MIZO HLACHHAM HMASAWN ZEL NA TURIN

July 7th, 2013 1:00 pm by VL Hminga

Tunlai chu post chhiar tur kan haihchham mai dawn. Heihi member nih man ah kumin tan fee ka lo pe ve a ni e

Mizo Poetry hmasawn zel theih nan a din Mizo Poetry Group/blog chuan kum hnih kan lo tling ta reng mai. Hetih lai hian poem collection 1500 lai kan nei thei tawh a, heng kan lak te hi member te irawm chhuak vek  an nih mai piahlam ah thalai hi a tam zawk kan la ni ve a ni. Hla post reng reng hi tunlai tawngkam lerh ang chi hman phal anih loh mai piahlam ah uluk tak a vil an nih avangin chhiar a harsa lovin en a hahdam em em bawk a ni.

Hla chham hi mi chi hrang hrang phuah te an ni nuk a, tunlai a Mizoram a miril kan tih ang chi te bakah inzirchawp te kan nih nawk avang in a that dan pawh inchen lovin kan vawm bei tawp tawp a ni ber mai.

Mizo Poetry blog ah hian poem 1500 dah a ni a, a tlawh duh tan tlawh theih reng a ni.

Mizo Poetry a hla pakhat ka rawn thailang ve ang e.

Htluanga Hruaia
NANG NGEI HI!
Chhawrthla vànglai hi,
Nang vànga mawi ve mai a ni.

Si-âr de tiar khian,

I nalhzia an lantir lek fang a ni!
 
Zanlai thlifim leng hian,
Ka tân se se thu di an sawi thin a.
Zan reh ka mal tuar lai hian,
Zawitein i hming ka lam thin a.
 
Chhinhar veia ka pau hian,
Ring taka tap thin chu he thinlung hi a ni!
Awmhar lunglen ka tuar hian,
Run taka ka vei chu Nang ngei hi i ni!

 

http://mizopoetry.blogspot.in/

Similar Posts:

Recent Posts:

21 Responses to “MIZO HLACHHAM HMASAWN ZEL NA TURIN”

  1. 1
    Athana Chhangte Says:

    Post tha tak a ni

    Taka. ‘Chhinhar veia ka pau hian’ tih a ‘pau’ hi rum tihna em ni aw, Nge Paite tawnga pau zawk hi?

    Report this comment

  2. 2
    Joel Lrsa Says:

    A nia sin, he Blog hi ka fak khawp mai. ka kuthnu pakhat pawh a o awm ve tehmial a!!

    Report this comment

  3. 3
    eL Says:

    tha tak a ni e..ka va thawh ve tawh ngei a..

    Report this comment

  4. 4
    Sihtea Says:

    Pau tih hi, eng tih na nge?
    Lian tih na nge Lal tih na?
    Paite u nau ho hming ah hian,
    Pau tih hi a tam em a.
    Kei nin kan hming a, Lal tih leh,
    Lian tih kan hman ang hian,
    an hmang a ni mai lawng maw?

    Report this comment

  5. 5
    VL Hminga Says:

    Pau tih thu hi, Mizo hla thu thenkhat “Bawhar lo pau val ka chhing nem maw”, tih ang chi te. Hetiang deuh hian a tah thu sawinan a hman anih a rinawm. Zan muhil theilo a ka tah hian, tihna tluk a ni ang.

    Report this comment

  6. 6
    VL Hminga Says:

    @ Joel Lrs, lehkhabu te pawh chhuah tum mek a nia. Lo ngaichang teh u, hralh kal lo viau mahse neih ve hrim hrim atan a that ka ring.

    Report this comment

  7. 7
    chhana Says:

    Kei peotry lam hi chu ka line lo ve khawp mai.

    Report this comment

  8. 8
    Athana Chhangte Says:

    Paite tawng ‘pau’ kan hman dan hi chu a dik hlel deuhin ka hria. Pau aiah hian Lusei tawnga ‘rum’ tih emaw hmang ta se a nalh zawk ka’n ring ve mai mai.

