MZU Registrar Thar Pu C. Zothankhuma, IDAS

July 10th, 2013 12:00 pm by CFL

MZU Registrar thar atan Pu C. Zothankhuma, Indian Defence Accounts Service (IDAS) chuan June ni 20, 2013 khan a hna a zawm ta.

Pu C. Zothankhuma hi Mizo Historian lar Pu C. Chhuanvawra fapa niin Leithum, Champhai khuaa piang a ni a. MA (History) a zawh hnuin IDAS-ah a inziak tling leh a. Controller of Defence Accounts (CDA) hna Guwahati-ah a chelh mek laiin MZU-in Deputation-a a sawm angin MZU Registrar turin Zoram lam a pan ta a ni.

Mizote zingah IDAS hi kan la tam lo hle mai a, Upa Dr. PC Biaksiama kha IDAS ah chuan mi tam zawkin kan hriat lar pawl a ni awm e. Pu C. Zothankhuma hi Guwahati Mizo Presbyterian Kohhran Upa atana thlan niin, Zoram Pawn Presbytery pawhin kum 2010 khan Upa atan a lo nemnghet tawh a ni.

Amah hi mi tawng tlem tak, a tul chin chauh sawichhuak mi a ni a, mi a rel thu hria hi an awm lo hial awm e. Corruption-ah pawh mi fihlim, a hnuaia thawkte pawhin, “Kan Pu hi mi tha, damchhunga kan bula thawk turin kan duh a ni,” an tih hial a ni. Guwahati-ah zirlai harsate tana inhlawhnate pawh lo ngaihtuahsak tawhtu leh zirlai hmangai thin tak a ni. Tin, Zoram hmatlhir lam suangtuahna lehkhabu leh Pathian thu sermon bu pawh a lo ziak tawh nghe nghe.

Hetianga mi dik takin Guwahati a chhuahsan a lo ngai ta hi kan ui hle a, mittui nena kan thlah liam awmchhun a ni hial awm e. “Mi inngaitlawm leh mi pawisawi lo, mi dik, thlaraumi, ani ang mi panga vel tal Zoram hian kawl ila kan thatpui ang” tih hi mi tam tak comment a ni reng fo.

Tun tum MZU hnalak chungchanga buaina hi a hna a zawm hmaa thil thleng a ni a; a dinhmun han ngaihtuah hian a lainatawm viau rualin amahah hian beiseina lian tak nghah ngam a niin ka hria a, tawngtaipui turin min sawm nghe nghe hlawm a ni. Mi dik tak pakhat hian thudik a sualchhuah theihnan tawngtaipui a ngai hlein ka hria. A chanchin hi sawi vak lo mahila amah belchiang apiangin kan hrechiang ting mai ang. Lo belchiang ve mah teh aw.

Pu Zothana

Similar Posts:

Recent Posts:

8 Responses to “MZU Registrar Thar Pu C. Zothankhuma, IDAS”

  1. 1
    kotlaman Says:

    A va tha ve! Pu Benjamina, MZU Registrar hlui pawh kha IDAS tho a ni. MLA ni lai pakhat hian ram danga thawh chuan fel a awl, kan ramah kan thawk a chaw sain min kang dai ta mai zawk thin a ni a ti e an ti. Ani hi chutiang chu ni ve lo turah ngai phawt ang, a thawhna tur MZU khu a tawp ru nek mai lehnghal a, a hmabak a ko hle. Duhsakna sang ka hlan e.

    Report this comment

  2. 2
    Vladimir Putin Says:

    Kan lo thilir mauh aniang chu, a that tak tak leh tak tak loh. Mizorama kan experience ah chuan kohhran upa anih vanga sawiselbo ni ta sawi tur an vang.

    Report this comment

  3. 3
    Joel Lrsa Says:

    “Kristian Chhungkaw dik tak tute nge tia min zawt awm sela chu, Upa C. Zothankhuma te chhungkua hi ka kawhhmuh ngei ang.” – Rev. C. Laltharzuala, Guwahati Mizo Presbyterian Pastor Bial

    Report this comment

  4. 4
    Dr John Says:

    (Y) BVT hle mai. Ava la naupan hmel ang reng ve!?

    Pathian leh Zoram Tan tha takin hna thawk ngei turin ka duhsakna sangber ka hlan e, Amen!

    Report this comment

  5. 5
    Dr Mahminga Sailo Says:

    Comment hmasa ber khi ka sawi tum pakhat a ni, rilru kawih vang ni miah lovin.. (Y) ;-)

    MZU Registrar/VC te hi hriat a lawi ka nei lo nangin, tuna VC ni lai leh Pu Benjamin te pawh kha pa fel leh tha, faktlak nia hna zawm ngei an ni a. An thawnain a zir lo nge? a hnuaia thawk te’n an thiam lo nge? Enge a chhan niang ka hre law? Heti tak maia sawi leh sel, mi tam tak beihna an tawk ta mai hi.

    Englekhawle, PA tak leh huai taka dikna nena a thuneihna a hman ngei ka duhsak e… (Y)

    Report this comment

  6. 6
    hlatekhua Says:

    Zothana hi pa taima leh tumruh tak a ni a, pa fel tak a ni ngei ang. Civil Service exam tura a inbuatsaih laiin Delhi khawlumah pawh fan on lo te hian a lo zir leh ngar ngar thin a, khua a lum tih pawh a hre mang lo thin an ti.

    Tha tak leh rinawm takin, a hmaa mi thenkhat te aia tha zawk daihin, a thawh ngei ka ring tlat.

    Report this comment

  7. 7
    Awmtea Leo Khiangte Says:

    Duhsakna ka hlan e. Rinawm taka hna a thawh ngei ka beisei. (Y)

    Report this comment

  8. 8
    chhana Says:

    MZU leh Zoram tan pa chhawrnahawmtak a nih ka beisei.

    Report this comment