  11. 11
    H.Vangchhia Says:

    Ngaihtuah a ti thui hle mai (Y)

    Report this comment

  12. 12
    TuaiSialA Says:

    Tunah hian MPSC hian Grade Pay Rs. 4600 chin an la a. Tuna MSU ngiat chu, Rs. 4400 chin chauh a ni. A chhan chu, post-a kan tarlan tak ang khian, Grade Pay Rs. 4400 hna hrang hrangah khian hna pawimawh tak tak a awm a. He’ng hnate hi tling leh tlak ni lem lote’n an hnawhkhah fo a hlauhawm ve reng a ni.

    Report this comment

  13. 13
    malsta27 Says:

    Tha khawp mai han ti zel teh u……sorkar hna chuah hi hna a kan la hmuh chhung chuan induhsakna hi a nasa lo thei lo bawk a tin ni. Chutih rualin ram rethei zia a ni ve pakhat hetiang hi chu.

    Report this comment

  14. 14
    levodopa Says:

    bengvarthlak thin e, Mizo mipui kan tanrual a ngai a ni

    Report this comment

  15. 15
    caribou Says:

    Ka chunglama miropui tak tak te comment ang khian Staff Selection Commission hi neih ve a tul khawp mai.

    Zirlaite future atana pawimawh ngaihtuaha hma in la hi a ropui khawp mai.

    Report this comment

  16. 16
    Lamji Says:

    ‘Thalai lehkhathiam lo kan pung a, hna zawng kan tam telh telh a.’
    Zir sang thiam si lo, a thiam te hna ang duh ve si te maw. ;)

    Report this comment