    Bawhar a lo pau a tih hi chu a nalh tho mai hehe

    Report this comment

  9. 9
    Joel Lrsa Says:

    @ 6, VL Hminga, a va lawmawm ve aw. Ka lo ngaichang tlat ange. (Y)

    Report this comment

  10. 10
    Charice_mizo Says:

    Tha hle mai. Mizote hian poetry pawh kan lo tuipui phian anih dawn hi, 1500 lai mai hun reilo teah in khawnkhawm theia!! Hetiang blog ah hian ka lut ngailo khawp, allpoetry.com ah khan vawihnih ka post ve zuaia, comment reng ngai chiin an siama ka peih ta lo. Han ti zel teh u.

    Report this comment

  11. 11
    VL Hminga Says:

    @charice, i ni duhsakna chu a hlu kan ti khawp mai. Theih chuan lo thawh ve ta che, a thawh tute a tam ber 80% hi kum 25 hnuailam an ni. Ka post hmasa kha ilo en chuan nikum october thla khan 450 poem kan senglut a, khami hnu ah khan 1000 chuang kan dahlut leh tihna a ni. Hemi a langchiang tak chu Mizo poetry hi a intan ve chiah kan ti dawn nge ualau tak leh ngampa takin thalai te zingah pawh phuah ngam kan lo awm ve tan ta a ni tih a tilang chiang hle in ka hria. Lo tlawh ve thin la, Mizo te blog ah chuan post nei tam ber angin kan in ngai ve tawh asin. Thu vel i thawh duh chuan Mizo Poetry group atang a lak a ni e. Ka lawm e.

    Report this comment

  12. 12
    Awmtea Leo Khiangte Says:

    Tha lutuk. Ka tui ve pah reng. (Y)

    Report this comment

  13. 13
    malsta27 Says:

    In ti tha hle mai, a chhiar lampang chu peih ve thin tho mahse thiam loh ltk chuan a tui pawh hi tui tak2 chu har deuh…..han ti zel teh u.

    Report this comment

  14. 14
    H.Vangchhia Says:

    #4 “Pau” tih chu keini Vangchhe tawng chuan “tawng”
    tihna a ni. “Pautu hi a pian tirh chuan hming pangai an sak sak ngei a, mahse a tawng duh tak luatah chuan “Pautu” tiin an ko ta a, koh hlen a ni ta a ni,” tiin ziak a awm.

    Hlathu a an hman hian tawng emaw, aw/ri ti chhuak sawinan hman ani tlangpui bawk awm e. Paite ho hian Lusei ho ten hming bul a “Lal” an lo hman thin ang a an hman a ni ve thung.

    Report this comment

  15. 15
    Dr John Says:

    (Y)

    Report this comment

  16. 16
    chepahakhata Says:

    Hla an chham ngai em maw ni le? An hril thin a lawm.
    Poem chu “thu hla hril” tih tur a ni.

    Report this comment

  17. 17
    VL Hminga Says:

    Hmanlai atang a tunlai thleng hian hla sak loh chi chu an chham thin. Sa an kah in hlado an chham a, an hril kan hre ngai lo. Hla hril anih chuan, a huhova sak anih in hla thu hriltu an awm thin. Vawiin hian Mizo Poetry Group hian kum hnih kan tling ve chiah e. Poem hrim hrim chu hla chham tih tur a ni ang. Tin dik ve ve ah popularity hi a pawimawh zawk a, mithiam leh mipui tamzawk in an pawm tlan HLA CHHAM tih kan hman hi a sual vak in kan hre lo a ni.

    Report this comment

  18. 18
    chepahakhata Says:

    Hla do te chu thluk dan a nei deuh a chham tih reng tur a ni a, tunlaia “rap hla” ang chi pawh hi hlachham tih theih chu a ni a. Mizo tawng kalhmangah poem chu “Hla thu hril” tih hi a dik a ni.

    Lengkhawm hla te, a huhoa zai ang chi a hla an hrilin “Hla thu hril” an ti ngai kher lo,”Hla hril” tih mai tur.

    Report this comment

  19. 19
    VL Hminga Says:

    Poetry hi ziahchhuah ringawt ni lovin a tone a awm ve a. Chhamchhuah remchang tak tur a duan chhuah a ngai reng a ni. Chham kan han tih hian rap music ang chi chu a kawk leh si lo a. Tu emaw intih fekfawn deuh avang a hlathu hril kan lo tih ngawt hi a dik hlel deuh. A dik tak a sawichuan poetry hi Mizo te zingah ala mikhual hle a, a awmzia kan la man tak tak lo ti ila a dik awm e. Hla thu hril tih hi a hrilhfiahna ni ta se ti zawk la, a tha awm mang e aw. Thil hming hi a hrilhfiahna a a hming kan vuah zel anih chuan a dik thei lo ang. Entirna atan mai mai LU te pawh kan sawi a, a awmzia kan man nghal mai, tumah in THLUAK BAWM tiin kan va sawisel ngai lo ang hian.

    Report this comment

  20. 20
    chepahakhata Says:

    Poem hi”Hlachham” tiha sawi ka vawikhat hriatna a ni, i chhiar emaw, i sawi emaw a nih erawh chuan “chham” tih tur a ni a,a hming erawh “Hla thu hril” tih zawk tur a ni.

    Mi tam zawk hman apiang hi dik zawkah i ngaih chuan Mizo tawng hi inti dazat zel ang.Mizoramin tawng inhman dik lo mahse mitam zawk hman tam tak a awm a ni.
    Entir nan:

    1. cooking oil pawh “tel” in ti a Mizo tawng a ni reng reng hleinem “hriak/sahriak/chhitui'(Mizot’n hriak kan neih dan hmasa kha vawk hriak a nih vangin “sahriak” tih a koh a ni a, tichuan chhawhchi atang hriak lak an thiam chin chuan “chhitui” an ti leh a ni) tih tur a ni.

    2.Send pawh “Balu”in ti a Mizo tawng a ni hleinem,”Tiau dip” tih tur a ni.

    3.Flip-flop(USA), thong(UK),jandal(NZ) te pawh “Vaw-thlep” tih tur a ni a,”slipper” in ti a, slipper te chu inchhung bun chi a nem thep leh dup deuh chi hi a ni a, Burma lam Mizote chuan Kawl(Burmese) tawng an hmang a “Pha-nat” an ti a, a chhan a dik thlap a mahse, Mizo tawng a ni chuang lo.

    4.Tomato pawh Mizo tawng a ni lova, “Bawkbawnthur” tih tur a ni a, a Mizo tawng pawn hre lo in tam zawk hi.

    5. Sangha-dil te pawh “Tuikhuah” in ti mai mai a, tui luang lai lovah tuikhuah a awm thei lo.

    6.Air port pawh “Thlawhna-kerawn” tih tur a ni a, a hming ni lo a nihna zawk “Thlawhna tumhmun” tih inhmang zawk hlauh a.

    Hei lo pawh sawi tur a awm teuh, mi tam zawk hman a piang hi a dik ber lo tih hi lo hre tawh rawh. Mizo tawng rawn chhuahna Lusei tawng hmang thlang tla lo tam tak Burma ramah an awm a, tawng dik leh tawng khun pawh tunthlenga hmang an awm teuh a ni.

    Report this comment

  21. 21
    VL Hminga Says:

    Engpawh nise, kan group ah hian lo lut la, pawn lam atang a tih ai chuan a effective zawk in ka ring. https://www.facebook.com/groups/mizopoetry/

    Report this comment

Leave a Reply

You must be logged in to post a comment.